Ba na di Zeremi taanɩ te tɩn
26
Zʋzɩasɩ bu Yeoyakim dɛɛn na puli sɩ o di Zuda tɩʋ paarɩ tɩn, mʋ kwǝrǝ kantʋ tu Zeremi te. 2 Baŋa-Wɛ ma ta dɩd-o DƖ wɩ:«Ve n zɩgɩ Wɛ-digə kʋnkɔlɔ kʋm nɩ. Nɔɔna bam laan maa na nuŋi Zuda tɩɩnɩ dɩm maama wʋnɩ ba ba ba zʋ da sɩ ba zuli amʋ Baŋa-Wɛ, sɩ n ta kwǝrǝ kantʋ maama n brɩ-ba. Yɩ səgi kʋlʋkʋlʋ ba yigə nɩ. 3 Dɛdoŋ nɔɔna bam wʋ́ cəgi amʋ kwǝrǝ kam yɩ ba daarɩ ba yagɩ ba lwarɩm kikiə yam. Ba na sɛ ba kɩ kʋntʋ, amʋ wʋ́ wanɩ a ləri a wʋbʋŋa dɩ lɛɛrʋ tɩlʋ a ya na jeeli sɩ a kɩ ba baŋa nɩ ba lwarɩm dɩm ŋwaanɩ tɩn.
4 Nan ta dɩ ba nɩ: ‹Baŋa-Wɛ na tagɩ te tɩn mʋ tɩntʋ: Abam nan maŋɩ sɩ á cəgi amʋ taanɩ, sɩ á daarɩ á sɛ niə yalʋ a na pɛ abam tɩn mʋ. 5 A yǝni a tʋŋɩ a nijoŋnǝ bam á tee nɩ kuni zanzan sɩ ba tɔɔlɩ a kwǝrǝ kam ba brɩ abam. Kʋ ya maŋɩ sɩ á sɛ ba ni-kaana yam, á nan ba sɛa. 6 Abam daa ta na wʋ sɛ a taanɩ dɩm, amʋ dɩ nan wʋ́ cɔgɩ Wɛ-digə kantʋ mʋ, nɩ a dɛɛn na kɩ te Siloo baŋa nɩ tɩn. A laan maa wʋ́ pa Zeruzalɛm ji tɩʋ kʋlʋ lʋgʋ baŋa dwi maama na wʋ́ ma kʋ yɩrɩ ba sɔɔlɩ lwarɩm ba pa daanɩ tɩn.› »
7 Kaanɩm tiinə bam, dɩ nijoŋnǝ bam, dɩ nɔɔna bam maama dɛɛn ma zɩgɩ Baŋa-Wɛ digə kam nɩ yɩ ba ni Zeremi na tagɩ te maama tɩn. 8 O maa na tɔɔlɩ Baŋa-Wɛ kwǝrǝ kam maama o ti tɩn, mʋ kaanɩm tiinə bam, dɩ nijoŋnǝ bam, dɩdaanɩ nɔɔna bam maama kɩ lɩla ba zaŋɩ o baŋa nɩ ba zi‑o yɩ ba wɩ: «N maŋɩ sɩ n tɩ mʋ! 9 Wɔɔ mʋ pɛ‑m cwǝŋǝ sɩ n ŋɔɔnɩ dɩ Baŋa-Wɛ yɩrɩ nɩ: Wɛ-digə kantʋ dɩ lagɩ ka cɔgɩ mʋ, nɩ kʋ dɛɛn na kɩ te Siloo baŋa nɩ tɩn? Bɛɛ mʋ yɩ n ta ta nɩ tɩʋ kʋntʋ wʋ́ ji di-dwəənu sɩ nɔɔn-nɔɔnʋ daa yɩ taa zʋʋrɩ kʋ wʋnɩ?» Ba dɛɛn ma ta kʋntʋ Wɛ digə kam nɩ yɩ ba pɩɩnɩ Zeremi ba kɩ-o ba tɩtarɩ nɩ.
10 Zuda tɩʋ nakwa bam na ni kʋlʋ na kɩ tɩn, mʋ ba dɩ kɩ lɩla ba zɩgɩ pɛ sɔŋɔ kʋm nɩ ba vu Wɛ digə kam nɩ. Ba ma vu Wɛ-digə kʋnkɔlɔ kʋm ni dɩlʋ yɩrɩ na yɩ ‹Ni-dʋʋrɩ dɩm› tɩn ba jǝni da sɩ ba nii taanɩ dɩm baŋa nɩ. 11 Kaanɩm tiinə bam, dɩ nijoŋnǝ bam laan ma ta dɩ tɩʋ nakwa bam, dɩ nɔn-biə bam maama ba wɩ: «Nɔɔnʋ wʋntʋ maŋɩ sɩ o tɩ mʋ. Bɛŋwaanɩ, o ŋɔɔnɩ taanɩ dɩlʋ na yáalɩ dɩ́ tɩʋ kʋm tɩn mʋ. O na tagɩ te maama tɩn tʋ abam tɩtɩ zwa wʋnɩ.»
12 Zeremi ma ta dɩ nakwa bam dɩ nɔɔna bam maama o wɩ: «Baŋa-Wɛ mʋ pɛ-nɩ ni sɩ a ŋɔɔnɩ yiyiu-ŋwɛ a cɔgɩ Wɛ-digə kantʋ dɩ tɩʋ kʋntʋ maama, nɩ á na ni te maama tɩn. 13 Nan lǝni-na á kikiə yam sɩ á taá tɔgɩ cwə-laarʋ. Pipiri-na á sɛ á Tu Baŋa-Wɛ ni dɩm. Kʋntʋ mʋ wʋ́ pa DƖ ləni DƖ wʋbʋŋa dɩ lɛɛrʋ tɩlʋ DƖ ya na jeeli sɩ DƖ pa tɩ yi abam tɩn. 14 Kʋ nan na yɩ amʋ, a wʋ á jɩan nɩ mʋ, sɩ á kɩ kʋlʋ maama á na bʋŋɩ nɩ kʋ tɔgɩ cwǝŋǝ tɩn. 15 Nan lwarɩ-na nɩ: abam na gʋ-nɩ, á gʋ wʋlʋ na wʋ kɩ kʋlʋkʋlʋ o cɔgɩ tɩn mʋ. Á lwarɩm dɩm kʋntʋ wʋ́ taa wʋ á yuu nɩ, dɩdaanɩ tɩʋ kʋntʋ dɩ kʋ nɔn-biə bam maama yuu nɩ. Bɛŋwaanɩ, Baŋa-Wɛ mʋ sɩɩnɩ DƖ tʋŋɩ-nɩ sɩ a ta kʋlʋ maama á na ni tɩn.»
16 Tɩʋ kʋm nakwa bam, dɩ nɔɔna bam maama na ni kʋntʋ tɩn, ba ma ta dɩ kaanɩm tiinə bam, dɩ nijoŋnǝ bam ba wɩ: «Nɔɔnʋ wʋntʋ wʋ kɩ kʋlʋ na maŋɩ sɩ o tɩ tɩn. Kʋ yɩ o tɔgɩ Baŋa-Wɛ yɩrɩ ŋwaanɩ mʋ o ŋɔɔnɩ dɩ dɩbam.»
17 Ba taanɩ dɩm kwaga nɩ mʋ nakwa badonnǝ zɩgɩ ba ta dɩ nɔɔna balʋ maama na jeeri da tɩn ba wɩ: 18 «Ezekɩasɩ dɛɛn na yɩ Zuda tɩʋ pɛ tɩn mʋ Moresɛtɩ tɩʋ tu Mika ŋɔɔnɩ o brɩ Zuda tiinə bam maama yɩ o wɩ:
‹Paŋwa Tu Baŋa-Wɛ na tagɩ te tɩn mʋ tɩntʋ:
Wɛ tɩtɩ tɩʋ Zeruzalɛm wʋ́ tʋ kʋ saarɩ
kʋ ji di-dwəənu yɩranɩ.
Nɔɔna wʋ́ ba ba va Siyɔn tɩga kam kʋntʋ ba tiŋi.
Tweeru maa wʋ́ li zoŋo kʋlʋ Wɛ-digə kam ya na zɩgɩ da tɩn.›a
19 Pɛ Ezekɩasɩ dɩ Zuda tiinə bam dɛɛn nan gʋ Mika mʋ na? Awo. Pɛ wʋm kwarɩ Baŋa-Wɛ yɩ o loori‑DƖ sɩ DƖ duri ba ŋwaŋa. Baŋa-Wɛ dɩ ma ləni DƖ wʋbʋŋa dɩ lɛɛrʋ tɩlʋ DƖ ya na jeeli sɩ DƖ pa tɩ yi-ba tɩn. Dɩbam nan na gʋ nɔɔnʋ wʋntʋ, lɛɛrʋ lagɩ tɩ ba dɩ́ baŋa nɩ lɩla mʋ!»
20 Nɔɔnʋ wʋdoŋ dɩ dɛɛn wʋra. O yɩ Semaya bu Yuri mʋ. O maa nuŋi Kiriaf-Jeerim. O dɩ dɛɛn tɔgɩ Baŋa-Wɛ yɩrɩ ŋwaanɩ mʋ o ŋɔɔnɩ o ta Zeruzalɛm dɩ Zuda tiinə bam taanɩ, nɩ Zeremi na tagɩ te tɩn. 21 Pɛ Yeoyakim, dɩ o nɔn-babɛ sɩm, dɩ o nakwa bam ma ni kʋ ŋwa. Pɛ wʋm ma beeri o gʋm. Yuri ma maanɩ kʋ ni nɩ, pa o duri o vu Ezipi o səgi da, o na kwarɩ fʋʋnɩ tɩn ŋwaanɩ. 22 Yeoyakim ta ma tʋŋɩ Akbɔrɩ bu Elinatan dɩ nɔɔna badonnǝ sɩ ba vu Ezipi ba ja-o ba ba. 23 Ba ma vu ba ja Yuri ba joori ba vu ba kɩ Pɛ Yeoyakim jɩŋa nɩ. Pɛ wʋm ma pa ba gʋ-o, yɩ ba dʋlɩ o yɩra yam ba yagɩ ba tɩʋ yibeelǝ yam je nɩ.
24 Kʋ nan na yɩ Zeremi, Safan bu Ahikam dɛɛn ŋɔɔnɩ o pa‑o. Kʋntʋ ŋwaanɩ ba wʋ jaan‑o ba kɩ nɔɔna bam jɩŋa nɩ sɩ ba gʋ.