Nɔn-ŋʋm tǝrǝ
5
«Kaagɩ-na Zeruzalɛm cwe sɩm maama á pu,dɩ kʋ gugwəəru tɩm, dɩ kʋ yɛ sɩm maama,
sɩ á nii á na wʋ́ na nɔn-ŋʋm tɩʋ kʋm maama wʋnɩ
dɩ dɩdʋa dɩ.
Nɔɔnʋ wʋra o na tɔgɩ kǝm-laarʋ
yɩ o jɩgɩ cɩga dɩ amʋ na?
Abam na nɛ nɔɔnʋ kʋntʋ doŋ,
amʋ dɩ wʋ́ da kʋ tu ŋwaanɩ
a kwe tɩʋ kʋntʋ lwarɩm dɩm
a ma a cɛ-ba.
2 Ba na yǝni ba ma amʋ Ŋwɩa Tu Baŋa-Wɛ yɩrɩ dɩm ba du durə,
ba taanɩ dɩm kʋntʋ yɩ vwan yɩranɩ mʋ.»
3 Baŋa-Wɛ, nmʋ yǝni n beeri cɩga mʋ nabiinǝ tee nɩ.
Nmʋ nan magɩ n nɔɔna bam,
yɩ kʋ wʋ cɛ ba yɩra.
Nmʋ ta pɛ ba tiini ba na cɔgɩm,
yɩ ba wʋ sɛ kʋrɩsɩm.
Ba ma pa ba bɩcara kɩ dam,
yɩ ba wʋ sɛ sɩ ba joori ba ba nmʋ te.
4 Amʋ laan ma ta a tɩtɩɩ nɩ a wɩ:
«Nɔɔna bantʋ yɔɔrɩ ba yɩ nabwənə mʋ
pa ba tʋŋɩ jwərim yɩranɩ.
Bɛŋwaanɩ, ba yǝri Baŋa-Wɛ cwe sɩm na yɩ te tɩn.
Ba nan wʋ lwarɩ ba Tu Wɛ dɩm
na beeri kikiə yalʋ sɩ DƖ nɔɔna taa kɩ tɩn.
5 A nan wʋ́ vu dɩdɛɛra bam te mʋ
a ŋɔɔnɩ dɩ ba.
Bɛŋwaanɩ, bantʋ wʋ́ taa ye Baŋa-Wɛ cwe sɩm,
dɩ DƖ na beeri kikiə yalʋ DƖ nɔɔna tee nɩ tɩn.»
Bantʋ tɩtɩ dɩ nan vɩn mʋ sɩ Baŋa-Wɛ taa te-ba,
Ba ma kwe ba kwaga ba ya‑DƖ.
6 Ba kǝm dɩm kʋntʋ ŋwaanɩ,
nyoŋo wʋ́ nuŋi kagʋa wʋnɩ
kʋ ba kʋ zi-ba.
Nywənkurə dɩ wʋ́ zɩgɩ kagʋa nɩ ka ba
sɩ ka ja-ba ka tʋrɩ.
Gweeru dɩ wʋ́ vwɛ ba tɩ-niə yam nɩ.a
Nɔɔnʋ wʋlʋ maama na nuŋi o beeri pooni yigə nɩ,
ga-varɩm wʋ́ ja kʋ tu kʋ gʋ.
Kʋ nan yɩ nɔɔna bam na tiini ba ywəri Wɛ kwaga nɩ
yɩ ba lwarɩm dɩ gaalɩ te tɩn ŋwaanɩ mʋ kʋntʋ.
Baŋa-Wɛ ma bwe-ba DƖ wɩ:
7 «Zeruzalɛm, bɛŋwaanɩ mʋ amʋ wʋ́ kwe n lwarɩm a ma a cɛ‑m?
N nɔn-biə bam nuŋi amʋ kwaga nɩ mʋ,
yɩ ba ve ba zuli wa-yɔɔrʋ.
Amʋ mʋ paɩ ba di ba sui.
Ba ma lɔ ba kaana kwaga nɩ,
yɩ ba laan yɔɔrɩ ba vu ba pəni dɩ ka-tʋlɩ.
8 Bantʋ nyɩ dɩ sisəŋ-bɛ sɩlʋ na di sɩ sui yɩ sɩ nu lanyɩranɩ tɩn mʋ.
Ba fra mʋ yɔɔrɩ ya wʋ nɔɔna badonnǝ kaana wʋnɩ
sɩ ba lagɩ-ba.
9 A nan na waarɩ-ba ba kǝm dɩm kʋntʋ ŋwaanɩ,
kʋ daɩ kʋ cwǝŋǝ nɩ mʋ na?
Amʋ bá joori a ŋwɩ ba lwarɩm jɩnɩ,
ba dwi dɩm na yɩ nɔn-balwaarʋ tɩn ŋwaanɩ na?»
Baŋa-Wɛ na tagɩ te tɩn mʋ kʋntʋ.
10 «Zʋ-na ba kadwi sɩm wʋnɩ mɛ ba na jəri vinyə tweeru tɩn
á gwɛɛnɩ-sɩ.
Nan yɩ chɔgɩ-na-sɩ á ti.
Za á goni-na tweeru tɩm nɛ á yagɩ,
sɩntʋ na daɩ Baŋa-Wɛ nyɩm tɩn ŋwaanɩ.
11 Yisɩrayɛlɩ dwi dɩm dɩ Zuda dwi dɩm maama
yɔɔrɩ ba ywəri amʋ kwaga nɩ mʋ.»
12 Nɔɔna bam fɔɩ vwan mʋ Baŋa-Wɛ ŋwaanɩ ba wɩ:
«DƖ bá kɩ dɩbam kʋlʋkʋlʋ.
Cam bá yi dɩbam.
Kana dɩ jara-kǝm bá tʋ dɩbam tɩʋ kʋm baŋa nɩ.
13 Nijoŋnǝ bam nyɩ dɩ viu mʋ!
Ba ni-taanɩ ba jɩgɩ Wɛ dam dɩ wʋnɩ.
Yagɩ-na sɩ ba tɩtɩ taanɩ dɩm joori dɩ di-ba.»
14 Kʋntʋ ŋwaanɩ Paŋwa Tu Baŋa-Wɛ tagɩ DƖ wɩ:
«Zeremi, nɔɔna bam na tagɩ kʋntʋ tɩn ŋwaanɩ,
amʋ wʋ́ pa taanɩ dɩlʋ a na kɩ n ni nɩ tɩn ji mim.
Nɔɔna bam maa wʋ́ taa yɩ dɛ sɩlʋ na wʋ́ ja mim tɩn,
pa dɩ zwɛ-ba.»
15 Baŋa-Wɛ na tagɩ te tɩn mʋ tɩntʋ:
«Yisɩrayɛlɩ tiinə bam, cəgi-na!
Amʋ lagɩ a ja dwi tiinə balʋ tɩʋ na baŋwɛ tɩn mʋ a ba
a ma a waarɩ abam.
Tɩʋ kʋm kʋntʋ maŋɩ kʋ wʋra mʋ faŋa faŋa.b
Á ba ni ba ŋwaŋa.
Á maa ba ni ba taanɩ dɩm.
16 Ba maama yɩ nɔn-babɛ mʋ.
Ba maa taɩ ba cɩna yɩ ba gʋɩ nɔɔna.
17 Ba nan lagɩ ba di á mɩna dɩ á wʋdiiru maama mʋ.
Kʋ na yɩ á biə, baá gʋ ba maama,
bəkəri dɩdaanɩ bɩsankam.
Ba ta wʋ́ di á vara maama,
yɩ ba cɔgɩ á vinyə tweeru dɩ á kapʋrrʋ.
Kʋ na yɩ tɩɩnɩ dɩlʋ na lɔgɩ dɩ pɩ
yɩ á ya bʋŋɩ sɩ á səgi dɩ wʋnɩ tɩn,
baá cɔgɩ-dɩ jara-kǝm baŋa nɩ mʋ.»
18 Baŋa-Wɛ daa ma ta DƖ wɩ: «Maŋa kam kʋntʋ na yiǝ, amʋ bá yɔɔrɩ a cɔgɩ abam maama a ti kʋntʋ. 19 Nɔɔna bam na bwe nmʋ Zeremi ba wɩ: ‹Bɛŋwaanɩ mʋ dɩ́ Tu Baŋa-Wɛ pɛ tɩntʋ maama yi dɩbam?›, sɩ n ta dɩ ba nɩ: ‹Kʋ kɩ abam kʋntʋ, á na nuŋi amʋ Baŋa-Wɛ kwaga nɩ yɩ á daarɩ á jɩgɩ wa-yɔɔrʋ á zuli á tɩtɩ tɩga kam nɩ tɩn ŋwaanɩ mʋ. Kʋntʋ ŋwaanɩ abam nan wʋ́ vu sa-tɩʋ sɩ á taá tʋŋɩ á pa vərə.›
20 Tɔɔlɩ-na kwǝrǝ kantʋ sɩ Zakɔbɩ dwi tiinə bam maama ni.
Nan pa-na sɩ ka yi Zuda laŋa kam maama.
21 Cəgi-na Wɛ taanɩ dɩm,
sɩ á yɩ jwəəru mʋ yɩ á ta ga wʋbʋŋa.
Abam jɩgɩ yiǝ, yɩ ya ba naɩ.
Á ma á jɩgɩ zwa, yɩ á ba ni taanɩ kuri.
22 Kʋ ya maŋɩ sɩ á taá kwarɩ amʋ Baŋa-Wɛ,
yɩ á yɩra saɩ dɩ amʋ.
Amʋ mʋ kɩ nɩnɩʋ ni kasʋlʋ a ma a cɩ-kʋ.
Kʋntʋ ma ji nɩnɩʋ kʋm sisəm sɩ kʋ taa ve maŋa maama.
Nɩnɩʋ kʋm na-ŋʋnɩ na maŋɩ sɩ diini wɛɛnɩ te,
yɩ sɩ na wuuri te maama dɩ,
na bam bá gaalɩ sisəm dɩlʋ a na tiŋi a pa-ba tɩn.
23 Amʋ nɔɔna bam nan tiini ba jɩgɩ yi-dɛɛrɩ zanzan,
yɩ ba zwa dɩ ba ni.
Ba lɔgɩ amʋ kwaga nɩ mʋ,
yɩ ba pipiri ba viiri ba daarɩ-nɩ.
24 Ba ba tɛ daanɩ nɩ:
‹Pa-na sɩ dɩ́ taa kwarɩ dɩ́ Tu Baŋa-Wɛ.
Bɛŋwaanɩ, duum dʋa maŋa na yǝni ka yi,
yɩ kweelim dʋa maŋa dɩ yi,
Dɩntʋ mʋ paɩ dʋa nɩ ka maŋa nɩ lanyɩranɩ.
DƖ maa da kʋ ŋwaanɩ DƖ pa dɩ́ zagɩ mɩna lanyɩranɩ.›
25 Wǝǝnu tɩm kʋntʋ nan wʋ kɩ,
á lwarɩm dɩm ŋwaanɩ.
Á lwarɩm kikiǝ yam dɩ ma cɩ abam
dɩ wo-laarʋ tɩntʋ maama.
26 Nɔn-balwaarʋ mʋ tɔgɩ ba gwaanɩ dɩ a nɔɔna bam.
Ba dalɩ mʋ yɩ ba vwɛ,
nɩ nɔɔnʋ na vwɛ te sɩ o ja zuŋə tɩn.
Kʋ nan yɩ cɩgɩrʋ mʋ ba cʋa sɩ ba ja nabiinǝ.
27 Bantʋ sam dɩm su dɩ vwan kikiə mʋ,
nɩ zuŋ-pogo na su dɩ zunə te tɩn.
Ba laan ma da kənə yam kʋntʋ baŋa nɩ
ba ji nɔn-kamunə dɩ nadunə.
28 Ba ma yɔɔrɩ ba nu lanyɩranɩ,
yɩ ba ba sɛ sɩ ba yagɩ lwarɩm kikiə.
Kʋ na yɩ bɩtara dɩdaanɩ nabwənə,
nɔn-balwaarʋ tɩm bá zɩgɩ ba kwaga nɩ
sɩ ba jaŋɩ ba di bʋra ba pa-ba.
29 A nan na waarɩ-ba ba kǝm dɩm kʋntʋ ŋwaanɩ,
kʋ daɩ kʋ cwǝŋǝ nɩ mʋ na?
Amʋ bá joori a ŋwɩ ba lwarɩm jɩnɩ,
ba dwi dɩm na yɩ nɔn-balwaarʋ tɩn ŋwaanɩ na?»
Baŋa-Wɛ na tagɩ te tɩn mʋ kʋntʋ.
30 «Woŋo kʋlʋ na zizigi yɩra tɩn mʋ jɩgɩ kʋ kɩ tɩga kantʋ nɩ.
Kʋ maa tiini kʋ yɩ wo-zɔɔnɩ.
31 Nijoŋnǝ bam ŋɔɔnɩ vwan yɩranɩ mʋ.
Kaanɩm tiinə bam dɩ ma kwe ba tɩtɩ dam
ba nii nɔɔna bam baŋa nɩ.
A nɔɔna bam ma yɔɔrɩ ba lagɩ kʋ na yɩ te kʋntʋ tɩn.c
Wǝǝnu tɩntʋ maama kweelim na yiǝ,
abam lagɩ á kɩ tɩta mʋ?»