Wɛ Nijoŋnu
Zeremi Tɔnɔ
Baŋa-Wɛ wʋ́ waarɩ Zuda dwi tiinə bam
1:1–12:17
1
Hilkiya bu Zeremi ni-taanɩ mʋ tɩntʋ. O dɛɛn nuŋi Anatɔtɩ tɩʋ kʋlʋ na wʋ Bɛnzamɛn laŋa kam nɩ tɩn mʋ. O dwi tiinə bam maa yɩ Wɛ kaanɩm tiinə. 2 Bɩnɩ dɩlʋ Amɔn bu Zʋzɩasɩ dɛɛn na jɩgɩ bɩna fugə-yatɔ Zuda paarɩ baŋa nɩ tɩn, mʋ Baŋa-Wɛ pɛ Zeremi kwǝrǝ sɩ o ta o brɩ nɔɔna.a 3 Zʋzɩasɩ bu Yeoyakim dɩ paarɩ dim maŋa nɩ sɩ kʋ taa ve o bu Sedesɩasɩ na jɩgɩ bɩna fugə-dɩdʋa Zuda paarɩ baŋa nɩ tɩn mʋ Baŋa-Wɛ yǝni DƖ ŋɔɔnɩ dɩ Zeremi kuni zanzan. Bɩnɩ dɩm kʋntʋ canɩ sɩnu cana kam nɩ mʋ ba dɛɛn jaanɩ Zeruzalɛm tiinə bam ba kalɩ ba vu sa-tɩʋ yigə yigə.bWɛ kuri Zeremi sɩ o taa tʋŋɩ o pa‑o
4 Baŋa-Wɛ dɛɛn ma pa amʋ ni yɩ DƖ wɩ:
5 «Amʋ maŋɩ a ye n ni nɩ mʋ,
yɩ a ya ta wʋ naanɩ‑m a kɩ n nu pugə nɩ.
Ba dɛɛn ta na wʋ lʋgɩ‑m tɩn,
dɩ a maŋɩ a pɔɔrɩ‑m a zɩgɩ dáa nɩ.
A ma tiŋi‑m sɩ n tan yɩ amʋ nijoŋnu
n brɩ dwi-gɛ tiinə bam n pa-nɩ.»c
6 Amʋ ma lǝr-o a wɩ: «Yuutu Baŋa-Wɛ, amʋ ta yɩ bu mʋ, yɩ a ni yǝri taanɩ.»d
7 Baŋa-Wɛ daa ma ta DƖ wɩ: «Yɩ ta wɩ: n yɩ bu. Nmʋ nan wʋ́ vu balʋ maama amʋ na wʋ́ tʋŋɩ-m tɩn te mʋ, sɩ n pa-ba ni dɩlʋ maama amʋ na pɛ‑m sɩ n ta dɩ ba tɩn. 8 Yɩ ta n fʋna dɩ ba, sɩ amʋ wʋ́ taa wʋ n tee nɩ, sɩ a joŋi‑m ba jɩŋa nɩ a yagɩ.»e Baŋa-Wɛ na tagɩ te tɩn mʋ kʋntʋ.
9 Baŋa-Wɛ ma twɩ DƖ jɩŋa DƖ dwe amʋ ni, yɩ DƖ daarɩ DƖ ta dɩ amʋ DƖ wɩ: «Nii yo! A taanɩ dɩm mʋ tɩntʋ a kwe a pa‑m sɩ n ta n jɩgɩ n ŋɔɔna.f 10 Lwarɩ nɩ a zɩm kwe tɩɩnɩ dɩ dwi tiinə na wʋ mɛ maama tɩn mʋ a pa‑m. Nmʋ jɩgɩ dam sɩ n brɩ-ba nɩ: ba wǝǝnu wʋ́ gɔ tɩ yagɩ, naa tɩ dɩ tɩga nɩ tɩ yagɩ. Nmʋ ta wʋ́ brɩ-ba nɩ: ba wǝǝnu wʋ́ ba tɩ cɔgɩ, naa ba dʋlɩ-tɩ ba yagɩ kafɛ. Dam ta wʋ n tee nɩ sɩ n pa ba lwarɩ nɩ ba wǝǝnu wʋ́ joori tɩ fɔgɩ tɩ lɔ tɩ zɩgɩ dɩ dam, naa tɩ jəri tɩ-ywəŋə je nɩ.»
Wɛ na vɩɩrɩ wǝǝnu tɩlʋ DƖ brɩ Zeremi tɩn
11 Baŋa-Wɛ dɛɛn ma bwe-nɩ DƖ wɩ: «Zeremi, bɛɛ mʋ n nii n na?» Amʋ dɩ ma ləri a wɩ: «A nɛ amandiə tiu naga mʋ.»
12 Baŋa-Wɛ laan maa wɩ: «Nmʋ sɩɩnɩ n na lanyɩranɩ! Amʋ dɩ nan lagɩ a niig mʋ sɩ a taanɩ dɩm sɩɩnɩ dɩ kɩ lɩla.»
13 Baŋa-Wɛ daa ma bwe-nɩ DƖ wɩ: «Bɛɛ mʋ nmʋ daa n nii n na?» A ma lǝr-o a wɩ: «A nɛ kambiə na mʋ na cʋra jazɩm baŋa seeni, yɩ ka guni ka jeeri yo seeni.»
14 Baŋa-Wɛ ma ta DƖ wɩ: «Amʋ lagɩ a pa lɛɛrʋ nuŋi jazɩm baŋa seeni mʋ tɩ ba. Tɩ wʋ́ guni tɩ lo tɩga kantʋ maama dɩ ka nɔɔna bam baŋa nɩ.»
15 Baŋa-Wɛ na tagɩ kʋlʋ tɩn mʋ tɩntʋ:
«A lagɩ a bəŋi jazɩm baŋa seeni tɩɩnɩ dɩm dwi tiinə mʋ sɩ ba maama ba yo seeni.
Ba pwa bam lagɩ ba ba ba jǝni Zeruzalɛm tɩʋ kʋm ni nɩ mʋ
ba di paarɩ.
Ba maa wʋ́ ba ba gilimi Zeruzalɛm dɩ Zuda tɩɩnɩ dɩm maama ba pu,
sɩ ba daarɩ ba di-dɩ.
16 Amʋ wʋ́ puri ni mʋ a ta wɩ waarɩm ba a nɔɔna bam baŋa,
ba lwarɩm kikiə yam ŋwaanɩ.
Ba vɩn amʋ mʋ yɩ ba daarɩ ba zuli wa yadonnə,
bantʋ tɩtɩ jɩan na kɩ tɩn.
17 Kʋntʋ ŋwaanɩ Zeremi, ti n yigə sɩ n vu n ta dɩ ba kʋlʋ maama a na pɛ‑m ni sɩ n ta tɩn. Yɩ ta n fʋna dɩ ba. Kʋ na daɩ kʋntʋ, nmʋ na yi ba te, amʋ wʋ́ kɩ kʋlʋ na jɩgɩ fʋʋnɩ tɩn n baŋa nɩ. 18 Amʋ zɩm lagɩ a pa nmʋ tan jɩgɩ dam, nɩnɛɛnɩ tɩʋ kʋlʋ na lɔgɩ kʋ pɩ tɩn mʋ. Nmʋ ta wʋ́ tan nyɩ dɩ ywe dɩlʋ na yɩ luu tɩn, naa kəbrə kalʋ ba na mɛ canna ba lɔ tɩn. Nmʋ wʋ́ zɩgɩ dɩ dam n vɩn balʋ maama na zʋʋrɩ tɩga kam nɩ tɩn kikiə yam, nɩnɛɛnɩ kʋ na yɩ Zuda tiinə pwa bam, dɩ ba tɩʋ nakwa bam, dɩ ba kaanɩm tiinə bam, dɩ ba nɔn-biə bam maama. 19 Bantʋ maama wʋ́ taa dwǝni dɩ nmʋ mʋ. Ba nan bá wanɩ‑m kʋlʋkʋlʋ ba kɩ. Bɛŋwaanɩ, amʋ wʋ n tee nɩ sɩ a joŋi‑m ba jɩŋa nɩ a yagɩ.»
Baŋa-Wɛ na tagɩ te tɩn mʋ kʋntʋ.