Jwǝnǝ kaanɩm na cɔgɩ nɔɔna te tɩn
«Abam yɩ lwəni-na dwi-gɛ tiinə bam kikiə.
Yɩ nii-na wo-kɩnkagɩla yalʋ na wʋ wɛyuu nɩ tɩn,
sɩ á pa ya sʋ abam,
nɩnɛɛnɩ dwi-gɛ tiinə na yǝni ba fʋnɩ dɩ-ya te tɩn.
3 Bantʋ na kɩ te dɩ ba cullu tɩm tɩn ba jɩgɩ kuri.
Ba yǝni ba vu kagʋa wʋnɩ ba goni daa mʋ,
sɩ gɔgɔ kwe o dooru o ma o kwɛ-ka sɩ ka ji jwəm.
4 Ba maa wʋ́ kwe səbu-sɩŋa dɩ səbu-poŋo
ba ma fɔgɩ-dɩ ba kaagɩ,
yɩ ba daarɩ ba kwe hama ba ma ba pa cɩna ka yɩra nɩ ba cwi-ka,
sɩ ka daa yɩ zaŋɩ ka ta zuulə.
5 Wa-yɔɔrʋ tɩm kʋntʋ nyɩ dɩ nabiinu nyɩnyʋgʋ
nɔɔnʋ na kwe o cwi o kadugə nɩ,
sɩ o ma o saarɩ zunə te tɩn mʋ.
Ya warɩ ya ŋɔɔnɩ.
Ya maa warɩ ya vu ya tɩtɩ nɩ.
Nɔɔna maŋɩ sɩ ba taa zɩŋɩ-ya mʋ ba beerǝ.
Kʋntʋ ŋwaanɩ, yɩ taá fʋna dɩ-ya.
Ya bá wanɩ abam ya cɔgɩ,
ya nan bá wanɩ ya wǝli abam.»a
6 Yuutu Baŋa-Wɛ, nmʋ doŋ tǝrǝ.
Nmʋ mʋ yɔɔrɩ n jɩgɩ kamunni.
Nmʋ yɩrɩ dɩm yɩ yɩrɩ kamunu mʋ,
n dam-fɔrɔ kʋm ŋwaanɩ.
7 Nmʋ yɩ dwi tiinə maama Pɛ.
Nɔɔna maama maŋɩ sɩ ba taa kwarɩ-m mʋ.
Nmʋ maŋɩ sɩ n joŋi ba zulə yam.
Kʋ na yɩ tɩga baŋa tɩɩnɩ dɩm maama pwa bam
dɩdaanɩ ba swan tiinə bam,
nmʋ doŋ tǝrǝ ba maama wʋnɩ.
8 Ba maama ba jɩgɩ wʋbʋŋa.
Ba maa tɔgɩ jwərim yɩranɩ mʋ.
Kwiə yalʋ ba na joŋi ba jwǝnǝ tee nɩ tɩn yɩ kafɛ mʋ.
9 Ba yǝni ba yəgi səbu-poŋo Tarsisi nɩ,
yɩ ba ta yəgi səbu-sɩŋa Ufazɩ nɩ,
sɩ gwarʋ kwe-tɩ ba ma ba kwɛ jwǝnǝ yam.
Ba ma daarɩ ba gɔgɩrɩ-ya
dɩ garyiə yalʋ nyɩnyʋrʋ na yɩ nazon-pupwiə,
dɩ nasʋŋ-pupwiə tɩn.
Nabiinǝ ma swan mʋ ba mɔɔnɩ-ya.
10 Cɩga ŋwaanɩ nan,
Baŋa-Wɛ yɩranɩ mʋ yɩ Wɛ cɩga cɩga!
DƖ maa yɩ Ŋwɩa Tu Wɛ dɩm.
DƖ paarɩ dɩm wʋra maŋa maama.
DƖ banɩ nan na zaŋɩ,
tɩga baŋa maama sisiŋi mʋ.
DƖ ban-lʋm dɩm kʋntʋ dwe
lʋgʋ baŋa dwi maama jam.
11 Ta-na sɩ ba lwarɩ nɩ Baŋa-Wɛ mʋ wɩ: «Kʋ daɩ abam wa yam mʋ naanɩ wɛyuu dɩdaanɩ tɩga baŋa. Ya nan wʋ́ je tɩga baŋa nɩ, dɩ wɛyuu maama nɩ.»
12 Baŋa-Wɛ nan kwe DƖ dam dɩm mʋ
DƖ kɩ tɩga kam baŋa.
DƖ ma daarɩ DƖ kwe DƖ swan yam
DƖ naanɩ lʋgʋ kʋm maama.
DƖ ma da DƖ wʋbʋŋa baŋa nɩ DƖ lwarɩ wɛyuu kʋm
pa kʋ tigi palalala.
13 Dɩntʋ na zɩgɩ wɛɛnɩ DƖ bagɩ DƖ kwǝrǝ,
wɛyuu baŋa na bam yǝni ba wuuri mʋ.
DƖ waɩ DƖ paɩ kunkwǝǝnu zɩgɩ
lʋgʋ baŋa kweelim je sɩm nɩ
tɩ taɩ tɩ nuŋǝ.
DƖ maa paɩ dʋa nɩ yɩ ka pɩpɩla.
DƖ na pʋrɩ DƖ digə kam,
viu mʋ wʋ́ nuŋi da kʋ jagɩ kʋ yi je maama.
14 Jwǝ-kaana bam maama jwərim dɩm gaalɩ mʋ,
yɩ ba wʋbʋŋa tǝrǝ.
Cavɩɩra wʋ́ ja gɔgɔ kʋlʋ maama na gɔgɩrɩ jwǝnǝ tɩn,
o jwǝnǝ yam na ba jɩgɩ ŋwɩa tɩn ŋwaanɩ.
Ya yɩ wo-yɔɔrʋ mʋ.
15 Ya ba jɩgɩ kuri.
Ya maŋɩ sɩ nɔɔna taa jɩgɩ-ya ba mwana mʋ.
Ya waarɩm maŋa kam na yiǝ,
ya maama wʋ́ cɔgɩ mʋ fasɩ.
16 Wʋlʋ Zakɔbɩ dwi tiinə bam na zuli tɩn
nan daɩ nɩ yantʋ na yɩ te tɩn.
Wʋntʋ mʋ yɩ woŋo maama Naanʋ wʋm.
Yisɩrayɛlɩ dwi tiinə bam dɩ yɩ balʋ
o na kuri sɩ ba taa yɩ wʋntʋ tɩtɩ nyɩm tɩn mʋ.
O yɩrɩ mʋ yɩ Paŋwa Tu Baŋa-Wɛ dɩm.
Lɛɛrʋ wʋ́ ba Zeruzalɛm tiinə baŋa nɩ
17 Nan kɩ-na á zɩla á kɩ daanɩ,
sɩ á duri á daarɩ á tɩʋ kʋm,
á dʋna na gilimi abam ba kɩ tɩtarɩ nɩ tɩn ŋwaanɩ.
18 Baŋa-Wɛ nan tagɩ tɩntʋ mʋ DƖ wɩ:
«Amʋ lagɩ a kwe abam balʋ na zʋʋrɩ tɩga kam nɩ tɩn
a dʋlɩ a yagɩ mʋ,
nɩnɛɛnɩ nɔɔna na mɛ napana ba dʋlɩ kandwɛ ba yagɩ te tɩn.
A maa wʋ́ pa lɛɛrʋ yi abam
pa kʋ ni abam kʋ ja gaalɩ.»
A maa wɩ:b
19 Lɛɛrʋ wʋ a yuu nɩ!
Nii kʋ na zʋʋrɩ a yɩra te.
A zʋnnɩ dɩm ba tiə!
A ya bʋŋɩ nɩ: «Yawɩʋ mʋ jɩgɩ-nɩ,
a laan wʋ́ ba a wəri.»
20 Kʋ nan na yɩ te tɩn,
a vwe dɩm yɔɔrɩ dɩ cɔgɩ mʋ.
Ŋʋnɩ sɩlʋ ya na vɔgɩ-dɩ tɩn laan kɔga.
A biə bam maama ma je ba daarɩ-nɩ.
Nɔɔn-nɔɔnʋ daa tǝrǝ sɩ kʋ tu cwi a vwe dɩm o pa-nɩ,
naa o lɔ digə sɩ a zʋ ka wʋnɩ.
21 Dɩ́ yigǝ tiinǝc bam wʋbʋŋa tɩgɩ mʋ.
Ba ba bwe sɩ ba lwarɩ Baŋa-Wɛ wʋbʋŋa.
Kʋntʋ nan mʋ pɛ ba zʋ gɛɛrɩ wʋnɩ,
yɩ dɩ́ kɔgɔ kʋm maama dɩ jagɩ kʋ je.
22 Cəgi-na! Ba jɩgɩ taanɩ ba bɩɩna!
Tiguri-kaasa mʋ nuŋi jazɩm baŋa seeni tɩʋ kʋdoŋ nɩ.
Ba jar-kərə mʋ nuŋi ba bɩɩnɩ dɩbam baŋa.
Ba kǝm dɩm kʋntʋ nan wʋ́ pa
Zuda laŋa kam ji di-dwəənu mʋ.
Ga-kakuri yɩranɩ maa wʋ́ taa zʋʋrɩ ka tɩɩnɩ dɩm wʋnɩ.
23 Amʋ Tu Baŋa-Wɛ, amʋ ye nɩ kʋ na yɩ nabiinǝ,
dɩ́ wʋlʋwʋlʋ ba ze o tɩtɩ ŋwɩa.
Nɔɔn-nɔɔnʋ warɩ sɩ o lwarɩ cwǝŋǝ kalʋ
kʋ tu na wʋ́ kwe tɩn.
24 Kʋntʋ tɩn, Baŋa-Wɛ, ta n jɩgɩ-nɩ n kʋrɩsa.
Nan tɔgɩ cɩga cwǝŋǝ n kʋrɩsɩ-nɩ,
sɩ n na dɛ n ban-zɔŋɔ kʋm baŋa n kɩ kʋntʋ,
a bá wəri.
25 Kʋ nan na yɩ dwi-gɛ tiinə balʋ na ba kwarɩ nmʋ tɩn,
dɩ balʋ maama na vɩn nmʋ tɩn,
pa n ban-lʋm dɩm tʋ ba baŋa nɩ.
Bɛŋwaanɩ, bantʋ tiini ba cɔgɩ dɩbam Yisɩrayɛlɩd tiinə bam mʋ.
Ba ma wanɩ dɩbam ba di
yɩ ba daarɩ ba pa dɩ́ tɩʋ kʋm ji di-dwəənu kʋ zɩga.