Baŋa-Wɛ na pɛ Zeremi cwe sɩlʋ sɩ o tɔgɩ tɩn
16
Baŋa-Wɛ daa ma pa amʋ ni yɩ DƖ wɩ:2 «Yɩ di bukɔ n ma n ji n kaanɩ, naa n lʋ bəkəri dɩ bɩsankam tɩʋ kʋntʋ nɩ. 3 Kʋ na yɩ biə balʋ ba na lʋgɩ je sɩntʋ wʋnɩ tɩn, dɩ ba niinə, dɩ ba kwə, amʋ Baŋa-Wɛ jɩgɩ taanɩ sɩ a ta ba ŋwaanɩ nɩ: 4 Yawɩ-cɛɛrʋ mʋ lagɩ tɩ ja-ba sɩ ba tɩ. Ba bá na nɔɔna sɩ ba keeri ba lwi, naa balʋ na wʋ́ kɩ-ba tɩn. Ba yɩra wʋ́ taa tigi tɩga baŋa nɩ, nɩ pʋpɔnɔ mʋ te. Najara wʋnɩ mʋ ba lagɩ ba tɩ, sɩ kana dɩ gʋ-ba. Ba yɩra yam maa wʋ́ ji wʋdiiru ya pa zunə dɩ ga-vara.»
5 Baŋa-Wɛ na tagɩ te tɩn mʋ tɩntʋ:
«Zeremi, yɩ ve n zʋ ba lwi wʋnɩ sɩ n da n keeri dɩ ba. Bɛŋwaanɩ, amʋ yiri a yu-yoŋo dɩ a sono kʋm ba tee nɩ, yɩ a daa bá duri ba yibwənə. 6 Nadunə dɩ nabwənə maama wʋ́ tɩ tɩga kantʋ wʋnɩ mʋ. Ba nan bá na nɔɔna sɩ ba kɩ-ba, naa sɩ ba keeri ba lwi. Ba bá gwɩn ba yɩra yam, naa ba ceeri ba yum lwi sɩm ŋwaanɩ.a 7 Nɔɔna daa bá tʋŋɩ wʋdiu sɩ kʋ vu lwi sɩm na wʋ mɛ tɩn. Kʋ na maŋɩ kʋ yɩ nɔɔnʋ nu dɩ o ko luə dɩ, nɔɔna bá vu ba yi kʋ tu yɩra sɩ ba weeri o yi-na.
8 Nan yɩ zʋ sɔŋɔ kʋlʋ wʋnɩ ba na di wʋdi-fɔrɔ kɛɛla-kɛɛla tɩn. Yɩ wǝli ba wʋnɩ sɩ n ta n di yɩ n nyɔa. 9 Amʋ Paŋwa Tu Baŋa-Wɛ dɩlʋ na yɩ Yisɩrayɛlɩ tiinə bam Wɛ dɩm tɩn mʋ tagɩ tɩntʋ: Amʋ lagɩ a pa wʋpolo dɩ ywəəni sɔɔ ti nɔɔna bam tee nɩ. Ba daa bá kwɛɛrɩ kadri kwɛɛra. Nmʋ dɩ n badonnǝ ta na ŋwɩ: á wʋ́ na amʋ na lagɩ a kɩ-ba te tɩn.
10 Nmʋ nan na ve n ta wǝǝnu tɩm kʋntʋ maama n brɩ nɔɔna bam, baá bwe‑m nɩ: ‹Bɛŋwaanɩ mʋ Baŋa-Wɛ kɩ sɩ cam dɩntʋ ba dɩbam baŋa nɩ? Bɛɛ mʋ dɩ́ kɩ dɩ́ cɔgɩ? Dɩ́ cɔgɩ dɩ́ Tu Baŋa-Wɛ yigə tɩta seeni mʋ?› 11 Laan ta dɩ ba nɩ: ‹Á nabaara bam na nuŋi amʋ kwaga nɩ tɩn ŋwaanɩ mʋ a kɩ kʋntʋ. Ba ma kuri sɩ ba tɔgɩ wa-yɔɔrʋ yɩ ba zuli-ya. Ba yɔɔrɩ ba vɩ-nɩ mʋ yɩ ba wʋ sɛ a niə yam. 12 Abam kǝm-balwaarʋ nan brɩ ya dwe á nabaara bam na kɩ te tɩn! Á yɔɔrɩ á kɩ á tɔgɩ á wʋ-dɛɔ kʋm na lagɩ kǝm-balwaarʋ tɩlʋ tɩn mʋ, yɩ á ba cəgi amʋ taanɩ. 13 Kʋntʋ ŋwaanɩ, a lagɩ a lɩ abam mʋ tɩga kantʋ nɩ, sɩ a daarɩ a dʋlɩ abam a yagɩ sa-tɩʋ nɩ yigə yigə, mɛ abam dɩ á nabaara bam ya na yǝri kʋ ni nɩ tɩn. Abam laan na wʋ je sɩm kʋntʋ nɩ, á wʋ́ taá zuli á wa-yɔɔrʋ tɩm maŋa maama, wɩa dɩ tɩtɩ. Amʋ nan bá duri á ŋwaŋa.› »
Baŋa-Wɛ daa ta ma ta DƖ wɩ:
14 «Cɩga tɩn, maŋa lagɩ ka yi sɩ balʋ na lagɩ ba du durə, ba daa yɩ ta wɩ: ‹A dugi dɩ Baŋa-Wɛ dɩlʋ na joŋi dɩbam Yisɩrayɛlɩ tiinə bam DƖ ja DƖ nuŋi Ezipi tɩʋ kʋm nɩ tɩn yɩrɩ dɩm.› 15 Ba laan wʋ́ taa tɛ nɩ: ‹A dugi dɩ Baŋa-Wɛ dɩlʋ na joŋi Yisɩrayɛlɩ tiinə bam DƖ ja DƖ nuŋi jazɩm baŋa seeni tɩʋ kʋm nɩ, dɩdaanɩ je sɩlʋ maama DƖ na jagɩ-ba tɩn yɩrɩ dɩm mʋ.› Bɛŋwaanɩ amʋ wʋ́ sɩɩnɩ a ja-ba a ba sɩ ba joori ba taa je tɩga kalʋ wʋnɩ a na pɛ ba nabaara sɩ ba taa te tɩn.b
16 Amʋ Baŋa-Wɛ nan na tagɩ te tɩn mʋ tɩntʋ: A laan lagɩ a tʋŋɩ kalǝŋ-jara zanzan mʋ sɩ ba vu nɔɔna bantʋ te ba ja-ba. A ta maa wʋ́ pa tɔɔra zanzan vu ba ja-ba. Baá vu pweeru dɩ zwəənu tɩm maama baŋa ba beeri-ba ba lɩ bɔɔna dɩ gugwəəru wʋnɩ ba gʋ. 17 Amʋ yɔɔrɩ a yɩrɩ-ba mʋ je maama wʋnɩ. Ba bá wanɩ ba səgi amʋ yigə nɩ. A maa naɩ lwarɩm yalʋ ba na jɩgɩ ba kɩ tɩn. 18 Amʋ nan wʋ́ joori a ŋwɩ ba lwarɩm dɩ ba kǝm-balwaarʋ jɩnɩ kuni bɩle. Bɛŋwaanɩ, ba cɔgɩ amʋ tɩga kantʋ mʋ dɩ ba jwǝnǝ yalʋ na ba jɩgɩ ŋwɩa yɩ a yɔɔrɩ a culi-ya tɩn. Ba ta ma su a tɩtɩ tɩga kam kʋntʋ dɩ ba wo-zɔɔna kikiə yam.»
Amʋ maa wɩ:
19 Amʋ Tu Baŋa-Wɛ,
nmʋ mʋ yɩ amʋ dam dɩ a dalɩm je.
Cam na lagɩ dɩ yi-nɩ,
a yǝni a duri a səgi nmʋ woro wʋnɩ mʋ.
Lʋgʋ baŋa dwi tiinə maama nan wʋ́ ba nmʋ te
sɩ ba zuli nmʋ.
Ba maa wʋ́ zɩgɩ tɩga baŋa je maama nɩ
ba ba ba ta wɩ:
«Dɩ́ nabaara dɛɛn jɩgɩ wa-yɔɔrʋ mʋ ba zulə.
Yantʋ nan wʋ wanɩ-ba ya wǝli.
20 Nɔɔna wʋ́ wanɩ ba tɩtɩ wa ba kɩ na?
Ba na kɩ-ya, ya bá taa yɩ wa cɩga cɩga!»
Baŋa-Wɛ maa wɩ:
21 «Amʋ laan nan wʋ́ yɔɔrɩ a pa ba lwarɩ
a dam dɩm na maɩ te tɩn.
Kʋntʋ laan mʋ wʋ́ pa ba taa ye nɩ
amʋ yɩrɩ mʋ yɩ Yuutu Baŋa-Wɛ dɩm.»