Zeremi dɩ Pasuuri taanɩ
20
Yimera bu Pasuuri dɛɛn mʋ yɩ kaanɩm tu wʋlʋ na nii Baŋa-Wɛ digə kam tɩtʋŋa yam baŋa nɩ tɩn. O ma ni Zeremi na pwərisi o pa Zeruzalɛm te tɩn. 2 O ma pa ni sɩ ba ja Wɛ nijoŋnu Zeremi ba magɩ, sɩ ba daarɩ ba ja-o ba vɔ dɩ capʋnnʋ.a Ba dɛɛn lugi dɛ mʋ ba kɩ o nɛ nɩ yɩ ba pɩ-o sɩ kʋ maŋɩ dɩ Bɛnzamɛn Ni dɩm na wʋ Wɛ-digə kam baŋa seeni tɩn. 3 Tɩga na pʋʋrɩ tɩn, Pasuuri ma pa ba bwǝl-o ba yagɩ. Zeremi ma ta o brɩ-o o wɩ: «Baŋa-Wɛ laan ləni n yɩrɩ dɩm mʋ. Dɩ daa daɩ ‹Pasuuri›. Dɩ laan wʋ́ taa yɩ ‹Ba fugi-nɩ je maama nɩ› mʋ. 4 Bɛŋwaanɩ, Baŋa-Wɛ na tagɩ te tɩn mʋ tɩntʋ:Amʋ wʋ́ pa á dʋna ba ba fugi nmʋ dɩ n badonnǝ bam maama. Nmʋ wʋ́ ta n zɩgɩ n nii mʋ yɩ á dʋna bam gʋ-ba dɩ sʋ-lwaanʋ. A nan ta wʋ́ kwe Zuda tiinə bam maama a kɩ Babilɔnɩ tɩʋ pɛ wʋm jɩŋa nɩ, sɩ o kalɩ-ba o ja o vu Babilɔnɩ, naa o gʋ-ba jara-kǝm baŋa nɩ. 5 A ta wʋ́ pa ba dʋna bam cwǝŋǝ sɩ ba zʋ Zeruzalɛm tɩʋ kʋm ba vrɩ kʋ jɩjɩgɩrʋ tɩm maama. Kʋ na yɩ wǝǝnu tɩlʋ nɔɔna na yaarɩ ba na tɩn, dɩ tɩlʋ na tiini tɩ jɩgɩ lʋnnɩ tɩn, dɩ wo-laarʋ tɩlʋ Zuda pwa bam na nɛ tɩn, ba dʋna bam wʋ́ pɛ tɩ maama ba ja ba vu Babilɔnɩ ba cɛ ba pa daanɩ. 6 Kʋ na yɩ nmʋ Pasuuri, ba lagɩ ba ja nmʋ, dɩ n sɔŋɔ tiinə maama mʋ ba kalɩ ba vu Babilɔnɩ. Dáanɩ mʋ nmʋ wʋ́ tɩ, sɩ ba daarɩ ba kɩ-m da. Kʋ ta wʋ́ taa yɩ bɩdwɩ mʋ dɩ n badonnǝ bam maama, Bɛŋwaanɩ, n ŋɔɔnɩ vwan mʋ n brɩ-ba.»
Zeremi daa pʋʋnɩ Wɛ yigə nɩ
7 Baŋa-Wɛ, nmʋ sʋgɩ amʋ mʋ,
pa a ji nmʋ tɩntʋŋnʋ.
Amʋ dɩ ma pa nmʋ cwǝŋǝ
sɩ n sʋgɩ-nɩ kʋntʋ.
Nmʋ dam dɩm wanɩ amʋ dɩ di.
Nɔɔna maama laan jɩgɩ-nɩ mʋ ba mwana.
Ba maa twɩ-nɩ dɛ maama wʋnɩ.
8 Amʋ na yǝni a puri a ni
sɩ a ŋɔɔnɩ taanɩ,
kʋlʋ yɩranɩ a na tɔɔlɩ tɩn
yɩ vuvugə dɩ lɛɛrʋ taanɩ mʋ!
Baŋa-Wɛ kwǝrǝ kalʋ a na maŋɩ sɩ a tɔɔlɩ tɩn
ma ja tʋrʋ dɩ goonə yɩranɩ
ka ba ka pa-nɩ.
9 Amʋ nan na tagɩ a tɩtɩ nɩ a wɩ:
«Amʋ daa bá bʋŋɩ Baŋa-Wɛ wʋbʋŋa,
a nan daa bá tɔɔlɩ DƖ kwǝrǝ kam,»
DƖ taanɩ dɩm laan yǝni dɩ daanɩ-nɩ
nɩ mim na di a wʋnɩ te tɩn mʋ.
Kʋ nyɩ dɩ mim mʋ jɩgɩ a kwi sɩm dɩ zwɛa.
A na kwaanɩ sɩ a cɩ o kwǝrǝ kam
sɩ a daa yɩ tɔɔlɩ-ka,
a warɩ a tɩtɩ sɩ a ja.
10 Amʋ yɔɔrɩ a ni nɔɔna na jɩgɩ a taanɩ mʋ
ba waasa yɩ ba wɩ:
«Ba fugi dɩbam je maama nɩ!
Nan pa dɩ́ ba bɩbara dɩ́ daŋɩ o baŋa nɩ!
Dɩ́ wʋ́ pa o tʋ dɩ o bʋra.»
Amʋ cilon-sonnu tɩm maama
dɩ maa lagɩ sɩ a seeri a tʋ.
Ba maa wɩ:
«Pa-na dɩ́ sʋg-o sɩ o kɩ o sa cwǝŋǝ.
Dɩ́ laan wʋ́ wanɩ dɩ́ di dam o baŋa nɩ
sɩ dɩ́ joori dɩ́ ŋwɩ jɩnɩ o baŋa nɩ.»
11 Baŋa-Wɛ nan zɩgɩ a tee nɩ mʋ, nɩ babɩa te.
Kʋntʋ ŋwaanɩ mʋ balʋ na bɛɛsɩ-nɩ tɩn
wʋ́ seeri ba tʋ tɩga nɩ.
Ba bá yi amʋ yuu.
Ba nan wʋ́ di cavɩɩra.
Nɔɔna bá fɔgɩ ba swe bantʋ yuu na yáalɩ te tɩn.
12 Paŋwa Tu Baŋa-Wɛ, nmʋ yǝni n maŋɩ
balʋ na yɩ nɔn-ŋʋna tɩn mʋ n nii.
N maŋɩ n ye ba bɩcara
dɩ ba wʋbʋŋa na yɩ te tɩn.
Nan zaŋɩ n waarɩ-ba n pa-nɩ,
sɩ n joori n ŋwɩ jɩnɩ ba baŋa nɩ.
Bɛŋwaanɩ, a kwe a taanɩ dɩm a kɩ nmʋ jɩŋa nɩ mʋ.
13 Nan leeni-na ləŋə á pa Baŋa-Wɛ!
Tee-na DƖ yɩrɩ!
Bɛŋwaanɩ DƖ yǝni DƖ joŋi nabwənə mʋ
DƖ yagɩ nɔn-balwaarʋ jɩŋa nɩ.
14 A nan wʋ́ sɔɔlɩ lwarɩm mʋ
a yagɩ a lʋra dɛ dɩm baŋa nɩ!
Dɛ dɩm a nu na lʋgɩ-nɩ tɩn daɩ wʋpolo dɛ!
15 Kʋ ta na yɩ wʋlʋ na tu o pa a ko kwǝrǝ,
pa o dɩ wʋʋ poli, yɩ o ta dɩd-o o wɩ:
«Ba lʋgɩ bəkərə ba pa‑m» tɩn,
aá sɔɔlɩ lwarɩm a yagɩ kʋ tu dɩ yuu nɩ.
16 Wɛ wʋ́ pa kʋ tu na cɔgɩm
nɩ faŋa faŋa tɩɩnɩ dɩlʋ Baŋa-Wɛ na cɔgɩ,
yɩ DƖ wʋ jaanɩ dɩ ŋwaŋa tɩn mʋ.
Zɩzɩŋa nɩ, kʋ tu wʋ́ ni kərə mʋ na zaŋɩ bugi-bugi.
Wɩa tɩtarɩ nɩ, tiguri-kaasa wʋ́ tʋ o zwa nɩ.
17 Kʋ tu ya na gʋ-nɩ yɩ a tigi a nu pugə nɩ mʋ,
kʋ yaá taa gara.
A nu pugə kam yaá lɛɛrɩ ka ji a yibeeli.
O yaá taa jɩgɩ a pugə kam taan wuu.
18 Bɛŋwaanɩ mʋ ba brɩ ba lʋ-nɩ?
A ŋwɩa kam yɔɔrɩ ka su dɩ cam
dɩ wʋ-cɔgɔ mʋ.
Amʋ laan maa wʋ́ ba a kweeli dɩ cavɩɩra!