Zeremi dɩdaanɩ vwa-nijoŋnu Hanania na jaanɩ daanɩ te tɩn
28
Bɩnɩ dɩm kʋntʋ canɩ sɩnu cana kam wʋnɩ mʋ Azuuri bu Hanania dɛɛn zɩgɩ Wɛ-digə kam wʋnɩ o ŋɔɔnɩ dɩ amʋ. Pɛ Sedesɩasɩ paarɩ dim bɩna yana bɩnɩ dɩm nɩ mʋ kʋntʋ. Hanania maa yɩ nijoŋnu yɩ o nuŋi Gabawɔn tɩʋ nɩ. O ma zɩgɩ kaanɩm tiinə bam, dɩ nɔɔna bam maama yigə nɩ o ta dɩ amʋ o wɩ:2 «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: ‹Amʋ lagɩ a cɔgɩ Babilɔnɩ tɩʋ pɛ wʋm dam dɩlʋ o na jɩgɩ o di abam baŋa nɩ nɩnɛɛnɩ á jɩgɩ nabɛ ban-daa mʋ á ban nɩ te tɩn. 3 Bɩna yale laŋa nɩ amʋ wʋ́ joori a ja Wɛ-digə kam zɩla yalʋ Babilɔnɩ tɩʋ pɛ Nebukadnɛtsarɩ na vrɩ o ja o vu Babilɔnɩ tɩn a ba a yagɩ yo. 4 A nan ta wʋ́ ja Yeoyakim bu Yehoyakini na yɩ Zuda tɩʋ pɛ tɩn a joori yo. Wʋntʋ dɩ balʋ maama ba na kalɩ ba ja vu Babilɔnɩ nɩ tɩn mʋ a lagɩ a ja a joori yo. Bɛŋwaanɩ, a lagɩ a cɔgɩ dam dɩlʋ Babilɔnɩ tɩʋ pɛ na jɩgɩ o di abam baŋa nɩ tɩn mʋ.› Baŋa-Wɛ na tagɩ kʋlʋ tɩn mʋ kʋntʋ.»
5 Wɛ nijoŋnu Zeremi dɩ ma zɩgɩ Baŋa-Wɛ digə kam wʋnɩ o ləri Hanania, yɩ kaanɩm tiinə bam dɩ nɔɔna bam maama dɩ zɩgɩ da ba cǝgǝ. 6 O ma ta o wɩ: «Amina. Baŋa-Wɛ wʋ́ pa kʋ sɩɩnɩ kʋ kɩ! A tɩɩnɩ nɩ n na ŋɔɔnɩ te tɩn wʋ́ sɩɩnɩ kʋ kɩ, sɩ Baŋa-Wɛ pa jɩjɩgɩrʋ tɩlʋ Babilɔnɩ tiinə bam na vrɩ Wɛ-digə kam nɩ ba ja ba viiri tɩn, dɩ nɔɔna balʋ ba na kalɩ ba ja ba viiri tɩn joori yo. 7 Nan cəgi taanɩ dɩlʋ a na maŋɩ sɩ a pa nmʋ dɩ nɔɔna bantʋ maama tɩn. 8 Kʋ na yɩ Wɛ nijoŋnə balʋ na loori yigə sɩ ba faŋa faŋa yɩ nmʋ dɩ amʋ ta wʋ tu tɩn, bantʋ yǝni ba ŋɔɔnɩ ba brɩ nɩ jara-kǝm, dɩ kana, dɩ lɛɛrʋ dwi dwi wʋ́ ba tɩɩnɩ zanzan baŋa nɩ, dɩ na maŋɩ dɩ yɩ tɩ-kamunnu mʋ dɩ. 9 Kʋ daarɩ, nijoŋnu kalʋ na pwərisi yazurə taanɩ, kʋ tu na pwərisi te tɩn na sɩɩnɩ kʋ kɩ, kʋ brɩ nɩ wʋntʋ mʋ yɩ wʋlʋ Baŋa-Wɛ na sɩɩnɩ DƖ tʋŋɩ tɩn.»
10 Hanania laan ma vaŋɩ nabɛ ban-daa kalʋ na wʋ Zeremi ban nɩ tɩn o lɩ, yɩ o daarɩ o bwəri-ka. 11 O ta ma zɩgɩ nɔɔna bam maama yigə nɩ, yɩ o ta o wɩ: «Baŋa-Wɛ na tagɩ te tɩn mʋ tɩntʋ: ‹Tɩntʋ doŋ mʋ a lagɩ a cɔgɩ dam dɩlʋ pɛ Nebukadnɛtsarɩ na jɩgɩ o di dwi tiinə maama baŋa nɩ tɩn. Bɩna yale laŋa nɩ mʋ amʋ wʋ́ kɩ kʋntʋ.› »
O na tagɩ kʋntʋ o ti tɩn, Zeremi ma kɛ o daarɩ-ba.
12 Hanania dɛɛn na lɩ nabɛ ban-daa Zeremi ban nɩ yɩ o daarɩ o bwəri-ka yɩ kʋ kɩ fɩɩn tɩn, mʋ Baŋa-Wɛ daa kwe kwǝrǝ kadoŋ DƖ pa Zeremi. DƖ ma ta dɩd-o DƖ wɩ: 13 «Zaŋɩ n vu n ta dɩ Hanania nɩ: Baŋa-Wɛ na tagɩ te tɩn mʋ tɩntʋ: ‹Nmʋ sɩɩnɩ n wanɩ ban-daa kalʋ amʋ na mɛ daa a kɩ tɩn n bwəri n yagɩ. Nmʋ nan lagɩ n ləri ban-daa kam kantʋ pa ka ji luuru nyɩm mʋ. 14 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: Amʋ lagɩ a kwe luuru ban-daa mʋ a dɩ tɩɩnɩ dɩm kʋntʋ maama ban nɩ, sɩ kʋ fɩn-ba sɩ ba sɛ ba pa Babilɔnɩ tɩʋ pɛ Nebukadnɛtsarɩ. Baá taa tʋŋɩ ba pa‑o. A ta maa wʋ́ pa ga-vara dɩ ni sɩ ba sɛ ba pa‑o.› »
15 Zeremi ta ma ta dɩ Hanania o wɩ: «Cəgi-nɩ! Baŋa-Wɛ brɩ DƖ wʋ tʋŋɩ nmʋ. Dɩ kʋ dɩ, n ta pɛ nɔɔna bantʋ sɛ n vwan yam. 16 Kʋntʋ ŋwaanɩ, Baŋa-Wɛ na tagɩ kʋlʋ tɩn mʋ tɩntʋ: A lagɩ a lɩ nmʋ sɩ n je tɩga baŋa nɩ. Bɩnɩ dɩntʋ nɩ mʋ n lagɩ n tɩ, n na brɩ nɔɔna bam sɩ ba lɔ amʋ Baŋa-Wɛ kwaga nɩ tɩn ŋwaanɩ.»
17 Bɩnɩ dɩm kʋntʋ canɩ sɩrpɛ cana kam nɩ nɔ́ɔ mʋ Hanania sɩɩnɩ o tɩ.