Yisɩrayɛlɩ tiinə ba jɩgɩ cɩga ba pa Wɛ
3
Baŋa-Wɛ daa ma ta DƖ wɩ:«Nɔɔnʋ na vɩn o kaanɩ
pa kaanɩ wʋm vu o zʋ barʋ wʋdoŋ,
kʋ tu wʋ́ wanɩ o joori o kwe kaanɩ wʋm sɩ o ji o kaanɩ na?
Kǝm dɩm kʋntʋ bá cɔgɩ tɩga kam mʋ na?
Abam nan boori dɩ bɔɔla zanzan mʋ,
yɩ á ta beeri cwǝŋǝ sɩ á joori amʋ te.
2 Kwəni-na á yum sɩ á nii pu-kum sɩm baŋa nɩ.
Jǝgǝ wʋra yɩ abam wʋ ve da sɩ á kɩ kabwəŋə na?
Abam ve á je cwe sɩm maama ni nɩ mʋ
á cəgi á bɔɔla bam,
nɩnɛɛnɩ vɩnvɩrna na je kagʋa yuu nɩ sɩ ba zi nɔɔna te tɩn.
Á kwe á lwarɩm dɩ á boorim kikiə mʋ
á ma á cɔgɩ tɩga kam.
3 Kʋntʋ ŋwaanɩ nan a cɩgɩ dʋa sɩ ka yɩ nɩ,
nɩnɛɛnɩ kʋ na yɩ duum dʋa dɩ kweelim-dʋa dɩ.
Á yɔɔrɩ á cɛ mʋ dɩ á tʋlʋ kʋm,
yɩ cavɩɩra ba jɩgɩ abam kʋ ŋwaanɩ.
4 Abam yǝni á tɛ amʋ taanɩ mʋ á wɩ:
‹Dɩ́ ko›,
yɩ á ta wɩ: ‹Kʋ na zɩgɩ dɩ́ nɔn-dʋnnɩ maŋa nɩ tɩn mʋ
nmʋ maŋɩ n yɩ dɩbam ciloŋ.
5 Nmʋ banɩ bá tiini dɩ zaŋɩ dɩbam baŋa nɩ sɩ kʋ daanɩ.›
Nan nii-na á na tɛ te,
yɩ á laan soe lwarɩm kikiə.»
Yisɩrayɛlɩ tiinə maŋɩ sɩ ba ləri ba wʋʋ Wɛ ŋwaanɩ
6 Zʋzɩasɩ dɛɛn na yɩ pɛ tɩn, mʋ Baŋa-Wɛ tagɩ dɩ amʋ DƖ wɩ: «Zeremi, nii Yisɩrayɛlɩ tɩʋ na kɩ te tɩn. O ba jɩgɩ cɩga o pa-nɩ, nɩ kaanɩ wʋlʋ na nuŋi o barʋ tee nɩ o vu o beeri bɔɔla tɩn. O ma kaagɩ pweeru maama yuu nɩ o kɩ kʋntʋ yɩ o daarɩ o tigi tweeru maama kuri nɩ o tɔgɩ boorim kikiə kwaga. 7 Amʋ ya ta cəgi mʋ sɩ a nii, o na kɩ o su, sɩ o joori amʋ te. O nan vɩn sɩ o joori o ba. O cʋrʋ Zuda dɛɛn nɛ o kikiə yam na yɩ te tɩn. Wʋntʋ dɩ nan ba jɩgɩ cɩga, 8 yɩ Yisɩrayɛlɩ kǝm dɩm wʋ sagɩ wʋntʋ dɩ yɩra. A ma zəli Yisɩrayɛlɩ sɩ o viiri o daarɩ amʋ o boorim kikiə yam ŋwaanɩ. Zuda dɩ nan yagɩ amʋ mʋ, yɩ o nuŋi o boorə. 9 O maŋɩ o wʋ nii o tʋlʋ kikiə yam nɩ ya jɩgɩ cavɩɩra ya pa‑o. O ma yagɩ amʋ yɩ o daarɩ o kaagɩ o zuli jwǝnǝ yalʋ ba na kwe kandwa dɩ dɛ ba kɩ-ya tɩn. Kʋntʋ baŋa nɩ o jɩgɩ o tɩtɩ dɩdaanɩ amʋ tɩga kam mʋ o cɔga. 10 Dɩ kʋntʋ maama dɩ, Zuda wʋ joori amʋ tee nɩ dɩ o wʋʋ maama. O yɔɔrɩ o kɩ nɩnɛɛnɩ o wʋʋ mʋ cɔgɩ yɩ kʋ nan daɩ kʋntʋ.»
Baŋa-Wɛ na tagɩ te tɩn mʋ kʋntʋ.
11 Baŋa-Wɛ laan ma ta dɩ amʋ DƖ wɩ: «Yisɩrayɛlɩ tiinə bam yɔɔrɩ ba ywəri amʋ kwaga nɩ mʋ. Dɩ kʋ dɩ, ba nan garɩ Zuda tiinə bam na ba tɔgɩ-nɩ dɩ cɩga tɩn. 12 Nan ve n yɔɔrɩ jazɩm baŋa seeni n ta dɩ Yisɩrayɛlɩ tiinə bam n wɩ:
‹Abam sɩɩnɩ á ywəri amʋ kwaga nɩ.
Nan joori-na amʋ te.›
Baŋa-Wɛ na tagɩ te tɩn mʋ kʋntʋ.
‹Amʋ yɩ ŋwaŋa tu mʋ.
A banɩ dɩm bá taa wʋ á baŋa nɩ maŋa maama.›
Baŋa-Wɛ na tagɩ te tɩn mʋ kʋntʋ.
13 ‹Yɔɔrɩ á sɛ-na nɩ á tusi,
yɩ á nuŋi abam Tu Baŋa-Wɛ dɩm kwaga nɩ.
Sɛ-na nɩ á tɔgɩ wa-yɔɔrʋ kwaga,
yɩ á zuli-ya tweeru maama kuri nɩ.
Á yɔɔrɩ á wʋ kɩ á tɔgɩ amʋ niə yam.›a
Baŋa-Wɛ na tagɩ te tɩn mʋ kʋntʋ.»
14 Baŋa-Wɛ nan tagɩ tɩntʋ mʋ yɩ DƖ wɩ: «A bu-cɩcɔgɩrʋ tɩm, amʋ mʋ te abam. Nan joori-na amʋ te! A lagɩ a lɩ abam dɩdʋa dɩdʋa á tɩʋ maama wʋnɩ, sɩ a daarɩ a lɩ bale bale sɔ-yuu maama wʋnɩ, a ja-ba a joori Siyɔn wʋnɩ. 15 A maa wʋ́ beeri yigǝ tiinǝb balʋ na kɩ ba tɔgɩ amʋ yigə tɩn, sɩ ba taa nii abam baŋa nɩ. Bantʋ wʋ́ tɔgɩ yǝno dɩ yi-pʋrʋ baŋa nɩ mʋ ba wǝli abam lanyɩranɩ. 16 Abam kɔgɔ kʋm laan maa wʋ́ puli tɩga kam baŋa nɩ. Maŋa kam kʋntʋ nɩ nɔɔna daa bá taa tɛ Wɛ ni-gonim daka kam taanɩ. Kʋ maŋɩ kʋ bá ba ba wʋbʋŋa nɩ sɩ ba guli ka gulə. Nɔɔna fra bá zʋ-ka. Ba nan bá taa lagɩ sɩ ba joori ba kɩ ka doŋ. 17 Maŋa kam kʋntʋ nɩ, baá taa bǝi Zeruzalɛm tɩʋ kʋm nɩ: Baŋa-Wɛ paarɩ jangɔŋɔ kʋm mʋ. Lʋgʋ baŋa dwi maama tiinə maa wʋ́ jeeri Zeruzalɛm nɩ sɩ ba zuli Baŋa-Wɛ yɩrɩ dɩm. Ba daa bá tɔgɩ ba wʋ-dɛɔ kʋm na lagɩ kǝm-balwaarʋ tɩlʋ tɩn. 18 Kʋ nan na yi maŋa kam kʋntʋ, Yisɩrayɛlɩ dwi dɩm dɩ Zuda dwi dɩm wʋ́ ba ba kɩ daanɩ sɩ ba taa yɩ sɔŋɔ dɩdʋa. Baá zɩgɩ jazɩm baŋa seeni tɩʋ kʋm nɩ ba joori ba zʋ tɩga kalʋ wʋnɩ amʋ dɛɛn na pɛ ba nabaara bam sɩ ba taa te tɩn.
19 Amʋ dɛɛn bʋŋɩ a tɩtɩɩ nɩ a wɩ:
Yisɩrayɛlɩ dwi tiinə bam, amʋ ya lagɩ sɩ a taa jɩgɩ abam
nɩ á yɩ amʋ tɩtɩ biə mʋ.
A ma ja wʋbʋŋa sɩ a pa abam tɩ-ywəŋə kantʋ,
ka na yɩ tɩ-ŋʋŋa ka dwe tɩga kalʋ maama
dwi-gɛ tiinə bam na jɩgɩ tɩn.
A nan ya lagɩ sɩ á taá bəi-nɩ nɩ: ‹Dɩ́ ko› mʋ,
sɩ á daa yɩ nuŋi amʋ kwaga nɩ.
20 Abam nan ba sɛa.
Á brɩ á ba jɩgɩ cɩga dɩ amʋ,
nɩ kaanɩ wʋlʋ na yagɩ o barʋ
yɩ o daarɩ o tɔgɩ bɔɔla kwaga te tɩn mʋ.»
Baŋa-Wɛ na tagɩ te tɩn mʋ kʋntʋ.
21 Kərə zɩgɩ zwəənu tɩm yuu nɩ
ka tui yo seeni mʋ.
Yisɩrayɛlɩ tiinə bam mʋ yɔɔrɩ ba kaasɩ sɩ ba na zǝnǝ.
Bantʋ nan mʋ ywəri cwə-laarʋ wʋnɩ
yɩ ba daarɩ ba swe ba Tu Baŋa-Wɛ dɩm ni nɩ.
22 «Abam balʋ maama na nuŋi amʋ kwaga nɩ tɩn,
joori-na amʋ tee nɩ,
sɩ aá yɔɔrɩ abam
a dɩ cɩga cwǝŋǝ wʋnɩ.»
«Dɩ́ wʋ́ sɩɩnɩ dɩ́ joori nmʋ te,
Nmʋ na yɩ dɩbam Tu Baŋa-Wɛ dɩm tɩn ŋwaanɩ.
23 Dɩbam na diini zwəənu tɩm yuu nɩ dɩ zuli jwǝnǝ,
yɩ dɩ́ kaasɩ baŋa baŋa pweeru tɩm yuu nɩ tɩn,
kǝm-yɔɔrʋ tɩm kʋntʋ wʋ wanɩ dɩbam tɩ wǝli.
Kʋ yɩ dɩ́ Tu Baŋa-Wɛ yɩranɩ mʋ wanɩ
DƖ joŋi Yisɩrayɛlɩ tiinə bam DƖ yagɩ.
24 Kʋ nan na zɩgɩ faŋa faŋa tɩn,
jwə-yɔɔrʋ tɩlʋ dɩ́ na zuli tɩn mʋ cɔgɩ dɩ́ wǝǝnu.
Tɩ yɔɔrɩ tɩ cɔgɩ wǝǝnu tɩlʋ maama
dɩ́ nabaara bam na yaarɩ ba na tɩn mʋ.
Kʋ na yɩ dɩ́ vara dɩ dɩ́ biə maama,
dɩ́ gɛ-ba jwǝnǝ kaanɩm baŋa nɩ.
25 Dɩ́ laan nan wʋ́ taa je dɩ dɩ́ cavɩɩra mʋ,
sɩ dɩ́ kwe tɩtɔ-gʋrrʋ dɩ pu dɩ́ yum nɩ.
Bɛŋwaanɩ, dɩbam dɩdaanɩ dɩ́ nabaara bam maama
tusi dɩ́ Tu Baŋa-Wɛ dɩm yigə nɩ.
Kʋ na zɩgɩ faŋa faŋa tɩn, dɩ́ yɔɔrɩ dɩ́ wʋ sɛ DƖ niə yam mʋ.»