Yisɩrayɛlɩ tiinə na vɩn Wɛ te tɩn
«Cəgi-na Baŋa-Wɛ taanɩ dɩm:
A guli nmʋ dɛɛn na yɩ nɔn-dʋŋʋ
yɩ n tiini n soe amʋ,
nɩ kabwəm na soe o barʋ te tɩn.
N yɔɔrɩ n tɔgɩ a kwaga mʋ kagʋa kam wʋnɩ,
mɛ seeni ba na wʋ dugi wʋdiu da tɩn.
3 Ka maŋa nɩ, Yisɩrayɛlɩ tiinə dɛɛn yɔɔrɩ ba yɩ Baŋa-Wɛ nyɩm mʋ,
nɩ wʋdiiru tɩlʋ na loori yigə tɩ kɩ yɩ ba pɔɔrɩ-tɩ ba pa‑DƖ tɩn.
Wɛ dɛɛn ma yǝni DƖ waarɩ balʋ na cɔgɩ DƖ nɔɔna bam tɩn,
pa lɛɛrʋ yi-ba.
Baŋa-Wɛ na tagɩ te tɩn mʋ kʋntʋ.»
4 Zakɔbɩ dwi tiinə bam, cəgi-na Baŋa-Wɛ taanɩ dɩm!
Á sɔ-yuni tɩm maama, cəgi-na DƖ kwǝrǝ kam!
5 Baŋa-Wɛ taanɩ dɩm mʋ tɩntʋ:
«Á nabaara bam dɛɛn na ywəri amʋ kwaga nɩ tɩn,
kʋ yɩ amʋ na kɩ a tusi dɩ ba tɩn ŋwaanɩ mʋ na?a
Ba dɛɛn tɔgɩ jwə-yɔɔrʋ kwaga ba daarɩ amʋ.
Ba kǝm dɩm kʋntʋ pɛ ba dɩ ji wo-kʋrrʋ mʋ amʋ yigə nɩ.
6 Ba maŋɩ ba wʋ bwe daanɩ nɩ:
‹Baŋa-Wɛ dɩm nan bɛ?
DƖ dɛɛn jaanɩ dɩbam DƖ nuŋi Ezipi wʋnɩ
DƖ daarɩ DƖ da dɩbam yigə
DƖ ja DƖ tɔgɩ kagʋa kam wʋnɩ sɩ dɩ́ kɛ.
Ka maa yɩ tɩ-kʋra na jɩgɩ gwəənu,
yɩ na tǝrǝ ka wʋnɩ tɩn.
Ka tɔgɩm tiini ka jɩgɩ fʋʋnɩ,
yɩ nɔɔna ba zʋʋrɩ ka wʋnɩ.›
7 Amʋ Baŋa-Wɛ nan jaanɩ abam mʋ
a kalɩ a zʋ tɩ-ywəŋə wʋnɩ,
sɩ á di ka tweeru biə dɩ ka wʋdi-laarʋ tɩm.
Abam nan na zʋ a tɩga kam kʋntʋ tɩn,
á kwe á lwarɩm á ma á cɔgɩ-ka,
pa ka ji wo-zɔɔnɩ amʋ yigə nɩ.
8 Abam tɩʋ kaanɩm tiinə bam daa wʋ bwe daanɩ nɩ:
‹Baŋa-Wɛ dɩm bɛ?›
Balʋ na jɩgɩ amʋ niə yam ba brɩ nɔɔna tɩn
nan yǝri amʋ ni nɩ.
Á yigǝ tiinǝb bam ma lɔ amʋ kwaga nɩ.
Kʋ na yɩ amʋ nijoŋnǝ bam,
ba dɩ yǝni ba ma Baalɩ yɩrɩ ba ŋɔɔnɩ mʋ,
yɩ ba daarɩ ba tɔgɩ jwə-yɔɔrʋ kwaga.
9 Á lwarɩm dɩm kʋntʋ ŋwaanɩ,
amʋ Baŋa-Wɛ daa lagɩ a saŋɩ abam mʋ,
sɩ a daarɩ a saŋɩ á biə dɩ á naarʋ maama.»
Baŋa-Wɛ na tagɩ te tɩn mʋ kʋntʋ.
10 «Kwaanɩ-na á bɛ wa-zʋʋrɩ seeni
á vu á yi Kitimic bubɛ niə yam,
sɩ á nii kʋ na yɩ te tɩn.
Ta daarɩ-na á tʋŋɩ nɔɔna wa-puli seeni,
sɩ ba vu ba yi Kedarɩ je sɩm,
ba fɔgɩ ba nii ba na kʋ na yɩ te tɩn.
Kǝm dɩntʋ doŋ maŋɩ dɩ kɩ na?
11 Tɩʋ kʋlʋ wa na maŋɩ ya yɩ kafɛ te,
baá vɩ-ya na?
Nan nii! Amʋ nɔɔna bam dʋlɩ amʋ ba yagɩ,
yɩ ba daarɩ ba tɔgɩ jwə-yɔɔrʋ kwaga.
Amʋ nan yɩ ba Paarɩ-zulǝ Tu Baŋa-Wɛ dɩm mʋ!
12 Wɛyuu maama maŋɩ sɩ kʋ nii kʋ na kʋ na yɩ te tɩn!
Ja-na á niə yɩ á daarɩ á taá yɩ yǝǝu!
Pa-na á yɩra taa saɩ dɩ fʋʋnɩ!
13 Amʋ nɔɔna bam cɔgɩ bɩle mʋ ba daŋɩ ba yuu nɩ:
Amʋ mʋ yɩ buli-yi dɩlʋ na na paɩ ŋwɩa tɩn,
yɩ ba vɩ-nɩ.d
Ba ta ma lɛɛrɩ ba mɔ kɔɔra sɩ ba kɩ ba na ba wʋnɩ,
yɩ ba kɔɔra bam kʋntʋ maŋɩ ba lɔ mʋ.
Na bam nan warɩ kɔɔra bam kʋntʋ wʋnɩ sɩ ba maŋɩ da!
14 Yisɩrayɛlɩ tiinə bam daɩ gambɛ.
Ba dɛɛn wʋ lʋgɩ-ba gabɛɛm wʋnɩ.
Bɛ nan mʋ pɛ ba dʋna wanɩ ba ja-ba ba viiri?
15 Ba dʋna bam nyɩ dɩ nywəənu mʋ
tɩ na di-ba yɩ tɩ kaasɩ ba ŋwaanɩ.
Ba yɔɔrɩ ba cɔgɩ Yisɩrayɛlɩ tɩga kam mʋ,
pa ba tɩɩnɩ dɩm zwɛ dɩ daarɩ di-dwəənu yɩranɩ.
16 Cɩga tɩn, Memfisi dɩ Tapanɛzɩe jar-kərə mʋ tuǝ
ba ceeri á tɩʋ kʋm ba daarɩ yu-kwəli-pʋa ba tiŋi.
17 Yisɩrayɛlɩ tiinə bam,
abam tɩtɩ nan mʋ bəŋi yaara yantʋ á pa a tɩtɩ.
Bɛŋwaanɩ, á Tu Baŋa-Wɛ dɩm mʋ ya wʋ abam yigə nɩ
DƖ brɩ cwǝŋǝ kam pa á veǝ,
yɩ á laan ywəri DƖ kwaga nɩ.
18 Bɛɛ mʋ yɩ á bʋŋɩ sɩ á vu Ezipi
á nyɔ Nili bugə na bam?
Bɛɛ mʋ yɩ á lagɩ á vu Asiiri
sɩ á nyɔ Efratɩ bugə na bam?
Á wʋ́ na zǝnǝ bantʋ tee nɩ na?
19 Abam lwarɩm kikiə yam ŋwaanɩ nan,
kʋʋ́ zʋ á yɩra.
Abam na nuŋi amʋ kwaga nɩ te tɩn,
dɩ maa wʋ́ pa á na waarɩm.
Nan taá ye-na nɩ kʋ camma
sɩ á vɩn á Tu Baŋa-Wɛ dɩm.
Kʋ ta wʋ́ ni abam lanyɩranɩ,
dɩ á na ba kwarɩ amʋ tɩn ŋwaanɩ.»
Paŋwa Tu Baŋa-Wɛ na tagɩ te tɩn mʋ kʋntʋ.
20 «Kʋ zɩgɩ faŋa faŋa tɩn mʋ
á ywəri amʋ cwǝŋǝ kam nɩ.
Á mɛ á kwaga á ya amʋ yɩ á wɩ:
á bá sɛ sɩ á zuli-nɩ.
Á ma kaagɩ pweeru maama yuu nɩ
sɩ á zuli jwǝnǝ,
yɩ á daarɩ á tigi tweeru maama kuri nɩ
á kɩ boorim kikiə.
21 Amʋ dɛɛn jəri abam a tɩga kam nɩ,
nɩ á yɩ Vinyə tiu kʋlʋ na tiini kʋ lana tɩn mʋ.
Nan nii abam na garɩ á ləri te!
Á jigi vinyə tiu kʋlʋ na ləri bu balwaarʋ tɩm mʋ.
22 Canfɩm dɩ sɩan na daga te maama,
tɩ bá wanɩ abam yɩra tɩ titigi tɩ gɔ á yɩra digiru tɩm.
Abam lwarɩm dɩm ta wʋ́ taa wʋ amʋ yigə nɩ mʋ taan.»
Yuutu Baŋa-Wɛ na tagɩ te tɩn mʋ kʋntʋ.
23 «Bɛɛ mʋ yɩ á wɩ: á wʋ digimi á tɩtɩ cullu tɩm seeni?
Á wʋ zuli Baalɩ jwǝnǝ yam na?
Nii-na lɛɛrʋ tɩlʋ á na kɩ bwəəlu tɩm tɩga nɩ tɩn.
Abam nyɩ dɩ yogondi-kana na lagɩ sɩ baara di-ka yɩ ka kɩ te tɩn mʋ.
Ka warɩ ka tɩtɩ sɩ ka ja.
24 Abam ta nyɩ dɩ bɩna-kana kalʋ na wʋ kagʋa yuu nɩ
ka kaagɩ ka beeri baara sɩ ba di-ka tɩn mʋ.
Nɔɔn-nɔɔnʋ bá wanɩ ka yigə o cɩ.
Bɩna-bɩa kalʋ maama na lagɩ-ka,
kʋ bá cɛ ka yɩra.
Ka wʋ́ na-ka mwalɩ mʋ ka di,
bɩna-kana kam yɩra na maŋɩ ya nyaarɩ tɩn ŋwaanɩ.
25 Yisɩrayɛlɩ tiinə bam, yɩ taá duri-na taan,
sɩ á napra pɩɩrɩ yɩ na-nyɔm jɩgɩ abam.
Abam nan vɩn mʋ yɩ á wɩ:
‹Yɩ kwaanɩ sɩ n cɩ dɩbam!
Dɩ́ fra zʋ dwi-gɛ tiinə wa yam mʋ.
Dɩ́ wʋ́ yɔɔrɩ dɩ́ da ya kwaga.›
26 Yisɩrayɛlɩ tiinə bam yuu nan lagɩ kʋ yáalɩ mʋ.
Kʋʋ́ taa nyɩ dɩ ba na jaanɩ ŋwɩɩnʋ
yɩ ba yáal‑o te tɩn mʋ.
Ba pwa dɩ ba tɩʋ kʋm nakwa bam,
dɩ ba kaanɩm tiinə bam,
dɩ ba nijoŋnǝ bam maama
mʋ lagɩ ba di cavɩɩra.
27 Ba yǝni ba zuli daa mʋ yɩ ba wɩ:
‹Nmʋ yɩ amʋ ko mʋ.›
Ba daa ta zuli kandwɛ yɩ ba wɩ:
‹Nmʋ mʋ lʋgɩ-nɩ.›
Ba ta ma pipiri ba lɔ amʋ kwaga nɩ,
yɩ ba yigə tǝrǝ amʋ wʋnɩ.
Cam laan na yǝni dɩ yi-ba,
ba duri ba tui ba keeri ba loori-nɩ
sɩ a joŋi-ba a yagɩ.f
28 Zuda tiinə bam, á jwǝnǝ yam á na mɔɔnɩ tɩn nan bɛ?
Pa-na sɩ ya ba ya joŋi abam ya yagɩ á cam maŋa nɩ!
Á tɩʋ maama jɩgɩ kʋ jwəm mʋ. Vwan mʋ na?
29 Abam jɩgɩ-nɩ á bwɛ sɩ bɛɛ mʋ?
Kʋ nan yɩ abam mʋ ywəri amʋ kwaga nɩ.»
Baŋa-Wɛ na tagɩ te tɩn mʋ kʋntʋ.
30 «Amʋ ya waarɩ á nɔɔna bam
yɩ ba pa kʋ ba jɩgɩ kuri.
Ba wʋ sɛ a kwiə yam.
Á laan ma á gʋ nijoŋnə balʋ a na tʋŋɩ abam tee nɩ tɩn,
nɩ nyoŋo kʋlʋ kana na jɩgɩ-kʋ yɩ kʋ zi vara te tɩn.»
31 Abam zɩm nɔɔna bam, cəgi-na Baŋa-Wɛ taanɩ dɩm. DƖ maa wɩ:
«Amʋ laan jigi kagʋa mʋ a pa Yisɩrayɛlɩ tiinə bam na?
A yagɩ pa lim mʋ gilimi-ba na?
Bɛŋwaanɩ mʋ a nɔɔna bam kaagɩ ba tɛ nɩ:
‹Dɩ́ wʋ́ beeri dɩ́ vu dɩ́ na lagɩ mɛ tɩn mʋ,
sɩ dɩ bá joori nmʋ te›?
32 Bukɔ wʋ́ wanɩ o swe o nɩnwaŋa zɩla sɩ o zʋ na?
Kaanɩ na wʋra o ti o yigə sɩ o zʋ barʋ,
kʋ tu wʋ́ kwe o ban-zʋrɩ gɔrɔ kʋm o səgi na?
Kʋ nan na yɩ amʋ tɩtɩ nɔɔna bam,
kʋ na zɩgɩ faŋa faŋa tɩn mʋ
ba maŋɩ ba swe amʋ swiə sɩ kʋ daanɩ.
33 Abam tiini á lwarɩ cwe sɩlʋ á na wʋ́ tɔgɩ
sɩ á na bɔɔla zanzan tɩn.
Nmʋ dɛɛn ma n na-vəli-balɔrɔ kʋm, n ma n zaasɩ nɔɔna!
34 Abam gwaarʋ tɩm taŋɩ dɩ nabwənə jana mʋ,
yɩ nɔɔna naɩ á na digimi á tɩtɩ te tɩn.
Abam nan wʋ pɩɩrɩ-ba ŋʋnnɩ baŋa nɩ,
yɩ ba jɩgɩ bʋra.
Dɩ kʋ maama dɩ, abam nan ta tɛ á wɩ:
35 ‹Dɩbam wʋ kɩ dɩ́ cɔgɩ mʋ.
Wɛ zuri DƖ banɩ DƖ pa dɩbam mʋ.›
Amʋ nan lagɩ a waarɩ abam mʋ,
dɩ á na kaagɩ á tɛ nɩ
‹Dɩbam sɩɩnɩ dɩ́ wʋ tusi› tɩn.
36 Nii-na á na kaagɩ á jɩgɩ á tɩtɩ
á bo je maama nɩ te!
Abam na ve Ezipi tiinə te mʋ sɩ ba wǝli abam,
á wʋ́ tʋ ba jɩŋa nɩ,
nɩnɛɛnɩ á dɛɛn na tʋ te Asiiri tiinə jɩŋa nɩ tɩn.
37 Abam lagɩ á kwe á jɩan yam á vɔ á yum nɩ mʋ,
sɩ á zɩgɩ Ezipi nɩ á joori dɩ cavɩɩra.
Amʋ Baŋa-Wɛ maŋɩ a nuŋi
balʋ á na pɛ-ba cɩga tɩn kwaga nɩ mʋ.
Ba bá wanɩ abam ba wǝli dɩ fɩnfɩɩn dɩ.»