4
Baŋa-Wɛ ma ta DƖ wɩ:«Yisɩrayɛlɩ tiinə bam, sɛ-na sɩ á joori á ba amʋ te.
Dʋlɩ-na wo-zɔɔna yalʋ á na zuli tɩn á yagɩ
sɩ á laan ba.
Á nan na tuǝ,
daa yɩ joori-na kwaga.
2 Abam na mɛ amʋ Ŋwɩa Tu Baŋa-Wɛ yɩrɩ dɩm á du durə,
á maŋɩ sɩ á taá tʋŋɩ á tɔgɩ cɩga cwǝŋǝ á ŋwɩa maama wʋnɩ mʋ.
Á na sɩɩnɩ á kɩ kʋntʋ doŋ,
lʋgʋ baŋa dwi maama wʋ́ da abam ŋwaanɩ
ba loori yu-yoŋo amʋ tee nɩ.
Ba maa wʋ́ taa jɩgɩ tɩɩra amʋ ŋwaanɩ.»
3 Baŋa-Wɛ ta tagɩ tɩntʋ mʋ dɩ Zeruzalɛm tiinə, dɩdaanɩ Zuda tiinə badaara bam:
«Ve-na á kagwɩ sɩm wʋnɩ sɩ á cɛ-sɩ.
Nan yɩ kwe-na á wo-dwə bam
á du á yagɩ sabarɩ wʋnɩ.
4 Kwɛ-na á tɩtɩ dɩdaanɩ amʋ Baŋa-Wɛ,
nɩ amʋ ni-gonim dɩm na brɩ te tɩn.
Abam Zeruzalɛm dɩ Zuda tiinə bam,
kwɛ-na á bɩcara yam sɩ ya taa tɔgɩ amʋ wʋbʋŋa.
Abam na wʋ kɩ kʋntʋ
a banɩ wʋ́ tiini dɩ fuli abam baŋa nɩ,
á lwarɩm kikiə yam ŋwaanɩ.
Nɔɔn-nɔɔnʋ bá wanɩ a banɩ dɩm
o pa dɩ zuri.»
Lɛɛrʋ wʋ́ zaŋɩ sa-tɩʋ wʋnɩ tɩ ba tɩ cɔgɩ Zuda tiinə
5 «Tɔɔlɩ-na kwǝrǝ kantʋ á ma á kaanɩ Zeruzalɛm tiinə dɩ Zuda tiinə bam maama á wɩ:
‹Wu-na nabwaanʋ á ma á kaanɩ
balʋ maama na zʋʋrɩ tɩga kam nɩ tɩn.›
Ta-na dɩ kwǝr-dɩa á wɩ: ‹Jeeri-na daanɩ,
sɩ á duri á zʋ tɩɩnɩ dɩlʋ na lɔgɩ dɩ pɩ tɩn wʋnɩ!›
6 Zəŋi-na nyɩnyʋgʋ woŋo sɩ ka brɩ Zeruzalɛma cwǝŋǝ kam.
Kɩ-na lɩla á duri á vu á səgi tʋ-fɔrɔ wʋnɩ!
Bɛŋwaanɩ, amʋ lagɩ a pa lɛɛrʋ mʋ nuŋi jazɩm baŋa seeni
tɩ ba tɩ cɔgɩ abam zɔŋ-zɔŋ.
7 Á dʋnʋ mʋ zaŋɩ o tɩʋ wʋnɩ
sɩ o nuŋi o ba o wanɩ tɩ-kamunnu zanzan.
O nyɩ dɩ nyoŋo mʋ na zɩgɩ kʋ bɔɔnɩ wʋnɩ kʋ nuŋi.
O na tu sɩ o cɔgɩ á tɩʋ kʋm,
di-dwəənu yɩranɩ mʋ wʋ́ daarɩ,
yɩ nɔɔn-nɔɔnʋ daa bá taa zʋʋrɩ á tɩɩnɩ dɩm wʋnɩ.
8 Kʋntʋ ŋwaanɩ, kwe-na gwar-zɩnzwara á lɛ,
sɩ á daarɩ á taá coosǝ yɩ á keeri á wɩ:
‹Baŋa-Wɛ ban-zɔŋɔ ta wʋ dɩbam Zuda tiinə baŋa nɩ.› »
9 Baŋa-Wɛ daa ma ta DƖ wɩ:
«Dɛ dɩm kʋntʋ na yiǝ,
tɩʋ kʋm pɛ dɩ o nakwa vwana wʋ́ parɩ.
Kʋ maa wʋ́ sʋ kaanɩm tiinə bam,
sɩ Wɛ nijoŋnǝ bam dɩ niə yɛ.»
10 Amʋ laan ma ta a wɩ: «Yuutu Baŋa-Wɛ, nmʋ na kɩ te tɩn, n yɔɔrɩ n ganɩ Zuda dɩ Zeruzalɛm tiinə bam mʋ! Nmʋ tagɩ dɩ ba n wɩ: ‹Yazurə wʋ́ taa wʋ á tee nɩ› yɩ sʋ-lɔŋɔ zɩgɩ sɩ kʋ gʋ-ba.»
11 Maŋa nan na yiǝ, baá ta dɩ Zuda dɩ Zeruzalɛm tiinə bam maama ba wɩ: «Dʋ-viu mʋ zɩgɩ kagʋa yuu zwəənu tɩm nɩ kʋ bɩɩnɩ a nɔn-sonnu tɩm baŋa nɩ. Kʋ nan daɩ viu na daanɩ kʋ dʋla sɩ ba ma-kʋ ba caarɩ wǝǝnu tɩn. 12 Kʋ yɩ vu-dɩʋ kʋlʋ na nuŋi amʋ Baŋa-Wɛ tee nɩ tɩn mʋ. Amʋ mʋ wʋra a brɩ a nɔɔna bam nɩ ba ba jɩgɩ bʋra.»
13 Nii dɩ́ dʋna bam na bɩɩnɩ dɩbam baŋa nɩ te!
Ba nyɩ dɩ dʋ-viu na kalɩ kunkwǝǝnu
kʋ tui dɩ baarɩ te tɩn mʋ.
Ba jar-kərə tərikooru tɩm nyɩ dɩ kʋrɩm viu na kɩ sɔɔ te tɩn mʋ.
Ba siseŋ-nɔɔna duri lɩla
sɩ dwe maarʋ na caalɩ wǝǝnu te tɩn.
Lɛɛrʋ yi dɩbam!
Dɩ́ lagɩ dɩ́ tɩ mʋ.
14 Zeruzalɛm tiinə bam,
kwɛ-na á bɩcara sɩ á yagɩ lwarɩm kǝm,
sɩ Wɛ laan vrɩ abam DƖ yagɩ.
Abam bá kɩ lɩla á yagɩ á wʋbʋŋ-lwaanʋ tɩm na?
15 Nɔɔna mʋ zɩgɩ Dan tɩʋ wʋnɩ ba ba.
Badonnǝ dɩ ma nuŋi Efrayim pweeru laŋa kam nɩ ba yi yo.
Ba kwǝrǝ kam maa brɩ lɛɛrʋ taanɩ yɩ ba tɛ ba wɩ:
16 «Pa-na sɩ dwi-gɛ tiinə bam lwarɩ nɩ
jar-kərə bam yiǝ!
Tɔɔlɩ-na á brɩ Zeruzalɛm tiinə bam á wɩ:
‹Jar-kərə nuŋi tɩʋ yigə yigə mʋ
ba bɩɩnɩ abam baŋa.
Baá kaasɩ tiguri-kaasa ba ma jeeri Zuda tɩɩnɩ dɩm.
17 Ba lagɩ ba kaagɩ Zeruzalɛm tɩʋ kʋm mʋ ba pu,
nɩnɛɛnɩ nɔɔna na kaagɩ ba karɩ sɩm yɩ ba yɩrɩ-sɩ te tɩn.
Amʋ nɔɔna bam nan nuŋi amʋ kwaga nɩ mʋ
pa kʋ yɩ kʋntʋ ba yɩra nɩ.› »
Baŋa-Wɛ na tagɩ te tɩn mʋ kʋntʋ.
18 «Kʋ zɩgɩ abam tɩtɩ yɩra nɩ mʋ
pa á na waarɩm dɩntʋ.
Kikiə yalʋ á na tʋŋɩ tɩn mʋ jaanɩ cam dɩntʋ dɩ ba á baŋa.
Lɛɛrʋ mʋ tuǝ!
Kʋ maa jɩgɩ abam yɩra kʋ zʋʋra.»
Zeremi wʋʋ cɔgɩ o nɔɔna bam ŋwaanɩ
19 Nii mim na jɩgɩ-nɩ dɩ zwɛ te!
Ei! Lɛɛrʋ jɩgɩ-nɩ naa!
Amʋ yɩra mʋ yɔɔrɩ ya wiirə.
A maa warɩ sɩ a jǝni cɩmm,
yɩ a bɩcarɩ di.
Bɛŋwaanɩ a ni nabwaanʋ na wui tɩ brɩ jara-kǝm,
yɩ tiguri-kaasa kwǝri zaŋa.
20 Cam dɩdʋa na kɩ dɩ kɛ,
dɩdoŋ mʋ wʋ́ saŋɩ dɩ ba dɩ́ baŋa.
Dɩ́ tɩʋ kʋm maama wʋ́ ji di-dwəənu yɩranɩ.
Dɩ́ di sɩm maama lagɩ sɩ cɔgɩ bɩdwɩ baŋa nɩ mʋ.
21 Dɩ́ dʋna bam wʋ́ taa ciŋi najara dɩdaanɩ dɩbam taa
sɩ ba vu ba maŋɩ yən mʋ?
Dɛ dɔɔ mʋ a daa bá taa ni ba nabwaanʋ tɩm kwǝri?
Baŋa-Wɛ ma ta DƖ wɩ:
22 «Kʋ na yɩ a nɔɔna bam,
ba yɩ jwəəru mʋ.
Ba maa yǝri amʋ ni nɩ.
Ba tiini ba ga wʋbʋŋa zanzan,
nɩ bu-sɩsɩn na yɩ te tɩn.
Kʋ na yɩ lwarɩm kikiə,
ba tiini ba ye dɩntʋ lanyɩranɩ.
Sɩ kʋ na yɩ lanyɩranɩ kǝm,
ba yɔɔrɩ ba yəri-dɩ kɔtaa mʋ.»
Zeremi lwarɩ cɔgɩm dɩlʋ na wʋ́ ba tɩn
23 Amʋ na nii tɩn,
tɩga kam baŋa ya yɩ kafɛ mʋ
ka jagɩ jǝgǝ maama.
Wɛyuu kʋm pooni maama dɩ ma je,
yɩ lim yɩranɩ mʋ daarɩ.
24 A ta na nii pweeru tɩm seeni tɩn,
tɩ sisiŋi mʋ,
yɩ zwəənu tɩm maama zuuli yigə dɩ kwaga.
25 Amʋ nan na nii taan tɩn,
a wʋ nɛ nabiinǝ.
Zunə bam tɩtɩ jaanɩ mʋ ba je wɛyuu kʋm nɩ.
26 Dɩ́ tɩ-ywəŋə kam laan jigi kagʋa mʋ.
Ka tɩɩnɩ dɩm maama dɩ jigi di-dwəənu yɩranɩ.
Kʋntʋ nan kɩa Baŋa-Wɛ ban-lʋm dɩm ŋwaanɩ mʋ.
27 Bɛŋwaanɩ, Baŋa-Wɛ na tagɩ te tɩn mʋ tɩntʋ:
«Lɛɛrʋ wʋ́ ba tɩga kantʋ maama baŋa nɩ,
yɩ a nan bá yɔɔrɩ a cɔgɩ-ka a ti.
28 Kʋntʋ ŋwaanɩ tɩga kam baŋa wʋ́ keeri wʋ-cɔgɔ ŋwaanɩ,
sɩ wɛyuu kʋm maama dɩ ji lim.
Bɛŋwaanɩ amʋ mʋ tagɩ a taanɩ,
dɩ nan ba gɔɩ.
Amʋ wʋbʋŋa na jaanɩ te tɩn mʋ kʋntʋ.
A nan bá joori a ni dɩm kwaga nɩ.»
29 Dɩ́ dʋna bam wʋ́ taa dɔgɩ siseŋ-nɔɔna baŋa nɩ
yɩ ba badonnǝ dɩ taa ta cɩna
ba ba ba ciŋi najara dɩ dɩbam.
Dɩ́ tɩʋ maama nɔn-biə bam na ni ba sɔɔ kʋm,
baá duri ba vu ba səgi mʋ.
Badaara wʋ́ vu ba zʋ punnu wʋnɩ ba səgi,
sɩ badonnǝ di pweeru yuu ba dalɩ.
Ba maama wʋ́ duri ba daarɩ ba tɩɩnɩ dɩm,
sɩ nɔɔn-nɔɔnʋ daa yɩ taa zʋʋrɩ dɩ wʋnɩ.
30 Zeruzalɛm tɩʋ kʋm, cɔgɩm mʋ tu n baŋa nɩ!
N wʋra n kɩ bɛɛ mʋ?
N jɩgɩ yigə mʋ n zʋʋrɩ gwar-ŋʋnnʋ na?
N kwɛ n tɩtɩ dɩ səbu-sɩŋa wǝǝnu,
yɩ n daarɩ n fɔgɩ n yibiyə sɩ bɛ?
Kʋ ba jɩgɩ kuri.
Á bɔɔla bam vɩn abam mʋ,
yɩ ba bʋŋɩ sɩ ba gʋ abam.
31 Cɩga tɩn, amʋ ni kərə mʋ
nɩ kaanɩ na vri pugə sɩ o lʋ yɩ o kʋnɩ te tɩn.
Kʋ nyɩ dɩ ka-ceeru na wʋra o lʋrɩ o dayigə bu
yɩ o kaasɩ tɩte tɩn.
Kərə kam nan yɩ Zeruzalɛmb mʋ kaasɩ kʋntʋ,
yɩ o sin o sɔɔnɩ mʋ.
O yɔɔrɩ o loori zǝnǝ mʋ dɩ jɩ-kʋra yɩ o wɩ:
«Lɛɛrʋ jɩgɩ-nɩ naa!
A dʋna bam wʋra ba gʋɩ-nɩ.»