9
Amʋ yuu ya na wʋ́ wanɩ kʋ ji vʋlɩ,
sɩ a yiǝ dɩ ji buli-yiə,
amʋ yaá keeri wɩa dɩ tɩtɩɩ maama,
ba na gʋ a nɔɔna balʋ tɩn ŋwaanɩ.
2 Amʋ yaá lagɩ je kagʋa yuu nɩ,
mɛ cwə-vələ na ve ba sin tɩn a vu da.
A laan maa wʋ́ vu dáa a daarɩ a nɔɔna bam.
Bɛŋwaanɩ, ba maama nuŋi Wɛ kwaga nɩ,
yɩ ba tɔgɩ kǝm-balwaarʋ.
Baŋa-Wɛ na ləri Zeremi te tɩn
3 Baŋa-Wɛ na tagɩ kʋlʋ tɩn mʋ tɩntʋ:
«Nɩ nɔɔna na saŋɩ tɛ te tɩn,
kʋntʋ mʋ a nɔɔna bam dɩ ti ba yigə
sɩ ba taa fɔɩ vwan.
Ba na kwaanɩ sɩ ba na dam tɩga kam nɩ te tɩn,
kʋ daɩ cɩga mʋ ba tɔga,
sɩ vwan yɩranɩ mʋ.
Ba maa tʋŋɩ lwarɩm ba daŋɩ da-baŋa nɩ,
yɩ ba yigə tǝrǝ dɩ amʋ.
4 Taá ye-na á badonnǝ bam ni nɩ.
Nan yɩ kwe-na á tɩɩna á daŋɩ á cʋrrʋ baŋa nɩ.
Bɛŋwaanɩ, á dwi tiinə bam maama
kaagɩ ba pini daanɩ mʋ.a
Nɔɔna maama dɩ maa baɩ da-bɩbara.
5 Ba maa jɩgɩ ba badonnǝ ba gana.
Nɔɔn-nɔɔnʋ ba tɛ cɩga o paɩ o doŋ.
Ba maa paɩ ba niə yam mɩ dɩ vwa-fɔra.
Ba maama soe sɩ ba taa kɩ lwarɩm,
yɩ ba warɩ ba yagɩ.
6 Ba maa yǝni ba tɔgɩ vuvugə kikiə
ba daŋɩ da-baŋa nɩ,
yɩ ba ta ganɩ ba donnǝ ba wǝli da.
Ba ba sɛ sɩ ba taa kwarɩ amʋ.»
Baŋa-Wɛ na tagɩ te tɩn mʋ kʋntʋ.
7 Kʋntʋ ŋwaanɩ Paŋwa Tu Baŋa-Wɛ tagɩ tɩntʋ:
«Nii a na lagɩ a kɩ te tɩn!
A lagɩ a ma mim mʋ a maŋɩ a nɔɔna bam a nii,
yɩ a lɩ wo-yɔɔrʋ ba wʋnɩ
sɩ a daarɩ a kwɛ-ba.
Bɛɛ mʋ amʋ daa wʋ́ kɩ,
a nɔɔna bam lwarɩm dɩm ŋwaanɩ?
8 Bɛŋwaanɩ, ba ni-taanɩ nyɩ dɩ cɩna yalʋ ba na sɩlɩ tɩn mʋ.
Ba maa kaagɩ ba fɔɩ vwan yɩranɩ.
Nɔɔnʋ maama maɩ yazurə taanɩ mʋ o warɩ o doŋ,
yɩ o laan cɩ cɩkʋ sɩ o ma o ja kʋ tu.
9 A na waarɩ-ba ba kikiə yam ŋwaanɩ,
kʋ daɩ kʋ cwǝŋǝ nɩ mʋ na?
Amʋ bá joori a ŋwɩ ba lwarɩm jɩnɩ,
ba dwi dɩm na yɩ nɔn-balwaarʋ tɩn ŋwaanɩ na?»
Baŋa-Wɛ na tagɩ te tɩn mʋ kʋntʋ.
Amʋ ma ta a wɩ:
10 «Amʋ wʋ́ keeri pweeru tɩm ŋwaanɩ mʋ.
A maa wʋ́ coosi kagʋa pwələ kam ŋwaanɩ,
ka laan na jigi tɩ-kʋra tɩn ŋwaanɩ.
Nɔɔna nan daa warɩ je sɩm kʋntʋ nɩ
sɩ ba tɔgɩ ba kɛ.
Naanɩ daa tǝrǝ dáanɩ dɩ keerǝ.
Zunə dɩ vara dwi maama viiri ba daarɩ je sɩm kʋntʋ.»
Baŋa-Wɛ maa wɩ:
11 «Amʋ wʋ́ pa Zeruzalɛm ji di-doŋ-kʋrʋ,
sɩ ga-kakuri taa kaagɩ dáanɩ sɩ veǝ.
Amʋ ta wʋ́ pa Zuda tɩɩnɩ dɩm taa yɩ yɔɔ yɩranɩ,
sɩ nɔɔn-nɔɔnʋ yɩ wanɩ dɩ wʋnɩ o zʋ.»b
12 Swan tu wʋra o na ye kǝm dɩntʋ kuri na? Baŋa-Wɛ pɛ nɔɔnʋ lwarɩ kʋ kuri sɩ kʋ tu wanɩ o brɩ dɩbam na? Bɛŋwaanɩ mʋ yɩ dɩ́ tɩga kam tiini ka ji kagʋa kʋntʋ, pa nɔɔna daa warɩ ka wʋnɩ sɩ ba tɔgɩ ba kɛ?
13 Baŋa-Wɛ ma ləri DƖ wɩ:
«Amʋ nɔɔna bam na vɩn kwiə yalʋ a na pɛ-ba tɩn ŋwaanɩ mʋ kʋ yɩ kʋntʋ ba yɩra nɩ. Ba maa wʋ sɛ sɩ ba tɔgɩ amʋ niə yam, yɩ ba ywəri a cwe sɩm wʋnɩ. 14 Ba nan jɩgɩ yi-dɛɛrɩ mʋ yɩ ba yɔɔrɩ ba zuli Baalɩ jwǝnǝ yam, nɩnɛɛnɩ ba kwə na brɩ-ba sɩ ba taa kɩ tɩn.» 15 Kʋntʋ ŋwaanɩ, Yisɩrayɛlɩ tiinə Paŋwa Tu Baŋa-Wɛ dɩm tagɩ tɩntʋ DƖ wɩ: «Amʋ wʋ́ pa a nɔɔna bam na yaara zanzan. Kʋ maŋɩ sɩ ba di wʋdi-cɛɔ yɩ ba daarɩ ba nyɔ na balʋ na jɩgɩ cɔŋɔ tɩn mʋ. 16 A nan ta wʋ́ jagɩ-ba a yagɩ sa-tɩɩnɩ nɩ yigə yigə, mɛ ba dɩ ba kwə na wʋ ni dɩ ŋwa tɩn! A ta wʋ́ tʋŋɩ jar-kərə ba baŋa nɩ sɩ ba ba ba zəli-ba taan, sɩ kʋ yi ba maama cɔgɩm.»
Zeruzalɛm tiinə keeri ba loori Baŋa-Wɛ
17 Paŋwa Tu Baŋa-Wɛ na tagɩ kʋlʋ tɩn mʋ tɩntʋ:
«Bʋŋɩ-na á nii kʋlʋ na jɩgɩ kʋ kɩ tɩn,
sɩ á daarɩ á bəŋi kaana balʋ
na ye lusəm mɔɔnɩm tɩn
sɩ ba ba.»
Amʋ maa wɩ:
18 Tɔ. Pa ba kɩ lɩla ba ba
ba leeni lu-kəri,
sɩ kʋ pa yi-na ta zɩgɩ dɩbam yiə nɩ ba lurə,
yi-na ta zɩgɩ dɩbam yi-vɔɔrʋ nɩ ba soe!
19 Zeruzalɛmc tiinə bam yɔɔrɩ ba keeri mʋ yɩ ba wɩ:
«Lɛɛrʋ yi dɩbam yoo!
Cavɩɩra tiini ya ba dɩbam baŋa nɩ!
Dɩ́ maŋɩ sɩ dɩ́ nuŋi dɩ́ daarɩ dɩ́ tɩga kam mʋ,
dɩ́ sam dɩm maama na cɔgɩ tɩn ŋwaanɩ.»
20 Kaana bam, nan cəgi-na Baŋa-Wɛ taanɩ dɩm.
Pa-na sɩ DƖ bɩtara kam zʋ á wʋbʋŋa.
Brɩ-na á bukwa dɩ á badonnǝ ba na wʋ́ kɩ te
ba leeni lu-kəri tɩntʋ doŋ tɩn:
21 «Tʋʋnɩ laan tɔgɩ dɩ́ takwəəru tɩm nɩ mʋ
dɩ zʋ dɩ́ sɔ-fwaarʋ tɩm wʋnɩ.
Kʋ na yɩ dɩ́ biə ya na wʋ tɩʋ kʋm cwe sɩm nɩ ba kwɛɛrɩ tɩn,
dɩdaanɩ nɔn-dʋnnʋ tɩlʋ na wʋ yaga kam nɩ tɩn,
tʋʋnɩ gʋ-ba mʋ.»
22 Baŋa-Wɛ na brɩ-nɩ sɩ a ta kʋlʋ mʋ tɩntʋ:
«Twa wʋ́ taa tigi jasɩ mʋ je maama nɩ,
nɩnɛɛnɩ pʋpɔnɔ na yǝni kʋ tigi karɩ sɩm nɩ te tɩn.
Kʋ ta wʋ́ taa nyɩ dɩ mɩn-poə yalʋ nɔɔnʋ na zagɩ o tiŋi,
yɩ nɔɔna tǝrǝ sɩ ba la-ya ba kɩ digə nɩ tɩn mʋ.»
23 Baŋa-Wɛ na tagɩ kʋlʋ tɩn mʋ tɩntʋ:
«Swan tiinə daɩ sɩ ba taa magɩ ba nyɔɔna
dɩ ba swan yam.
Dɩdɛɛra nan yɩ magɩ ba nyɔɔna
dɩ ba dam dɩm.
Nadunə dɩ nan taa ye sɩ ba yɩ magɩ ba nyɔɔna
ba duuni dɩm baŋa nɩ.
24 Nɔɔnʋ nan na bʋŋɩ sɩ o taa magɩ o nyɔɔnɩ,
kʋ tu maŋɩ sɩ o jɩgɩ wʋpolo woŋo kʋntʋ yɩranɩ baŋa nɩ mʋ:
Oó kɩ wʋpolo nɩ o yɔɔrɩ o ye amʋ,
yɩ o lwarɩ nɩ amʋ mʋ yɩ Baŋa-Wɛ dɩm.d
A maa yɩ wʋlʋ sono kʋm na daga maŋa maama tu tɩn.
Amʋ nan lagɩ sɩ cɩga dɩ lanyɩranɩ kǝm mʋ taa tʋŋa tɩga baŋa nɩ.
Kənə yantʋ doŋ mʋ yɩ yalʋ na poli amʋ wʋʋ tɩn.»
Baŋa-Wɛ na tagɩ te tɩn mʋ kʋntʋ.
25 Baŋa-Wɛ daa ta ma ta DƖ wɩ: «Cɩga tɩn, maŋa lagɩ ka yi sɩ amʋ waarɩ balʋ dwi maama na goni ba pənə yɩ ba laan ba kwarɩ amʋ tɩn mʋ. 26 Bantʋ nan mʋ yɩ Ezipi tiinə, dɩ Zuda tiinə, dɩ Edɔm tiinə, dɩ Amɔn tiinə, dɩ Moabɩ tiinə, dɩdaanɩ balʋ na ceeri ba yum yɩ ba zʋʋrɩ kagʋa yuu nɩ tɩn. Bɛŋwaanɩ bantʋ maama ba tɔgɩ pən-gwəŋə ni-mɔrɔ dɩlʋ amʋ na tiŋi tɩn. Yisɩrayɛlɩ dwi tiinə bam dɩ tɩtɩ maŋɩ ba ba tɔgɩ ni dɩm kʋntʋe.»