Lɛɛrʋ wʋ́ tʋ Zuda tiinə baŋa nɩ
15
Baŋa-Wɛ ma ta dɩ amʋ DƖ wɩ:«Moyisi dɩ Samowɛlɩ tɩtɩ ya na tu sɩ ba loori-nɩ, a bá duri nɔɔna bantʋ ŋwaŋa. Zəli-ba n pa ba kɩ baŋwɛ dɩdaanɩ amʋ yibiyə, sɩ a daa yɩ taa na-ba! 2 Ba nan na bwe‑m ba wɩ: ‹Dɩ́ nan ve yən nɩ?› sɩ n ta dɩ ba nɩ: ‹Baŋa-Wɛ na tagɩ te tɩn mʋ tɩntʋ:
Balʋ na maŋɩ sɩ ba tɩ tɩn wʋ́ tɩ mʋ.
Balʋ maa na maŋɩ sɩ ba tɩ najara wʋnɩ tɩn wʋ́ tɩ najara wʋnɩ.
Balʋ dɩ na maŋɩ sɩ kana gʋ-ba tɩn,
kana wʋ́ gʋ-ba mʋ.
Balʋ maa na maŋɩ sɩ ba kalɩ tɩn,
baá kalɩ-ba ba vu sa-tɩʋ mʋ.› »
3 Baŋa-Wɛ maa wɩ:
«A nan lagɩ a tʋŋɩ lɛɛrʋ dwi dwi kuni bɩna mʋ ba baŋa nɩ. Sʋ-lwaanʋ wʋ́ gʋ-ba najara wʋnɩ. Kakuri maa wʋ́ tuuri ba yɩra yam sɩ ja sɩ kɛ. Duurə dɩ wʋ́ ba ba zɔgɩ ba yɩra, yɩ ga-vara laan di ba yɩra yalʋ ta na daarɩ tɩn nyɩlamm. 4 Amʋ lagɩ a pa ba ji wo-zɔɔna mʋ lʋgʋ baŋa tɩɩnɩ maama yigə nɩ, Zuda tɩʋ pɛ Ezekɩasɩ bu Manasɩ na tʋŋɩ kʋlʋ Zeruzalɛm wʋnɩ tɩn ŋwaanɩ.»a
5 Baŋa-Wɛ daa ta maa wɩ:
«Zeruzalɛm tiinə bam, wɔɔ nan mʋ wʋ́ ŋwanɩ o pa abam?
Wɔɔ mʋ lagɩ o keeri o pa abam?
Wɔɔ mʋ wʋ́ zɩgɩ sɩ o warɩ abam?
Nɔɔn-nɔɔnʋ tǝrǝ!
6 Abam yɔɔrɩ á vɩn amʋ mʋ,
yɩ á nuŋi a kwaga nɩ kuni zanzan.
Kʋntʋ ŋwaanɩ, amʋ tɩtɩ mʋ lagɩ a twɩ a jɩŋa
a gʋrɩgɩ abam a ja a cɔgɩ.
Amʋ duri nmʋ yibwənə kam a ba a bwəni mʋ laan!»
7 «A lagɩ a caarɩ-ba,
nɩ nɔɔnʋ na caarɩ mɩna
yɩ viu kʋm kalɩ weeru kʋ yagɩ te tɩn mʋ.
Amʋ wʋ́ waarɩ-ba kʋntʋ doŋ
ba tɩɩnɩ dɩm maama nɩ.
Aá cɔgɩ a nɔɔna bam tɩtɩ, dɩ ba biə dɩ,
ba na wʋ sɛ sɩ ba pipiri
ba yagɩ ba lwarɩm kikiə tɩn ŋwaanɩ.
8 A ta wʋ́ pa ba tɩʋ kadənə taa daga
ba dwe nɩnɩʋ ni kasʋlʋ na yɩ te tɩn.
Wɩa na bɩga, aá tʋŋɩ lɛɛrʋ ba nɔn-dʋnnʋ tɩm baŋa nɩ,
sɩ ba niinə tiini ba yaarɩ ba tʋʋnɩ ŋwaanɩ.
Bɩdwɩ baŋa nɩ mʋ a lagɩ a pa cam yɔɔrɩ dɩ ja-ba,
pa fʋʋnɩ tiini dɩ zʋ-ba.
9 Kaanɩ wʋlʋ na lʋgɩ biə barpɛ tɩn wʋ́ bəri,
yɩ o bɩcɔŋɔ fwe,
ba maama na tɩgɩ tɩn ŋwaanɩ.
Kʋ nyɩ dɩ wɩa tɩtarɩ nɩ mʋ wɛ zʋ dɩ pa wʋntʋ.
Cavɩɩra maa jɩg-o,
o na tu o ga o biə bam tɩn ŋwaanɩ.
Kʋ na yɩ balʋ ta na daarɩ tɩn,
amʋ wʋ́ pa ba dʋna gʋ-ba najara wʋnɩ.»
Baŋa-Wɛ na tagɩ te tɩn mʋ kʋntʋ.
Zeremi pʋʋnɩ Baŋa-Wɛ yigə nɩ
10 A nu, lɛɛrʋ mʋ jɩgɩ-nɩ! Bɛŋwaanɩ mʋ n lʋgɩ-nɩ? Mɛ maama a na veǝ, nɔɔna yɔɔrɩ ba culi-nɩ mʋ. Amʋ wʋ ve a jɩnɩ woŋo nɔɔnʋ tee nɩ, a nan wʋ jɩnɩ woŋo a pa nɔɔn-nɔɔnʋ. Dɩ kʋ dɩ, nɔɔna maama dʋnɩ-nɩ mʋ.
11 Baŋa-Wɛ ma ta DƖ wɩ: «Amʋ nan lagɩ a joŋi nmʋ sɩ kʋ kɩ lanyɩranɩ kʋ pa‑m mʋ. Cam dɩdaanɩ vuvugə na tu ya daanɩ n dʋna, ba laan wʋ́ ba ba loori zǝnǝ n tee nɩ.
12 Abam nyɩ dɩ luuru tɩlʋ na gwaanɩ dɩ canna tɩn. Á bá wanɩ á bwəri luuru tɩlʋ na nuŋi jazɩm baŋa seeni tɩn. 13 A nan lagɩ a kwe á jɩjɩgɩrʋ dɩ á duuni maama mʋ a pa á dʋna zaanɩ sɩ ba cɛ ba pa daanɩ, á na tiini á kɩ lwarɩm á tɩʋ kʋm je maama nɩ tɩn ŋwaanɩ. 14 Amʋ wʋ́ pa á dʋna kwe abam ba ja ba vu sa-tɩʋ kʋlʋ á ya na yǝri kʋ ni nɩ tɩn, sɩ á ji ba gambɛ dáanɩ. Bɛŋwaanɩ, a ban-lʋm dɩm nyɩ dɩ mim na lagɩ dɩ di abam kulə te tɩn mʋ!»
Amʋ maa wɩ:
15 Amʋ Tu Baŋa-Wɛ,
nmʋ maŋɩ n ye a na yaarɩ te maama tɩn.
Guli amʋ gulə sɩ n ta n nii amʋ baŋa nɩ.
Nan pa kʋ zʋ balʋ na culi-nɩ tɩn yɩra!
Yɩ duri ba yibwənə
sɩ n pa ba na cwǝŋǝ ba gʋ-nɩ.
Kʋ yɩ nmʋ ŋwaanɩ mʋ
a nɛ yaara ba tee nɩ.
16 Nmʋ taanɩ dɩm na tʋ a zwa nɩ tɩn,
a kɩ-dɩ a wʋnɩ mʋ pa a ŋwɩ.
Dɩntʋ mʋ pɛ-nɩ wʋpolo
yɩ a wʋʋ dɩ tigə.b
Paŋwa Tu Baŋa-Wɛ,
nmʋ yɩrɩ dɩm mʋ lǝgi amʋ yɩra nɩ.
17 Amʋ ba tɔgɩ a je dɩdaanɩ nɔɔna balʋ na pupogi-da
ba mwanɩ tɩn a lara.
A nan pwɛ a tɩtɩ a jǝni dáa nɩ mʋ a yɩranɩ,
kʋ na yɩ nmʋ mʋ te-nɩ tɩn ŋwaanɩ.
Nmʋ pɛ a banɩ zaŋɩ dɩ bantʋ kikiə yam.
18 Bɛŋwaanɩ nan mʋ yɩ amʋ yaara yam ba fɔgɩ ya tiə?
Bɛɛ mʋ kɩ yɩ a zʋnnɩ dɩm dɩ ba fɔgɩ dɩ tiə?
Nmʋ na wǝli amʋ te tɩn
nyɩ dɩ bugə na wɩ tɩ-pwəŋə nɩ,
dɩ buli-yi na yǝni dɩ kʋ te tɩn mʋ.
19 Kʋntʋ ŋwaanɩ, Baŋa-Wɛ tagɩ tɩntʋ:
«Nmʋ na yagɩ n bɩtar-yɔɔrʋ tɩm kʋntʋ,
yɩ n joori n ba amʋ te,
a laan wʋ́ pa n joori n zɩgɩ lanyɩranɩ
sɩ n tan tʋŋɩ n pa-nɩ.
Nmʋ na ŋɔɔnɩ taanɩ dɩlʋ na jɩgɩ kuri tɩn,
nń tan yɩ a nijoŋnu.
Nɔɔna bam laan maa wʋ́ ba ba tɔgɩ nmʋ kwaga.
Kʋ daɩ sɩ n tan tɔgɩ bantʋ kwaga.
20 Amʋ wʋ́ pa n tan nyɩ dɩ kəbrə kalʋ ba na mɛ canna ba lɔ tɩn mʋ
sɩ n cɩ nɔɔna bantʋ dɩ ba kǝm-balwaarʋ tɩm.
Baá ciŋi najara dɩ nmʋ.
Ba nan bá wanɩ‑m ba di.
Bɛŋwaanɩ, amʋ wʋ n tee nɩ
sɩ a joŋi‑m a yagɩ.
21 Amʋ wʋ́ joŋi‑m a yagɩ
wʋ-lʋn-nyɩna bam jɩŋa nɩ,
sɩ ba yɩ wanɩ‑m ba kɩ lwarɩm.»
Baŋa-Wɛ na tagɩ te tɩn mʋ kʋntʋ.