Da-kʋrɩ taanɩ
14
Baŋa-Wɛ na pɛ Zeremi kwǝrǝ kalʋ da-kʋrɩ seeni tɩn mʋ tɩntʋ:
2 «Zuda laŋa kam maama yɩ ŋɔɔ mʋ dɩ kərə.
Ka tɩɩnɩ dɩm nɔn-biə bam joori kwaga mʋ.
Ba maa je tɩga nɩ wʋ-cɔgɔ ŋwaanɩ.
Zeruzalɛm tiinə bam dɩ maa coosi wɛ wɛ.
3 Nadunə bam tʋŋɩ ba gambɛ,
sɩ ba vu ba beeri na ba ba ba pa-ba.
Gambɛ sɩm na yi buli sɩlʋ maama,
sɩ yǝni sɩ kʋ mʋ yɩ na tǝrǝ.
Ba laan maa wʋ́ zɩŋɩ ba kɔɔra bam
ba joori sɔŋɔ dɩ jɩ-kʋrɩ,
yɩ wʋ-cɔgɔ dɩ cavɩɩra yɩranɩ jɩgɩ-ba.
4 Dʋa daa ba nɩ,
pa tɩga kam maama bagɩ lulooru.
Kʋntʋ ŋwaanɩ vala bam vwana parɩ,
yɩ ba kwe gɔrɔ ba ma ba kwəli ba yuu.
5 Wəŋə mʋ lʋgɩ ka bu gaa nɩ,
yɩ ka duri ka daarɩ‑o,
gaa na tǝrǝ je je nɩ tɩn ŋwaanɩ.
6 Ga-bɩnɛ laan zɩgɩ zwəənu tɩm yum nɩ mʋ,
sɩ sin sɩ dwe nɩnɛɛnɩ ga-kakuri na sin te tɩn.
Sɩ yɔɔrɩ sɩ niə je maama sɩ nii mʋ,
sɩ gaa na zɩgɩ kʋ wʋ je sɩlʋ nɩ.
Wʋdiu nan tǝrǝ sɩ sɩ di.»
Nɔɔna bam maa tɛ ba wɩ:
7 «Dɩ́ Tu Baŋa-Wɛ,
dɩ́ lwarɩm dɩm yɔɔrɩ ya lɩ dɩbam mʋ ya zɩgɩ dáa nɩ.
Dɩ kʋ dɩ, dɩ́ nan loori‑m mʋ,
sɩ n ta da kʋ baŋa n wǝli dɩbam,
nmʋ tɩtɩ yɩrɩ dɩm ŋwaanɩ.
Cɩga tɩn, dɩ́ nuŋi nmʋ kwaga nɩ kuni zanzan,
yɩ dɩ́ tusi dɩ́ cɔgɩ nmʋ yigə.a
8 Nmʋ yɩranɩ baŋa nɩ mʋ
Yisɩrayɛlɩ tiinə bam jɩgɩ ba tɩɩna.
Cam na yǝni dɩ yi dɩbam,
n ma n yɩ dɩ́ Vrɩnʋ.
Bɛɛ mʋ yɩ n kɩ nɩ n yɩ vəru mʋ
dɩ́ tɩʋ kʋm wʋnɩ?
Kʋ nyɩ dɩ n pəni dɩbam tee nɩ tɩtɩ dɩdʋa yɩranɩ mʋ.
Tɩga daa na pʋʋrɩ tɩn, n ma n kwe cwǝŋǝ n kɛ.
9 N kɩ nɩ n yɩ nabwəm mʋ,
naa babɩa kalʋ na warɩ ka nɔɔna sɩ ka joŋi ka yagɩ tɩn.
Dɩ́ Tu Baŋa-Wɛ, nmʋ nan wʋ dɩbam tee nɩ mʋ.
Dɩ́ yɔɔrɩ dɩ́ yɩ n tɩtɩ nɔɔna mʋ cɩga cɩga.
Nan yɩ viiri n daarɩ dɩbam!»
 
10 Baŋa-Wɛ ma ləri DƖ ta nɔɔna bam taanɩ DƖ wɩ:
«Ba soe sɩ ba taa kaagɩ je maama nɩ mʋ ba beerǝ.
Ba ba jaanɩ ba tɩtɩ sɩ ba maŋɩ amʋ tee nɩ.
Kʋntʋ ŋwaanɩ amʋ yi daa ba sui ba kikiə yam.
Amʋ laan wʋ́ guli ba gɛɛra yam dɩ ba lwarɩm kikiə,
sɩ a waarɩ-ba ya ŋwaanɩ.»
 
11 Baŋa-Wɛ laan ma ta dɩ amʋ DƖ wɩ:
«Yɩ loori amʋ sɩ a pa nɔɔna bantʋ joori ba na lam. 12 Ba na maŋɩ ba vɔ ba niə sɩ ba kaasɩ ba loori-nɩ dɩ, amʋ bá cəgi ba wɛ-loro kʋm. Ba nan na kɩ zwɛɛm pɛɛra dɩ wʋdiiru pɛɛra sɩ ba pa-nɩ dɩ, a bá joŋi-tɩ. A lagɩ a pa ba tɩ najara wʋnɩ mʋ, sɩ yawɩ-cɛɛrʋ dɩ kana dɩ ja-ba tɩ gʋ.»
13 Amʋ dɩ ma ləri a wɩ:
«Yuutu Baŋa-Wɛ, nmʋ nijoŋnǝ bam yǝni ba ta dɩ ba ba wɩ: ‹Wǝǝnu maama wʋ́ kɩ lam tɩ pa abam. Á bá zʋ najara wʋnɩ. Kana dɩ nan bá ja abam, sɩ yazurə yɩranɩ mʋ wʋ́ taa wʋra.› »
14 Baŋa-Wɛ daa ma ləri-nɩ DƖ wɩ:
«Nijoŋnǝ bam kʋntʋ tɔgɩ amʋ yɩrɩ baŋa mʋ sɩ fɔɩ vwan yɩranɩ. Amʋ wʋ tiŋi-ba sɩ ba taa yɩ a nijoŋnə. A nan wʋ tʋŋɩ-ba a nɔɔna bam tee nɩ. Amʋ maŋɩ a wʋ pɛ-ba a kwǝrǝ. Ba yi-nɛɛrɩ tɩtʋŋa dɩ vɩɩra yalʋ ba na jɩgɩ ba tɛ ba brɩ abam tɩn maama ba jɩgɩ kuri. Kʋ yɩ ba tɩtɩ wʋbʋŋa mʋ ganɩ-ba pa ba ŋɔɔna.b 15 Amʋ Baŋa-Wɛ nan tagɩ tɩntʋ mʋ: Kʋ nan na yɩ nijoŋnə balʋ amʋ na wʋ tʋŋɩ-ba yɩ ba jɩgɩ amʋ yɩrɩ ba fɔɩ vwan nɩ najara dɩ kana bá ba á tɩʋ kʋm nɩ tɩn, amʋ wʋ́ pa bantʋ tɩtɩ tɩ najara wʋnɩ, yɩ kana dɩ gʋ-ba. 16 Kʋ ta na yɩ balʋ ba na pwərisi vwan dɩ ba tɩn, kana dɩ najara mʋ wʋ́ gʋ bantʋ dɩ, pa ba yɩra taa tigi Zeruzalɛm cwe sɩm je maama nɩ. Nɔɔn-nɔɔnʋ daa bá daarɩ sɩ o kwe nɔɔna bam kʋntʋ o kɩ tɩga nɩ. Kʋʋ́ kɩ kʋntʋ kʋ pa bantʋ tɩtɩ, dɩ ba kaana, dɩ ba biə maama. A yɔɔrɩ a lagɩ a pa lɛɛrʋ tʋ ba baŋa nɩ, nɩ kʋ na maŋɩ dɩ ba lwarɩm kikiə te tɩn mʋ.»
 
17 Baŋa-Wɛ ma pa-nɩ ni sɩ a vu a ta dɩ nɔɔna bam nɩ:
«Wɩa dɩ tɩtɩ maama wʋnɩ a yiǝ su dɩ yi-na mʋ.
A kərə kam bá wanɩ ka kwǝri.
Kʋ nan yɩ amʋ nɔn-sonnu tɩm ŋwaanɩ mʋ.
Ba tiini ba na zʋnnɩ,
yɩ dɩ zʋ ba yɩra lanyɩranɩ.
18 A na nuŋi a vu gaa wʋnɩ,
a yɔɔrɩ a naɩ nɔɔna mʋ na tɩgɩ najara wʋnɩ
yɩ ba tigi je maama.
Amʋ nan na zʋ tɩʋ kʋm wʋnɩ dɩ,
a naɩ nɔɔna mʋ kana na jɩgɩ-ba ka gʋɩ.
Nijoŋnǝ bam dɩ kaanɩm tiinə bam maa kaagɩ je maama nɩ mʋ ba tʋŋa.
Ba nan yǝri ba na jɩgɩ kʋlʋ ba tʋŋɩ tɩn.»
Nɔɔna bam na loori Baŋa-Wɛ te tɩn
19 «Dɩ́ Tu Baŋa-Wɛ, nmʋ yɔɔrɩ n vri n kwaga
n ya Zuda tiinə bam mʋ na?
Nmʋ laan nɩɩsɩ dɩbam Siyɔn tiinə mʋ na?
Bɛɛ mʋ yɩ n kwe zʋnnɩ dɩlʋ na ba je tɩn
n kɩ dɩ́ yɩra nɩ?
Dɩ́ ya jɩgɩ tɩɩna nɩ dɩ́ wʋ́ na yazurə mʋ.
Wo-laarʋ nan wʋ tu dɩ́ tee nɩ.
Dɩ́ ma tɩɩnɩ sɩ dɩ́ na fɔgɩm,
yɩ lɛɛrʋ yɩranɩ mʋ tʋ dɩ́ baŋa nɩ.
20 Dɩbam Tu Baŋa-Wɛ, dɩ́ sɛ nɩ dɩ́ yɩ wʋ-lʋŋ-nyɩna.
Dɩ́ ta sɛ nɩ dɩ́ nabaara bam tusi zanzan.
Dɩbam maama yɔɔrɩ dɩ́ kɩ dɩ́ cɔgɩ nmʋ yigə mʋ.
21 Nmʋ tɩtɩ yɩrɩ dɩm ŋwaanɩ,
yɩ nuŋi dɩbam kwaga nɩ.
Yɩ yáalɩ n tɩtɩ tɩʋ kʋm mɛ n na di paarɩ tɩn.
Nan yɩ yiri ni dɩlʋ n dɛɛn na goni dɩ dɩbam tɩn.
22 Dwi-gɛ tiinə jwǝnǝ yam waɩ ya paɩ dʋa nɩ na?
Dʋa nan zɩgɩ wɛyuu nɩ ka nɩa ka tɩtɩ nɩ na?
Cɩga tɩn, dɩbam Tu Baŋa-Wɛ,
kʋ yɩ nmʋ yɩranɩ mʋ waɩ kʋntʋ n kɩ.
Kʋntʋ ŋwaanɩ, dɩ́ tɩɩna tigi nmʋ baŋa nɩ.»