Zuda tiinə wʋ́ sɛ ba pa Nebukadnɛtsarɩ
27
Zʋzɩasɩ bu Sedesɩasɩ dɛɛn na puli o di Zuda paarɩ tɩn, mʋ Baŋa-Wɛ pɛ Zeremi kwǝrǝ sɩ o ta. 2 Baŋa-Wɛ na tagɩ kʋlʋ dɩ amʋ tɩn mʋ tɩntʋ:«Kwe tankɔlɔ n sɩɩrɩ-kʋ, sɩ n ma sɩsɩrɩ sɩm kʋntʋ n vɔ daa yɩra nɩ n kɩ nabɛ ban-daa sɩ n daarɩ n kwe-ka n dɩ n ban nɩ. 3 Nmʋ laan wʋ́ tʋŋɩ kwǝrǝ sɩ ka yi Edɔm tɩʋ pɛ, dɩ Moabɩ tɩʋ pɛ, dɩ Amɔn tɩʋ pɛ, dɩ Tiiri tɩʋ pɛ, kʋ wǝli dɩ Sidɔn tɩʋ pɛ. Kʋ nan yɩ ba dɩdɛɛra balʋ na tu Zeruzalɛm sɩ ba warɩ Pɛ Sedesɩasɩ tɩn mʋ wʋ́ ja n kwǝrǝ kam ba vu ba pa pwa bam kʋntʋ. 4 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn nan tagɩ dɩ amʋ sɩ a pa-ba kwǝrǝ kantʋ, sɩ ba dɩ ta ba brɩ ba pwa bam nɩ:
5 ‹Amʋ tɔgɩ a dam baŋa nɩ a tʋŋɩ wo-kamunnu a ma a naanɩ tɩga baŋa, dɩ ka nɔn-biə, dɩ vara balʋ na kaagɩ ba ve da tɩn. A nan yǝni a kwe tɩntʋ maama a paɩ wʋlʋ a yi na su tɩn mʋ. 6 Amʋ yɔɔrɩ a kwe tɩɩnɩ dɩntʋ maama mʋ a kɩ Babilɔnɩ tɩʋ pɛ Nebukadnɛtsarɩ jɩŋa nɩ. Wʋntʋ yɩ amʋ tɩntʋŋnʋ mʋ. Amʋ ma brɩ a pa ga-vara ni sɩ ba sɛ ba pa‑o. 7 Tɩɩnɩ maama nɔɔna wʋ́ taa tʋŋɩ ba pa‑o mʋ. Ba ta wʋ́ tʋŋɩ ba pa o bu, dɩ o naa. Kʋʋ́ taa yɩ kʋntʋ mʋ sɩ kʋ yi maŋa kalʋ ba dɩ tɩʋ kʋm na yi sɩ a pa nɔɔna taa te-ba tɩn. Wʋntʋ dɩ o tɩʋ tiinə laan maa wʋ́ tʋŋɩ ba pa pa-kamunə dɩ ba nɔɔna.
8 Tɩʋ kʋlʋ nɔɔna nan na vɩn sɩ ba kɩ ba tɩtɩ Babilɔnɩ tɩʋ pɛ Nebukadnɛtsarɩ jɩŋa nɩ sɩ o taa te-ba, amʋ wʋ́ pa bantʋ tɩ najara wʋnɩ mʋ, sɩ yawɩɩrʋ dɩ kana dɩ ja-ba tɩ gʋ. Amʋ wʋ́ tɔgɩ Pɛ Nebukadnɛtsarɩ baŋa nɩ mʋ a cɔgɩ-ba kʋntʋ sɩ ba ba ba ti fasɩ. Amʋ Baŋa-Wɛ na tagɩ te tɩn mʋ kʋntʋ. 9 Kʋntʋ ŋwaanɩ, á ba maŋɩ sɩ á cəgi á nijoŋnə, dɩ á sampwəri, dɩdaanɩ abam tɩtɩ dɩndwɛa yam, dɩ á ciciri vʋra, dɩ á liri mwaanʋ tiinə taanɩ. Bantʋ yǝni ba ta dɩ abam ba wɩ: á bá taa wʋ Babilɔnɩ tɩʋ pɛ dam kuri nɩ. 10 Kʋ yɩ vwan mʋ ba jɩgɩ ba pwərisə. Ba na ganɩ abam te tɩn wʋ́ pa á vu sa-tɩʋ yigə yigə á daarɩ á tɩga kam. Amʋ wʋ́ zəli abam a dʋlɩ a yagɩ da, sɩ á maŋɩ dáanɩ á tɩ. 11 Tɩʋ kʋlʋ nɔɔna nan na sɛ sɩ ba kɩ ba tɩtɩ Babilɔnɩ tɩʋ pɛ wʋm jɩŋa nɩ sɩ o taa te-ba, amʋ dɩ wʋ́ pa nɔɔna bam kʋntʋ cwǝŋǝ sɩ ba maŋɩ ba tɩtɩ tɩga wʋnɩ, sɩ ba taa zʋʋrɩ ka wʋnɩ yɩ ba vara.› »
12 Amʋ dɛɛn ma daarɩ a ja kwǝrǝ kam kʋntʋ a vu Zuda pɛ Sedesɩasɩ te, yɩ a lwəni-ka a brɩ-o. A ma ta dɩd-o a wɩ: «Kɩ n tɩtɩ Babilɔnɩ tɩʋ pɛ wʋm jɩŋa nɩ sɩ o taa te á tɩʋ kʋm. Á na sɛ á pa wʋntʋ dɩ o nɔɔna, á wʋ́ joŋi á tɩtɩ á yagɩ. 13 Baŋa-Wɛ tagɩ DƖ wɩ tɩʋ kʋlʋ nɔɔna na wʋ sɛ Babilɔnɩ tɩʋ pɛ wʋm, bantʋ wʋ́ tɩ najara wʋnɩ mʋ, sɩ yawɩɩrʋ dɩ kana dɩ ja-ba tɩ gʋ. Bɛɛ mʋ wʋ́ kɩ sɩ nmʋ dɩ n nɔɔna bam taá lagɩ tʋʋnɩ? 14 Nan yɩ cəgi-na nijoŋnə balʋ na tɛ dɩ abam ba wɩ: á bá taa wʋ Babilɔnɩ tɩʋ pɛ dam kuri nɩ tɩn. Bantʋ jɩgɩ vwan mʋ ba ŋɔɔnɩ dɩ abam.
15 Baŋa-Wɛ na tagɩ te tɩn mʋ tɩntʋ:
‹Amʋ wʋ tʋŋɩ nijoŋnǝ bam kʋntʋ. Ba jɩgɩ vwa yiyiu-ŋwɛ ba ŋɔɔnɩ dɩdaanɩ amʋ yɩrɩ. Kʋntʋ ŋwaanɩ mʋ amʋ lagɩ a zəli abam sɩ á viiri. Abam dɩ á nijoŋnǝ bam kʋntʋ maama wʋ́ tɩ mʋ.› »
16 Amʋ laan ma ta dɩ kaanɩm tiinə bam, dɩ nɔɔna bam maama a wɩ:
«Baŋa-Wɛ na tagɩ te tɩn mʋ tɩntʋ: ‹Yɩ cəgi-na nijoŋnə balʋ na tɛ dɩ abam ba wɩ: Babilɔnɩ tiinə bam wʋ́ joori ba ja Wɛ-digə zɩla yalʋ ba ya na jaanɩ ba viiri tɩn ba ba ba pa dɩbam. Kʋ yɩ vwan mʋ ba jɩgɩ ba pwərisə. 17 Nan yɩ cəgi-na ba taanɩ. Sɛ-na á pa Babilɔnɩ tɩʋ pɛ wʋm, sɩ á joŋi á tɩtɩ á yagɩ. Á lagɩ á pa tɩʋ kʋntʋ ji di-dwəənu sɩ bɛɛ mʋ?›
18 Ba nan na sɩɩnɩ ba yɩ nijoŋnə balʋ na jɩgɩ Baŋa-Wɛ kwǝrǝ sɩ ba ta tɩn, sɩ ba loori Paŋwa Tu Baŋa-Wɛ sɩ DƖ yɩ pa cwǝŋǝ sɩ ba vrɩ Wɛ-digə kam zɩla yalʋ ta na daarɩ Zeruzalɛm nɩ tɩn, dɩ pɛ sɔŋɔ kʋm wʋ jɩjɩgɩrʋ tɩm ba ja vu Babilɔnɩ. 19 Paŋwa Tu Baŋa-Wɛ nan tagɩ tɩntʋ mʋ sɩ kʋ vu Wɛ-digə kam zɩla yalʋ ta na wʋra tɩn seeni. Yantʋ maa yɩ canna ywə yale yam, dɩ canna na-zʋŋ-zaŋa kalʋ ba na bǝi nɩ ‹Nɩnɩʋ kʋm› tɩn, dɩ war-zwɩ zɩgɩm tərikooru tɩm, dɩ zɩla dwi dwi yalʋ ta na daarɩ tɩn. 20 Babilɔnɩ tɩʋ pɛ Nebukadnɛtsarɩ dɛɛn na tu o kalɩ Zuda tɩʋ pɛ Yeoyakim bu Yehoyakini, dɩ Zeruzalɛm dɩ Zuda laŋa kam nadunə maama o ja o vu Babilɔnɩ tɩn, o yagɩ Wɛ-digə zɩla yam kʋntʋ ya je nɩ mʋ. 21 Cɩga tɩn, Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn tagɩ Wɛ-digə kam zɩla yalʋ ta na daarɩ Zeruzalɛm nɩ tɩn, dɩ pɛ sɔŋɔ kʋm wʋ jɩjɩgɩrʋ tɩm taanɩ DƖ wɩ:
22 ‹Nɔɔna wʋ́ vrɩ jɩjɩgɩrʋ tɩm kʋntʋ maama ba vu Babilɔnɩ mʋ. Tɩ wʋ́ maŋɩ dáanɩ, sɩ kʋ yi maŋa kalʋ amʋ wʋbʋŋa daa na wʋ́ vu tɩ seeni tɩn. Amʋ laan maa wʋ́ joori a ja-tɩ a ba a zɩgɩ je sɩntʋ nɩ.›a
Baŋa-Wɛ na tagɩ te tɩn mʋ kʋntʋ.»