Zuda tiinə wʋ́ maŋɩ sa-tɩʋ nɩ bɩna fusɩrpɛ
25
Zuda tɩʋ pɛ Zʋzɩasɩ bu Yeoyakim paarɩ dim bɩna yana bɩnɩ dɩm wʋnɩ mʋ Baŋa-Wɛ pɛ Zeremi kwǝrǝ sɩ o ta o brɩ Zuda tiinə bam maama. Bɩnɩ dɩm kʋntʋ nɩ mʋ Babilɔnɩ tɩʋ Pɛ Nebukadnɛtsarɩ dɩ dɛɛn puli sɩ o di o paarɩ.2 Wɛ nijoŋnu Zeremi na tagɩ kʋlʋ o brɩ balʋ na zʋʋrɩ Zeruzalɛm nɩ tɩn dɩdaanɩ Zuda tiinə bam maama tɩn mʋ tɩntʋ:
3 Kʋ zɩgɩ Zuda tɩʋ Pɛ Amɔn bu Zʋzɩasɩ paarɩ dim bɩna fugə-yatɔ bɩnɩ dɩm nɩ, sɩ kʋ yi zɩm, amʋ yɔɔrɩ a tɛ dɩ abam Baŋa-Wɛ na pɛ-nɩ kwǝrǝ kalʋ maama sɩ a pa abam tɩn mʋ. Abam nan ba cǝgǝ. 4 Baŋa-Wɛ nan yɔɔrɩ DƖ tʋŋɩ DƖ nijoŋnǝ bam mʋ á tee nɩ maŋa maama sɩ ba ŋɔɔnɩ dɩ abam, yɩ á ta ba sɛ ba taanɩ dɩm. Á maŋɩ á ba cəgi-ba dɩ. 5 Baŋa-Wɛ maa yǝni DƖ tɔgɩ bantʋ baŋa DƖ ta wɩ: «Abam maama pipiri-na á yagɩ cwə-balwaarʋ tɩlʋ á na ve sɩ wʋnɩ tɩn, sɩ á daa yɩ taá tɔgɩ lwarɩm kikiə. Á na kɩ kʋntʋ, á wʋ́ taá zʋʋrɩ tɩga kalʋ amʋ Baŋa-Wɛ na kwe a pa abam dɩ á nabaara bam sɩ á taá te-ka maŋa maama tɩn nɩ. 6 Nan yɩ tɔgɩ-na wa-yɔɔrʋ kwaga, sɩ á zuli-ya. Yɩ pa-na sɩ a banɩ zaŋɩ dɩ á jɩan na kɩ wǝǝnu tɩlʋ tɩn. Abam na sɛ amʋ ni kʋntʋ, amʋ dɩ bá cɔgɩ abam.
7 Baŋa-Wɛ na tagɩ kʋlʋ tɩn mʋ tɩntʋ: Abam nan wʋ sɛ amʋ taanɩ dɩm, yɩ á zaŋɩ a banɩ dɩ á jɩan na kɩ wǝǝnu tɩlʋ tɩn. Á kǝm dɩm kʋntʋ ma pa á na cɔgɩm dɩlʋ laan na tu á baŋa tɩntʋ tɩn. 8 Kʋntʋ ŋwaanɩ, Paŋwa Tu Baŋa-Wɛ na tagɩ te tɩn mʋ tɩntʋ: Abam na wʋ cəgi amʋ taanɩ dɩm tɩn, 9 amʋ dɩ wʋ́ bəŋi dwiə yalʋ na zʋʋrɩ jazɩm baŋa seeni tɩn nɔɔna bam maama, dɩ amʋ tɩntʋŋnʋ Nebukadnɛtsarɩ wʋlʋ na yɩ Babilɔnɩ tɩʋ Pɛ tɩn sɩ ba ba. A maa wʋ́ tʋŋɩ-ba sɩ ba kɩ najara dɩ abam balʋ na zʋʋrɩ tɩga kantʋ wʋnɩ tɩn, dɩ tɩɩnɩ dɩlʋ maama na gilimi abam tɩn. Baá yɔɔrɩ ba cɔgɩ á tɩga kam maama dɩ je sɩlʋ na gilimi abam tɩn fasɩ,a pa ka maama ji di-dwəənu yɩranɩ. Nɔɔna wʋ́ taa jɩgɩ-ka ba yáala, yɩ ba dʋlɩ ba yum ka ŋwaanɩ. 10 Amʋ wʋ́ pa wʋpolo dɩ ywəəni sɔɔ maama ti je sɩm maama nɩ. Kadri ywəəni dɩ daa bá taa wʋra. Nɔɔna daa bá taa cʋɩ muni naa ba tarɩgɩ mim. 11 Tɩga kam maama jilli wʋ́ ji di-dwəənu mʋ nɩ kagʋa te. Zuda tiinə bam dɩ dwi-gɛ tiinə balʋ maama na gilimi-ba tɩn maa wʋ́ taa wʋ Babilɔnɩ tɩʋ pɛ dam kuri nɩ bɩna fusɩrpɛ (70).b
12 Bɩna fusɩrpɛ sɩm nan na yiǝ, amʋ wʋ́ waarɩ Babilɔnɩ tɩʋ pɛ dɩ o tɩʋ kʋm maama ba lwarɩm dɩm ŋwaanɩ. Amʋ ta wʋ́ pa lɛɛrʋ ba Babilɔnɩ tiinə tɩga kam maama baŋa nɩ pa ka ji di-dwəənu sɩ kʋ taa ve maŋa kalʋ na ba ti tɩn. 13 A lagɩ a pa cam dɩlʋ maama a na tagɩ sɩ kʋ vu Babilɔnɩ tɩga kam seeni tɩn mʋ sɩɩnɩ dɩ yi-ba. Waarɩm dɩlʋ maama na pʋpʋnɩ dɩ tiŋi tɔnɔ kʋntʋ wʋnɩ tɩn, dɩdaanɩ wǝǝnu tɩlʋ maama Zeremi na ŋɔɔnɩ o pa dwi-gɛ tiinə bam maama tɩn wʋ́ yi-ba. 14 Pa-kamunə dɩ dwiə yadonnə zanzan mʋ wʋ́ di dam Babilɔnɩ tiinə bam baŋa nɩ pa ba ji ba gambɛ. Amʋ wʋ́ joori a ŋwɩ ba kǝm-balwaarʋ tɩm jɩnɩ sɩ kʋ maŋɩ dɩ ba jɩn na kɩ wǝǝnu tɩlʋ tɩn.»
Baŋa-Wɛ na tagɩ te tɩn mʋ kʋntʋ.
Baŋa-Wɛ ban-zɔŋɔ kʋm
15 Yisɩrayɛlɩ tiinə Baŋa-Wɛ dɩm ma ta dɩ amʋ DƖ wɩ: «Nii na-zʋŋa a jɩŋa nɩ dɩ ka wʋ sa-dɛɛra bam. Ka su dɩ a ban-zɔŋɔ kʋm mʋ ka pɛɛlɩ. Nan joŋi-ka n vu n pa dwi tiinə balʋ maama amʋ na pɛ n vu ba te tɩn, sɩ ba nyɔ ka wʋʋ sana bam.c 16 Ba na nyɔga, baá yirisi mʋ, najara yalʋ amʋ na wʋ́ pa ya tʋ ba tɩtarɩ nɩ tɩn ŋwaanɩ.»
17 Amʋ ma sɩɩnɩ a joŋi na-zʋŋa kam Baŋa-Wɛ jɩŋa nɩ. A ma kwe ka wʋ sa-dɛɛra bam a pa dwi tiinə balʋ maama o na pɛ a vu ba te tɩn, yɩ ba nyɔ. 18 A ve Zeruzalɛm mʋ, dɩ Zuda tɩɩnɩ dɩdonnǝ dɩm, dɩ ba pwa dɩ ba nakwa bam te. A ma pa ba nyɔ na-zʋŋa kam wʋ sa-dɛɛra bam, sɩ kʋ brɩ nɩ ba lagɩ ba na cɔgɩm yɩ ba tɩɩnɩ dɩm ji di-dwəənu yɩranɩ. Nɔɔna wʋ́ taa jɩgɩ-ba ba yáala yɩ ba maɩ ba yɩra ba sɔɔlɩ lwarɩm ba pa daanɩ. Kʋ ta yɩ kʋntʋ mʋ dɩ zɩm maama.
19 Nɔɔna balʋ amʋ ta na pɛ ba nyɔ na-zʋŋa kam wʋ sa-dɛɛra bam tɩn mʋ tɩntʋ:
Ezipi tɩʋ Pa-farʋ wʋm, dɩ o nakwa, dɩ o dɩdɛɛra, dɩ o nɔn-biə bam, 20 dɩdaanɩ vərə balʋ maama na zʋʋrɩ ba tɩtarɩ nɩ tɩn.
Utsi laŋa pwa bam maama.
Filisi tiinə pwa bam maama. Bantʋ maa yɩ Asekelon tɩʋ pɛ, dɩ Gaza tɩʋ pɛ, dɩ Ekoron tɩʋ pɛ, dɩ balʋ ta na daarɩ Asedodi tɩʋ wʋnɩ tɩn.
21 Edɔm tiinə bam, dɩ Moabɩ tiinə bam, dɩ Amɔn tiinə bam.
22 Tiiri dɩ Sidɔn tɩɩnɩ pwa bam maama, kʋ ta wǝli dɩ pwa balʋ na zʋʋrɩ nɩnɩʋ ni tɩɩnɩ yam nɩ tɩn.
23 Dedan tiinə bam, dɩ Tema tiinə bam, dɩ Buzi tiinə bam, dɩdaanɩ balʋ na ceeri ba yum yɩ ba zʋʋrɩ kagʋa yuu nɩ tɩn.
24 Arabɩ laŋa pwa bam, dɩ dwi-gɛ tiinə balʋ na zʋʋrɩ kagʋa kam wʋnɩ tɩn pwa bam.
25 Zimiri pwa bam, dɩ Elam pwa bam, dɩ Mɛdɩ pwa bam.
26 Pwa balʋ na zʋʋrɩ jazɩm baŋa seeni tɩɩnɩ dɩm nɩ tɩn, kʋ na yɩ dɩlʋ na bwələ daanɩ tɩn, dɩdaanɩ dɩlʋ na yɩ yigə yigə tɩn dɩ.
A ve lʋgʋ baŋa maama tɩɩnɩ dɩm mʋ a pa ba nyɔ na-zʋŋa kam wʋ sa-dɛɛra bam. Sɩ kʋ kweeli tɩn, Babilɔnɩ tɩʋ pɛ wʋm dɩ maa wʋ́ nyɔ ka wʋnɩ.
27 Baŋa-Wɛ ma ta dɩ amʋ DƖ wɩ: «Nan ta nɔɔna bam n wɩ: ‹Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ wɩ: Nyɔ-na na-zʋŋa kam wʋnɩ sa-dɛɛra á bugi, sɩ á twanɩ tɩtwaanʋ. Taá parɩ á tʋɩ tɩga nɩ, sɩ á daa yɩ zaŋɩ wɛɛnɩ, najara yalʋ amʋ na wʋ́ pa ya tɩn á tɩtarɩ nɩ tɩn ŋwaanɩ.› 28 Ba nan na vɩn sɩ ba nyɔ na-zʋŋa kam n na te na pa-ba tɩn wʋnɩ, sɩ n ta dɩ ba wɩ: ‹Paŋwa Tu Baŋa-Wɛ tagɩ tɩntʋ mʋ: Á maŋɩ sɩ á nyɔ mʋ! 29 Nii-na! Kʋ na yɩ tɩʋ kʋlʋ na yɩ a tɩtɩ nyɩm tɩn, amʋ sɩŋɩ bantʋ baŋa nɩ mʋ sɩ a pa ba na cɔgɩm. Abam nan bʋŋɩ nɩ a laan wʋ́ yagɩ abam mʋ na? Abam dɩ bá lu waarɩm dɩm wʋnɩ! A yɔɔrɩ a lagɩ a pa najara mʋ tɩn lʋgʋ baŋa tɩɩnɩ dɩm maama wʋnɩ. Amʋ Paŋwa Tu Baŋa-Wɛ mʋ tagɩ kʋntʋ!›
30 Zeremi, nan tɔɔlɩ taanɩ dɩntʋ maama n brɩ-ba nɩ:
‹Baŋa-Wɛ kwǝrǝ mʋ lagɩ ka zaŋɩ wɛyuu nɩ ka mumuni.
DƖ kwǝr-dɩa maa wʋ́ bagɩ ka zɩgɩ DƖ wɛyuu sɔŋɔ kʋm wʋnɩ.
DƖ sɔɔ wʋ́ zaŋɩ DƖ tɩga kam maama baŋa nɩ.
DƖ kwǝrǝ kam wʋ́ zaŋɩ baŋa baŋa,
nɩ nɔɔnʋ na nɔnɩ vinyə tiu biə yɩ o kɩ sɔɔ o yagɩ te tɩn.
Lʋgʋ baŋa nɔɔna maama wʋ́ ni Baŋa-Wɛ na bagɩ-ba te tɩn.
31 Sɔɔ kʋm kʋntʋ wʋ́ jagɩ kʋ yi lʋgʋ baŋa je maama.
Bɛŋwaanɩ, Baŋa-Wɛ jɩgɩ taanɩ dɩ dwi yam maama mʋ.
DƖ nan lagɩ DƖ di nabiinǝ maama taanɩ mʋ,
sɩ sʋ-lwaanʋ ti nɔn-balwaarʋ dwi dɩm.›
Baŋa-Wɛ na tagɩ te tɩn mʋ kʋntʋ.»
32 Paŋwa Tu Baŋa-Wɛ nan tagɩ tɩntʋ mʋ DƖ wɩ:
«Nii mʋ! Lɛɛrʋ lagɩ tɩ jagɩ
tɩ yi lʋgʋ baŋa tɩɩnɩ maama.
Najara zaŋɩ nɩ vu-dɩʋ mʋ te.
Ya ma nuŋi lʋgʋ baŋa je sɩlʋ na wʋ yigə yigə tɩn nɩ ya bɩɩnɩ.»
33 Najara yam na yiǝ, nɔɔna balʋ Baŋa-Wɛ na gʋ tɩn wʋ́ faarɩ tɩga baŋa je maama nɩ mʋ. Ba bá na nɔɔna sɩ ba keeri ba lwi naa ba kɩ-ba. Ba yɩra wʋ́ taa tigi tɩga baŋa je maama nɩ parɩ-parɩ, nɩ pʋpɔnɔ mʋ te.
34 Abam yigǝ tiinǝd bam, keeri-na á sisigi.
Tʋ-na tɩga nɩ á taá bibilə,
abam balʋ na yɩrɩ Wɛ nɔɔna bam tɩn.
Bɛŋwaanɩ, kʋ laan yi maŋa sɩ ba gʋ abam.
Á lagɩ á yɔɔrɩ á tʋ tɩga nɩ mʋ á cɩcʋgɩ,
nɩ kabələ na tʋ ka cɩcʋgɩ te tɩn.
35 Yigǝ tiinǝ bam bá na cwǝŋǝ sɩ ba duri ba lu.
Balʋ na yɩrɩ Wɛ nɔɔna bam tɩn bá na səgim je.
36 Cəgi-na sɩ á wʋ́ ni
yigǝ tiinǝ bam na keeri bɔgɩ-bɔgɩ te tɩn.
Balʋ na yɩrɩ Wɛ nɔɔna bam tɩn
dɩ ma kaasɩ ba yagɩ je maama nɩ.
Bɛŋwaanɩ, Baŋa-Wɛ mʋ lagɩ DƖ cɔgɩ tɩga kam
ba na kalɩ DƖ nɔɔna bam ba vu mɛ tɩn.
37 Pwəli sɩlʋ ya na jɩgɩ ga-zuru lanyɩranɩ tɩn
lagɩ sɩ yɔɔrɩ sɩ cɔgɩ mʋ,
Baŋa-Wɛ ban-lʋm dɩm na zaŋɩ tɩn ŋwaanɩ.
38 Baŋa-Wɛ viiri DƖ daarɩ DƖ tɩga kam
nɩ nyoŋo na yagɩ kʋ tigə je te tɩn mʋ.
Tɩga kalʋ Wɛ nɔɔna bam na zʋʋrɩ da tɩn yɔɔrɩ ka cɔgɩ mʋ.
Bɛŋwaanɩ, ba dʋna bam tiini ba zaŋɩ najara dɩ ba,
Baŋa-Wɛ banɩ na tiini dɩ zaŋɩ ba baŋa nɩ tɩn ŋwaanɩ.