Nɔɔna bam cɔgɩ Wɛ ni-gonim dɩm
11
Baŋa-Wɛ daa na pɛ Zeremi ni dɩlʋ tɩn mʋ tɩntʋ:2 «Guli ni dɩlʋ a dɛɛn na goni dɩ a nɔɔna bam tɩn. Ta daarɩ n ŋɔɔnɩ dɩ Zeruzalɛm tɩʋ kʋm tiinə dɩ Zuda tiinə bam maama. 3 Ta dɩ ba nɩ amʋ Yisɩrayɛlɩ tiinə Baŋa-Wɛ dɩm mʋ tagɩ a wɩ: Amʋ dɛɛn goni ni dɩ á nabaara bam. A nan sɔɔlɩ lwarɩm a yagɩ wʋlʋ maama na vɩn sɩ o kɩ dɩ na brɩ te tɩn yuu nɩ mʋ. 4 A dɛɛn na jaanɩ á nabaara bam a nuŋi Ezipi nɩ yɩ a kɩ ni-gonim dɩlʋ dɩ ba tɩn mʋ kʋntʋ. Tɩʋ kʋm kʋntʋ ya yɩ min-vʋgʋ yaara je mʋ kʋ pa-ba. A dɛɛn tagɩ dɩ ba a wɩ: ‹Sɛ-na amʋ ni sɩ á daarɩ á taá tɔgɩ cullu tɩlʋ maama a na pɛ abam tɩn. Á na kɩ kʋntʋ, á wʋ́ taá yɩ amʋ tɩtɩ nɔɔna, sɩ amʋ dɩ taa yɩ abam Wɛ. 5 Amʋ laan maa wʋ́ kɩ a su a dɛɛn na dugi durə dɩ á nabaara bam sɩ a pa-ba tɩga kalʋ na ywəmmə dɩ varɩm dɩ kɔnɔ tɩn.› Tɩga kam kʋntʋ baŋa nɩ mʋ abam laan zʋʋrɩ zɩm tɩntʋ.» Amʋ ma ləri a wɩ: «Ɛɛn, Baŋa-Wɛ, pa kʋ sɩɩnɩ kʋ kɩ kʋntʋ.»
6 Baŋa-Wɛ laan ma ta dɩ amʋ DƖ wɩ:
«Ve n tɔɔlɩ kwǝrǝ kantʋ Zeruzalɛm cwe sɩm nɩ dɩ Zuda tɩɩnɩ dɩm maama wʋnɩ sɩ n ta nɩ: Guli-na ni dɩlʋ amʋ dɛɛn na goni tɩn, sɩ á taá tɔgɩ dɩ na brɩ te tɩn. 7 Amʋ dɛɛn na yɔɔrɩ a ja á nabaara bam á nuŋi Ezipi nɩ tɩn mʋ a maŋɩ a kaanɩ-ba taan sɩ kʋ yi zɩm. A maa yǝni a ta dɩ ba a wɩ: ‹Sɛ-na amʋ ni dɩm.› 8 Ba nan wʋ sɛ. Ba brɩ ba wʋ cəgi-nɩ dɩ. Ba maa jɩgɩ yi-dɛɛrɩ yɩ ba tɔgɩ kǝm-balwaarʋ tɩlʋ maama ba wʋbʋŋa na lagɩ tɩn. Kʋntʋ ŋwaanɩ mʋ a nan pɛ waarɩm dɩlʋ maama ni-gonim dɩm na brɩ tɩn ba ba baŋa, ba na vɩn sɩ ba tɔgɩ ni dɩlʋ amʋ na goni dɩ ba tɩn ŋwaanɩ.»
9 Baŋa-Wɛ daa ma ta dɩ amʋ DƖ wɩ:
«Zeruzalɛm tɩʋ kʋm tiinə dɩ Zuda tiinə bam maama mʋ kɩ ni daanɩ sɩ ba yɩ sɛ ba pa-nɩ. 10 Ba nuŋi amʋ kwaga nɩ yɩ ba yɔɔrɩ ba sɛ sɩ ba kɩ ba nabaara lwarɩm dɩm doŋ mʋ. Bantʋ dɩ dɛɛn vɩn sɩ ba cəgi amʋ taanɩ dɩm. Ba laan ma tɔgɩ wa-yɔɔrʋ kwaga sɩ ba zuli-ya. Yisɩrayɛlɩ dwi tiinə bam, dɩ Zuda dwi tiinə bam maama mʋ cɔgɩ ni-gonim dɩlʋ amʋ na kɩ dɩ ba nabaara bam tɩn. 11 Amʋ Baŋa-Wɛ nan tagɩ tɩntʋ mʋ DƖ wɩ: ‹A lagɩ a pa cɔgɩm mʋ ba ba baŋa nɩ sɩ ba yɩ lu. Ba nan na kaasɩ ba loori amʋ te maama dɩ, a bá cəgi ba kərə kam. 12 Zeruzalɛm tiinə bam dɩdaanɩ Zuda tiinə bam maama laan maa wʋ́ vu wa-yɔɔrʋ tɩlʋ ba na zuli tɩn te sɩ ba loori zǝnǝ ya tee nɩ. Ya nan bá wanɩ-ba ya cɩ cam dɩlʋ na wʋ́ tʋ ba yuu nɩ tɩn. 13 Abam Zuda dwi tiinə bam, nii á kikiə na yɩ te! Abam tɩɩnɩ dɩm na maɩ te tɩn, á jwǝnǝ dɩ yɩ kʋntʋ mʋ. Bimbinə yalʋ á na kaanɩ Baalɩ jwə-yɔɔ kʋm ya baŋa nɩ tɩn dɩ maa maɩ dɩ cwe sɩlʋ na wʋ Zeruzalɛm tɩʋ kʋm wʋnɩ tɩn.›
14 Kʋntʋ ŋwaanɩ Zeremi, yɩ kwaanɩ sɩ n loori-nɩ n pa nɔɔna bantʋ. Nan yɩ magɩ n japoori n loori a yigə nɩ ba ŋwaanɩ, sɩ ba cam maŋa na yiǝ, amʋ bá cəgi ba wɛ-loro kʋm.
15 A nɔn-sonno tɩm daa ba jɩgɩ cwǝŋǝ
sɩ ba jeeri a digə kam wʋnɩ.
Ba zanzan mʋ kɩ kǝm-balwaarʋ.
Á bʋŋɩ nɩ: á na sugi a yiǝ dɩ á vara kaanɩm dɩm,
cam daa bá ba á baŋa nɩ mʋ na?
Yɩ taá jɩgɩ-na wʋpolo,
sɩ kʋ ba jɩgɩ kuri.
16 Amʋ Baŋa-Wɛ nan ya pɛ á nyɩ dɩ Olivi tiu
kʋlʋ na kɩ vɔɔrʋ lanyɩranɩ
yɩ kʋ tiu biə bam dɩ tiini ba lana tɩn mʋ.
A nan wʋ́ bagɩ mʋ nɩ dʋ-fara te,
yɩ a pa mim ja tiu kʋm kʋntʋ dɩ di.
Kʋ nɛ sɩm maama dɩ maa wʋ́ cɩcʋgɩ.a
17 Amʋ Paŋwa Tu Baŋa-Wɛ dɛɛn mʋ jəri abam á tɩga kam nɩ, nɩ tiu te tɩn. Amʋ nan sɔɔlɩ lwarɩm mʋ a yagɩ á yuu nɩ. Bɛŋwaanɩ, Yisɩrayɛlɩ dwi tiinə dɩ Zuda dwi tiinə bam maama pɛ a banɩ zaŋɩ mʋ, dɩ ba na zuli Baalɩ jwəm dɩm tɩn.»
Nɔɔna na bʋŋɩ sɩ ba gʋ Zeremi te tɩn
18 Baŋa-Wɛ dɛɛn ma pa a yiǝ puri sɩ a wanɩ a lwarɩ kʋ kuri. O ma pa a taa ye nɔɔna bam kǝm-balwaarʋ tɩm ni nɩ. 19 A ya yǝri nɩ ba kɩ ni-mɔrɔ daanɩ sɩ ba gʋ amʋ mʋ. A maa nyɩ dɩ pǝlbu kalʋ ba na wʋ́ ja ba vu ba gʋ yɩ ka yǝri kʋlʋ na wʋra kʋ kɩ tɩn mʋ. Ba dɛɛn ma ta ba wɩ:
«Pa-na sɩ dɩ́ cɔgɩ tiu kʋm dɩ kʋ biə maama.
Dɩ́ wʋ́ pa o mʋmwɛ ti lʋgʋ baŋa nɩ,
sɩ nɔɔna daa yɩ taa guli o gulə.»
20 Kʋ nan na yɩ nmʋ, Paŋwa Tu Baŋa-Wɛ,
nmʋ yǝni n bʋrɩ cɩga bʋra mʋ.
N ta ma n maŋɩ nɔɔna bɩcara dɩ ba wʋbʋŋa
sɩ n lwarɩ ya na yɩ te tɩn.
Nan zaŋɩ n waarɩ-ba,
sɩ n ma n ŋwɩ a jɩnɩ ba baŋa nɩ.
Bɛŋwaanɩ, a kwe a woŋo maama
a kɩ nmʋ jɩŋa nɩ mʋ.
21 Anatɔtɩ tɩʋ tiinə dɛɛn beeri amʋ mʋ sɩ ba gʋ, yɩ ba tɛ ba wɩ a yɩ taa ŋɔɔnɩ Baŋa-Wɛ yɩrɩ ŋwaanɩ, sɩ a na vɩn, baá gʋ-nɩ. 22 Kʋntʋ ŋwaanɩ, Paŋwa Tu Baŋa-Wɛ tagɩ ba taanɩ DƖ wɩ: «Amʋ wʋ́ waarɩ-ba mʋ. Ba nɔn-dʋnnʋ tɩm wʋ́ tɩ najara wʋnɩ mʋ, sɩ kana laan gʋ ba biə bam, bəkəri dɩ bɩsankam maama. 23 Maŋa kam na yi sɩ a waarɩ Anatɔtɩ tiinə bam, a laan wʋ́ pa lɛɛrʋ tʋ ba baŋa nɩ, yɩ ba wʋlʋwʋlʋ bá daarɩ.»