Zuda dwi dɩm na wʋ́ na cɔgɩm dɩlʋ tɩn
13:1–20:18
Jɔgɔ mɩmaŋɩ
13
Baŋa-Wɛ ma ta dɩ amʋ DƖ wɩ: «Ve n yəgi jɔgɔ kʋlʋ ba na mɛ gar-fɩfalɩ ba sɔ tɩn, sɩ n daarɩ n vɔ-kʋ n təŋə nɩ. Nan yɩ pa na dwe-kʋ.» 2 Amʋ dɩ ma vu a kɩ te Baŋa-Wɛ na brɩ-nɩ sɩ a kɩ tɩn, yɩ a vɔ-kʋ a təŋə nɩ.3 Baŋa-Wɛ daa ta ma pa amʋ ni yɩ DƖ wɩ: 4 «Kwe jɔgɔ kʋm na vɔgɩ n təŋə nɩ tɩn n ja n vu Efratɩ bugə kam, sɩ n beeri piu gugoro n kwe-kʋ n səgi kʋ wʋnɩ.» 5 Amʋ ma sɩɩnɩ a vu a səgi-kʋ Efratɩ bugə kam je sɩm nɩ, nɩ Baŋa-Wɛ na brɩ-nɩ nɩ a kɩ te tɩn.
6 Kʋ na kɩ da yale tɩn, Baŋa-Wɛ ma ta dɩ amʋ DƖ wɩ: «Nan zaŋɩ n joori n vu Efratɩ bugə kam, sɩ n lɩ jɔgɔ kʋm a na tagɩ a brɩ-m sɩ n vu n səgi tɩn.» 7 A ma sɩɩnɩ a joori Efratɩ bugə kam, yɩ a vu a kʋ a lɩ jɔgɔ kʋm kʋ səgim jǝgǝ kam nɩ. A na nii tɩn, dɩ kʋ pɔgɩ mʋ. Kʋ daa ba jɩgɩ tɩtʋŋɩ.
8 Baŋa-Wɛ ma ta dɩ amʋ DƖ wɩ: 9 «Amʋ Baŋa-Wɛ na tagɩ te tɩn mʋ tɩntʋ: A lagɩ a cɔgɩ wǝǝnu tɩlʋ Zeruzalɛm tiinə dɩ Zuda dwi tiinə bam maama na magɩ ba nyɔɔna tɩ baŋa nɩ tɩn mʋ. 10 Nɔn-balwaarʋ tɩm kʋntʋ yɔɔrɩ ba vɩn sɩ ba cəgi amʋ taanɩ mʋ. Ba ma kɩ wʋ-dɛɔ ba beeri wa-yɔɔrʋ sɩ ba zuli. Amʋ nan na waarɩ-ba a ti, ba dɩ wʋ́ ji nɩnɛɛnɩ jɔgɔ kʋntʋ na yɩ te yɩ kʋ daa ba jɩgɩ kuri tɩn mʋ. 11 Amʋ ya lɩ Yisɩrayɛlɩ dwi tiinə bam dɩ Zuda dwi tiinə bam maama sɩ ba salɩ amʋ yɩra nɩ, nɩnɛɛnɩ nɔɔnʋ na wʋ́ vɔ jɔgɔ o təŋə nɩ te tɩn mʋ. A kuri-ba sɩ ba taa zuli-nɩ mʋ, sɩ a na yɩrɩ. Ba nan vɩ-nɩ mʋ. Amʋ Baŋa-Wɛ na tagɩ te tɩn mʋ kʋntʋ.»
Sana kɔɔra mɩmaŋɩ
12 «Amʋ Baŋa-Wɛ na tagɩ te dɩ Yisɩrayɛlɩ tiinə bam tɩn mʋ tɩntʋ: ‹Abam sana kɔɔra bam maama maŋɩ sɩ á lɛɛrɩ-ba á su dɩ sana mʋ!› Baá joori ba ləri‑m ba ta nɩ: ‹Dɩbam maŋɩ dɩ́ ye nɩ: dɩ́ maŋɩ sɩ dɩ́ lɛɛrɩ dɩ́ sana kɔɔra bam maama dɩ́ su dɩ sana mʋ.› 13 Ba na tagɩ kʋntʋ, sɩ n lǝri-ba n ta nɩ: ‹Baŋa-Wɛ nan tagɩ DƖ wɩ: Amʋ Baŋa-Wɛ wʋ́ pa nɔɔna balʋ maama na zʋʋrɩ Zuda laŋa kam nɩ tɩn nyɔ sana ba su pa ba bugi. A lagɩ a kɩ kʋntʋ a waarɩ pwa balʋ na nuŋi Pɛ Davidi dwi dɩm wʋnɩ tɩn, dɩ kaanɩm tiinə bam, dɩ nijoŋnǝ bam, dɩ Zeruzalɛm tiinə bam maama mʋ. 14 A laan maa wʋ́ kwe-ba a magɩ daanɩ sɩ ba cɩcʋgɩ nɩ kɔɔra mʋ te. Kʋ na yɩ ba nankwɩn dɩ ba biə bam, ba maama wʋ́ na cɔgɩm. A nan bá duri ba ŋwaŋa naa a ləri a wʋbʋŋa kɔtaa! A lagɩ a waarɩ-ba mʋ.›
Amʋ Baŋa-Wɛ na tagɩ te tɩn mʋ kʋntʋ.»
Zeremi kaanɩ nɔɔna bam dɩ ba kamunni dɩm
15 Cəgi-na sɩ á ni
kʋlʋ Baŋa-Wɛ na tagɩ dɩ abam tɩn.
Yɩ taá jɩgɩ-na kamunni.
16 Kwe-na á zulə á pa-na á Tu Baŋa-Wɛ dɩm
sɩ cam yɩ yi abam.
Kʋ na daɩ kʋntʋ,
Baŋa-Wɛ wʋ́ pa lim yi abam
yɩ á seeri á tʋ pweeru tɩm yuu nɩ,
tɩga na yi tɩn ŋwaanɩ.
Abam na jɩgɩ tɩɩna sɩ pooni ba á baŋa nɩ,
Wɛ wʋ́ pa lim ba dɩ kwǝli je maama,
sɩ á taá je lim-nyɔrɩsɩ wʋnɩ.
17 Abam nan na vɩn sɩ á cəgi Wɛ taanɩ dɩm,
amʋ wʋ́ vu a səgi a yɩranɩ a kan yi-na mʋ,
abam na brɩ á tɩtɩ kamunni tɩn ŋwaanɩ.
Amʋ wʋ́ kanɩ yi-na yɩranɩ mʋ.
A yibiyə maa wʋ́ taa cuuri dɩ yi-na,
ba na jaanɩ Baŋa-Wɛ nɔn-kɔgɔ kʋm
ba maa ve gambɛɛm tɩn ŋwaanɩ.
Baŋa-Wɛ ma ta dɩ amʋ DƖ wɩ:
18 «Kwe amʋ ni n vu n pa pɛ wʋm dɩ o nu wʋm nɩ:
‹Zaŋɩ-na á paarɩ yitunnu tɩm nɩ á tu tɩga nɩ.
Bɛŋwaanɩ, abam paarɩ yipwi sɩm lagɩ sɩ dwanɩ á yum nɩ
sɩ tʋ tɩga nɩ mʋ.a
19 Tɩɩnɩ dɩlʋ na wʋ Zuda jagwiə seeni tɩn maama pɩ.
Ba dʋna kaagɩ-dɩ mʋ ba pu
yɩ nɔɔna daa ba jɩgɩ cwǝŋǝ sɩ ba zʋ tɩʋ kʋm wʋnɩ
naa ba nuŋi kʋ pooni nɩ.
Ba zi Zuda tiinə bam maama ba ja ba kɛ.
Ba ma kalɩ-ba ba vu sa-tɩʋ yigə yigə.› »
20 Zeruzalɛm tiinə bam, kwəni-na á nii
jar-kərə balʋ na nuŋi jazɩm baŋa seeni
ba bɩɩnɩ á baŋa nɩ tɩn.
Nɔn-kɔgɔ kʋlʋ Wɛ na kɩ n jɩŋa nɩ
sɩ n ta n nii-ba tɩn nan bɛ?
Á dɛɛn nan tiini á jɩgɩ tɩɩra ba baŋa nɩ mʋ.
21 Baŋa-Wɛ lagɩ DƖ pa á na di ciloŋo dɩ balʋ tɩn
joori ba di dam mʋ abam baŋa nɩ.
Kʋ laan wʋ́ taa yɩ tɩta mʋ á yɩra nɩ?
Kʋ bá tiini kʋ ni abam,
nɩ kaanɩ na vri pugə sɩ o lʋ
yɩ kʋ ni‑o te tɩn mʋ na?
22 Nmʋ nan waɩ n bwe n tɩtɩ nɩ n wɩ:
«Bɛɛ mʋ pɛ tɩntʋ maama yi-nɩ?»
Kʋ yɩ n lwarɩm dɩm na gaalɩ tɩn ŋwaanɩ mʋ.
Kʋntʋ ŋwaanɩ n gwaarʋ kaarɩ tɩ daarɩ‑m
yɩ nɔɔna zi‑m ba cɔgɩ.
23 Nɔn-zonob wʋ́ wanɩ o ləri o yɩ-daa sɩ ka pɩɩrɩ na?
Gweeru dɩ nan wʋ́ wanɩ o zarɩ o yɩra
sɩ ya daa yɩ pʋpʋrɩ na?
Abam dɩ bá wanɩ á ləni á wʋʋ
sɩ á taá kɩ wo-laarʋ,
á na yɔɔrɩ á mɩ dɩ lwarɩm kikiə tɩn ŋwaanɩ.
24 Baŋa-Wɛ na tagɩ te tɩn mʋ tɩntʋ:
«Amʋ nan lagɩ a pa á jagɩ mʋ,
nɩnɛɛnɩ viu na nuŋi kagʋa nɩ
kʋ kalɩ weeru kʋ ja je te tɩn.
25 Amʋ wʋbʋŋa jaanɩ sɩ a kɩ kʋntʋ mʋ á yɩra nɩ.
Kʋ nan wʋ́ sɩɩnɩ kʋ kɩ.
Bɛŋwaanɩ, abam swe amʋ swiə mʋ,
yɩ á daarɩ á tɔgɩ jwə-yɔɔrʋ kwaga.
26 Amʋ wʋ́ pa á tiini á di á cavɩɩra
nɩnɛɛnɩ ba na lɩ kaanɩ gwaarʋ
ba daarɩ‑o dɩ cavɩɩra te tɩn.
27 Zeruzalɛm tiinə bam, amʋ nii a na
wo-zɔɔna yalʋ maama á na jɩgɩ á kɩ tɩn.
Á nuŋi amʋ kwaga nɩ
yɩ á daarɩ á tɔgɩ wa-yɔɔrʋ kwaga,
nɩ kaanɩ na yagɩ o barʋ
yɩ o vu o beeri bɔɔla
sɩ o kɩ kabwəŋə dɩ ba
karɩ sɩm nɩ dɩ pweeru yuu nɩ te tɩn mʋ.
Á fra tiini ya zʋ kəm-balwaarʋ,
yɩ á ba jɩgɩ cavɩɩra ya ŋwaanɩ.
Lɛɛrʋ yi abam!
Á wʋ́ digimi á tɩtɩ taan
sɩ á laan joori á na kwɛɛm yən mʋ?»