Zuda tiinə dʋna wʋ́ gilimi ba kaagɩ Zeruzalɛm
6
Bɛnzamɛn dwi tiinə bam, duri-na sɩ á lu!Duri á nuŋi-na á daarɩ Zeruzalɛm tɩʋ kʋm!
Wu-na nabwaanʋ á kaanɩ Tekoa nɔn-biə bam,
sɩ á daarɩ á tarɩgɩ mim Bɛte-Hakerem nɩ
sɩ dɩ nyʋa kam ji ni-kaana ka pa nɔɔna bam.
Bɛŋwaanɩ lɛɛrʋ mʋ lagɩ tɩ zɩgɩ jazɩm baŋa seeni tɩ ba yo seeni.
Kʋ nan wʋ́ ja cɔgɩm zanzan kʋ ba.
2 Zeruzalɛma tɩʋ ya nyɩ dɩ a bukɔ-laa mʋ,
kʋ yɩ tʋ-kajɔŋɔ!
Amʋ nan wʋ́ cɔgɩ-kʋ.
3 Pwa dɩ ba jar-kərə mʋ lagɩ ba ba
ba jeeri abam dɩ najara.
Baá cwi ba vwə ba gilimi tɩʋ kʋm,
nɩ nayɩra dɩ ba varɩ-kɔgɔ kʋm te tɩn.
Kɔgɔ maama wʋ́ jǝni kʋ jǝgǝ nɩ,
sɩ ba di ba na lagɩ mɛ tɩn.
4 Ba maa wʋ́ ta ba jar-kərə bam ba wɩ:
«Ti-na á yigə sɩ dɩ́ ja najara yam sɩ dɩ́ yi tɩʋ kʋm.
Pa-na sɩ dɩ́ zaŋɩ ba baŋa nɩ wɩa tɩtarɩ nɩ.»
Ba ta wʋ́ ta wɩ: «Maŋa tiini ka kɛ.
Wɛ dɩm guni yɩ tɩga lagɩ ka yi.
5 Kʋntʋ ŋwaanɩ dɩ́ wʋ́ zaŋɩ dɩ́ li-ba tɩtɩɩ nɩ mʋ,
sɩ dɩ́ cɔgɩ ba sɔ-fwaarʋ tɩm maama!»
6 Paŋwa Tu Baŋa-Wɛ dɩ ma ta DƖ wɩ:
«Zagɩ-na tweeru tɩm á dɩ tɩga nɩ,
yɩ á daarɩ á lɔ taala
á yǝri Zeruzalɛm kabri sɩm təŋə nɩ.
Amʋ wʋ́ waarɩ kʋ nɔn-biə bam,
ba na yɔɔrɩ ba sɛ pu-sɩŋa tɩtʋŋa tɩn ŋwaanɩ.
7 Nɩ vʋlɩ na yǝni dɩ buri na te tɩn,
kʋntʋ mʋ amʋ nɔɔna bam dɩ yɔɔrɩ ba kɩ lwarɩm.
Je maama nɩ, nakɔɔrɩ dɩ vuvugə tɩtʋŋa sɔɔ mʋ zaŋa.
Yawɩɩrʋ dɩ zʋnnɩ mʋ jɩgɩ nɔɔna bam,
yɩ amʋ naɩ tɩ maama!
8 Zeruzalɛm tiinə bam,
cəgi-na amʋ ni-kaana yam.
Kʋ na daɩ kʋntʋ,
amʋ wʋ́ dʋlɩ abam a yagɩ mʋ.
A ta maa wʋ́ pa á tɩʋ kʋm ji di-dwəənu,
sɩ nɔɔn-nɔɔnʋ yɩ wanɩ da o zʋ.»
Yisɩrayɛlɩ tiinə bam vɩn Wɛ ni-kaana yam
9 Paŋwa Tu Baŋa-Wɛ na tagɩ te tɩn mʋ tɩntʋ:
«Zeremi, pa ba kwaanɩ ba larɩ
nɔɔna balʋ ta na daarɩ Yisɩrayɛlɩ tiinə bam wʋnɩ tɩn,
sɩ ba wʋlʋwʋlʋ daa yɩ daarɩ,
nɩnɛɛnɩ ba na larɩ vinyə tiu biə te,
yɩ kʋlʋkʋlʋ wʋ daarɩ tiu kʋm yɩra nɩ te tɩn.»
10 Amʋ nan na ŋɔɔnɩ dɩ nɔɔna bam,
nɔɔn-nɔɔnʋ bá sɛ sɩ o joŋi nmʋ ni-kaana yam.
Ba zwa yam kwarɩmɩ mʋ,
yɩ ba vɩn sɩ ba cəgi taanɩ.
Ba yigə daa tǝrǝ Baŋa-Wɛ taanɩ dɩm wʋnɩ,
yɩ ba ba ni dɩ ywəəni.
11 Amʋ dɩ banɩ tiini dɩ fuli
nɩ Baŋa-Wɛ banɩ na zaŋɩ te tɩn mʋ,
pa a daa warɩ a tɩtɩ sɩ a ja.
Baŋa-Wɛ ma ləri DƖ wɩ:
«Kwe a ban-lʋm dɩm
n lo tɩʋ kʋm nɔn-biə bam maama yɩra nɩ,
kʋ na maŋɩ kʋ yɩ biə bam na kwɛɛrɩ pooni nɩ tɩn,
dɩ nɔn-dʋnnʋ tɩm na kaagɩ ba jeeri daanɩ tɩn.
A banɩ dɩm bá muri nɔɔn-nɔɔnʋ,
dɩ kan-banna, dɩ ba kaana bam,
dɩ nankwɩn: dɩ balʋ na gɛ fɩɩn sɩ ba tɩ tɩn maama dɩ.
12 Amʋ wʋ́ kwe ba sam dɩm, dɩ ba karɩ sɩm,
dɩdaanɩ ba kaana bam,
a pa nɔɔna badonnǝ sɩ ba taa te.
Cɩga tɩn, a lagɩ a yɔɔrɩ a waarɩ
balʋ na zʋʋrɩ tɩga kantʋ wʋnɩ tɩn mʋ.»
Baŋa-Wɛ na tagɩ te tɩn mʋ kʋntʋ.
13 «Ba wʋnɩ nɔɔna maama pini o doŋ mʋ
sɩ o ma ji nɔɔnʋ.
Nɔn-kamunə, dɩ nɔn-balwa maama kɩ kʋntʋ doŋ mʋ.
Wɛ kaanɩm tiinə tɩtɩ dɩ DƖ nijoŋnǝ bam
dɩ maa yǝni ba tɔgɩ vwan kikiə.
14 Ba nii a nɔɔna bam zʋnnɩ dɩm
nɩnɛɛnɩ dɩ yɩ mwalɩ yɩranɩ mʋ te.
Ba maa wɩ: ‹Yazurə taa wʋ á tee nɩ.›
Yazurə nan tǝrǝ sɩ ya yi a nɔɔna bam.
15 Kʋ ya maŋɩ sɩ cavɩɩra taa jɩgɩ-ba
ba wo-zɔɔna kikiə yam ŋwaanɩ.
Kʋ nan ba saɩ ba yɩra.
Ba maŋɩ ba yǝri cavɩɩra na yɩ kʋlʋ tɩn.
Kʋntʋ ŋwaanɩ, ba dɩ wʋ́ tʋ tɩga nɩ mʋ,
nɩnɛɛnɩ nɔɔna maama na tʋɩ te tɩn.
Amʋ na tu a waarɩ-ba,
ba kweelim jǝgǝ mʋ kʋntʋ.»
Baŋa-Wɛ na tagɩ te tɩn mʋ kʋntʋ.
Yisɩrayɛlɩ tiinə vɩn Wɛ cwǝŋǝ kam
16 Baŋa-Wɛ na tagɩ te tɩn mʋ tɩntʋ:
«A nɔɔna bam, ve á zɩgɩ-na cwe sɩm yuu nɩ
sɩ á taá fɔgɩ á niə.
Nan ta bwe-na sɩ á lwarɩ
á nabaara cwe sɩm dɛɛn na yɩ te tɩn.
Kuri-na cwə-laa kʋm,
sɩ á taá ve ka wʋnɩ,
sɩ á bɩcara zuri.b
Abam ma vɩn yɩ á wɩ: ‹Dɩ́ bá tɔgɩ-ka.›
17 Amʋ ta ma tʋŋɩ a tɩntʋŋna á tee nɩ,
sɩ ba taa yɩrɩ abam.
A maa wɩ: ‹Cəgi-na sɩ á ni nabɔnɔ kʋm kwǝri!›
Abam ta maa wɩ: ‹Dɩ́ bá cəgi.›
18 Tɔ, dwi tiinə maama, cəgi-na lanyɩranɩ!
Abam balʋ na nii tɩn,
lwarɩ-na kʋlʋ na lagɩ kʋ kɩ a nɔɔna bam yɩra nɩ tɩn.
19 Tɩga baŋa maama, cəgi-na yo seeni.
Amʋ lagɩ a pa lɛɛrʋ mʋ yi a nɔɔna bam,
ba kənə yam ŋwaanɩ.
Ba yɔɔrɩ ba soe sɩ ba taa vɩn a taanɩ mʋ.
Ba ma vri ba kwaga ba ya amʋ niə yam.
20 Kʋ na yɩ wǝǝnu tɩlʋ lwǝm na ywǝmmǝ tɩn kalʋ ba na jaanɩ ba nuŋi Seba nɩ tɩn,
dɩ tralɩ nugə kam ba na jaanɩ ba nuŋi tɩʋ yigə yigə tɩn,
amʋ yigə tǝrǝ sɩ wʋnɩ.
Amʋ bá joŋi á zwɛɛm pɛɛra yam,
Bɛŋwaanɩ, ya wʋ su a yi.c
21 Amʋ Baŋa-Wɛ nan lagɩ a kwe kandwa-cəllə mʋ
a tiŋi nɔɔna bantʋ cwǝŋǝ nɩ.
Kwə dɩ ba biə maama lagɩ ba magɩ ba naga mʋ kandwa yam kʋntʋ yɩra nɩ ba tʋ.
Balʋ dɩ na yɩ cilonnə daanɩ tɩn,
dɩ ba badonnǝ dɩ maa wʋ́ je.»
Baŋa-Wɛ na tagɩ te tɩn mʋ kʋntʋ.
Jar-kərə wʋ́ nuŋi jazɩm baŋa seeni ba ba
22 Baŋa-Wɛ na tagɩ te tɩn mʋ tɩntʋ:
«Kwǝni á nii-na jazɩm baŋa seeni!
Tʋ-fɔrɔ nɔɔna mʋ maa bɩɩnɩ abam baŋa.
Ba nan ti ba yigə mʋ ba nuŋi yigə yigə
sɩ ba ba ba jeeri abam dɩ najara.
23 Ba ze ba tɛn dɩdaanɩ ba cicwəd mʋ ba bɩɩna.
Ba nan tiini ba jɩgɩ pu-sɩŋa mʋ,
yɩ ba ba jɩgɩ nɔɔna yibwənə kɔtaa!
Ba wurigi ba siseŋ-nɔɔna
nɩ nɩnɩʋ na-ŋʋna na wuuri te tɩn mʋ.
Ba kɩ ba tɩtɩ ba kɩ daanɩ
sɩ ba zaŋɩ najara dɩ abam Zeruzalɛme tiinə bam.»
Nɔɔna bam ma ta ba wɩ:
24 «Dɩbam ni nɔɔna bam kʋntʋ ŋwa mʋ,
pa dɩ́ vwana parɩ.
Fʋʋnɩ tiini dɩ jɩgɩ dɩbam mʋ,
nɩnɛɛnɩ kaanɩ na vri pugə sɩ o lʋ
yɩ kʋ kɩ-o te tɩn.
25 Nan yɩ taá kaagɩ á ve pwələ nɩ yɔɔ yɔɔ,
Á nan yɩ taá kaagɩ cwə-farɩ sɩm nɩ á veǝ,
bɛŋwaanɩ, dɩ́ dʋna bam wʋ je maama nɩ mʋ,
yɩ ba ze sʋ-lwaanʋ ba maɩ ba fugi dɩbam.»
Amʋ Zeremi maa wɩ:
26 «Amʋ nɔɔna bam, zʋ-na gwar-zɩnzwara,
yɩ á bibili tɩntwarɩm wʋnɩ
á wʋ-cɔgɔ ŋwaanɩ.
Taá keeri-na nɩnɛɛnɩ nɔɔnʋ na gɛ o bu-dʋa
yɩ o keeri o luə te tɩn.
Bɛŋwaanɩ, dɩ́ dʋna bam wʋ́ da ba zaŋɩ dɩ́ baŋa nɩ mʋ.»
Baŋa-Wɛ ma ta dɩ amʋ DƖ wɩ:
27 «A pɛ nmʋ ni mʋ
sɩ n maŋɩ a nɔɔna bam n nii.
Nmʋ nan na maŋɩ-ba,
nń lwarɩ ba na yɩ nɔɔna dwi dɩlʋ tɩn,
nɩ nɔɔnʋ na maŋɩ luuru dwi dwi o nii te tɩn.
28 Ba maama yɩ zwabani-nyɩna mʋ.
Ba maa kaagɩ ba baɩ da-bɩbara.
Ba wʋʋ maa tiini kʋ dana
kʋ dwe canna dɩ luuru na yɩ te tɩn.
Ba maa yɔɔrɩ ba jɩgɩ daanɩ ba cɔga.
29 Mim fʋnyʋgʋ kʋm tiini kʋ dana lanyɩranɩ,
sɩ kʋ lɩ weeru səbu-poŋo tɩm wʋnɩ.
Ba nan na maŋɩ ba kwaanɩ te,
kʋ maama yɩ kafɛ mʋ.
Ba maa warɩ ba lɩ nɔn-balwaarʋ tɩm
a nɔɔna bam wʋnɩ.
30 Baá taa bǝi a nɔɔna bam nɩ:
səbu-poŋo tɩlʋ ba na vɩn tɩn mʋ,
Bɛŋwaanɩ, amʋ Baŋa-Wɛ maŋɩ a vɩ-ba mʋ.»