Baŋa-Wɛ wʋ́ joŋi DƖ nɔɔna DƖ yagɩ
23
Baŋa-Wɛ na tagɩ kʋlʋ tɩn mʋ tɩntʋ:«Lɛɛrʋ taa wʋ yigǝ tiinǝ balʋ na nii a nɔɔna bam tɩn yuu nɩ! Bantʋ nyɩ dɩ nayɩra balʋ na jɩgɩ a peeni sɩm ba cɔga tɩn mʋ, pa sɩ jagɩ je maama nɩ.»
2 Yisɩrayɛlɩ tiinə Baŋa-Wɛ dɩm nan na tagɩ nayɩra bam kʋntʋ taanɩ te tɩn mʋ tɩntʋ:
«Abam na zəli amʋ peeni sɩm pa sɩ jagɩ, yɩ á wʋ nii sɩ baŋa nɩ lanyɩranɩ tɩn, amʋ lagɩ a waarɩ abam mʋ, á lwarɩm kikiə yam ŋwaanɩ. 3 Kʋ na yɩ amʋ nɔɔna balʋ ta na daarɩ yɩ a zəli-ba je sɩlʋ maama nɩ tɩn, amʋ lagɩ a joori a la-ba sɩ ba nuŋi mɛ maama ba na ve tɩn mʋ, sɩ ba joori ba tɩtɩ tɩga kam nɩ. Ba laan maa wʋ́ puli zanzan. 4 A ta wʋ́ beeri nayɩra balʋ yigə na wʋ ba wʋnɩ tɩn a pa-ba, sɩ ba taa nii ba baŋa nɩ. Kʋntʋ wʋ́ pa fʋʋnɩ daa yɩ ja a nɔɔna bam, yɩ ba wʋlʋwʋlʋ dɩ bá je.»
5 Baŋa-Wɛ mʋ taga DƖ wɩ:
«Maŋa lagɩ ka yi
sɩ Davidi dwi dɩm puli naga dɩdʋa,
yɩ kʋ tu wʋ́ taa yɩ nɔn-ŋʋm mʋ.
Amʋ wʋ́ tiŋi wʋntʋ sɩ o di paarɩ,
yɩ o taa nii a nɔɔna baŋa nɩ dɩ yi-pʋrʋ.
O ta wʋ́ taa tɔgɩ cɩga dɩ o na kɩ nɔɔna te tɩn mʋ
tɩga kam maama nɩ.a
6 O paarɩ dim maŋa nɩ, Zuda tiinə wʋ́ na vrɩm,
yɩ Yisɩrayɛlɩ tiinə maama taa zʋʋrɩ dɩ yazurə.
Nɔɔna maa wʋ́ taa bǝi o yɩrɩ nɩ:
‹Baŋa-Wɛ mʋ bʋrɩ dɩbam bʋra dɩ cɩga.›
7 Cɩga tɩn, maŋa lagɩ ka yi sɩ balʋ na lagɩ ba du durə, sɩ ba daa yɩ ta wɩ: ‹A dugi dɩ Baŋa-Wɛ dɩlʋ na joŋi dɩbam Yisɩrayɛlɩ tiinə bam DƖ ja DƖ nuŋi Ezipi tɩʋ kʋm nɩ tɩn yɩrɩ dɩm.› 8 Ba laan wʋ́ taa tɛ ba wɩ: ‹A dugi dɩ Baŋa-Wɛ dɩlʋ na joŋi Yisɩrayɛlɩ tiinə bam DƖ ja DƖ nuŋi jazɩm baŋa seeni tɩʋ kʋm nɩ, dɩdaanɩ je sɩlʋ maama DƖ na jagɩ-ba tɩn yɩrɩ dɩm.› Bɛŋwaanɩ ba laan wʋ́ taa zʋʋrɩ ba tɩtɩ tɩga kam nɩ mʋ.»
Vwa-nijoŋnǝ bam taanɩ
9 A wʋʋ yɔɔrɩ kʋ cɔgɩ mʋ
dɩ nijoŋnǝ bam kikiə yam.
A yɩra maa zizigi dɩ ba kǝm dɩm.
Kʋ yɩ Baŋa-Wɛ tɩtɩ ŋwaanɩ,
dɩ taanɩ dɩlʋ DƖ na ŋɔɔnɩ bantʋ seeni tɩn ŋwaanɩ mʋ,
amʋ nyɩ dɩ nɔɔnʋ na nyɔgɩ sana o bugi tɩn.
10 Tɩga kam maama su dɩ balʋ na lɔgɩ amʋ kwaga nɩ tɩn mʋ.
Nijoŋnǝ bam duri ba tɔgɩ lwarɩm kikiə.
Ba na jɩgɩ dam ba kɩ te tɩn yɔɔrɩ kʋ ba tɔgɩ cwǝŋǝ.
Kʋntʋ ŋwaanɩ Wɛ sɔɔlɩ lwarɩm DƖ yagɩ tɩga kam baŋa nɩ,
pa ka keeri wʋ-cɔgɔ ŋwaanɩ.
Pwəli sɩm maama laan jigi tɩ-kʋra yɩranɩ.
11 «Nijoŋnǝ bam dɩ kaanɩm tiinə bam ba garɩ daanɩ,
ba wʋlʋwʋlʋ yǝri Wɛ.
Ba brɩ ba ja ba tɩtʋŋ-lwaannʋ tɩm
ba zʋ amʋ digə kam wʋnɩ mʋ ba kɩ.»
Baŋa-Wɛ na tagɩ te tɩn mʋ kʋntʋ.
12 «Kʋntʋ ŋwaanɩ, ba cwe sɩm wʋ́ taa yɩ lim mʋ,
yɩ sɩ taa seerə.
Nɔɔna wʋ́ zəli-ba cwe sɩm kʋntʋ wʋnɩ,
pa ba tʋ tɩga nɩ.
Maŋa kam na yi sɩ a waarɩ-ba,
a laan wʋ́ pa lɛɛrʋ tʋ ba baŋa nɩ.»
Baŋa-Wɛ na tagɩ te tɩn mʋ kʋntʋ.
13 «Amʋ nii a na nijoŋnə balʋ na wʋ Samari nɩ
yɩ ba jɩgɩ wo-zɔɔnɩ dɩlʋ ba kɩ tɩn.
Ba yǝni ba ma Baalɩ jwəm dɩm yɩrɩ mʋ
ba pwərisə.
Ba na kɩ te kʋntʋ tɩn
ma pa a nɔɔna Yisɩrayɛlɩ tiinə bam tusi.
14 Kʋ nan na yɩ nijoŋnə balʋ na wʋ Zeruzalɛm tɩʋ kʋm nɩ tɩn dɩ,
amʋ ta nɛ nɩ bantʋ kɩ wo-zɔɔnɩ kʋ ja gaalɩ.
Ba kaagɩ ba tɔgɩ boorim kikiə mʋ,
yɩ ba ta soe sɩ ba taa tʋŋɩ vwan.
Ba yɔɔrɩ ba wǝli ba donnǝ mʋ
sɩ ba taa kɩ tɩtʋŋ-balwaarʋ,
pa nɔɔna warɩ ba lwarɩm dɩm ba yagɩ.
Ba maama jigi nɩ Sodɔm tɩʋ tiinə na yɩ te tɩn mʋ a yigə nɩ.
Cɩga tɩn, Zeruzalɛm tiinə bam
yɩ nɩ Gomɔrɩ tɩʋ tiinə dɛɛn na yɩ te tɩn mʋ.»
15 Paŋwa Tu Baŋa-Wɛ dɩm nan na tagɩ nijoŋnǝ bam kʋntʋ taanɩ te tɩn mʋ tɩntʋ:
«Amʋ wʋ́ pa ba na yaara zanzan.
Kʋ maŋɩ sɩ ba di wʋdi-cɛɔ
yɩ ba daarɩ ba nyɔ na balʋ na jɩgɩ cɔŋɔ tɩn mʋ.
Bɛŋwaanɩ, Zeruzalɛm nijoŋnǝ bam kikiə ŋwaanɩ mʋ
nɔɔna swe amʋ swiə tɩga kam je maama nɩ.»
16 Paŋwa Tu Baŋa-Wɛ dɩm nan na tagɩ te tɩn mʋ tɩntʋ:
«Zeruzalɛm tiinə bam, yɩ cəgi-na nijoŋnə bantʋ na ŋɔɔnɩ te dɩ abam tɩn. Ba paɩ á jɩgɩ tɩɩna kafɛ mʋ. Kʋ maa yɩ ba tɩtɩ wʋbʋŋa mʋ ba jɩgɩ ba tɛ ba brɩ abam, sɩ ba wʋ ni taanɩ amʋ Baŋa-Wɛ ni nɩ. 17 Ba soe sɩ ba taa tɛ dɩ balʋ na vɩn amʋ taanɩ tɩn nɩ: ‹Baŋa-Wɛ tagɩ DƖ wɩ: abam wʋ́ na yazurə.› Kʋ ta na yɩ zwabani-nyɩna bam dɩ, ba tɛ dɩ ba mʋ ba wɩ: ‹Cam bá ba á baŋa maŋa dɩ maŋa!›b
18 Nijoŋnǝ bam kʋntʋ wɔɔ nan mʋ mɩ dɩ Baŋa-Wɛ,
sɩ kʋ tu maanɩ o lwarɩ Baŋa-Wɛ kwǝrǝ?
Ba wɔɔ mʋ brɩ o cəgi sɩ o ni o taanɩ dɩm?
19 Nii-na! Baŋa-Wɛ banɩ wʋ́ zaŋɩ lɩla,
nɩ vu-dɩʋ na zaŋɩ te tɩn mʋ.
Kʋ nan wʋ́ taa nyɩ dɩ kʋrɩm viu
na cugi nɔn-balwaarʋ yuu nɩ te tɩn mʋ.
20 Baŋa-Wɛ banɩ nan na zaŋɩ dɩ ba,
kʋ na daɩ nɩ DƖ kɩ DƖ su DƖ wʋbʋŋa yam mʋ,
DƖ bɩcarɩ dɩm ta bá zuri.
Maŋa kam nan na yiǝ,
abam laan wʋ́ ni kʋ kuri lanyɩranɩ.
21 Amʋ wʋ tʋŋɩ nijoŋnǝ bam kʋntʋ.
Dɩ kʋ dɩ, ba duri ba vu nɔɔna te
sɩ ba ŋɔɔnɩ amʋ yɩrɩ ŋwaanɩ.
Amʋ nan wʋ kwe a taanɩ a pa-ba,
yɩ ba ta kaagɩ ba pwərisə ba brɩ nɔɔna.
22 Ba nan ya na mɩ dɩ amʋ cɩga cɩga,
ba yaá tɔɔlɩ amʋ taanɩ dɩm
ba brɩ a nɔɔna bam.
Ba yaá pa a nɔɔna bam pipiri
ba yagɩ ba vwan cwe sɩm,
dɩ ba lwarɩm kikiə yam.»
23 Baŋa-Wɛ ta ma bwe DƖ wɩ:
«Abam bʋŋɩ nɩ a yɩ Wɛ dɩlʋ na wʋ jǝgǝ dɩdʋa bwələ bwələ yɩranɩ tɩn mʋ na? Á yǝri nɩ amʋ wʋ yigə yigə dɩ je maama nɩ na? 24 Gugoro wʋra lʋgʋ baŋa nɩ sɩ nɔɔnʋ səgi kʋ wʋnɩ yɩ a bá na kʋ tu na? Á yǝri nɩ amʋ yɔɔrɩ a su wɛyuu kʋm dɩ tɩga kam maama mʋ na?»
Kwǝrǝ kalʋ Baŋa-Wɛ na tagɩ tɩn mʋ kʋntʋ.
25 «Amʋ ni vwan yalʋ nijoŋnə bantʋ na kaagɩ ba ŋɔɔnɩ amʋ yɩrɩ ŋwaanɩ tɩn. Ba yɔɔrɩ ba tɛ mʋ ba wɩ: ‹Wɛ ŋɔɔnɩ dɩ amʋ dɩndwɛ wʋnɩ!› 26 Kʋ nan yɩ vwan mʋ ba jɩgɩ ba pwərisə. Ba tɩtɩ wʋbʋŋa mʋ ganɩ-ba pa ba ŋɔɔna. Baá kɩ kʋntʋ taan sɩ ba vu ba maŋɩ yən mʋ? 27 Ba maa kwaanɩ sɩ ba pa amʋ nɔɔna bam swe amʋ yɩrɩ dɩm, dɩ ba na lwǝni ba dɩndwɩa yam ba brɩ daanɩ te tɩn. Ba kɩ nɩnɛɛnɩ ba nabaara dɩ dɛɛn na kɩ te yɩ ba swe amʋ yɩrɩ dɩm ba daarɩ ba zuli Baalɩ jwəm dɩm tɩn mʋ. 28 Tɔ. Nijoŋnu na dwɛ dɩndwɛ, sɩ kʋ tu ta o brɩ dɩ na sɩɩnɩ dɩ yɩ te tɩn. Nijoŋnu kalʋ nan na joŋi amʋ taanɩ, sɩ kʋ tu yɔɔrɩ o brɩ-dɩ cɩga cɩga. Taana yantʋ daɩ bɩdwɩ: nɩ mɩn-swaanʋ na daɩ mɩna yam cɩga cɩga te tɩn!»
Baŋa-Wɛ na tagɩ te tɩn mʋ kʋntʋ.
29 «Amʋ taanɩ zwɛ wǝǝnu nɩ mim na kɩ te tɩn mʋ. Dɩ ta maa nyɩ dɩ hama na jɩgɩ kandwa-zana dɩ lɔɛ mugə-mugə te tɩn. Kʋ daɩ kʋntʋ na?
30 Kʋntʋ tɩn, kʋ na yɩ nijoŋnə balʋ na kaagɩ ba jɩnɩ da-taana ba ŋɔɔnɩ, yɩ ba wɩ kʋ yɩ amʋ kwǝrǝ mʋ ba jɩgɩ ba ŋɔɔnɩ tɩn, amʋ nuŋi ba kwaga nɩ. 31 Cɩga tɩn, amʋ yigə tǝrǝ nijoŋnə balʋ na ŋɔɔnɩ ba tɩtɩ taanɩ yɩ ba tɛ ba wɩ: ‹Baŋa-Wɛ kwǝrǝ mʋ tɩntʋ› tɩn wʋnɩ. 32 Nii-na! Amʋ Baŋa-Wɛ mʋ tagɩ a wɩ: A culi balʋ na dwɛ dɩndwɩa yɩ ba daarɩ ba ŋɔɔnɩ vwan ya ŋwaanɩ tɩn. Ba na yɔɔrɩ ba fɔɩ vwan ba brɩ a nɔɔna bam te tɩn maa paɩ ba kɩ lwarɩm. Amʋ wʋ kuri nijoŋnǝ bam kʋntʋ. A ta wʋ tʋŋɩ-ba a nɔɔna bam tee nɩ. Ba brɩ ba ba wǝli a nɔɔna bam dɩ fɩnfɩɩn dɩ.»
Baŋa-Wɛ na tagɩ te tɩn mʋ kʋntʋ.
Baŋa-Wɛ laan ma ta dɩ amʋ DƖ wɩ:
33 «Nɔɔna bantʋ wʋnɩ, naa ba nijoŋnǝ bam wʋnɩ, naa ba kaanɩm tiinə wʋnɩ dɩdʋa na bwe‑m o wɩ: ‹Baŋa-Wɛ daa kwe zɩlɩ dɔɔ mʋ sɩ DƖ pa dɩ́ zɩŋɩ?›, sɩ n ta dɩ kʋ tu wɩ: ‹Abam mʋ yɩ zɩlɩ dɩlʋ na daanɩ Baŋa-Wɛ tɩn mʋ! Baŋa-Wɛ wɩ DƖ lagɩ dʋlɩ abam mʋ DƖ yagɩ!›
34 Nijoŋnu wʋlʋ, naa kaanɩm tu wʋlʋ, naa nɔɔnʋ wʋlʋ maama nan na tagɩ o wɩ: ‹Baŋa-Wɛ kwe zɩlɩ dɩntʋ mʋ o pa-nɩ›, amʋ wʋ́ waarɩ kʋ tu mʋ dɩ o sɔŋɔ tiinə maama.
35 Abam nan na maŋɩ sɩ á bwe daanɩ te tɩn mʋ tɩntʋ: ‹Baŋa-Wɛ ləri dɩbam DƖ wɩ bɛɛ mʋ?› naa ‹Baŋa-Wɛ tagɩ DƖ wɩ bɛɛ mʋ?›. 36 Á nan daa yɩ taá tɛ nɩ: ‹Zɩlɩ dɩlʋ Baŋa-Wɛ na pɛ dɩbam tɩn mʋ tɩntʋ.› Bɛŋwaanɩ, abam tɩtɩ kwǝrǝ mʋ yɩ zɩlɩ dɩlʋ na daanɩ abam tɩn. Á tɔgɩ kʋntʋ baŋa á kwɩɩlɩ dɩ́ Tu Wɛ dɩm taanɩ dɩm á yagɩ tɩga nɩ, yɩ Dɩntʋ mʋ yɩ Ŋwɩa Tu Baŋa-Wɛ dɩ Paŋwa Tu Baŋa-Wɛ dɩm. 37 Abam nan na yǝni á vu nijoŋnu te, sɩ á bwe‑o nɩnɛɛnɩ: ‹Baŋa-Wɛ ləri‑m DƖ wɩ bɛɛ mʋ?› naa ‹Baŋa-Wɛ tagɩ DƖ wɩ bɛɛ mʋ?› 38 Á nan ta na tɛ á wɩ: ‹Zɩlɩ dɩlʋ Baŋa-Wɛ na pɛ dɩbam tɩn mʋ tɩntʋ›, taá ye-na nɩ amʋ Baŋa-Wɛ na tagɩ te tɩn mʋ tɩntʋ: Abam ta na tagɩ nɩ ‹Zɩlɩ dɩlʋ Baŋa-Wɛ na pɛ dɩbam tɩn mʋ tɩntʋ›, yɩ a maŋɩ a kaanɩ abam nɩ á daa yɩ taá tɛ kʋntʋ doŋ tɩn ŋwaanɩ, 39 amʋ yɔɔrɩ a lagɩ a gɔ abam a dʋlɩ a yagɩ yigə yigə mʋ. A ta wʋ́ zəli á tɩʋ kʋm maama amʋ dɛɛn na pɛ abam dɩ á nabaara bam tɩn sɩ á viiri amʋ yigə nɩ. 40 A laan maa wʋ́ pa á na cavɩɩra yalʋ na bá fɔgɩ ya ti tɩn. Abam bá swe á na wʋ́ yáalɩ te tɩn ni nɩ.»