Baŋa-Wɛ wʋ́ wǝli DƖ nɔɔna sɩ ba joori ba tɩtɩ tɩʋ
30:1–33:26
Baŋa-Wɛ na goni ni dɩ o nɔɔna te tɩn
30
Baŋa-Wɛ na pɛ Zeremi ni dɩlʋ tɩn mʋ tɩntʋ:2 Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ: «Pʋpʋnɩ wǝǝnu tɩlʋ maama a na tagɩ a brɩ-m tɩn n kɩ tɔnɔ wʋnɩ sɩ tɩ taa tigə. 3 Bɛŋwaanɩ, maŋa kam bɩɩnɩ sɩ a pa a nɔɔna bam joori ba taa jɩgɩ yu-yoŋo. Yisɩrayɛlɩ tiinə bam dɩ Zuda tiinə bam mʋ kʋntʋ. Amʋ wʋ́ pa ba joori ba jǝni tɩga kalʋ nɩ a dɛɛn na pɛ ba nabaara bam tɩn. Ba laan maa wʋ́ taa te-ka.»
Baŋa-Wɛ na tagɩ kʋlʋ tɩn mʋ kʋntʋ.
4 Kwǝrǝ kantʋ mʋ Baŋa-Wɛ nan pɛ ka vu Yisɩrayɛlɩ tiinə dɩ Zuda tiinə bam seeni:
5 O na tagɩ kʋlʋ tɩn mʋ tɩntʋ:
«A ni nɔɔna bam na keeri te tɩn.
Kʋ nan yɩ fʋʋnɩ kərə mʋ,
vuvugə na tʋ ba wʋnɩ tɩn ŋwaanɩ,
Yazurə maa tǝrǝ je je.
6 Fɔgɩ-na á jeeli taanɩ dɩntʋ á nii:
Baara dɩ jaanɩ pwi yɩ ba lʋrɩ biə na?
Bɛ nan mʋ kɩ yɩ a naɩ baara na yɩ bɩlɩ-bɩlɩ,
nɩ kaanɩ pugə na vri sɩ o lʋ tɩn?
Ba jɩan yam ma təli ba pwi,
yɩ ba yibiyə nywanɩ kiri-kiri.
7 Lɛɛrʋ wʋ́ tiini tɩ ba maŋa kam kʋntʋ nɩ,
sɩ kʋ dwǝni maŋa maama.
Bɛŋwaanɩ, a nɔɔna Zakɔbɩ dwi tiinə bam wʋ́ zʋ cam zanzan wʋnɩ.
Ba nan wʋ́ na vrɩm dɩ wʋnɩ dɩ.»
8 Paŋwa Tu Baŋa-Wɛ ma ta DƖ wɩ: «Amʋ wʋ́ ja nabɛ ban-daa kalʋ na wʋ a nɔɔna bam ban nɩ tɩn a bwəri a yagɩ, yɩ a daarɩ a kɔɔ ba capʋnnʋ tɩm, sɩ vərə daa yɩ taa jɩgɩ dam ba di ba baŋa nɩ. 9 Ba laan wʋ́ kɩ ba tɩtɩ amʋ wʋlʋ na yɩ ba Tu Baŋa-Wɛ dɩm tɩn dam kuri nɩ mʋ. Ba ta wʋ́ zuli pɛ wʋlʋ a na wʋ́ kuri a pa-ba yɩ o yɩ Davidi dwi tu tɩn mʋ.»
10 Baŋa-Wɛ na tagɩ te tɩn mʋ tɩntʋ:
«Amʋ tɩntʋŋna, Zakɔbɩ dwi tiinə bam,
yɩ taá kwarɩ-na fʋʋnɩ.
Yisɩrayɛlɩ tiinə bam, nan yɩ taá liǝ.
Kʋ na yɩ balʋ na pɩɩnɩ abam yigə yigə tɩʋ wʋnɩ tɩn,
a lagɩ a joŋi abam dɩ á dwi dɩm mʋ bantʋ jɩŋa nɩ a yagɩ.
Zakɔbɩ dwi tiinə bam wʋ́ joori ba tɩtɩ tɩʋ dɩ yazurə,
yɩ nɔɔn-nɔɔnʋ daa bá kɩ sɩ fʋʋnɩ zʋ-ba.
11 Bɛŋwaanɩ, amʋ Baŋa-Wɛ wʋ abam tee nɩ
sɩ a joŋi abam a yagɩ.
Amʋ wʋ́ yɔɔrɩ a cɔgɩ tɩɩnɩ dɩlʋ maama
a ya na jagɩ abam a yagɩ dɩ wʋnɩ tɩn.
Sɩ kʋ na yɩ abam, a bá cɔgɩ abam fasɩ.
A nan yǝni a waɩ a kʋrɩsɩ abam.
Amʋ na waarɩ abam maŋa dɩ maŋa,
kʋ nan wʋ́ taa tɔgɩ cɩga cwǝŋǝ mʋ.»
Baŋa-Wɛ na tagɩ kʋlʋ tɩn mʋ kʋntʋ.
12 Baŋa-Wɛ na tagɩ te tɩn mʋ tɩntʋ:
«Abam na nɛ zʋnnɩ dɩlʋ tɩn,
á bá na dɩ soonim je.
Á fufwələ yam bá wanɩ tɩ je.
13 Nɔɔnʋ tǝrǝ sɩ kʋ tu nii á taanɩ dɩm baŋa nɩ.
Zǝnǝ nan tǝrǝ á zʋnnɩ dɩm ŋwaanɩ,
yɩ soonim dɩ tǝrǝ dɩ paɩ abam.
14 Á cilonnə bam maama swe á sweə,
yɩ ba yigə daa tǝri á wʋnɩ.
A tiini a dɩ ja-guli mʋ á yɩra nɩ,
nɩ amʋ yɩ á dʋnʋ mʋ te.
A na tiini a waarɩ abam te tɩn,
a wʋ duri á ŋwaŋa dɩ fɩnfɩɩn dɩ.
Kʋ nan yɩ á na tiini á cɔgɩ te,
dɩ á lwarɩm dɩm na kɛ jɩŋa tɩn ŋwaanɩ mʋ.
15 Bɛŋwaanɩ mʋ yɩ á keerǝ
á zʋnnɩ dɩm na ba jɩgɩ soonim je tɩn ŋwaanɩ?
A na pɛ kʋ tiini kʋ zʋ á yɩra te tɩn,
kʋ yɩ á na tiini á tusi te,
dɩ á lwarɩm dɩm na kɛ jɩŋa tɩn ŋwaanɩ mʋ.
16 Kʋ nan na wʋ́ taa yɩ te tɩn,
amʋ wʋ́ cɔgɩ balʋ zɩm na jɩgɩ abam ba cɔgɩ tɩn.
Amʋ wʋ́ ja á dʋna maama
a vu a yagɩ tɩɩnɩ dɩdonnǝ wʋnɩ.
Kʋ na yɩ balʋ na vrɩ á jɩjɩgɩrʋ ba ja viiri tɩn,
a lagɩ pa nɔɔna vrɩ bantʋ dɩ jɩjɩgɩrʋ mʋ.
A ta wʋ́ pa balʋ zɩm na bɛɛsɩ abam tɩn
joori ba na bɛɛsɩm.
17 A laan maa wʋ́ joori a pa abam á yazurə,
yɩ a daarɩ a sooni á fufwələ yam.
Bɛŋwaanɩ, ba ya jɩgɩ abam Siyɔn tiinə bam
ba bǝi wɩ: nɔn-yɔɔrʋ tɩlʋ Wɛ na zəli tɩn,
yɩ ba wɩ: nɔɔn-nɔɔnʋ tǝrǝ kʋ tu yigə na wʋ á wʋnɩ.»
Baŋa-Wɛ na tagɩ kʋlʋ tɩn mʋ kʋntʋ.
18 Baŋa-Wɛ nan tagɩ tɩntʋ mʋ DƖ wɩ:
«Amʋ wʋ́ joori a ja Zakɔbɩ dwi dɩm
a joori ba tɩtɩ tɩʋ,
pa sɔ-yuu maama taa zʋʋrɩ dɩ yazurə.
Baá joori ba cwi Zeruzalɛm tɩʋ kʋm
kʋ di-dwəənu baŋa nɩ mʋ.
Pɛ sɔ-fɔrɔ kʋm dɩ wʋ́ joori kʋ zɩgɩ
kʋ jǝgǝ kam nɩ.
19 Baá leeni le-kǝm le je sɩm kʋntʋ nɩ,
yɩ ba daarɩ ba kɩ ywəəni dim sɔɔ.
A maa wʋ́ pa ba kɔgɔ puli zanzan,
sɩ ba daa yɩ muri.a
A ta wʋ́ pa ba joŋi zulə,
pa nɔɔna daa yɩ gooni-ba.
20 Ba nɔn-biə bam wʋ́ joori ba na dam,
nɩ ba dɛɛn na yɩ te faŋa faŋa tɩn.
Ba nɔn-kɔgɔ kʋm wʋ́ fɔgɩ ba zɩgɩ amʋ tee nɩ.
A maa wʋ́ waarɩ balʋ maama na wʋ́ bɛɛsɩ-ba tɩn.
21 Ba tɩtɩ dwi tu laan mʋ wʋ́ di paarɩ ba baŋa nɩ.
Wʋlʋ na wʋ́ taa te-ba tɩn
wʋ́ nuŋi ba tɩtɩ dwi dɩm wʋnɩ.
Amʋ laan maa wʋ́ pa kʋ tu cwǝŋǝ
sɩ o fʋfɔ o ba o twɛ-nɩ.
Wɔɔ mʋ nan wʋ́ sɛ o yi amʋ te,
yɩ amʋ wʋ bəŋi kʋ tu?
22 Abam laan wʋ́ taa yɩ amʋ nɔɔna mʋ,
sɩ amʋ dɩ taa yɩ abam Wɛ dɩm.»
Baŋa-Wɛ na tagɩ kʋlʋ tɩn mʋ kʋntʋ.
23 Nii-na! Baŋa-Wɛ banɩ wʋ́ zaŋɩ lɩla,
nɩ vu-dɩʋ na zaŋɩ te tɩn mʋ.
Kʋ nan wʋ́ taa nyɩ dɩ kʋrɩm viu
na cugi nɔn-balwaarʋ yuu nɩ te tɩn mʋ.
24 Baŋa-Wɛ banɩ nan na zaŋɩ dɩ ba,
kʋ na daɩ nɩ DƖ kɩ DƖ su DƖ wʋbʋŋa yam,
DƖ bɩcarɩ dɩm bá zuri.
Maŋa kam nan na yiǝ,
abam laan wʋ́ ni kʋ kuri lanyɩranɩ.