Mɔɔla dwiə yale taanɩ
24
Babilɔnɩ tɩʋ pɛ Nebukadnɛtsarɩ dɛɛn jaanɩ Zuda tɩʋ pɛ Yeoyakim bu Yehoyakini Zeruzalɛm nɩ mʋ o kalɩ o ja o vu Babilɔnɩ. O ta kalɩ Zuda nakwa bam, dɩ ba tɩʋ gwarʋ, dɩ ba lurə bam maama mʋ o ja o viiri.a Kʋntʋ kwaga nɩ mʋ Baŋa-Wɛ lɩ wǝǝnu DƖ brɩ-nɩ. DƖ ma pa a na mɔɔla tɩtwarʋ tɩle, tɩ na zɩgɩ Baŋa-Wɛ digə kam yigə nɩ. 2 Tɩtɔgɔ dɩdʋa su dɩ mɔɔla na lana tɩn. Ya maa yɩ yalʋ na loori yigə ya kɩ tɩn mʋ. Tɩtɔgɔ kʋdoŋ kʋm wʋ mɔɔla yam ma pɔ, ya yɔɔrɩ ya wʋ maŋɩ dɩ dim!3 Baŋa-Wɛ ma bwe amʋ DƖ wɩ: «Zeremi, bɛɛ mʋ n nii n na?» Amʋ ma lǝr-o a wɩ: «Mɔɔla dwiə yale mʋ a nɛa. Yadonnǝ tiini ya lana. Yayam yam ba lana. Ya yɔɔrɩ ya daɩ ba kɩ ni nɩ.»
4 Baŋa-Wɛ dɛɛn ma pa amʋ ni DƖ wɩ:
5 «Amʋ Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ: Mɔɔla yalʋ na lana tɩn zɩgɩ ya paɩ Zuda tiinə balʋ a na kalɩ a ja a vu a yagɩ Babilɔnɩ tɩʋ wʋnɩ tɩn mʋ. Nɔɔna bam kʋntʋ lana amʋ yigə nɩ. 6 Amʋ wʋ́ taa nii ba baŋa nɩ pa kʋ kɩ lanyɩranɩ kʋ pa-ba. A ta wʋ́ joori a ja-ba a joori a ba yo seeni. A lagɩ a fɔgɩ a lɔ-ba a zɩgɩ mʋ, sɩ a daa bá vaarɩ-ba a dɩ tɩga nɩ a yagɩ. A maa wʋ́ jəri-ba tɩ-ywəŋə je nɩ, sɩ a bá vuuri-ba a gɔ a yagɩ. 7 A maa wʋ́ pa ba wʋbʋŋa ja sɩ ba taa kwarɩ amʋ wʋlʋ na yɩ Baŋa-Wɛ dɩm tɩn. Ba laan maa wʋ́ taa yɩ amʋ tɩtɩ nɔɔna, sɩ amʋ dɩ taa yɩ ba Wɛ. Bɛŋwaanɩ, ba lagɩ ba joori amʋ te dɩ ba bɩcarɩ maama mʋ.
8 Amʋ Baŋa-Wɛ daa ta maa wɩ: Kʋ daarɩ kʋ na yɩ Zuda tɩʋ pɛ Sedesɩasɩ, dɩ o nakwa bam, dɩ nɔɔna balʋ maama ta na daarɩ Zeruzalɛm tɩʋ kʋm wʋnɩ tɩn, dɩ balʋ na duri ba vu Ezipi tɩʋ ba zʋʋrɩ da tɩn, amʋ lagɩ a kɩ-ba nɩ mɔɔla yalʋ na pɔga yɩ ya daɩ sɩ ba di tɩn mʋ. 9 A lagɩ a pa lɛɛrʋ ba ba baŋa mʋ, sɩ ba ji wo-zɔɔna lʋgʋ baŋa tɩɩnɩ maama yiǝ nɩ. Nɔɔna maama wʋ́ nɩɩsɩ-ba mʋ, yɩ ba ta lɔŋɩ-ba. Ba ta maa wʋ́ taa yɩ sinsərə nɔɔna niə nɩ. Mɛ maama amʋ na wʋ́ pa ba jagɩ ba yi da tɩn, nɔɔna wʋ́ taa mwanɩ-ba, yɩ ba daarɩ ba maɩ ba yɩrɩ ba sɔɔlɩ lwarɩm ba pa daanɩ. 10 A lagɩ a pa ba tɩ najara wʋnɩ mʋ, sɩ kana dɩ yawɩ-cɛɛrʋ dɩ ja-ba tɩ gʋ, sɩ kʋ ta nii maŋa kalʋ ba yɩrɩ na saarɩ tɩga kalʋ a dɛɛn na kwe a pa ba dɩ ba nabaara bam tɩn wʋnɩ.»b