Guiduꞌndaꞌnu ndaayaꞌ ra guinábanu gacané Diuxi laanu
Guendaruundaꞌ diidxaguieꞌ bicaa David, dxi canaguxooñelube de xiiñibe Absalón.
3
Diuxi nabé stale nga tu nanalaꞌdxiꞌ naa,stale nga tu ruchelaniꞌdiꞌ naa.
2 Stale nga tu riníꞌ ne rabi naa:
«Qué zandadiꞌ gulá Diuxi laabe!»
3 Huaxa lii nga rulaluꞌ naa Diuxi,
lii nga stipa xtinneꞌ ne lii nga rusiechuꞌ naa.
4 Rucaaꞌ ridxi Diuxi gacané naa,
ne dede lu dani nandxóꞌ xtibe rucabibe naa.
5 Rataꞌ, raseꞌ ne ribaneꞌ, rizaa xpacaandaꞌ
tí Diuxi cayapa naa.
6 Qué ruchibi diꞌ guiráꞌ xixé ca dxuꞌ ni naguu leꞌ naa,
ca ni nuu gucaalú naa.
7 ¡Diuxi biasa!
¡Diuxi ni bizáꞌ naa, bilá naa!
Lii nga capuꞌ bezalú ca ni nanalaꞌdxiꞌ naa;
¡lii gusaꞌbuꞌ laya ca ni qué guiquiiñeꞌ!
8 Diuxi lii nga rulaluꞌ;
¡bidii ti ndaayaꞌ ca xpínniluꞌ!