Zeremi 29

Zeremi pʋpʋnɩ tɔnɔ o pa balʋ ba na kalɩ ba ja vu Babilɔnɩ tɩn

Zeremi dɛɛn zɩgɩ Zeruzalɛm nɩ mʋ o pʋpʋnɩ tɔnɔ o tʋŋɩ o pa Yisɩrayɛlɩ nakwa balʋ ba na jaanɩ ba vu Babilɔnɩ yɩ ba ta wʋra tɩn, dɩ kaanɩm tiinə bam, dɩ nijoŋnǝ bam, dɩ balʋ maama Pɛ Nebukadnɛtsarɩ na jaanɩ Zeruzalɛm nɩ o kalɩ o vu Babilɔnɩ tɩn. 2 Kʋ nan yɩ ba dɛɛn na maŋɩ ba kalɩ Pɛ Yehoyakini, dɩ o nu, dɩ pɛ sɔŋɔ dɩdɛɛra bam, dɩ yigǝ tiinǝ balʋ na nii Zeruzalɛm dɩ Zuda tɩɩnɩ yam baŋa nɩ tɩn, dɩ ba tɩʋ kʋm gwarʋ, dɩ ba lurə ba ja ba viiri tɩn kwaga nɩ mʋ. 3 Zeremi dɛɛn kwe tɔnɔ kʋm o kɩ Safan bu Elasa, dɩ Hilkiya bu Gemarɩa jɩŋa nɩ mʋ. Zuda tɩʋ pɛ Sedesɩasɩ dɛɛn tʋŋɩ bantʋ mʋ sɩ ba vu Babilɔnɩ ba zɩgɩ ba pa‑o Pɛ Nebukadnɛtsarɩ tee nɩ. Tɔnɔ kʋm wʋʋ bɩtarɩ sɩm mʋ tɩntʋ:

4 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na jɩgɩ kʋlʋ sɩ DƖ ta dɩ balʋ DƖ na pɛ Nebukadnɛtsarɩ kalɩ o nuŋi Zeruzalɛm nɩ o vu Babilɔnɩ tɩn mʋ tɩntʋ:

5 «Lɔ-na sam dáanɩ sɩ á lɛɛrɩ á jǝni ba tɩʋ kʋm wʋnɩ. Jəri-na gaara á jəri dwə da, sɩ á daarɩ á ta á di ya wʋʋ dwə-biə bam. 6 Ádi-na kaana, sɩ á daarɩ á ta á lʋrɩ bəkəri dɩ bɩsankam. Á ta di-na kaana á pa á bu-baara, sɩ á daarɩ á ta kwe á bukwa á ye á pa banna, sɩ kʋ pa ba dɩ dáa lʋ bəkəri dɩ bɩsankam. Á puli-na jəgə kalʋ á na wʋra tɩn nɩ, sɩ á yɩ zaŋɩ á ta á wɩ á pɔɔrɩ. 7 Taá tʋŋɩ-na sɩ tɩʋ kʋlʋ a na kalɩ abam a vu a yagɩ da tɩn taa jɩgɩ yazurə, sɩ wǝǝnu taa kɩ lanyɩranɩ tɩ pa-ba. Nan ta loori-na Baŋa-Wɛ á pa-ba, Bɛŋwaanɩ kʋ na kɩ lanyɩranɩ kʋ paɩ bantʋ, abam dɩ wʋ́ na á yigə-vəŋə.»

8 Cɩga ŋwaanɩ tɩn, Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn tagɩ tɩntʋ mʋ:

«Yɩ pa-na sɩ nijoŋnə balʋ, dɩ sampwəri sɩlʋ na wʋ abam tɩtarɩ nɩ tɩn ganɩ abam. Á nan yɩ kɩ á wʋbʋŋa ba dɩndwɩa yam wʋnɩ. 9 Sɩ kʋ yɩ vwan mʋ ba jɩgɩ ba pwərisə ba paɩ abam amʋ yɩrɩ ŋwaanɩ. Amʋ brɩ a wʋ tʋŋɩ-ba.» Baŋa-Wɛ na tagɩ kʋlʋ tɩn mʋ kʋntʋ.

10 Baŋa-Wɛ nan ta tagɩ tɩntʋ mʋ DƖ wɩ:

«Abam nan na kɩ á bɩna fusɩrpɛ yam Babilɔnɩ nɩ á ti, á laan wʋ́ joori á tɩtɩ tɩʋ kʋm. Amʋ yigə daa wʋ́ taa wʋ abam wʋnɩ sɩ a kɩ wo-laarʋ tɩlʋ a na goni ni sɩ a kɩ a pa abam tɩn. 11 Bɛŋwaanɩ, amʋ wʋbʋŋa maŋɩ ya ja dɩ a na wʋ́ kɩ abam te tɩn mʋ. Amʋ jeeli sɩ a pa á na yigə-vəŋə mʋ, sɩ kʋ daɩ lɛɛrʋ. A jeeli sɩ á taá jɩgɩ tɩɩna dɩ jwa mʋ. 12 Abam laan maa wʋ́ ba amʋ yigə nɩ sɩ á warɩ-nɩ. Amʋ dɩ maa wʋ́ cəgi á wɛ-loro kʋm. 13 Abam maa wʋ́ beeri-nɩ, yɩ á na-nɩ. Cɩga tɩn, á na beeri-nɩ dɩ á bɩcara maama, 14 a maa wʋ́ pa abam cwǝŋǝ sɩ á lwarɩ-nɩ.» Baŋa-Wɛ na tagɩ kʋlʋ tɩn mʋ kʋntʋ.

«Amʋ dɩ wʋ́ pa á joori á taá jɩgɩ yu-yoŋo. Amʋ wʋ́ la abam a ja a nuŋi je sɩlʋ maama nɩ a ya na zəli abam a yagɩ sɩ wʋnɩ tɩn, sɩ á joori á ba á jǝni á tɩtɩ tɩʋ kʋm wʋnɩ.» Baŋa-Wɛ na tagɩ kʋlʋ tɩn mʋ kʋntʋ.

15 Abam nan waɩ á tɛ nɩnɛɛnɩ, «Baŋa-Wɛ maŋɩ DƖ kuri nijoŋnə a pa dɩbam Babilɔnɩ tɩʋ nɩ.» 16 Kʋ nan na yɩ á pɛ wʋlʋ zɩm na je Pɛ Davidi paarɩ jangɔŋɔ kʋm baŋa nɩ o di paarɩ Zeruzalɛm nɩ tɩn, dɩ á cʋrrʋ tɩlʋ maama na wʋ tɔgɩ dɩ abam ba vu sa-tɩʋ yigə yigə yɩ ba ta daarɩ tɩʋ kʋm nɩ tɩn, Baŋa-Wɛ na tagɩ bantʋ taanɩ te tɩn mʋ tɩntʋ:

17 «Amʋ Paŋwa Tu Baŋa-Wɛ lagɩ a pa najara mʋ tʋ ba wʋnɩ, sɩ kana, dɩ yawɩɩrʋ dɩ ja-ba, pa ba ji nɩ mɔɔla tɩlʋ na pɔga yɩ tɩ warɩ tɩ di tɩn. 18 Cɩga ŋwaanɩ tɩn, amʋ lagɩ a tɔgɩ jara-kǝm, dɩ kana, dɩ yawɩɩrʋ baŋa a zəli-ba mʋ, pa ba ji wo-zɔɔna lʋgʋ baŋa tɩɩnɩ maama yiǝ nɩ. A nan na pɛ ba jagɩ ba yi mɛ maama, nɔɔna wʋ́ dʋlɩ ba yum ba ŋwaanɩ yɩ ba ma ba yɩrɩ ba sɔɔlɩ lwarɩm ba pa daanɩ. Nɔɔna wʋ́ taa jɩgɩ-ba ba yáala, yɩ ba mwanɩ-ba. 19 Bɛŋwaanɩ, ba wʋ cəgi amʋ kwǝrǝ kalʋ a tɩntʋŋna bam na ŋɔɔnɩ dɩ ba kuni zanzan tɩn.» Baŋa-Wɛ na tagɩ kʋlʋ tɩn mʋ kʋntʋ.

«Abam balʋ na wʋ sa-tɩʋ wʋnɩ tɩn dɩ wʋ cəgi a taanɩ dɩm. 20 Abam balʋ maama a na zəli Zeruzalɛm nɩ a kalɩ a ja a vu Babilɔnɩ tɩʋ tɩn, nan cəgi-na amʋ Baŋa-Wɛ taanɩ dɩm.»

21 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn nan na tagɩ te sɩ kʋ vu Kolaya bu Akabɩ, dɩ Maaseya bu Sedesɩasɩ seeni tɩn mʋ tɩntʋ:

«Bantʋ jɩgɩ vwan mʋ ba pwərisə amʋ yɩrɩ ŋwaanɩ. A nan wʋ́ kwe-ba a kɩ Babilɔnɩ tɩʋ pɛ Nebukadnɛtsarɩ jɩŋa nɩ, sɩ o gʋ-ba yɩ á zɩgɩ á niə. 22 Zuda tiinə balʋ maama ba na jaanɩ ba vu Babilɔnɩ tɩn wʋlʋ na bʋŋɩ sɩ o sɔɔlɩ lwarɩm o pa o doŋ, kʋ tu wʋ́ tɔgɩ bantʋ ŋwaanɩ o ta nɩ: ‹Baŋa-Wɛ wʋ́ kɩ-m nɩ Babilɔnɩ tɩʋ pɛ na kɩ te dɩ Sedesɩasɩ, dɩ Akabɩ, yɩ o zwɛ-ba mim wʋnɩ tɩn.› 23 Bɛŋwaanɩ, bantʋ tiini ba tʋŋɩ wo-zɔɔna mʋ a nɔɔna bam tɩtarɩ nɩ. Ba kɩ kabwəŋə dɩ ba donnǝ kaana. Ba ma ŋɔɔnɩ vwan amʋ yɩrɩ ŋwaanɩ, yɩ amʋ wʋ pɛ-ba a kwǝrǝ. Amʋ nan maanɩ kʋ maama ni nɩ.» Baŋa-Wɛ na tagɩ te tɩn mʋ kʋntʋ.

Semaya na pʋpʋnɩ tɔnɔ kʋlʋ tɩn

24 Baŋa-Wɛ dɛɛn ma ta dɩ Zeremi DƖ wɩ: «Nan ta dɩ Nehelam tu Semaya wɩ: 25 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: Nmʋ tɔgɩ n tɩtɩ yɩrɩ ŋwaanɩ mʋ n pʋpʋnɩ tɔnɔ n tʋŋɩ n pa Zeruzalɛm tiinə bam maama. N ma n pa kʋ yi Maaseya bu Sofoni na yɩ kaanɩm tu tɩn, dɩ kaanɩm tiinə badaara bam maama. N ma n ta dɩ Sofoni nɩ:

26 ‹Baŋa-Wɛ mʋ tiŋi‑m sɩ n ləri Yehoyada yuu nɩ n ta n yɩ kaanɩm tu DƖ digə kam nɩ, yɩ n nii Wɛ-digə kam baŋa nɩ. Nmʋ na nɛ nɩ cicoo mʋ wʋra o na brɩ o tɩtɩ nɩ o yɩ Wɛ nijoŋnu tɩn, n maŋɩ sɩ n ja kʋ tu n vɔ o nɛ mʋ, sɩ n daarɩ n lə luu o ban nɩ. 27 Bɛ nan mʋ yɩ n wʋ kɩ Anatɔtɩ tu Zeremi kʋlʋkʋlʋ? Wʋntʋ yǝni o ŋɔɔnɩ mʋ o pa abam. 28 Kʋ maŋɩ sɩ n cɩ-o mʋ, Bɛŋwaanɩ o pʋpʋnɩ tɔnɔ o tʋŋɩ o pa dɩbam balʋ na wʋ Babilɔnɩ nɩ tɩn yɩ o wɩ: dɩ́ wʋ́ daanɩ yo bɩna zanzan. O wɩ: dɩ́ lɔ sam sɩ dɩ́ lɛɛrɩ dɩ́ jǝni yo, yɩ dɩ́ daarɩ dɩ́ jəri gaara sɩ dɩ́ taa di ya tiu biə.› »

29 Sofoni na joŋi tɔnɔ kʋm tɩn, mʋ o karɩmɩ-ko o brɩ Zeremi. 30 Baŋa-Wɛ dɩ laan ma kwe kwǝrǝ kantʋ DƖ pa Zeremi yɩ DƖ wɩ: 31 «Pa kwǝrǝ kantʋ yi balʋ maama ba na kalɩ ba ja vu Babilɔnɩ tɩn: Baŋa-Wɛ na tagɩ te sɩ kʋ vu Nehelam tu Semaya seeni tɩn mʋ tɩntʋ: ‹Semaya yǝni o ŋɔɔnɩ mʋ o brɩ abam, yɩ amʋ wʋ tʋŋ-o. O ma ganɩ abam yɩ á sɛ o vwan yam. 32 Kʋntʋ ŋwaanɩ amʋ Baŋa-Wɛ lagɩ a waarɩ Nehelam tu Semaya dɩ o dwi dɩm mʋ. O dwi dɩm wʋlʋwʋlʋ bá na wo-laarʋ tɩlʋ a na bʋŋɩ sɩ a kɩ a pa a nɔɔna bam tɩn, o na brɩ nɔɔna bam sɩ ba lɔ amʋ kwaga nɩ tɩn ŋwaanɩ.› Baŋa-Wɛ na tagɩ kʋlʋ tɩn mʋ kʋntʋ.»