Wɛ wʋ́ waarɩ Zuda pwa dɩ yigǝ tiinǝ
21:1–29:32
Wɛ vɩn Sedesɩasɩ na loori‑o kʋlʋ tɩn
21
Baŋa-Wɛ na pɛ Zeremi ni dɩlʋ tɩn mʋ tɩntʋ. Pɛ Sedesɩasɩ dɛɛn tʋŋɩ Malakɩya bu Pasuuri, dɩ Maaseya bu Sofoni na yɩ Wɛ kaanɩm tu tɩn sɩ ba vu Zeremi te ba ŋɔɔnɩ dɩd-o. Ba ma loori‑o ba wɩ: 2 «Loori Baŋa-Wɛ sɩ DƖ joŋi dɩbam DƖ yagɩ. Pɛ Nebukadnɛtsarɩ puli sɩ o zaŋɩ najara dɩdaanɩ dɩ́ tɩʋ kʋm mʋ. Dɛdoŋ, Baŋa-Wɛ daa wʋ́ duri dɩ́ ŋwaŋa sɩ DƖ kɩ wo-kɩnkagɩlɩ nɩ DƖ na kɩ te faŋa tɩn, sɩ DƖ zəli Nebukadnɛtsarɩ sɩ o joori o viiri o daarɩ dɩbam.»3 Zeremi dɛɛn ma kwe Baŋa-Wɛ kwǝrǝ kam o ma o lǝri-ba o wɩ: «Ve-na á ta dɩ Sedesɩasɩ wɩ: 4 ‹Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ:
Babilɔnɩ tɩʋ pɛ wʋm dɩ o jar-kərə bam laan kaagɩ á tɩʋ kʋm ba pu. Kʋ nan na yɩ najara zɩla yalʋ á na jɩgɩ á ma á jeeri-ba tɩn, a lagɩ a pa ya joori ya ba á baŋa nɩ, pa á kwalɩmɩ-ya á tiŋi á tɩʋ kʋm tɩtarɩ nɩ mʋ. 5 Amʋ tɩtɩ mʋ wʋ́ tɔgɩ a dam baŋa nɩ a tʋŋɩ wo-kamunnu yɩ a zaŋɩ najara dɩ abam, a banɩ na tiini dɩ fuli á baŋa nɩ tɩn ŋwaanɩ. 6 A nan wʋ́ pa kʋ zʋ balʋ maama na zʋʋrɩ tɩʋ kʋntʋ wʋnɩ tɩn yɩra. Kʋ na yɩ nabiinǝ dɩ vara bam maama, yawɩ-cɛɛrʋ mʋ lagɩ tɩ gʋ-ba. 7 Kʋ kwaga nɩ, amʋ Baŋa-Wɛ wʋ́ kwe Zuda tɩʋ pɛ Sedesɩasɩ, dɩ o nakwa, dɩdaanɩ tɩʋ kʋntʋ nɔɔna balʋ maama yawɩ-cɛɛrʋ tɩm, dɩ najara yam, dɩ kana kam ta na wʋ gʋ-ba tɩn, a kɩ Pɛ Nebukadnɛtsarɩ jɩŋa nɩ, dɩ abam dʋna balʋ na beeri á gʋm tɩn jɩŋa nɩ. Wʋntʋ brɩ o bá duri ba ŋwaŋa dɩ fɩnfɩɩn dɩ yɩ o pa ba maama ga ba ŋwɩa. Amʋ Baŋa-Wɛ na tagɩ te tɩn mʋ kʋntʋ.›a
8 Daa n ta ta dɩ nɔɔna bam wɩ: ‹Baŋa-Wɛ dɩm na tagɩ te tɩn mʋ tɩntʋ: Amʋ zɩm pɛ abam cwǝŋǝ mʋ sɩ á kuri cwe sɩle tɩtarɩ nɩ: kuri-na ŋwɩa, naa tʋʋnɩ. 9 Wʋlʋ maama na maŋɩ tɩʋ kʋntʋ wʋnɩ, najara, naa kana, naa yawɩ-cɛɔ mʋ wʋ́ gʋ kʋ tu. Wʋlʋ nan na nuŋi tɩʋ kʋm wʋnɩ o vu o sɛ o pa Babilɔnɩ tiinə bam, kʋ tu wʋ́ joŋi o tɩtɩ o yagɩ. 10 Kʋ na yɩ te tɩn, amʋ wʋbʋŋa jaanɩ ya ti sɩ a pa lɛɛrʋ mʋ yi tɩʋ kʋntʋ, yɩ kʋ daɩ lam. A lagɩ a kwe-kʋ a kɩ Babilɔnɩ tɩʋ pɛ jɩŋa nɩ, sɩ o zwɛ-kʋ dɩ mim! Amʋ Baŋa-Wɛ na tagɩ te tɩn mʋ kʋntʋ.› »b
Zuda tɩʋ pwa bam taanɩ
Baŋa-Wɛ daa ta ma ta dɩ amʋ DƖ wɩ:
11-12 «Nan ta tɩntʋ n wǝli da n brɩ balʋ na yɩ Zuda tɩʋ Pɛ sɔŋɔ tiinə yɩ ba nuŋi Pɛ Davidi dwi dɩm wʋnɩ tɩn nɩ: ‹Baŋa-Wɛ na tagɩ kʋlʋ tɩn mʋ tɩntʋ:
Dɛ maama wʋnɩ, sɩ á taá kɩ cɩga dɩ balʋ á na nii tɩn.
Abam na maanɩ nɩ ba vrɩ nabwəm wʋlʋ,
sɩ á joŋi kʋ tu á yagɩ wʋlʋ na bɛɛs-o tɩn jɩŋa nɩ.
Á na wʋ kɩ kʋntʋ, a banɩ wʋ́ zaŋɩ dɩ di abam nɩ mim te tɩn,
á lwarɩm kikiə yalʋ á na kaagɩ á kɩ tɩn ŋwaanɩ.
Nɔɔn-nɔɔnʋ nan bá wanɩ mim dɩm kʋntʋ o dwe.
13 Zeruzalɛm pɛ sɔŋɔ kʋm,
amʋ nuŋi abam kwaga nɩ mʋ!
Á sɔŋɔ kʋm dɔgɩ pweeru yuu nɩ,
kʋ jeeri bolo kʋlʋ na wʋ kʋ kuri nɩ tɩn.
Abam laan maa tɛ wɩ:
«Wɔɔ mʋ wʋ́ wanɩ o yi sɩ o cɔgɩ dɩbam?
Wɔɔ mʋ wʋ́ wanɩ o zʋ dɩ́ dalɩm je sɩntʋ wʋnɩ?»
14 Amʋ nan wʋ́ waarɩ abam
sɩ kʋ maŋɩ dɩ á tɩtʋŋa na yɩ te tɩn.
Kʋ na yɩ á sɔ-fɔrɔ kʋm,
amʋ wʋ́ pa kʋ di sɩm ja mim,
sɩ mim dɩm di woŋo kʋlʋ maama na bwələ da tɩn kulə!
Amʋ Baŋa-Wɛ na tagɩ te tɩn mʋ kʋntʋ.› »