Zeremi na lɔgɩ kɔɔrʋ te tɩn
19
Baŋa-Wɛ dɛɛn ma ta dɩ amʋ DƖ wɩ: «Ve kamɔ-mɔrʋ te n yəgi kɔɔrʋ, sɩ n daarɩ n bəŋi Yisɩrayɛlɩ nakwa bam badaara dɩ kaanɩm yigǝ tiinǝ bam badonnǝ, 2 sɩ á maama vu Bɛn-Hinom bolo kʋm mɛ seeni na bwələ dɩ tɩʋ kʋm ni dɩlʋ ba na bǝi nɩ ‹Weeru-puuri Ni› tɩn. Abam na yi da, sɩ n kwe kwǝrǝ kalʋ amʋ na wʋ́ ta a brɩ-m tɩn n pa-ba. 3 Ta dɩ ba nɩ, ‹Zuda tiinə pwa bam, dɩ Zeruzalɛm tɩʋ nɔɔna bam, cəgi-na Baŋa-Wɛ kwǝrǝ. Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ tagɩ tɩntʋ:Cəgi-na! Amʋ lagɩ a pa lɛɛrʋ mʋ tiini tɩ ba tɩʋ kʋntʋ baŋa. Kʋ ta wʋ́ pa balʋ maama na ni kʋ ŋwa, sɩ ba niə mɔɔrɩ. 4 Kʋ nan yɩ Zuda tiinə bam na yagɩ amʋ tɩn ŋwaanɩ mʋ. Ba ma pipiri bolo kʋntʋ sɩ kʋ ji jwǝnǝ kaanɩm je yɩ ba zwɛ wǝǝnu ba pa-ya. Bantʋ tɩtɩ dɩ ba nabaara, dɩ Zuda pwa bam nan ya yǝri jwə-yɔɔrʋ tɩm kʋntʋ ni nɩ. Ba laan ma yɔɔrɩ ba gʋ balʋ na wʋ maŋɩ sɩ ba tɩ tɩn. 5 Ba ta lɔgɩ bimbinə mʋ sɩ ba ma ba zuli Baalɩ jwəm dɩm, yɩ ba laan kwe ba biə ba zwɛ mim wʋnɩ ba kɩ kaanɩm ba pa-kʋ. Amʋ nan wʋ fɔgɩ a pa-ba ni naa a ta dɩ ba sɩ ba kɩ kʋntʋ. Kǝm dɩm kʋntʋ doŋ nan ya brɩ dɩ tǝrǝ a wʋbʋŋa nɩ. 6 Nan lwarɩ-na nɩ maŋa bɩɩnɩ sɩ nɔɔna daa yɩ taa bǝi je sɩntʋ nɩ Tofɛtɩ, naa Bɛn-Hinom bolo kʋm. Ba laan wʋ́ taa bəi-kʋ wɩ «Nɔn-gʋrɩ bolo» mʋ. Amʋ Baŋa-Wɛ na tagɩ te tɩn mʋ kʋntʋ. 7 Bɛŋwaanɩ, a lagɩ a pa Zeruzalɛm tɩʋ tiinə dɩ Zuda tiinə bam maama wʋbʋŋa ji kafɛ mʋ. Amʋ wʋ́ yagɩ sɩ ba dʋna wanɩ-ba ba di yɩ ba daarɩ ba gʋ-ba. Ba twa wʋ́ taa tigi je maama nɩ, sɩ zunə dɩ ga-vara taa tui ba di. 8 Amʋ wʋ́ yɔɔrɩ a cɔgɩ Zeruzalɛm tɩʋ kʋm. Nɔɔna wʋ́ taa jɩgɩ-kʋ ba yáala. Balʋ maama na tɔgɩ kʋ je nɩ ba kɛ, kʋʋ́ kɩ-ba yǝǝu yɩ ba yáalɩ-kʋ kʋ cam dɩm ŋwaanɩ. 9 Zeruzalɛm dʋna bam wʋ́ kaagɩ tɩʋ kʋm ba pu sɩ nɔɔn-nɔɔnʋ yɩ lu kʋ wʋnɩ. Tɩʋ kʋm nɔɔna bam laan wʋ́ di ba donnǝ ya-nwana, ba dʋna bam na tiini ba pɩɩnɩ-ba yɩ wʋdiu tǝrǝ sɩ ba di tɩn ŋwaanɩ. Ba brɩ baá di ba tɩtɩ biə ya-nwana dɩ.› »
Baŋa-Wɛ ta ma ta dɩ amʋ DƖ wɩ:
10 «Laan kwe kɔɔrʋ kʋm n dɩ n cɩcʋgɩ sɩ nɔɔna balʋ na tɔgɩ dɩ nmʋ ba nuŋi tɩʋ kʋm wʋnɩ tɩn taa zɩgɩ ba niə. 11 Ta dɩ ba nɩ: ‹Paŋwa Tu Baŋa-Wɛ na tagɩ te tɩn mʋ tɩntʋ: Amʋ lagɩ a cɩcʋgɩ tʋ-fɔrɔ kʋntʋ, dɩ kʋ nɔn-biə bam, nɩ kɔɔrʋ kʋntʋ na cɩcʋgɩ te tɩn mʋ. Nɔɔn-nɔɔnʋ daa bá wanɩ-kʋ o la o kɩ daanɩ. Nɔɔna wʋ́ taa tigi Tofɛtɩ nɩ sɩ ba kɩ-ba, sɩ kʋ dwǝni pwələ kalʋ na wʋ́ taa wʋra sɩ ba kɩ-ba tɩn. 12 Amʋ Baŋa-Wɛ na tagɩ te tɩn mʋ tɩntʋ: Amʋ wʋ́ yɔɔrɩ a pa tɩʋ kʋntʋ dɩ kʋ nɔn-biə bam taa nyɩ dɩ Tofɛtɩ na yɩ te tɩn mʋ. 13 A nan wʋ́ pa Zeruzalɛm sam dɩm dɩ Zuda pwa bam sɔ-fwaarʋ tɩm maama dɩ cɔgɩ, nɩ Tofɛtɩ na digimi dɩ twa te tɩn. Bɛŋwaanɩ ba yǝni ba di sam dɩm kʋntʋ nayuni nɩ mʋ, yɩ ba zwɛ wǝǝnu ba ma kɩ kaanɩm ba pa calɩcwɩ: nɩ sɩ ga yɩ wa mʋ tɩn. Ba ta ma kwe sana pɛɛra ba pa wa yadonnə.› »
Zeremi daa na ŋɔɔnɩ Wɛ kwǝrǝ te tɩn
14 Zeremi ma zɩgɩ Tofɛtɩ nɩ o joori o zʋ tɩʋ kʋm wʋnɩ. Baŋa-Wɛ nan ya tʋŋ-o Tofɛtɩ nɩ sɩ o ŋɔɔnɩ o kwǝrǝ mʋ. O laan ma vu o zɩgɩ Baŋa-Wɛ Wɛ-digə kʋnkɔlɔ kʋm nɩ, yɩ o ta dɩ nɔɔna bam maama o wɩ: 15 «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ tagɩ tɩntʋ: Amʋ sɩɩnɩ a lagɩ a pa lɛɛrʋ mʋ ba tɩʋ kʋntʋ baŋa, dɩ kʋ nawuurə yam baŋa, nɩ a na goni ni nɩ aá kɩ te maama tɩn. Kʋ nan yɩ ba na sɩn ba zwa, yɩ ba vɩn sɩ ba cəgi amʋ taanɩ dɩm tɩn ŋwaanɩ mʋ a lagɩ a kɩ-ba kʋntʋ.»