Zuda pwa bam taanɩ
22
Baŋa-Wɛ dɛɛn ma ta dɩ amʋ DƖ wɩ: «Zaŋɩ n vu Zuda tɩʋ pɛ sɔŋɔ sɩ n ta amʋ kwǝrǝ n pa-ba nɩ: 2 ‹Zuda tɩʋ pɛ wʋlʋ na nuŋi Pɛ Davidi dwi dɩm wʋnɩ tɩn, kʋ wǝli dɩ nakwa bam, dɩ balʋ maama na tɔgɩ manco-pɩɩna yantʋ ba kɛ tɩn, cəgi-na Baŋa-Wɛ taanɩ dɩm! 3 Baŋa-Wɛ na tagɩ te tɩn mʋ tɩntʋ:Taá tɔgɩ-na cɩga dɩ á na kɩ nɔɔna te tɩn. Á na maanɩ nɩ ba vrɩ nabwəm wʋlʋ, sɩ á joŋi kʋ tu á yagɩ wʋlʋ na bɛɛs-o tɩn jɩŋa nɩ. Kʋ na yɩ vərə balʋ na zʋʋrɩ á tee nɩ tɩn, dɩ bɩtara, dɩ kadənə, sɩ á yɩ bɛɛsɩ-ba naa á kɩ-ba lwarɩm. Nan yɩ zaŋɩ-na á gʋ balʋ na wʋ maŋɩ sɩ ba tɩ tɩn je sɩntʋ nɩ.a 4 Abam na sɛ amʋ niə yam kʋntʋ, á tɩʋ kʋm pwa balʋ na nuŋi Pɛ Davidi dwi dɩm nɩ tɩn wʋ́ taa wʋra mʋ taan, yɩ ba tɔgɩ niə yantʋ seeni ba kɛa. Pwa bam kʋntʋ dɩdaanɩ ba nakwa wʋ́ yǝni ba di sise-tərikooru dɩ siseŋ-nɔɔna baŋa nɩ ba tɔgɩ manco-pɩɩna yantʋ ba kɛ mʋ, yɩ ba nɔɔna bam dɩ tɔgɩ ba kwaga. 5 Abam nan na wʋ sɛ amʋ niə yam kʋntʋ, amʋ tagɩ a du dɩ a tɩtɩ yɩrɩ nɩ: sɔ-fɔrɔ kʋntʋ lagɩ kʋ ji di-doŋo mʋ. Amʋ Baŋa-Wɛ na tagɩ te tɩn mʋ kʋntʋ.› »
6 Baŋa-Wɛ nan tagɩ tɩntʋ mʋ sɩ kʋ vu Zuda tɩʋ pɛ sɔŋɔ kʋm seeni:
«Sɔ-fɔrɔ kʋm kʋntʋ tiini kʋ lana amʋ yiǝ nɩ,
nɩ Galadɩ laŋa kam
dɩ Liban pweeru tɩm na yɩ te tɩn mʋ.
Amʋ nan wʋ́ pa kʋ ji nɩ kagʋa doŋ,
sɩ nɔɔn-nɔɔnʋ yɩ taa zʋʋrɩ kʋ wʋnɩ.
7 Amʋ mʋ lagɩ a tʋŋɩ jar-kərə
sɩ ba ba ba cɔgɩ-kʋ.
Baá taa jɩgɩ ba jara zɩla mʋ,
sɩ ba goni Sɛdrɩ ywə yam
ba dʋlɩ-ya ba dɩ mim wʋnɩ.
8 Kʋ kwaga nɩ dwi-gɛ tiinə zanzan wʋ́ tɔgɩ tɩʋ kʋntʋ seeni sɩ ba kɛ, yɩ ba bwe daanɩ ba wɩ: ‹Bɛŋwaanɩ mʋ Baŋa-Wɛ cɔgɩ tɩʋ kʋm tɩntʋ doŋ, yɩ kʋ ya yɩ tɩʋ kamunu mʋ?› 9 Ba maa wʋ́ lǝri-ba ba ta nɩ: ‹Kʋ yɩ ba na vɩn ni dɩlʋ ba Tu Baŋa-Wɛ dɩm na goni dɩ ba tɩn, yɩ ba daarɩ ba zuli wa-gɛ tɩn ŋwaanɩ mʋ o kɩ-ba kʋntʋ.› »
Pɛ Yoahazɩ yɩra taanɩb
10 Yɩ taá keeri-na pɛ wʋlʋ na tɩgɩ tɩn ŋwaanɩ,c
naa á taá nywanɩ yigə.
Kʋ nan na yɩ á pɛ wʋlʋ ba na kalɩ
ba jɩgɩ ba ve sa-tɩʋ yigə yigə tɩn,d
sɩ á taá keerǝ wʋntʋ ŋwaanɩ.
Wʋntʋ daa bá joori yo seeni,
sɩ o ma o yi o na o nabaara tɩga kam.
11 Bɛŋwaanɩ, Baŋa-Wɛ jɩgɩ kwǝrǝ sɩ DƖ pa Zʋzɩasɩ bu Yoahazɩe wʋlʋ na ləri o ko yuu nɩ o di Zuda tɩʋ paarɩ, yɩ ba laan kal‑o ba ja ba viiri tɩn. Wɛ kwǝrǝ kam mʋ tɩntʋ: «O daa bá joori yo seeni. 12 O lagɩ o tɩ sa-tɩʋ nɩ mʋ yigə yigə, sɩ o daa yɩ na o nabaara tɩga kam.»f
Pɛ Yeoyakim taanɩ
Baŋa-Wɛ ma ta DƖ wɩ:
13 «Lɛɛrʋ wʋ wʋlʋ na tɔgɩ vwan cwǝŋǝ
sɩ o ma o lɔ o sɔ-fɔrɔ kʋm tɩn yuu nɩ.
O ta ma kɩ kampinə sɩ o ma o yalɩ-kʋ o zɩgɩ.
O ma daarɩ o pa o nɔɔna tʋŋɩ zaanɩ mʋ ba pa‑o,
yɩ o ba sɛ o ŋwɩ-ba ba tɩtʋŋa ŋwaanɩ.
14 Wʋntʋ maa tɛ o wɩ: ‹Amʋ wʋ́ lɔ sɔ-fɔrɔ mʋ a pa a tɩtɩ,
dɩ kʋ nayuu di sɩlʋ na yalma tɩn.›
O ta ma kɩ takwəəru zanzan kʋ wʋnɩ,
sɩ o daarɩ o kwe Sɛdrɩ dɛ
o ma o kwɛ kʋ di sɩm.
O laan ma kwe pɛntiiri nasʋŋʋ dwi dwi o ma o kwɛ-kʋ.
15 Nmʋ na yɩ pɛ tɩn,
kʋ yɩ n na mɛ da-ŋʋnnʋ
n lɔ sɔ-fɔrɔ tɩn ŋwaanɩ mʋ na?
Bʋŋɩ n nii n ko Zʋzɩasɩ na yɩ te tɩn.
Wʋntʋ dɛɛn tɔgɩ cwǝŋǝ dɩ o na kɩ nɔɔna te tɩn.
O maa naɩ o dɛ dɛ wʋdiu pa kʋ maŋɩ dɩd-o,
yɩ wǝǝnu tɔgɩ cwǝŋǝ tɩ pa‑o.
16 O dɛɛn joŋi nabwənə taanɩ o ŋɔɔnɩ o pa-ba.
Kʋntʋ ŋwaanɩ wǝǝnu maama kwe cwǝŋǝ tɩ pa‑o.
O kənə yam kʋntʋ brɩ nɩ o yɔɔrɩ o ye amʋ.
Kʋ daɩ kʋntʋ na?»
Baŋa-Wɛ na tagɩ te tɩn mʋ kʋntʋ.
17 «Kʋ nan na yɩ nmʋ,
n wʋbʋŋa yam jaanɩ ya ti
sɩ n ma vwan mʋ n duni.
N ma n gʋɩ balʋ na wʋ maŋɩ sɩ ba tɩ tɩn,
yɩ n daarɩ n jɩgɩ n nɔɔna bam n bɛɛsa dɩ dam.»
18 Kʋntʋ ŋwaanɩ, Baŋa-Wɛ na tagɩ kʋlʋ Zʋzɩasɩ bu Yeoyakim na yɩ Zuda tɩʋ pɛ tɩn seeni tɩn mʋ tɩntʋ:g
«O na tɩga, nɔɔn-nɔɔnʋ bá keeri o luə.
Ba bá ta nɩnɛɛnɩ, ‹Lɛɛrʋ mʋ yi dɩbam!›
Ba wʋrʋ nan bá cɔgɩ dɩ o tʋʋnɩ dɩm,
sɩ ba keeri nɩ ba tu wʋm dɩ o nɩnwaŋa je.
19 Ba lagɩ ba kɩ-o
nɩ ba na suli bɩnaga te tɩn mʋ.
Baá tuur‑o mʋ
ba ja ba nuŋi Zeruzalɛm tɩʋ kʋm wʋnɩ,
sɩ ba kɛ ba dʋl-o ba yagɩ tɩʋ kʋm kəbrə kwaga nɩ.
20 Zeruzalɛm tiinə bam, ve-na Liban laŋa kam á kaasɩ dáanɩ,
Pa-na sɩ á kwǝri zɩgɩ Basan nɩ sɩ zaŋɩ wɛɛnɩ.
Ve-na Abarim pweeru tɩm wʋnɩ sɩ á keeri.
Bɛŋwaanɩ á cilonnə bam maama daa tǝrǝ je je
sɩ ba wǝli abam.
21 Wǝǝnu maama ya ta na ve lanyɩranɩ tɩ paɩ abam tɩn,
mʋ a kaanɩ abam.
Abam ma vɩn yɩ á wɩ: ‹Dɩ́ bá cəgi nmʋ ni-kaana yam.›
Abam nan maŋɩ á yɩ kʋntʋ mʋ
sɩ kʋ zɩgɩ á biini nɩ.
Á yǝni á ba sɛ á paɩ amʋ.
22 Abam yigǝ tiinǝ bam maama lagɩ ba je,
nɩ viu mʋ kalɩ-ba kʋ ja je te tɩn.
Ba maa wʋ́ ja á doonə bam ba viiri ba vu sa-tɩʋ.
Cavɩɩra laan wʋ́ di abam yɩ á yuu yáalɩ,
á wʋ-lʋŋʋ tɩtʋŋa yam ŋwaanɩ.
23 Abam jɩgɩ dalɩm je á sɔ-fwaarʋ tɩm wʋnɩ,
dɩ á na mɛ Liban tɩʋ da-ŋʋnnʋ á lɔ-tɩ tɩn.
Kʋ nan bá daanɩ sɩ abam tiini á keeri,
nɩ kaanɩ wʋlʋ na vri pugə yɩ ka wɔɛ te tɩn.»
Pɛ Yehoyakinih taanɩi
24 Baŋa-Wɛ nan na tagɩ te tɩn mʋ tɩntʋ:
«Yeoyakim bu Yehoyakini na yɩ Zuda tɩʋ pɛ tɩn, a lagɩ a vaŋɩ nmʋ mʋ a lɩ a yagɩ, nɩ n yɩ jafʋlɩ dɩlʋ na brɩ amʋ dam yɩ a vaŋɩ-dɩ a lɩ a jazɩm jɩŋa nɩ te tɩn mʋ. 25 A maa wʋ́ kwe‑m a kɩ balʋ na beeri‑m sɩ ba gʋ tɩn jɩŋa nɩ. Nmʋ nan yɔɔrɩ n kwarɩ fʋʋnɩ dɩ ba mʋ. A nan lagɩ a kwe‑m a pa Babilɔnɩ tɩʋ pɛ Nebukadnɛtsarɩ dɩ o jar-kərə mʋ. 26 A ta wʋ́ kwe nmʋ dɩ n nu a dʋlɩ a yagɩ sa-tɩʋ nɩ yigə yigə. Ba wʋ lʋgɩ abam tɩʋ kʋm kʋntʋ nɩ. Á nan wʋ́ maŋɩ dáanɩ sɩ á tɩ. 27 Á daa bá joori tɩga kantʋ á fra na wʋ ka wʋnɩ tɩn.»
28 Yehoyakini nyɩ dɩ zʋŋ-kwaga kalʋ na ba jɩgɩ kuri tɩn mʋ.
O maa yɩ wʋlʋ nɔɔna maama na vaɩ tɩn.
Kʋ sɩɩnɩ kʋ kɩ-o kʋntʋ mʋ na?
Bɛɛ mʋ kɩ yɩ ba lagɩ ba ja o dɩ o biə bam
ba dʋlɩ ba yagɩ sa-tɩʋ kʋlʋ ba na yǝri tɩn wʋnɩ?
29 Tɩga baŋa tiinə bam, tɩga baŋa tiinə bam,
nan cəgi-na Baŋa-Wɛ kwǝrǝ kam!
30 Baŋa-Wɛ na tagɩ te tɩn mʋ tɩntʋ:
«Pʋpʋnɩ-na Yehoyakini yɩrɩ dɩm á tiŋi,
sɩ kʋ brɩ nɩnɛɛnɩ o ya ba jɩgɩ biə.
Wʋntʋ ŋwɩa maama wʋnɩ,
kʋ bá kɩ lanyɩranɩ kʋ pa‑o.
Kʋ ta na yɩ o biə bam dɩ,
ba wʋlʋwʋlʋ bá di paarɩ Zuda tiinə baŋa nɩ,
nɩ ba nabaarʋ Davidi dɛɛn na di paarɩ te tɩn.»