Zeremi jɩgɩ taanɩ dɩ Baŋa-Wɛ
12
Baŋa-Wɛ, amʋ na yǝni a kwe taanɩ a pa‑m,n yǝni n nii dɩ baŋa nɩ dɩ cɩga mʋ.
Dɩ kʋ dɩ, a lagɩ a bwe bwiə nmʋ bʋra bʋrɩm dɩm seeni.
Bɛɛ mʋ te pa nɔn-balwaarʋ ve yigə?
Bɛŋwaanɩ mʋ vwa-nyɩna ŋwɩa kɩ lanyɩranɩ?a
2 Nmʋ jəri-ba nɩ ba yɩ tweeru mʋ te.
Ba ma kɩ bʋnnʋ yɩ ba zɩgɩ dɩ dam,
sɩ ba daarɩ ba taa ləri biə.
Maŋa maama n taanɩ wʋ ba niə nɩ.
Ba bɩcara nan ba tɔgɩ nmʋ.b
3 Amʋ Tu Baŋa-Wɛ, nmʋ nan maŋɩ n ye-nɩ.
N ma n yɩrɩ-nɩ yɩ n ta maŋɩ a wʋbʋŋa
sɩ n lwarɩ a na soe-m te tɩn.
Yɔɔrɩ n vaŋɩ nɔɔna bam kʋntʋ,
nɩ ba na vaŋɩ piə ba ve sɩ ba gʋ te tɩn.
Pɔɔrɩ-ba n zɩgɩ dáa nɩ
sɩ n lɩ dɛ dɩdʋa n cɔgɩ-ba.
4 Dɩbam tɩga kam wʋ́ taa yɩ tɩ-kʋra kʋntʋ taan na?
Nii gaarʋ na kwaarɩ je maama nɩ te!
Vara dɩ zunə maama maa wʋra ba tʋa,
dɩ́ nɔɔna bam kǝm-balwaarʋ ŋwaanɩ.
Ba nan ta jɩgɩ ni mʋ ba tɛ ba wɩ:
«Baŋa-Wɛ bá na kʋlʋ na lagɩ kʋ kɩ dɩbam tɩn.»
Baŋa-Wɛ na ləri Zeremi te tɩn
5 «Nmʋ nan na kwaanɩ n duri n dwəni dɩ nabiinǝ n ga,
nń kɩ tɩta mʋ n duri n dwəni dɩ siseŋ-nɔɔna sɩ n di?
Nmʋ na ve tɩ-kamparɩ baŋa nɩ n saarɩ n tʋɩ,
kʋ laan nan na yɩ punnu na li mɛ Zʋrdɛn bugə kam ni nɩ tɩn,
kʋ bá kɩ dono mʋ na?
6 Nmʋ tɩtɩ cʋrrʋ tɩlʋ á na yɩ dwi daanɩ tɩn
mʋ ba jɩgɩ cɩga dɩ nmʋ.
Ba maa ciŋi‑m yɩ ba bagɩ ba yagɩ wɛ wɛ.
Kʋntʋ tɩn, ba na maŋɩ ba ŋɔɔnɩ ni-sʋnɩ dɩ nmʋ,
yɩ kwe n cɩga n pa-ba.
7 Amʋ nan wʋ́ nuŋi a tɩtɩ dwi tiinə bam kwaga nɩ.
A yigə daa bá taa wʋ nɔɔna balʋ na yɩ a nyɩm tɩn wʋnɩ.
Kʋ yɩ balʋ a na tiini a soe tɩn mʋ
a lagɩ a kwe-ba a kɩ ba dʋna bam jɩŋa nɩ.
8 Nɔɔna balʋ a tɩtɩ na kuri tɩn mʋ pipiri
ba dwəni dɩ amʋ,
nɩ nywəənu na yɩ te kagʋa nɩ tɩn.
Ba maa kaasɩ dɩ sɔɔ ba yagɩ a yɩra nɩ.
Kʋ ma pa a culi-ba.
9 Amʋ laan pɛ a tɩtɩ nɔɔna bam ji nɩnɛɛnɩ kaloŋo na yɩ te,
yɩ duurə gilimi-kʋ ba zɔgɩ tɩn mʋ.
Nan bəŋi ga-vara bam sɩ ba dɩ ba
ba di ba su ba wʋbʋŋa.
10 Yigǝ tiinǝc zanzan mʋ wʋ́ ba sɩ ba nɔ ba cɔgɩ
tɩ-ywəŋə kalʋ a na jəri a nɔɔna bam ka wʋnɩ tɩn.
Ba nan wʋ́ pa a tɩ-ywəŋə kam kʋntʋ laan ji kagʋa.
11 Je sɩm maama wʋ́ ji kapor-poŋo,
dɩ di-dwəənu yɩranɩ mʋ.
Tɩga kam maama laan wʋ́ ji kagʋa mʋ,
yɩ nɔɔn-nɔɔnʋ yigə bá taa wʋ ka wʋnɩ.
12 Nɔn-kɔgɔ zanzan wʋ́ ba
ba məəli kagʋa zwəənu tɩm maama yuu nɩ
sɩ ba zaŋɩ najara dɩ a nɔɔna bam.
Amʋ Baŋa-Wɛ wʋ́ tɔgɩ jar-kərə bam kʋntʋ baŋa
a cɔgɩ tɩga kam je maama.
Nɔɔn-nɔɔnʋ bá wanɩ o lu ba jɩŋa nɩ.
13 Amʋ nɔɔna bam na dugi mɩna,
baá joori ba gwe mɩn-kayalɩ mʋ.
Ba maa wʋ́ yaarɩ dɩ tɩtʋŋ-cɛɛrɩ
yɩ ba bá na nyɔɔrɩ ba tɩtʋŋa baŋa nɩ.
Cavɩɩra wʋ́ ja-ba dɩ ba na wʋ́ zagɩ wʋdiu fɩnfɩɩn kʋlʋ tɩn.
Bɛŋwaanɩ, amʋ ban-lʋm mʋ zaŋɩ ba baŋa nɩ.»
14 Baŋa-Wɛ ma ta DƖ wɩ: «Kʋ na yɩ tɩɩnɩ dɩlʋ maama na gilimi tɩga kalʋ a na kwe a pa a nɔɔna Yisɩrayɛlɩ tiinə bam sɩ ba taa te yɩ ba bʋŋɩ sɩ ba cɔgɩ-ka tɩn, amʋ lagɩ a gɔ-ba ba je sɩm nɩ a dʋlɩ a yagɩ mʋ. A laan maa wʋ́ lɩ Zuda dwi tiinə bam ba wʋnɩ a joŋi a yagɩ. 15 Amʋ nan na gɔgɩ dwi-gɛ tiinə bam kʋntʋ a dʋlɩ a yagɩ yɩ kʋ kɩ fɩɩn, a daa wʋ́ duri ba ŋwaŋa, sɩ a ja-ba a joori ba tɩtɩ tɩɩnɩ dɩm, sɩ ba joori ba jǝni da. 16 Kʋ nan maŋɩ sɩ ba zaasɩ amʋ tɩtɩ nɔɔna bam cwe sɩm sɩ ba tɔgɩ-sɩ. Ba dɛɛn sʋgɩ amʋ nɔɔna bam pa ba ma Baalɩ yɩrɩ ba du durə. Ba laan maŋɩ sɩ ba ma amʋ yɩrɩ dɩm mʋ ba du durə, yɩ ba wɩ: ‹Nɩ Ŋwɩa Tu Baŋa-Wɛ dɩm na sɛ.› Ba na kɩ kʋntʋ maama, ba dɩ wʋ́ wanɩ ba na jǝŋǝ je amʋ nɔɔna bam wʋnɩ. 17 Kʋ daarɩ, tɩʋ kʋlʋ maama na vɩn amʋ ni, amʋ wʋ́ yɔɔrɩ a gɔ-ba mʋ a yagɩ, sɩ a daarɩ a cɔgɩ-ba fasɩ!»
Baŋa-Wɛ na tagɩ te tɩn mʋ kʋntʋ.