Asiiri tɩʋ pɛ kɩ jara dɩ Zuda tiinə
32
Pɛ Ezekɩasɩ dɛɛn kɩ o cɩga dɩdaanɩ Baŋa-Wɛ o tʋŋɩ tɩtʋŋ-ŋʋna mʋ. Kʋntʋ kwaga nɩ mʋ Asiiri tɩʋ pɛ Senakeribi tu o jeeri Zuda laŋa kam dɩ jara. O ma li tɩɩnɩ dɩlʋ na lɔgɩ dɩ pɩ tɩn, o na bʋŋɩ sɩ o di-dɩ najara wʋnɩ o taa te tɩn ŋwaanɩ.a 2 Ezekɩasɩ ma maanɩ nɩ Senakeribi wʋbʋŋa jaanɩ sɩ o ba o kwaarɩ jara dɩ Zeruzalɛm tɩʋ kʋm o wǝli da. 3 O ma kɩ bana dɩ o tɩʋ nakwa bam, dɩ o jar-kərə dɩdɛɛra bam, sɩ ba nuŋi tɩʋ kʋm wʋnɩ ba vu buli-yiə yalʋ na wʋ tɩʋ kʋm dáa nɩ tɩn ba sɩɩrɩ-ya. Ba ma sɛ sɩ ba pa o bʋbʋŋɩ dɩm jǝni. 4 Ba dɛɛn lagɩ kɔ-fɔrɔ mʋ, yɩ ba vu ba sɩɩrɩ buli-yiə yam, ba daarɩ ba cɩ bu-tʋla kʋlʋ na na tʋlɩ je sɩm kʋntʋ wʋnɩ ba kɛ tɩn. Ba ma ta ba wɩ: «Tɩta ŋwaanɩ mʋ Asiiri tɩʋ pwa bam wʋ́ ba yo seeni ba na na zanzan ba nyɔ?» 5 Ezekɩasɩ ma yɔɔrɩ o pa o tɩntʋŋna fɔgɩ ba cɩ tɩʋ kʋm kəbrə kam ba zɩgɩ. Ba ta lɔgɩ di-dɩdwaarʋ mʋ ka yɩra nɩ, yɩ ba cɩ pooni yigə kəbrə kadoŋ ba kɩ da. O ma fɔgɩ o lɔ mɛ tɩga kam na suuri ka maŋɩ daanɩ Pɛ Davidi dalɩm je sɩm nɩ tɩn. O ta ma pa ba kɩ jara zɩla, dɩ najara cɩ-kwɛn zanzan ba pa‑o. 6 O ma kuri o jar-kərə dɩdɛɛra badonnǝ sɩ ba taa nii tɩʋ kʋm nɔɔna bam baŋa nɩ. O laan ma pa ni sɩ ba jeeri tɩʋ kʋm manco-pɩɩna yam kaporo nɩ, yɩ o ta dɩ ba o wɩ: 7 «Kɩ-na á tɩtɩ á kɩ daanɩ sɩ á na baarɩ. Yɩ pa-na sɩ fʋʋnɩ zʋ abam Asiiri tɩʋ pɛ wʋm dɩ o jar-kərə kɔ-fɔrɔ kʋm ŋwaanɩ. Nan yɩ pa-na sɩ á vwana parɩ. Kʋ na yɩ te tɩn, wʋlʋ wʋm na wʋ dɩbam tee nɩ tɩn dana o dwe balʋ na wʋ wʋntʋ tee nɩ tɩn. 8 Balʋ na wʋ o tee nɩ sɩ ba kɩ najara yam tɩn yɩ nabiinǝ mʋ. Dɩ́ Tu Baŋa-Wɛ nan wʋ dɩbam tee nɩ sɩ DƖ zǝni dɩbam. Dɩntʋ mʋ wʋ́ jaŋɩ DƖ pa dɩbam.»b Nɔɔna bam na ni kʋlʋ Zuda tɩʋ Pɛ Ezekɩasɩ na tagɩ tɩn, kʋ ma pa ba na baarɩ.9 Kʋ na kɩ fɩɩn tɩn, Asiiri pɛ wʋm dɩ o jar-kərə bam ma li Lakisi tɩʋ kʋm sɩ ba ja. O ma tʋŋɩ o dɩdɛɛra badonnǝ sɩ ba ja o kwǝrǝ ba vu Zeruzalɛm ba gwarɩ Pɛ Ezekɩasɩ dɩ Zuda tiinə balʋ maama na wʋ tɩʋ kʋm wʋnɩ tɩn. O kwǝrǝ kam mʋ tɩntʋ:
10 «Asiiri tɩʋ pɛ Senakeribi na tagɩ te mʋ tɩntʋ: Abam kɩ á tɩɩna bɛ yɩra nɩ mʋ, yɩ á ta maŋɩ Zeruzalɛm nɩ kʋntʋ? Amʋ na li tɩʋ kʋm tɩn, á bʋŋɩ nɩ á wʋ́ lu amʋ jɩŋa nɩ mʋ na? 11 Ezekɩasɩ na tɛ dɩ abam nɩ á Tu Baŋa-Wɛ wʋ́ joŋi abam amʋ jɩŋa nɩ DƖ yagɩ tɩn, o jɩgɩ abam mʋ o gana. Kʋntʋ baŋa nɩ mʋ kana dɩ na-nyɔm wʋ́ gʋ abam. 12 Kʋ daɩ Wɛ dɩm kʋntʋ wara-je, dɩ dɩ kaanɩm bimbinə mʋ Ezekɩasɩ cɩcʋgɩ o yagɩ na? O ta daarɩ o pa ni sɩ Zeruzalɛm dɩ Zuda tiinə maama taa tui ba kɩ kaanɩm bimbim dɩm na wʋ Zeruzalɛm nɩ tɩn baŋa nɩ ba zuli‑DƖ dáanɩ yɩranɩ. Kʋ daɩ kʋntʋ na?
13 Abam wʋ ni amʋ dɩ a kwə bam na kɩ te tɩɩnɩ dɩdonnǝ nɔɔna bam maama baŋa nɩ tɩn na? Tɩɩnɩ dɩm kʋntʋ wa yam wanɩ ya joŋi ya nɔɔna amʋ jɩŋa nɩ ya yagɩ na? 14 Kʋ na yɩ tɩɩnɩ dɩlʋ a kwə bam na yɔɔrɩ ba cɔgɩ tɩn, dɩ jwǝnǝ yam maama wʋnɩ jwəm dɔɔ mʋ wanɩ dɩ nɔɔna dɩ joŋi amʋ jɩŋa nɩ dɩ yagɩ? Bɛ nan mʋ yɩ abam bʋŋɩ nɩ á Wɛ dɩm wʋ́ wanɩ dɩ vrɩ abam dɩ yagɩ amʋ jɩŋa nɩ? 15 Yɩ pa-na sɩ Pɛ Ezekɩasɩ na cwǝŋǝ o ganɩ abam nɩ o na bʋŋɩ sɩ o kɩ te tɩn. Yɩ sɛ-na o taanɩ dɩm. Tɩʋ tǝrǝ kʋ Wɛ na dana sɩ dɩ wanɩ-kʋ dɩ joŋi dɩ yagɩ amʋ dɩ a kwə bam jɩŋa nɩ. Abam Wɛ dɩm dɩ bá wanɩ kʋlʋkʋlʋ dɩ kɩ sɩ dɩ vrɩ abam amʋ jɩŋa nɩ dɩ yagɩ.»
16 Dɩdɛɛra balʋ Senakeribi na tʋŋɩ tɩn ta yɔɔrɩ ba tɛ wǝǝnu ba gooni Yuutu Baŋa-Wɛ yɩrɩ, yɩ ba twɩ DƖ tɩntʋŋnʋ Ezekɩasɩ. 17 Senakeribi ma tʋŋɩ twannʋ tɩlʋ na yáalɩ Yuutu Baŋa-Wɛ dɩm na yɩ Yisɩrayɛlɩ tiinə Wɛ tɩn. Tɩ taanɩ dɩm wɩ: «Tɩɩnɩ dɩdonnǝ wa yam wʋ wanɩ-ba ya joŋi amʋ jɩŋa nɩ ya yagɩ. Wɛ dɩlʋ Ezekɩasɩ na zuli tɩn dɩ nan bá wanɩ dɩ nɔɔna bam dɩ joŋi dɩ yagɩ.» 18 Asiiri tɩʋ dɩdɛɛra bam ma tiini ba tɔɔlɩ dɩ Ebru taanɩ dɩm, sɩ balʋ na dɔgɩ Zeruzalɛm tɩʋ kəbrə kam yuu nɩ tɩn ni kʋ kuri. Ba dɛɛn bʋŋɩ sɩ ba kɩ fʋʋnɩ mʋ nɔɔna bam kuri nɩ, sɩ kʋ pa cwǝŋǝ sɩ ba wanɩ tɩʋ kʋm ba di mwalɩ mwalɩ. 19 Ba maa jɩgɩ Wɛ dɩlʋ Zeruzalɛm tiinə bam na zuli tɩn ba yáala, nɩ ba na yǝni ba kɩ te dɩ tɩɩnɩ dɩdonnǝ dɩm wa yam tɩn. Wa yantʋ nan yɩ nabiinǝ mʋ mɛ ba jɩa ba kɩ-ya.c
20 Pɛ Ezekɩasɩ dɩ Amɔtɩ bu Ezayi na yɩ Wɛ nijoŋnu tɩn ma keeri ba loori Baŋa-Wɛ sɩ DƖ joŋi-ba DƖ yagɩ.d 21 Baŋa-Wɛ ma tʋŋɩ malɛka pa ka vu Asiiri tɩʋ pɛ dɩ o jar-kərə bam na tigisi daanɩ ba tigi mɛ tɩn. Ka ma yɔɔrɩ ka cɔgɩ jar-kərə bam, dɩ ba dɩdɛɛra bam maama nyɔ! Asiiri pɛ wʋm ma pipiri o joori o tɩtɩ tɩʋ dɩ cavɩɩra. Dɛ dɩdʋa mʋ o zʋ o jwəm dɩm digə kam sɩ o zuli-dɩ. O tɩtɩ biə badaara ma zʋ ba zag‑o ba gʋ dɩ ba sʋ-lwaanʋ.e
22 Baŋa-Wɛ tɔgɩ cwǝŋǝ kam kʋntʋ nɩ mʋ DƖ vrɩ Ezekɩasɩ dɩ Zeruzalɛm tiinə bam DƖ yagɩ Asiiri tɩʋ pɛ Senakeribi jɩŋa nɩ, dɩ ba dʋna maama jɩŋa nɩ. DƖ ta ma cɩ-ba tɩɩnɩ dɩlʋ na gilimi-ba tɩn jɩŋa nɩ pa ba daa ba yaarɩ-ba. 23 Nɔɔna zanzan ma ja pɛɛra ba ba Zeruzalɛm ba pa Baŋa-Wɛ. Ba ta jaanɩ pɛɛra yalʋ na tiini ya jɩgɩ kuri tɩn mʋ ba ba ba pa Zuda tɩʋ pɛ Ezekɩasɩ. Kʋ maa na zɩgɩ maŋa kam kʋntʋ nɩ tɩn, dwi-gɛ tiinə bam maama yɔɔrɩ ba tiini ba nɩgɩ Ezekɩasɩ mʋ.
Ezekɩasɩ tʋʋnɩ
24 Da yam kʋntʋ nɩ, Ezekɩasɩ dɛɛn ba jɩgɩ yazurə mʋ yɩ o bwələ dɩ tʋʋnɩ. O ma loori Baŋa-Wɛ, yɩ DƖ dɩ ləri o wɛ-loro kʋm. Wɛ ma vɩɩrɩ DƖ brɩ-o DƖ wɩ oó na yazurə.f 25 Dɩ kʋ dɩ, Ezekɩasɩ wʋ sɛ sɩ o kɩ Baŋa-Wɛ le dɩ DƖ na kɩ yu-yoŋo dɩlʋ maama DƖ pa‑o tɩn, o na zəŋi o tɩtɩ tɩn ŋwaanɩ.g Kʋntʋ ma pa Baŋa-Wɛ banɩ zaŋɩ, pa sɩ cam yi Ezekɩasɩ, dɩ Zuda dɩ Zeruzalɛm tiinə bam. 26 Nan dɩ Ezekɩasɩ dɛɛn na zəŋi o tɩtɩ kʋntʋ dɩ tɩn, o dɛɛn wəli dɩ Zeruzalɛm tiinə bam mʋ o tu o tɩtɩ. Kʋntʋ ŋwaanɩ, Baŋa-Wɛ ma pɩɩnɩ DƖ banɩ maŋa kalʋ maama Ezekɩasɩ ta na ŋwɩ tɩn.
27 Ezekɩasɩ dɛɛn tiini o duni mʋ pa o yɩrɩ zaŋɩ zanzan. O ma lɔ di sɩ o tiŋi o zɩla sɩ wʋnɩ. O jɩjɩgɩrʋ tɩm maa yɩ səbu-poŋo, dɩ səbu-sɩŋa, dɩ kandwa-ŋʋna, dɩ wo-talooru, dɩ jara cɩ-kwɛn, dɩ lʋnnɩ wǝǝnu dwi dwi. 28 O ta ma lɔ di sɩdonnǝ sɩ o taa maa zɩgɩ mɩna, dɩ dɩvɛn, dɩ nugə sɩ wʋnɩ. O ma cɩ najɩrɩ sɩ ba yagɩ o naanɩ dwi dwi dɩ o peeni da. 29 O dɛɛn ma lɔ tɩɩnɩ o pa o tɩtɩ, yɩ o daarɩ o yəgi vara zanzan o yagɩ dɩ wʋnɩ, Wɛ na pɛ o tiini o duni tɩn ŋwaanɩ.
30 Ezekɩasɩ dɛɛn nan mʋ yɩ wʋlʋ na pɛ ba cɩ Giyɔn buli-yi dɩm dɩ baŋa seeni tɩn. O ma daarɩ o pa na bam ywəri ba tɔgɩ na-fɩra ba zʋ Zeruzalɛm tɩʋ wʋ, kʋ wa-zʋʋrɩ seeni. Tɩtʋŋa yalʋ maama Ezekɩasɩ dɛɛn na kɩ tɩn, o nɛ yigə-vəŋə mʋ ya baŋa nɩ. 31 Kʋ daarɩ, Babilɔnɩ tɩʋ dɩdɛɛra na tʋŋɩ nɔɔna sɩ ba vu Ezekɩasɩ te ba bwe‑o wo-kɩnkagɩlɩ dɩlʋ na kɩ o tɩʋ kʋm nɩ tɩn, Wɛ ma yagɩ Ezekɩasɩ o yɩranɩ, sɩ DƖ maŋ-o DƖ nii kʋlʋ na sɩɩnɩ kʋ wʋ o bɩcarɩ wʋnɩ tɩn.
32 Ezekɩasɩ dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋ-ŋʋna tɩm maama, ba pʋpʋnɩ-tɩ ba tiŋi Wɛ nijoŋnu Ezayi vɩɩra yam tɔnɔ wʋnɩ, ya na wʋ Zuda dɩ Yisɩrayɛlɩ pwa cɩbarɩ tɔnɔ kʋm wʋnɩ tɩn. 33 Ezekɩasɩ ma tɩ yɩ o vu o kwə te. Ba ma kwe‑o ba kɩ zoŋo kʋlʋ baŋa nɩ Davidi dwi dɩm yibeelǝ na wʋra tɩn. O tʋʋnɩ maŋa nɩ mʋ Zuda dɩ Zeruzalɛm tiinə bam maama zul‑o lanyɩranɩ. O bu Manasɩ ma ləri o yuu nɩ o ji pɛ.