Zeremi zɩgɩ Wɛ-digə kam nɩ o tɔɔlɩ Wɛ kwǝrǝ
7
Baŋa-Wɛ na pɛ Zeremi ni dɩlʋ tɩn mʋ tɩntʋ:2 Ve n zɩgɩ Baŋa-Wɛ digə kam ni nɩ, sɩ n tɔɔlɩ kwǝrǝ kantʋ nɩ:
Zuda tiinə bam, Baŋa-Wɛ taanɩ mʋ tɩntʋ. Abam balʋ maama na tɔgɩ Wɛ-digə kam manco-pɩɩna yam á zʋʋrɩ ka wʋnɩ sɩ á zuli‑DƖ tɩn, nan cəgi-na! 3 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn nan tagɩ DƖ wɩ:
«Lǝni-na á kikiə yam sɩ á taá tɔgɩ cwə-laarʋ. Amʋ dɩ wʋ́ pa abam cwǝŋǝ sɩ á taá zʋʋrɩ tɩga kantʋ nɩ. 4 Nan yɩ taá tɛ á pa daanɩ nɩ: ‹Baŋa-Wɛ digə kam wʋ dɩbam tee nɩ! Cɩga tɩn, Baŋa-Wɛ digə kam wʋ dɩbam tee nɩ!› Á yǝni á tɛ kʋntʋ doŋ yɩ á bʋŋɩ nɩ kʋlʋkʋlʋ bá yi abam. Á jɩgɩ á tɩtɩ á gana mʋ kʋntʋ! 5 Nan yɔɔrɩ á lǝni-na á kikiə yam sɩ á taá tɔgɩ cwə-laarʋ, yɩ á daarɩ á tʋŋɩ dɩ cɩga da-tee nɩ. 6 Yɩ taá jɩgɩ-na vərə á bɛɛsa, dɩ bɩtara, dɩdaanɩ kadənə. Yɩ zaŋɩ-na á gʋ balʋ na wʋ maŋɩ sɩ ba tɩ tɩn. Yɩ taá zuli wa-yɔɔrʋ, sɩ yaá cɔgɩ abam. 7 Á na sɩɩnɩ á ləri á kikiə kʋntʋ doŋ, amʋ dɩ wʋ́ sɛ sɩ á taá zʋʋrɩ tɩga kantʋ wʋnɩ, a na kwe-ka a pa á nabaara bam sɩ ba taa te maŋa maama tɩn.
8 Nan nii-na á na kɩ te! Á jɩgɩ á tɩtɩ á gana, dɩ á na tɔgɩ bɩtar-yɔɔrʋ te tɩn. 9 Á yǝni á ŋɔna, yɩ á gʋɩ nɔɔna. Á tɔgɩ boorim kikiə. Á ma á daarɩ á fɔ vwan taanɩ dim baŋa nɩ. Á ma á zwɛ wǝǝnu tɩlʋ lwǝm na ywǝmmǝ tɩn á paɩ Baalɩ jwəm dɩm, yɩ á ta tɔgɩ wa-yɔɔrʋ tɩlʋ á ya na yǝri tɩn. 10 Á yǝni á tʋŋɩ kəm-balwaarʋ yam kʋntʋ doŋ yɩ á laan ba á zʋ amʋ tɩtɩ digə kam wʋnɩ sɩ á zuli-nɩ. Á kɩ kʋntʋ yɩ á bʋŋɩ nɩ kʋlʋkʋlʋ bá yi abam, amʋ na wʋ á tee nɩ tɩn ŋwaanɩ. 11 Abam bʋŋɩ sɩ á pipiri digə kantʋ ba na maɩ amʋ yɩrɩ ba bəi-ka tɩn, sɩ ka ji ŋwɩɩna kikilə jǝgǝ mʋ na?a Lwarɩ-na nɩ amʋ nii a naɩ á na kɩ te maama tɩn. Baŋa-Wɛ na tagɩ te tɩn mʋ kʋntʋ.
12 Nan ve-na Siloo sɩ á nii bɛɛ mʋ kɩa. Kʋ yɩ jǝgǝ kalʋ a na puli a kuri sɩ nɔɔna taa zuli a yɩrɩ da tɩn mʋ. Amʋ nan pɛ ka yɔɔrɩ ka cɔgɩ mʋ, amʋ nɔɔna Yisɩrayɛlɩ tiinə bam na tɔgɩ lwarɩm kikiə tɩn ŋwaanɩ. 13 Tɔ. Abam na yǝni á jɩgɩ wǝǝnu tɩntʋ maama á kɩ tɩn, amʋ yɔɔrɩ a ŋɔɔnɩ dɩ abam mʋ kuni zanzan yɩ á ba cǝgǝ. A ta ma kwaanɩ a bǝi abam, yɩ á vɩn sɩ á ləri-nɩ. Baŋa-Wɛ na tagɩ te tɩn mʋ kʋntʋ. 14 Nan lwarɩ-na sɩ amʋ na kɩ te Siloo nɩ tɩn, a ta wʋ́ kɩ kʋntʋ mʋ amʋ tɩtɩ digə kalʋ na wʋra a yɩrɩ zulə ŋwaanɩ tɩn baŋa nɩ. Ka yɩ digə kalʋ á na tiini á kwe á tɩɩna á daŋɩ ka baŋa nɩ tɩn. A ya kwe-ka a pa abam dɩ á nabaara bam mʋ. A nan wʋ́ cɔgɩ-ka. 15 Abam Zuda tiinə bam, a lagɩ a lɩ abam mʋ a dʋlɩ a yagɩ yigə yigə, nɩnɛɛnɩ a dɛɛn na kɩ te dɩdaanɩ á cʋrrʋ Efrayim tiinə bam maama tɩn.»
Zuda tiinə bam na vɩn Baŋa-Wɛ te tɩn
16 «Kʋntʋ ŋwaanɩ Zeremi, yɩ loori amʋ Baŋa-Wɛ n pa-ba. Yɩ ŋwanɩ a yigə nɩ ba ŋwaanɩ, naa n kwaanɩ sɩ n koori-nɩ n pa-ba. Bɛŋwaanɩ, a bá cəgi n wɛ-loro kʋm kʋntʋ. 17 Nan dʋlɩ n yi sɩ n na kʋlʋ ba na jɩgɩ ba kɩ Zeruzalɛm tɩʋ wʋnɩ dɩdaanɩ Zuda tɩɩnɩ dɩm maama wʋnɩ tɩn. N wʋ nɛ ba na kɩ te tɩn na? 18 Ba biə kaagɩ ba pɛ da-kʋrɩ mʋ, ba baara maa dwe mim, yɩ ba kaana bam dɩ cʋɩ muni sɩ ba ma ba fɔgɩ maasa. Ba kwe maasa yam ba ma ji pɛɛra ba pa jwəm dɩlʋ ba na bǝi nɩ ‹Wɛyuu Pa-kana kam› tɩn mʋ. Ba ta maa yǝni ba lwe sana ba pa ba wa-yɔɔrʋ tɩm. Ba maɩ ba kənə yam kʋntʋ mʋ ba twɩ amʋ pa a banɩ zaŋɩ. 19 Kʋ nan yɩ amʋ mʋ ba kənə yam cɔgɩ na? Kʋ daɩ ba tɩtɩ yɩra mʋ kʋ zʋʋrɩ na? Ba yǝri nɩ ba tɩtɩ cavɩɩra mʋ ba kaagɩ ba beerǝ.» Baŋa-Wɛ na tagɩ te tɩn mʋ kʋntʋ.
20 Yuutu Baŋa-Wɛ nan tagɩ tɩntʋ mʋ DƖ wɩ: «Kʋntʋ ŋwaanɩ amʋ wʋ́ tiini a lo a ban-lʋm je sɩm kʋntʋ maama baŋa nɩ. Kʋ na yɩ nabiinǝ, dɩ vara, dɩ tweeru, dɩ wʋdiiru tɩlʋ na kɩ tɩga kam baŋa nɩ tɩn maama, tɩ maama wʋ́ cɔgɩ! Kʋlʋkʋlʋ bá cɩ amʋ ban-lʋm dɩm.»
21 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ tagɩ tɩntʋ DƖ wɩ:
«Á na laga, ja-na á zwɛɛm pɛɛra yam, dɩ á kaanɩm yadonnə yam á ba á di nwana yam maama, sɩ a yigə tǝrǝ ya wʋnɩ. 22 Amʋ dɛɛn na jaanɩ á nabaara bam a nuŋi Ezipi nɩ yɩ a daarɩ a ŋɔɔnɩ dɩ ba tɩn, a wʋ pɛ-ba ni sɩ ba kwe zwɛɛm pɛɛra, dɩ kaanɩm dwi dwi ba pa-nɩ. 23 Amʋ dɛɛn na pɛ-ba ni dɩlʋ tɩn mʋ tɩntʋ: ‹Taá sɛ-na amʋ ni, sɩ a taa yɩ abam Wɛ dɩm, sɩ á dɩ taá yɩ amʋ nɔɔna. Taá tɔgɩ-na cwe sɩlʋ a na tiŋi a pa abam tɩn, sɩ á ŋwɩa kɩ lanyɩranɩ ka pa abam.› 24 Abam nabaara bam dɛɛn ma vɩn. Ba brɩ ba wʋ cəgi-nɩ dɩ. Ba maa jɩgɩ yi-dɛɛrɩ yɩ ba tɔgɩ kǝm-balwaarʋ tɩlʋ maama ba wʋbʋŋa na lagɩ tɩn. Kʋ ma pa ba pipiri ba joori kwaga, yɩ ba ya maŋɩ sɩ ba vu yigə mʋ. 25 Kʋ na zɩgɩ abam nabaara bam dɛɛn na maŋɩ ba nuŋi Ezipi nɩ tɩn sɩ kʋ yi zɩm, amʋ yǝni a tʋŋɩ a nijoŋnǝ bam mʋ á tee nɩ maŋa maama. 26 Abam ma á yɔɔrɩ á vɩn sɩ á cəgi ba taanɩ. Á zwabaniə kikiə yam kɛ á nabaara bam dɛɛn na kɩ te tɩn.b
27 Zeremi, nmʋ nan na tagɩ tɩntʋ maama n brɩ a nɔɔna bam, ba bá cəgi n taanɩ. N ma n na bǝŋi-ba, ba bá ləri‑m. 28 Nan ve n ta dɩ ba n wɩ: ‹Dwi dɩntʋ tiinə bam ba sɛ ba Tu Baŋa-Wɛ dɩm ni. Ba vɩn Wɛ kʋrɩsɩm sɩ ba wanɩ ba ləri ba wʋrʋ. Cɩga kam dɩ ma je ba tee nɩ, yɩ ba daa ba tɛ-ka. 29 A nɔɔna bam, nan ceeri-na á yum, sɩ á daarɩ á dʋlɩ á yuuywe sɩm á yagɩ. Ta diini-na piu yuu nɩ, á jǝni da á leeni luə le. Bɛŋwaanɩ abam yɩ dwi dɩlʋ Baŋa-Wɛ na vɩn tɩn mʋ, DƖ banɩ na tiini dɩ zaŋɩ dɩ abam tɩn ŋwaanɩ.› »
30 Baŋa-Wɛ daa ma ta DƖ wɩ:
«Zuda tiinə bam tiini ba tʋŋɩ lwarɩm amʋ yigə nɩ. Ba kwe wo-zɔɔna yalʋ ba na zuli tɩn ba zɩgɩ digə kalʋ na wʋra a yɩrɩ zulə ŋwaanɩ tɩn wʋnɩ, yɩ ba da kʋ ŋwaanɩ ba digimi-ka. 31 Ba lɔgɩ wara-je bimbinə mʋ ba zɩgɩ Tofɛtɩ nɩ na wʋ Bɛn-Hinom bolo kʋm wʋnɩ tɩn. Ba maa yǝni ba kwe ba biə ba zwɛ mim wʋnɩ ba kɩ kaanɩm da. Amʋ nan wʋ fɔgɩ a pa-ba ni sɩ ba kɩ kʋntʋ. Kǝm dɩm kʋntʋ doŋ nan ya brɩ dɩ tǝrǝ a wʋbʋŋa nɩ.c 32 Nan lwarɩ-na nɩ maŋa lagɩ ka yi sɩ nɔɔna daa yɩ taa bǝi je sɩm kʋntʋ wɩ Tofɛtɩ, naa Bɛn-Hinom bolo kʋm. Ba laan wʋ́ taa bə-kʋ wɩ: ‹Nɔn-gʋrɩ bolo› mʋ. Bɛŋwaanɩ, nɔɔna wʋ́ taa tigi Tofɛtɩ nɩ sɩ ba kɩ-ba, sɩ kʋ dwǝni pwələ kalʋ na wʋ́ taa wʋra sɩ ba kɩ-ba tɩn. 33 Zunə dɩ ga-vara mʋ wʋ́ ba ba di nɔɔna bam yɩra, yɩ nɔɔn-nɔɔnʋ daa bá daarɩ sɩ o zəli-tɩ o yagɩ. 34 Amʋ wʋ́ pa wʋpolo dɩ mwaanʋ sɔɔ maama ti Zeruzalɛm tɩʋ cwe sɩm nɩ, dɩ Zuda tɩɩnɩ dɩm maama wʋnɩ. Kadri ywəəni dɩ daa bá taa wʋra. Bɛŋwaanɩ, abam tɩga kam laan lagɩ ka ji di-dwəənu mʋ.»