Waarɩm dɩlʋ na maŋɩ dɩ Zuda tiinə lwarɩm dɩm tɩn
17
«Zuda tiinə bam yɔɔrɩ ba mɩ dɩ ba lwarɩm, nɩnɛɛnɩ nɔɔnʋ mʋ kwe luu o sarɩ-ya o tiŋi ba bɩcara nɩ. Kʋ ta nyɩ nɩnɛɛnɩ ba kwe kandwɛ-fʋlɩ mʋ ba pʋpʋnɩ-ya ba tiŋi ba bimbinə yam nyɩa nɩ. 2 Ba biə dɩ yǝni ba bʋŋɩ ba jwǝnǝ bimbinə yam dɩ ba Asera nyɩnyʋgʋ dɛ sɩm wʋbʋŋa mʋ. Ba kɩ wǝǝnu tɩm kʋntʋ sɩ ba taa maa zulə ba jwǝnǝ yam tweeru maama kuri nɩ, dɩ zwəənu tɩm maama yuu nɩ, 3 kʋ ta wǝli dɩ pweeru tɩm na wʋ gaa nɩ tɩn yuu nɩ. Kʋntʋ ŋwaanɩ, amʋ lagɩ a kwe á duuni, dɩ á jɩjɩgɩrʋ maama a pa á dʋna sɩ ba cɛ ba pa daanɩ, sɩ kʋ ŋwɩ á lwarɩm dɩm jɩnɩ, á na kɩ-ya tɩga kam je maama nɩ tɩn. 4 Kʋ yɩ abam tɩtɩ yigə mʋ pa á lagɩ á ga tɩga kalʋ a na kwe a pa abam tɩn. A maa wʋ́ pa á dʋna kwe abam ba ja ba vu sa-tɩʋ kʋlʋ á ya na yǝri kʋ ni nɩ tɩn, sɩ á ji ba gambɛ dáanɩ. Bɛŋwaanɩ, á pɛ a ban-lʋm dɩm tiini dɩ fuli á baŋa nɩ, nɩ mim dɩlʋ na lagɩ dɩ di abam taan wuu te tɩn!»Taana yadonnə
5 Baŋa-Wɛ na tagɩ kʋlʋ tɩn mʋ tɩntʋ:
«Amʋ sɔɔlɩ lwarɩm mʋ a yagɩ
balʋ na kwe ba cɩga ba pa nabiinǝ tɩn yuu nɩ.
Ba maa bʋŋɩ nɩ ba dam zɩgɩ ba tɩtɩ yɩra nɩ mʋ.
Ba laan ma pipiri ba yagɩ amʋ Baŋa-Wɛ.
6 Ba nyɩ nɩnɛɛnɩ kagʋa wʋ punnu mʋ.
Tɩntʋ zɩgɩ tɩ-kʋra nɩ mʋ,
mɛ yɛ yɩranɩ na wʋra,
yɩ nɔɔn-nɔɔnʋ ba zʋʋrɩ da tɩn.
Lanyɩranɩ na maŋɩ dɩ ba,
nɔɔna dwi dɩm kʋntʋ ba naɩ-dɩ.
7 Kʋ nan na yɩ balʋ na kwe ba cɩga
ba pa amʋ Baŋa-Wɛ tɩn,
amʋ wʋ́ kɩ bantʋ yu-yoŋo.
Bantʋ kɩ ba wʋ-dɩdʋa dɩ amʋ mʋ.
8 Ba nyɩ dɩ tiu kʋlʋ na zɩgɩ kʋ bwələ dɩ bugə ni,
yɩ kʋ bʋnnʋ zʋ tɩga lanyɩranɩ
tɩ yi na bam tɩn mʋ.a
Fʋnyʋgʋ wɛ na yiǝ,
kʋ bá kwarɩ fʋʋnɩ.
Da-kʋrɩ na maŋɩ kʋ ba,
kʋ ta jɩgɩ vɔ-lɛɛrʋ maŋa maama,
yɩ kʋ yɔɔrɩ kʋ ləri biə mʋ.
9 Nabiinu bɩcarɩ mʋ ba jɩgɩ cɩga
dɩ dwe woŋo maama.
Dɩ tiini dɩ cɔgɩ mʋ,
yɩ nɔɔna warɩ-dɩ sɩ ba sooni.
Wɔɔ mʋ waɩ-dɩ o lwarɩ o tiə?
10 Amʋ Baŋa-Wɛ nan yɛ nabiinu maama wʋbʋŋa.
A maa maŋɩ ba bɩcara a niə.
A maa paɩ nɔɔna maama ba kikiə ŋwɩɩrʋ,
sɩ kʋ maŋɩ dɩ cwǝŋǝ kalʋ ba na tɔgɩ tɩn.
11 Nɔɔnʋ na pini o donnǝ sɩ o ma o duni,
kʋ nyɩ dɩ lugə na vwɛ cɩcara yalʋ ka na wʋ dɩ tɩn baŋa nɩ
sɩ ka lwe-ya te tɩn mʋ.
O nɔn-dʋnnɩ maŋa nɩ mʋ
o jɩjɩgɩrʋ tɩm wʋ́ ti.
Kʋ tu laan maa wʋ́ ba o kweeli
nɩ nɔn-joro na kweeli te tɩn.»b
Zeremi wɛ-loro
12 Kʋ na zɩgɩ faŋa faŋa tɩn,
Baŋa-Wɛ paarɩ jǝŋǝ je sɩm dɩbam na zuli‑DƖ da tɩn
zǝŋi wɛɛnɩ dɩ paarɩ-zulǝ mʋ.
13 Dɩ́ Tu Baŋa-Wɛ, nmʋ yɩranɩ baŋa nɩ mʋ
Yisɩrayɛlɩ tiinə bam jɩgɩ tɩɩna.
Balʋ maama nan na nuŋi nmʋ kwaga nɩ tɩn wʋ́ na ba cavɩɩra.
Balʋ na vɩn nmʋ tɩn wʋ́ je mʋ
nɩ nɔɔna yɩra na pʋpʋnɩ ya tiŋi kasʋlʋ nɩ
yɩ ya saarɩ te tɩn.
Bɛŋwaanɩ ba vɩn nmʋ wʋlʋ na yɩ buli-yi
dɩlʋ na paɩ ŋwɩa tɩn mʋ.
14 Amʋ Tu Baŋa-Wɛ, sooni-nɩ
sɩ a sɩɩnɩ a na yazurə.
Joŋi-nɩ n yagɩ,
sɩ a sɩɩnɩ a zʋ n woro wʋnɩ.
Bɛŋwaanɩ, nmʋ mʋ amʋ yɔɔrɩ a zuli.
15 Nii mʋ! Nɔɔna mʋ tɛ dɩ amʋ ba wɩ:
«Kʋlʋkʋlʋ ta wʋ kɩ dɩbam.
Baŋa-Wɛ kwǝrǝ kam nan bɛ?
Pa sɩ ka sɩɩnɩ ka kɩ sɩ dɩ́ nii!»
16 A wʋ yagɩ tɩtʋŋɩ dɩlʋ n na kwe n pa-nɩ
sɩ a ta nii n nɔɔna bam tɩn.
A nan ba kaagɩ a beeri ba cɔgɩm.
Nmʋ yɔɔrɩ n ye a na yɩ te tɩn,
dɩ kwǝrǝ kalʋ a na jɩgɩ a ŋɔɔnɩ tɩn.
17 Yɩ pa fʋʋnɩ ja-nɩ.
Cam na lagɩ dɩ yi amʋ,
nmʋ mʋ yɩ amʋ dalɩm je.
18 Pa balʋ na culi-nɩ tɩn di cavɩɩra.
Nan cɩ amʋ sɩ a yɩ na a cavɩɩra.
Pa bantʋ vwana parɩ
yɩ kʋ daɩ amʋ.
Pa lɛɛrʋ yi bantʋ
sɩ ba tiini ba na cɔgɩm zanzan.
Wɛ siun dɛ taanɩ
19 Baŋa-Wɛ laan ma ta dɩ amʋ DƖ wɩ: «Zaŋɩ n vu tɩʋ kʋm manchoŋo ni dɩlʋ ba na bǝi nɩ ‹Nɔn-biə bam Ni› yɩ Zuda tiinə pwa bam tɔgɩ da ba zʋʋrɩ tɩʋ kʋm wʋ yɩ ba joori ba nuŋi tɩn n tan zɩgɩ da n tɔɔlɩ amʋ kwǝrǝ kam. Nan ta ve n zɩgɩ Zeruzalɛm tɩʋ mancwəənu niə yam maama nɩ n kɩ kʋntʋ. 20 Laan ta dɩ Zuda tiinə pwa bam dɩ ba nɔn-biə bam, dɩ balʋ maama na zʋʋrɩ Zeruzalɛm tɩʋ nɩ yɩ ba yǝni ba tɔgɩ niə yam kʋntʋ ba kɛ tɩn n wɩ: ‹Cəgi-na Baŋa-Wɛ kwǝrǝ kantʋ! 21 Baŋa-Wɛ na tagɩ te tɩn mʋ tɩntʋ: Wɛ siun dɛ dɩm nɩ, taá ye-na sɩ á yɩ taá zɩŋɩ zɩla. Nan yɩ zɩŋɩ-na zɩla á tɔgɩ Zeruzalɛm tɩʋ mancwəənu niə yantʋ á kɛ. 22 Yɩ zɩŋɩ-na zɩla á ja á nuŋi á sam nɩ, naa á kɩ tɩtʋŋɩ dɩ tɩtʋŋɩ Wɛ siun dɛ dɩm nɩ! Nan pɔɔrɩ-na dɛ dɩm kʋntʋ á pa Baŋa-Wɛ, nɩ amʋ na pɛ á nabaara bam ni sɩ ba kɩ te tɩn. 23 Dɩ kʋ dɩ, ba wʋ sɛ amʋ ni dɩm kʋntʋ. Ba ma vɩn sɩ ba cəgi a taanɩ. Ba bɩcara digili mʋ, yɩ ba wʋ sɛ kʋrɩsɩm.
24 Baŋa-Wɛ ta ma ta DƖ wɩ: Nan taá ye-na sɩ á sɛ amʋ ni. Yɩ taá zɩŋɩ-na zɩla á tɔgɩ tɩʋ kʋm mancwəənu niə yam á zʋ kʋ wʋ siun dɛ dɩm nɩ. Pɔɔrɩ-na dɛ dɩm kʋntʋ á pa amʋ sɩ á yɩ tʋŋɩ dɩ wʋnɩ. 25 Abam na kɩ kʋntʋ, á tɩʋ kʋm pwa balʋ na nuŋi Pɛ Davidi dwi dɩm wʋnɩ tɩn wʋ́ taa wʋra mʋ taan yɩ ba tɔgɩ niə yantʋ wʋnɩ ba kɛa. Ba nakwa bam dɩ wʋ́ taa tɔgɩ ba kwaga. Pwa bam kʋntʋ dɩdaanɩ Zeruzalɛm tɩʋ kʋm tiinə dɩ Zuda tiinə bam maama wʋ́ yǝni ba din sise-tərikooru dɩ siseŋ-nɔɔna baŋa nɩ ba tɔgɩ mancwəənu niə yam kʋntʋ ba kɛ. Tɩʋ kʋm tɩtɩ dɩ maa wʋ́ taa sui dɩ nɔɔna maŋa maama. 26 Nɔɔna dɩ wʋ́ nuŋi Zuda tɩɩnɩ dɩm maama wʋnɩ, dɩ Zeruzalɛm nawuurə yam wʋnɩ, dɩ Bɛnzamɛn laŋa kam nɩ, dɩ wa-zʋʋrɩ seeni bwəəlu tɩm nɩ, dɩ pweeru laŋa kam seeni, dɩ jagwiə kagʋa kam seeni, ba zʋ Zeruzalɛm tɩʋ kʋm wʋ. Ba laan maa wʋ́ taa jaanɩ zwɛɛm pɛɛra, dɩ wʋdiu pɛɛra, dɩ wǝǝnu tɩlʋ lwǝm na ywǝmmǝ tɩn, dɩdaanɩ le-kəm pɛɛra ba tui ba kaanɩ ba paɩ Baŋa-Wɛ DƖ digə kam nɩ. 27 Kʋ daarɩ, abam na wʋ sɛ sɩ á cəgi a kwǝrǝ kam, yɩ á vɩn sɩ á pɔɔrɩ Wɛ siun dɛ dɩm á pa‑DƖ pa á jaanɩ zɩla á tɔgɩ mancwəənu niə yam á zʋʋrɩ tɩʋ kʋm wʋ siun dɛ dɩm nɩ, nan lwarɩ-na nɩ: amʋ wʋ́ tarɩgɩ mim sɩ dɩ ja mancwəənu niə yam. Dɩ laan maa wʋ́ loŋi dɩ ja á sɔ-fwaarʋ tɩm dɩ di kulə. Nɔɔn-nɔɔnʋ nan bá wanɩ-dɩ sɩ o dwe.› »