Asiiri tɩʋ pɛ kɩ jara dɩ Zuda tiinə
2 Pwa 18:13-27; 2 Wǝǝnu Kɩbarɩ tɔnɔ 32:1-19
36
Pɛ Ezekɩasɩ paarɩ dim bɩna fugə-yana bɩnɩ dɩm wʋnɩ mʋ Asiiri tɩʋ pɛ Senakeribi tu o li Zuda tɩ-kamunnu tɩlʋ na lɔgɩ lanyɩranɩ, yɩ tɩ ta fɔgɩ tɩ pɩ tɩn maama dɩ najara. O ma wanɩ-ba o di. 2 Asiiri pɛ wʋm ma tʋŋɩ o dɩdɛɛra bam yigə tu sɩ o zɩgɩ Lakisi nɩ o nuŋi dɩ jar-kərə kɔgɔ zanzan o vu Zeruzalɛm o gwarɩ Ezekɩasɩ. Dɩdɛɛrʋ wʋm ma vu o zɩgɩ na-fɩra kalʋ na zʋʋrɩ baŋa seeni bugǝ kʋm tɩn ni nɩ, sɩ kʋ maŋɩ dɩ cwǝŋǝ kam mɛ ba na sɔ gwaarʋ tɩn. 3 Pɛ wʋm ma tʋŋɩ Hilkiya bu Eliyakɩm na nii pɛ sɔŋɔ kʋm tɩtʋŋa baŋa nɩ tɩn, dɩdaanɩ Sebɩna na yɩ tɔn-pʋpʋnnʋ tɩn, kʋ wǝli dɩ Azafɩ bu Yoa na nii pɛ sɔŋɔ kʋm yɩra cɩbarɩ twannʋ baŋa nɩ tɩn, sɩ ba nuŋi tɩʋ kʋm wʋnɩ ba vu ba jeer-o.4 Ba na jeeri tɩn mʋ Asiiri tɩʋ dɩdɛɛra yigə tu wʋm tagɩ dɩ ba sɩ ba ja Asiiri pɛ wʋm kwǝrǝ ba vu ba ta dɩ Pɛ Ezekɩasɩ. O maa wɩ:
«Asiiri tɩʋ Pa-farʋ wʋm wɩ: Bɛɛ mʋ brɩ kʋ pa n jɩgɩ n tɩtɩ cɩga kʋntʋ? 5 Nmʋ bʋŋɩ nɩ kamun-ŋwɛ waɩ najara dɩ kɩ mʋ na? Wɔɔ baŋa nɩ mʋ n tɩɩgɩ yɩ n lɔ amʋ kwaga nɩ? 6 Nmʋ tɩɩna wʋ Ezipi tɩʋ nɩ mʋ na? Kʋntʋ nan nyɩ dɩ nɔɔnʋ na kwe kasʋgʋ o ji o nacəgə tɩn mʋ. Kasʋgʋ kʋm wʋ́ sɩɩrɩ mʋ kʋ zɔ wʋlʋ maama na zei-kʋ tɩn jɩŋa. Kʋntʋ mʋ wʋ́ kɩ dɩ wʋlʋ maama na salɩ Ezipi Pa-farʋ wʋm yɩra nɩ tɩn. 7 Nmʋ nan ta na wɩ: ‹Dɩ́ wʋ́ salɩ dɩbam Tu Baŋa-Wɛ yɩra nɩ mʋ,› kʋ daɩ Wɛ dɩm kʋntʋ wara-je, dɩ dɩ kaanɩm bimbinə mʋ Ezekɩasɩ guri o yagɩ o daarɩ o pa ni sɩ Zeruzalɛm dɩ Zuda nɔɔna maama taa tui bimbim dɩm na wʋ yo seeni tɩn yɩranɩ ba zuli‑DƖ na?
8 Amʋ lagɩ a ma a tu wʋm yɩrɩ mʋ a kɩ ni dɩdaanɩ nmʋ Ezekɩasɩ. Amʋ wʋ́ pa‑m sise mʋrrʋ tɩle, nɩ nmʋ na wʋ́ wanɩ n na sɩ diinǝ bam n kɩ da. 9 Nii amʋ wʋlʋ na yɩ a pɛ wʋm nabwəm tɩn na jɩgɩ dam dɩlʋ tɩn. Nmʋ wʋ́ wanɩ amʋ n vɩn, yɩ n daarɩ n kɩ n tɩɩna dɩ Ezipi tiinə sɩ ba wəli‑m dɩ ba jara-kǝm tərikooru dɩ ba sise diinə na? 10 Kʋ daɩ Baŋa-Wɛ mʋ tʋŋɩ-nɩ sɩ a ba yo a wanɩ n tɩʋ kʋm na? Kʋ sɩɩnɩ kʋ yɩ Baŋa-Wɛ tɩtɩ mʋ pɛ-nɩ ni sɩ a li tɩʋ kʋm dɩ najara a daarɩ a cɔgɩ-kʋ.»
11 Eliyakɩm, dɩ Sebɩna, dɩdaanɩ Yoa maama ma ta dɩ Asiiri tɩʋ dɩdɛɛra yigə tu wʋm ba wɩ: «Popo ŋɔɔnɩ Aram tiinə taanɩ dɩ dɩbam, sɩ dɩ́ wʋ́ ni. Nmʋ na ŋɔɔnɩ dɩ Zuda tiinə taanɩ dɩm, balʋ na dɔgɩ kəbrə kam yuu nɩ ba cəgi tɩn wʋ́ da ba ni n na tɛ kʋlʋ tɩn mʋ.» 12 Asiiri tɩʋ dɩdɛɛrʋ wʋm ma ləri o wɩ: «Á bʋŋɩ nɩ amʋ tu wʋm kwǝrǝ kam yɩ abam dɩ á pɛ wʋm yɩranɩ nyɩm mʋ na? Ka ta wʋra balʋ maama na dɔgɩ kəbrə kam baŋa nɩ tɩn ŋwaanɩ mʋ. Bantʋ dɩ wʋ́ da ba di ba bəənu ba daarɩ ba nyɔ ba fɩan, nɩ abam na maŋɩ sɩ á kɩ te tɩn mʋ.»
13 Dɩdɛɛrʋ wʋm ma tɔɔlɩ o yagɩ dɩ Zuda tiinə taanɩ dɩm o wɩ:
«Abam maama cəgi-na Asiiri tɩʋ pa-farʋ wʋm kwǝrǝ kam. 14 Pɛ wʋm wɩ: Yɩ sɛ-na sɩ Ezekɩasɩ taa jɩgɩ abam o gana, sɩ o bá wanɩ abam o joŋi o yagɩ! 15 Yɩ pa-na sɩ á pɛ wʋm ganɩ abam sɩ á kɩ á wʋ-dɩdʋa dɩ Baŋa-Wɛ. O na tagɩ dɩ abam wɩ: Baŋa-Wɛ wʋ́ joŋi abam DƖ yagɩ, yɩ DƖ cɩ sɩ Asiiri tɩʋ pɛ yɩ di á tɩʋ kʋm, nan yɩ sɛ-na.
16 Yɩ cəgi-na Ezekɩasɩ taanɩ kɔtaa. Asiiri pɛ wʋm nan na tagɩ te tɩn mʋ tɩntʋ: Abam maama maŋɩ sɩ á nuŋi á tɩʋ kʋm wʋnɩ mʋ sɩ á ba á tʋ á pa-nɩ. Á na kɩ kʋntʋ, á wʋ́ na cwǝŋǝ sɩ á taá je yɔlɔlɔlɔ yɩ á di á tɩtɩ vinyə tweeru dɩ á kapʋrrʋ tɩm nyɔɔrɩ. Á ta maa wʋ́ nyɔ á vʋla na bam á ni ywəəni. 17 Kʋntʋ kwaga nɩ, amʋ ta wʋ́ ja abam a vu a yagɩ tɩga kalʋ na nyɩ dɩ abam tɩtɩ tɩga kam tɩn baŋa nɩ. Dáanɩ vinyə tweeru wʋra sɩ á na sana á nyɔ, dɩ mɩna sɩ á ma á kɩ dɩpɛ.
18 Yɩ cəgi-na pɛ Ezekɩasɩ taanɩ dɩm, dɩ o na ganɩ abam yɩ o wɩ: Baŋa-Wɛ wʋ́ joŋi abam DƖ yagɩ tɩn. Tɩʋ kɔɔ jwǝnǝ mʋ dana pa ya wanɩ ya joŋi ya tɩɩnɩ dɩm Asiiri pa-farʋ wʋm jɩŋa nɩ ya yagɩ? 19 Hamatɩ, dɩ Arapadɩ, dɩ Sefavayim jwǝnǝ yam bɛ? Ya wanɩ ya vrɩ Samari tiinə ya yagɩ a dam kuri nɩ na? 20 Tɩɩnɩ dɩm maama jwǝnǝ yam wʋnɩ, jwəm dɔɔ mʋ wanɩ dɩ joŋi dɩ tɩʋ dɩ yagɩ amʋ jɩŋa nɩ? Baŋa-Wɛ dɩ nan bá wanɩ DƖ vrɩ Zeruzalɛm DƖ yagɩ amʋ jɩŋa nɩ.»
21 Zeruzalɛm tɩʋ nɔɔna bam ma maŋɩ da cɩmm, ba wʋ ləri o taanɩ dɩm, Bɛŋwaanɩ, Pɛ Ezekɩasɩ ya pɛ-ba ni mʋ o wɩ: «Yɩ lər-o kʋlʋkʋlʋ.»
22 Hilkiya bu Eliyakɩm na nii pɛ sɔŋɔ kʋm tɩtʋŋa baŋa nɩ tɩn, dɩ Sebɩna na yɩ tɔn-pʋpʋnnʋ tɩn, dɩdaanɩ Azafɩ bu Yoa na tiŋi pɛ sɔŋɔ kʋm yɩra cɩbarɩ twannʋ tɩm tɩn maama ma ja ba gwaarʋ ba kaagɩ wʋ-cɔgɔ ŋwaanɩ, yɩ ba ja kwǝrǝ kalʋ Asiiri tɩʋ dɩdɛɛra yigə tu wʋm na taga tɩn ba vu ba ta dɩ Pɛ Ezekɩasɩ.