8
Baŋa-Wɛ daa ma ta DƖ wɩ:
«Maŋa kam kʋntʋ nɩ, baá joori ba kʋ Zuda tiinə pwa dɩ ba nakwa bam yibeelǝ ba lɩ ba kwi. Ba ta wʋ́ kʋ ba lɩ Wɛ kaanɩm tiinə kwi, dɩ Wɛ nijoŋnǝ bam kwi, dɩdaanɩ Zeruzalɛm tiinə bam maama kwi ba yibeelǝ yam nɩ. 2 Ba kwi sɩm laan maa wʋ́ taa jarɩ sɩ tigi pwələ nɩ sɩ wɩa, dɩ cana dɩdaanɩ calɩcwɩ sɩm magɩ-sɩ. A nɔɔna bam nan ya soe sɩ ba taa zuli tɩntʋ mʋ. Ba ma loori zǝnǝ tɩ tee nɩ yɩ ba kɩ kaanɩm ba pa-tɩ. Nɔɔn-nɔɔnʋ nan bá kɩ ba kwi sɩm bɔɔnɩ wʋnɩ. Sɩ wʋ́ taa tigi tɩga baŋa nɩ mʋ parɩ-parɩ, nɩ pʋpɔnɔ te. 3 Dwi-balɔrɔ tiinə bam kʋntʋ badaara nan wʋ́ wəri. Amʋ nan na pɛ bantʋ jagɩ ba vu ba jǝni sa-tɩʋ kʋlʋ maama nɩ, baá taa beeri tʋʋnɩ da, sɩ kʋ dwǝni ba ŋwɩa.»a
Paŋwa Tu Baŋa-Wɛ na tagɩ te tɩn mʋ kʋntʋ.
Lwarɩm dɩdaanɩ waarɩm taanɩ
4 «Ta dɩ nɔɔna bam nɩ: Baŋa-Wɛ mʋ tagɩ DƖ wɩ:
Nɩ nɔɔna na yǝni ba tʋ tɩga nɩ,
ba bá pɛ ba zaŋɩ sɩ ba zɩgɩ wɛɛnɩ mʋ na?
Nɔɔnʋ nan na ywəri o cwǝŋǝ yɩ o maanɩ kʋ ni nɩ,
kʋ tu bá joori o pipiri o tʋ cwǝŋǝ nɩ mʋ na?
5 Bɛŋwaanɩ mʋ a nɔɔna bam nuŋi amʋ kwaga nɩ?
Zeruzalɛm tiinə bam yɔɔrɩ ba vaɩ amʋ.
Ba maa yǝni ba gʋrɩgɩ vwan mʋ,
yɩ ba vɩn sɩ ba pipiri ba joori amʋ te.
6 Amʋ yɔɔrɩ a cəgi mʋ sɩ a ni ba ni-taanɩ.
Ba wʋlʋwʋlʋ nan ba tɛ cɩga.
Nɔɔn-nɔɔnʋ bá sɛ sɩ o ləni o wʋʋ
o daarɩ o yagɩ o lwarɩm kikiə.
O ba bʋŋa o nii o kikiə na yɩ te tɩn.
Ba maama yɔɔrɩ ba magɩ ba yum ba tɔgɩ cwə-yɔɔ mʋ,
nɩ siseŋ-nɔɔna na duri sɩ ve najara wʋnɩ te tɩn.
7 Zunə dwi dwi maŋɩ ba ye ba maŋa kam na yiǝ
sɩ ba zaŋɩ ba vu jǝgǝ kadoŋ ba taa je da.
Kʋ na yɩ bugə ni zunə, dɩ kunkwənə,
dɩ kawɛbudoorə, dɩ kʋŋwaarʋ,
ba maama ye ba cwe sɩm kʋntʋ.
Kʋ nan na yɩ amʋ tɩtɩ nɔɔna bam,
ba yɔɔrɩ ba yǝri cwe sɩlʋ amʋ Baŋa-Wɛ na pɛ-ba sɩ ba taa tɔgɩ tɩn mʋ.
8 Abam nan kaagɩ á tɛ nɩnɛɛnɩ,
‹Dɩbam yiǝ pʋʋrɩ!
Dɩ́ jɩgɩ Baŋa-Wɛ niə yam dɩ́ tee nɩ!›
Kʋ nan na sɩɩnɩ kʋ yɩ te tɩn,
balʋ na jɩgɩ abam ba brɩ tɩn pipiri amʋ niə yam
pa ya ji vwan mʋ ya pa abam.
9 Á yi-pʋrɩ-nyɩna bam kʋntʋ lagɩ ba ja ba niə mʋ,
cavɩɩra na wʋ́ ja-ba tɩn ŋwaanɩ.
Cwǝŋǝ bá taa wʋra sɩ ba lu.
Bɛŋwaanɩ, ba vɩn Baŋa-Wɛ ni mʋ.
Ba yi-pʋrʋ kʋm nan bɛ?
10 Kʋntʋ ŋwaanɩ mʋ a lagɩ a kwe ba kaana a pa nɔn-gɛ,
sɩ ba karɩ dɩ ji nɔɔna badonnǝ nyɩm.
Ba wʋnɩ nɔɔnʋ maama pini o doŋ mʋ
sɩ o ma ji nɔɔnʋ.
Nɔn-kamunə, dɩ nɔn-balwa maama kɩ kʋntʋ doŋ mʋ.
Wɛ kaanɩm tiinə tɩtɩ dɩ DƖ nijoŋnǝ bam
dɩ yǝni ba tɔgɩ vwan kikiə yam kʋntʋ mʋ.
11 Ba nii a nɔɔna bam zʋnnɩ dɩm
nɩnɛɛnɩ dɩ yɩ mwalɩ yɩranɩ mʋ te.
Ba maa wɩ: ‹Yazurə taa wʋ á tee nɩ.›
Yazurə nan tǝrǝ sɩ ya yi a nɔɔna bam.
12 Kʋ ya maŋɩ sɩ cavɩɩra taa jɩgɩ-ba
ba wo-zɔɔna kikiə yam ŋwaanɩ.
Kʋ nan ba saɩ ba yɩra.
Ba maŋɩ ba yǝri cavɩɩra na yɩ kʋlʋ tɩn.
Kʋntʋ ŋwaanɩ, ba dɩ wʋ́ tʋ tɩga nɩ mʋ,
nɩnɛɛnɩ nɔɔna maama na tʋɩ te tɩn.
Amʋ na tu a waarɩ-ba,
ba kweelim jǝgǝ mʋ kʋntʋ.»
Baŋa-Wɛ na tagɩ te tɩn mʋ kʋntʋ.
13 Baŋa-Wɛ ta ma ta DƖ wɩ:
«Amʋ wʋ́ kwe ba faa wʋdiiru tɩm a ja viiri.
Tiu biə daa bá daarɩ ba vinyə tweeru tɩm yɩra nɩ.
Mɔɔla dɩ bá taa wʋ ba kapʋrrʋ tɩm yuu nɩ.
Tweeru vɔɔrʋ tɩm maama dɩ maa wʋ́ kwaarɩ.
Kʋlʋ maama a ya na pɛ-ba tɩn laan wʋ́ je ba tee nɩ.»
Nɔɔna bam maa wɩ:
14 «Bɛŋwaanɩ mʋ yɩ dɩ́ ta je yo seeni?
Pa-na sɩ dɩ́ duri dɩ́ vu tɩɩnɩ dɩlʋ na lɔgɩ dɩ pɩ tɩn
dɩ́ gilimi dɩ wʋnɩ.
Bɛŋwaanɩ, dɩ́ na tɩgɩ dáanɩ,
kʋʋ́ taa gara.
Dɩ́ Tu Baŋa-Wɛ nan tagɩ DƖ tiŋi mʋ
sɩ dɩbam maama tɩ.
DƖ ma kwe na balʋ na jɩgɩ cɔŋɔ tɩn DƖ pa dɩbam
sɩ dɩ́ nyɔ dɩ́ tɩ.
Kʋ maa yɩ dɩ́ na cɔgɩ DƖ yigə nɩ tɩn ŋwaanɩ mʋ
DƖ kɩ kʋntʋ maama dɩ́ yɩra nɩ.
15 Dɩbam ya tɩɩnɩ yazurə mʋ,
yɩ kʋ wʋ kɩ dɩbam lanyɩranɩ.
Dɩ́ ta maa beeri sɩ dɩ́ na zurim,
yɩ dɩ́ joori dɩ́ na vuvugə yɩranɩ.
16 Dɩbam dʋna bam siseŋ-nɔɔna kwəri ŋwa mʋ zaŋɩ tɩntʋ,
kʋ na yɩ Dan tɩʋ kʋm seeni.
Ba sise sɩm kərə ma pa Zuda tiinə bam yɩra sisiŋə.
Dɩ́ dʋna bam bɩɩnɩ sɩ ba cɔgɩ dɩ́ tɩga kam mʋ,
dɩ ka woŋo maama,
dɩdaanɩ Zeruzalɛm tɩʋ kʋm,
dɩ kʋ nɔn-biə bam maama.»
17 Baŋa-Wɛ na tagɩ te tɩn mʋ tɩntʋ:
«Nii-na yo seeni!
A lagɩ a tʋŋɩ bɩsankwɩ mʋ
sɩ sɩ ba á tɩtarɩ nɩ.
Sɩ wʋ́ ba sɩ dʋnɩ abam,
yɩ á bá wanɩ-sɩ á cɩ.»
Zeremi keeri Zuda tiinə bam ŋwaanɩ
18 Amʋ wʋʋ na je te tɩn laan kɛ jam.
A vwana dɩ ma parɩ.
19 Cəgi-na, sɩ á wʋ́ ni a nɔɔna bam na keeri te
tɩga kam ni maama nɩb tɩn.
Ba maa wɩ: «Baŋa-Wɛ viiri DƖ daarɩ Siyɔn mʋ na?
Dɩ́ Pɛ wʋm daa tǝrǝ mʋ na?»
Baŋa-Wɛ maa wɩ:
«A nɔɔna bam zuli jwǝnǝ yalʋ ba jɩa na mɔɔnɩ tɩn,
dɩdaanɩ jwə-yɔɔrʋ tɩlʋ na yɩ dwi-gɛ tiinə nyɩm tɩn mʋ.
Bɛŋwaanɩ mʋ ba kɩ kʋntʋ
pa a banɩ zaŋɩ dɩ ba?»
Nɔɔna bam daa ma keeri ba wɩ:
20 «Yadɛ dɩ kwɩa maŋa tu tɩ kɛ,
yɩ nɔɔn-nɔɔnʋ ta wʋ joŋi dɩbam o yagɩ.»
21 Kʋ tiini kʋ jɩgɩ-nɩ kʋ ni
dɩ kʋ na ni a nɔn-sonnu tɩm te tɩn.
Liǝ mʋ tiini ya jɩgɩ-nɩ,
yɩ a keeri zanzan.
22 Tralɩ nugə tǝri Galadɩ nɩ mʋ
sɩ ba ma ba lɛ a nɔɔna bam ŋwana na?
Liri kəru dɩ nan mʋ tǝri dáanɩ na?
Dɩ kʋntʋ maama dɩ, a nɔɔna bam ta wʋ nɛ yazurə.