Zeremi ve kamɔ-mɔrʋ sɔŋɔ
18
Baŋa-Wɛ daa na pɛ Zeremi ni dɩlʋ tɩn mʋ tɩntʋ:2 «Nan zaŋɩ n vu kamɔ-mɔrʋ wʋm sɔŋɔ. N na yi da, amʋ wʋ́ pa‑m a kwǝrǝ.»a 3 Amʋ ma sɩɩnɩ a vu kamɔ-mɔrʋ wʋm te. A na yi o sɔŋɔ tɩn, a nɛ nɩ o je mɛ o na yǝni o mɔɔnɩ o kamwarʋ tɩm tɩn mʋ o tʋŋa. 4 O na mɔɔnɩ kamɔgɔ kʋlʋ, yɩ kʋ na wʋ dɛ cwǝŋǝ lanyɩranɩ, o laan wʋ́ joori o fɔgɩ o mɔ dɔgɔ kʋm sɩ kʋ ji kamɔgɔ kʋdoŋ, nɩ o wʋbʋŋa yam na tɔgɩ te tɩn.
5 Baŋa-Wɛ laan ma pa amʋ ni dɩntʋ DƖ wɩ:
6 «Yisɩrayɛlɩ dwi tiinə bam, amʋ dɩ ba jɩgɩ cwǝŋǝ sɩ a kɩ dɩ abam nɩ kamɔ-mɔrʋ na kɩ te dɩ o dɔgɔ tɩn na? Dɔgɔ kʋm na yɩ te kamɔ-mɔrʋ jɩŋa nɩ tɩn, abam Yisɩrayɛlɩ tiinə bam dɩ yɩ kʋntʋ mʋ amʋ jɩŋa nɩ. 7 Amʋ wʋ́ wanɩ a pa kwǝrǝ nɩ tɩʋ kʋlʋ, naa paarɩ dam dɩlʋ gɔ dɩ yagɩ, naa sɩ a vaarɩ-dɩ a dɩ tɩga nɩ, naa a cɔgɩ-dɩ. 8 Amʋ nan na kaanɩ tɩʋ kʋlʋ tɩn nɔn-biə na pipiri ba yagɩ ba lwarɩm kikiə yam, amʋ dɩ wʋ́ ləni a wʋbʋŋa mʋ, sɩ a daa yɩ cɔgɩ-ba nɩ a ya na bʋŋɩ sɩ a kɩ te tɩn.b 9 Kʋ daarɩ, amʋ nan wʋ́ wanɩ a pa kwǝrǝ nɩ a lagɩ a fɔgɩ a lɔ tɩʋ kʋlʋ a zɩgɩ, naa a jəri-kʋ tɩ-ywəŋə je nɩ. 10 Tɩʋ kʋm kʋntʋ nɔɔna nan na tʋŋɩ lwarɩm kikiə a yigə nɩ, yɩ ba daarɩ ba vɩn sɩ ba cəgi amʋ kwǝrǝ, amʋ dɩ wʋ́ ləni a wʋbʋŋa mʋ, sɩ a daa yɩ kɩ-ba lanyɩranɩ nɩ a ya na bʋŋɩ sɩ a kɩ te tɩn.
11 Zeremi, nmʋ nan ve n kaanɩ balʋ na zʋʋrɩ Zeruzalɛm nɩ tɩn dɩ Zuda tiinə bam maama. Ta dɩ ba nɩ: ‹Baŋa-Wɛ na tagɩ te tɩn mʋ tɩntʋ: Amʋ maŋɩ a kɩ a wʋbʋŋa nɩ sɩ a tʋŋɩ lɛɛrʋ abam baŋa nɩ. A wʋbʋŋa jaanɩ sɩ a cɔgɩ abam mʋ. Kʋntʋ ŋwaanɩ abam maama maŋɩ sɩ á yagɩ cwə-balwaarʋ tɩlʋ á na tɔgɩ tɩn. Lǝni-na á wʋbʋŋa dɩ á lwarɩm kikiə yam.› 12 Ba nan wʋ́ ləri ba ta nɩ: ‹Yɩ ta n jɩgɩ n tɩtɩ n yaara, sɩ dɩ́ lagɩ dɩ́ taa kɩ dɩ́ zwabaniə kikiə yam mʋ, nɩ dɩ́ wʋbʋŋa na lagɩ te tɩn.› »
13 Baŋa-Wɛ nan na tagɩ te tɩn mʋ tɩntʋ:
«Ve n bwe dwi-gɛ tiinə bam sɩ n nii,
nɔɔnʋ wʋra o na ni woŋo kʋntʋ doŋ ŋwa na?
Yisɩrayɛlɩ dwi dɩm ya nyɩ dɩ bɩsankana mʋ.
Ba laan kɩ kʋlʋ na tiini kʋ yɩ wo-zɔɔnɩ tɩn.
14 Liban pweeru yum tɩm pɩɩrɩ mʋ maŋa maama.
Tɩ nyɔnɔc kʋm ba fɔgɩ kʋ wɩa.
Kʋ na yɩ bwi sɩlʋ na nuŋi pweeru tɩm nɩ yigə yigə sɩ kɛ tɩn,
sɩ na-zurə bam yǝni ba duri ba ti na?
15 Kʋ nan na yɩ amʋ tɩtɩ nɔɔna bam,
ba yɔɔrɩ ba swe amʋ ni nɩ mʋ.
Ba maa kɩ kaanɩm ba zwɛ ba paɩ jwə-yɔɔrʋ.
Jwǝnǝ yam kʋntʋ ma sʋgɩ-ba
pa ba ywəri cwə-laarʋ tɩm nɩ.
Ba ma yagɩ ba nabaara cwe sɩm dɛɛn na yɩ te tɩn.
Ba ma lɛɛrɩ ba tɔgɩ cwə-mɩmɩnɩ sɩlʋ na wʋ kwɛ tɩn.
16 Kʋ ma pa ba tɩga kam yɔɔrɩ ka cɔgɩ.
Nɔɔna maa jɩgɩ-ka ba yáala
maŋa maama sɩ kʋ taa ve wuu.
Balʋ maama na tɔgɩ kʋ je nɩ ba kɛ,
kʋʋ́ kɩ-ba yǝǝu sɩ ba taa dʋlɩ ba yum.
17 Nɩ viu kʋlʋ na nuŋi wa-puli seeni
yɩ kʋ kalɩ fogo kʋ ja je te tɩn,
mʋ a lagɩ a pa a nɔɔna bam dɩ jagɩ ba dʋna yigə nɩ.
A nan wʋ́ ma a kwaga a ya-ba mʋ.
Lɛɛrʋ na tʋ ba baŋa nɩ,
a yigə bá taa wʋ ba wʋnɩ.»
Ba na bʋŋɩ sɩ ba cɔgɩ Zeremi te tɩn
18 Nɔɔna bam badonnǝ ma ta ba wɩ: «Pa-na sɩ dɩ́ kɩ ni daanɩ sɩ dɩ́ lwarɩ dɩ́ na wʋ́ kɩ te dɩ́ cɔgɩ Zeremi tɩn. Wɛ kaanɩm tiinə ta wʋ́ taa wʋra sɩ ba brɩ dɩbam Wɛ niə yam. Yi-pʋrɩ-nyɩna dɩ wʋ́ taa wʋra sɩ ba zaasɩ dɩbam. Wɛ nijoŋnə dɩ wʋ́ pa dɩ́ ni Wɛ kwǝrǝ kam. Nan pa-na sɩ dɩ́ ba bɩbara dɩ́ daŋɩ o baŋa nɩ. Dɩ́ daa bá taa cəgi o ni-taanɩ.»
Amʋ ma loori Wɛ a wɩ:
19 «Amʋ Tu Baŋa-Wɛ, cəgi-nɩ!
Nii a sɩbara bantʋ na tɛ amʋ taanɩ te!
20 Kʋ lana sɩ nɔɔnʋ kwe lwarɩm
o joori o ŋwɩ lanyɩranɩ kǝm na?
Bantʋ nan kʋgɩ goŋo mʋ
sɩ amʋ tʋ kʋ wʋnɩ.
Guli amʋ dɛɛn na tiini a loori‑m te ba fɔgɩm ŋwaanɩ tɩn.
A ma zɩgɩ nmʋ yigə nɩ yɩ a loori‑m
sɩ n zuri n banɩ dɩ ba.
21 Laan nan pa kana ni ba biə.
Dʋlɩ-ba n yagɩ sɩ ba tɩ najara wʋnɩ.
Pa ba kaana ga ba biə,
yɩ ba daarɩ ba ji kadənə.
Ta pa yawɩ-cɛɛrʋ gʋ ba nɔn-kwɩɩrʋ tɩm,
sɩ ba nɔn-dʋnnʋ dɩ tɩ jara-kǝm baŋa nɩ.
22 Pa kərə zaŋɩ ba sam dɩm wʋnɩ zanzan,
ba dʋna mʋ na da ba zaŋɩ ba baŋa nɩ tɩn ŋwaanɩ.
Bɛŋwaanɩ, ba kʋgɩ goŋo mʋ ba tiŋi sɩ amʋ tʋ da,
yɩ ba daarɩ ba cɩ cɩgɩrʋ je maama sɩ tɩ ja-nɩ.
23 Amʋ Tu Baŋa-Wɛ, nmʋ nan maŋɩ n ye
ba na bʋŋɩ sɩ ba gʋ-nɩ te tɩn.
Yɩ kwe ba tɩtʋŋ-balwaarʋ tɩm n ma n cɛ-ba.
Nan yɩ saarɩ ba lwarɩm dɩm maŋa dɩ maŋa!
Pa ba tʋ n dam kuri nɩ,
sɩ n daarɩ n tɔgɩ n ban-lʋm dɩm baŋa nɩ n waarɩ-ba.»