Zuda tɩʋ pɛ Ezekɩasɩ taanɩ
18
Yisɩrayɛlɩ tɩʋ pɛ Ela bu Oze paarɩ dim bɩna yatɔ bɩnɩ dɩm wʋnɩ mʋ Ahazɩ bu Ezekɩasɩ dɛɛn di Zuda tɩʋ paarɩ. 2 Ezekɩasɩ dɛɛn jɩgɩ bɩna fiinle-yanu mʋ yɩ ba tiŋ‑o paarɩ. O ma jǝni Zeruzalɛm nɩ o di paarɩ dɩm o kɩ bɩna fiinle-nʋgʋ. O nu wʋm dɛɛn yɩ Zakari bukɔ Abɩa mʋ. 3 O tɩtʋŋa ma su Baŋa-Wɛ yi lanyɩranɩ, nɩnɛɛnɩ o nabaarʋ Davidi dɛɛn na kɩ te tɩn. 4 O dɛɛn yɔɔrɩ o cɔgɩ wara-je bimbinə yam mʋ o dʋlɩ o yagɩ. O ta ma guri kandwa yalʋ ba ya na cugi ba jɩgɩ ba kaanɩ tɩn o cɩcʋgɩ, o daarɩ o go Asera nyɩnyʋgʋ dɛ sɩm o dɩ tɩga nɩ.a Kʋ ta na yɩ canna bɩsankwɩa kalʋ Moyisi dɛɛn na mɔɔnɩ o zɩgɩ tɩn, o ma cɩcʋgɩ-ka bɛŋwaanɩ Yisɩrayɛlɩ tiinə bam yǝni ba kɩ zwɛɛm pɛɛra mʋ ba ma kaanɩ-ka. Ba dɛɛn pɛ kʋ yɩrɩ nɩ ‹Newusitan› mʋ.5 Ezekɩasɩ dɛɛn pɛ Baŋa-Wɛ dɩm na yɩ Yisɩrayɛlɩ tiinə Wɛ tɩn cɩga. Zuda tɩʋ pwa balʋ maama ya na dɛ yigə ba ba tɩn, dɩ balʋ na saŋɩ o kwaga ba ba tɩn maama wʋnɩ, pɛ tǝrǝ o na nyɩ dɩ wʋntʋ.b 6 O ma yɔɔrɩ o salɩ Baŋa-Wɛ yɩra nɩ, yɩ o wʋ ywəri o cwe sɩm nɩ. O dɛɛn tɔgɩ Baŋa-Wɛ niə yalʋ DƖ na pɛ Moyisi tɩn lanyɩranɩ. 7 Baŋa-Wɛ dɩ maa wʋ Ezekɩasɩ tee nɩ, pa o na yigə-vəŋə o tɩtʋŋa maama wʋnɩ.c O ma lɔ Asiiri tɩʋ pɛ kwaga nɩ, yɩ o wʋ sɛ o pa‑o. 8 O dɛɛn wanɩ Filisi tiinə bam o di. O wanɩ ba tɩɩnɩ dɩm, kʋ na maŋɩ kʋ yɩ tɩʋ balaŋa dɩ tɩʋ kamunu maama dɩ, o kɛ o vu yigə yigə o yi Gaza dɩ kʋ tɩɩnɩ yam.
9 Ezekɩasɩ paarɩ dim bɩna yana bɩnɩ dɩm wʋnɩ mʋ Asiiri tɩʋ pɛ Salmanasarɩ dɩ o jar-kərə ve ba li Samari tɩʋ kʋm ba ba pu dɩ najara. Yisɩrayɛlɩ tɩʋ pɛ Ela bu Oze paarɩ dim bɩna yarpɛ bɩnɩ dɩm wʋnɩ mʋ kʋntʋ. 10 Bɩna yatɔ na kɛ tɩn, Asiiri jar-kərə bam ma lɛɛrɩ ba joŋi tɩʋ kʋm ba te. Ezekɩasɩ paarɩ dim bɩna yardʋ bɩnɩ dɩm wʋnɩ mʋ kʋntʋ, yɩ kʋ ta yɩ Yisɩrayɛlɩ tɩʋ pɛ Oze paarɩ dim bɩna nʋgʋ bɩnɩ dɩm wʋnɩ. 11 Asiiri tɩʋ pɛ ma lɩ Yisɩrayɛlɩ tiinə bam o ja o vu o yagɩ Hala nɩ, dɩ Gozan je sɩlʋ na wʋ Haborɩ bugə kam ni nɩ tɩn, dɩdaanɩ tɩɩnɩ dɩlʋ Mɛdɩ tiinə na zʋʋrɩ da tɩn. 12 Tɩntʋ maama dɛɛn kɩ Yisɩrayɛlɩ tiinə bam, ba na wʋ sɛ ba Tu Baŋa-Wɛ kwǝrǝ kam tɩn ŋwaanɩ mʋ. Ba ma cɔgɩ ni dɩlʋ DƖ na goni dɩ ba tɩn. Ba maa wʋ sɛ niə yalʋ Baŋa-Wɛ tɩntʋŋnʋ Moyisi dɛɛn na kwe o pa-ba tɩn. Ba brɩ ba wʋ cəgi-ya. Ba maa wʋ sɛ sɩ ba tɔgɩ-ya dɩ.
Asiiri tɩʋ pɛ kɩ jara dɩ Zuda tiinə
13 Pɛ Ezekɩasɩ paarɩ dim bɩna fugə-yana bɩnɩ dɩm wʋnɩ mʋ Asiiri tɩʋ pɛ Senakeribi tu o li Zuda tɩ-kamunnu tɩlʋ na fɔgɩ tɩ pɩ tɩn maama dɩ najara. O ma wanɩ-ba o di. 14 Zuda tɩʋ pɛ Ezekɩasɩ ma tʋŋɩ kwǝrǝ o pa Asiiri pɛ wʋm Lakisi tɩʋ nɩ yɩ o wɩ: «Amʋ tʋŋɩ a tusi nmʋ yigə nɩ. Kʋntʋ ŋwaanɩ amʋ wʋ́ ŋwɩ lampoo kʋlʋ maama nmʋ na bʋŋɩ nɩ kʋ maŋɩ tɩn a pa‑m. Nan yagɩ najara yam n daarɩ n viiri.» Asiiri pɛ wʋm ma ta sɩ Ezekɩasɩ ŋwɩ səbu-poŋo duuni na yi kilo mʋrrʋ fugə (10,000) tɩn, dɩ səbu-sɩŋa kilo mʋrʋ dɩdʋa (1,000) o pa‑o. 15 Ezekɩasɩ ma la səbu-poŋo wǝǝnu tɩlʋ maama na wʋ Baŋa-Wɛ digə kam nɩ tɩn, kʋ wǝli dɩ tɩlʋ ba ya na tiŋi pɛ sɔŋɔ kʋm wʋnɩ tɩn o kwe o pa Asiiri pɛ wʋm.
16 Kantʋ maŋa kam nɩ, Ezekɩasɩ ta ma lɩ səbu-sɩŋa kalʋ o ya na mɛ o taagɩ Baŋa-Wɛ digə kam bwəəru tɩm dɩ ka ywə yam tɩn o kwe ka maama o pa Asiiri pɛ wʋm. 17 Asiiri pɛ wʋm ma tʋŋɩ o jar-kərə yuutu dɩ o dɩdɛɛra bale sɩ ba zɩgɩ Lakisi nɩ ba nuŋi dɩ jar-kərə kɔgɔ zanzan ba vu Zeruzalɛm ba gwarɩ Ezekɩasɩ. Ba na yi da tɩn, ba ma vu ba zɩgɩ na-fɩra kalʋ na zʋʋrɩ baŋa seeni bugǝ kʋm tɩn ni nɩ. Jǝgǝ kam kʋntʋ bwələ dɩ cwǝŋǝ kalʋ ba na zarɩ gwaarʋ ka ni nɩ tɩn mʋ. 18 Dɩdɛɛra bam ma tʋŋɩ ba bəŋi Pɛ Ezekɩasɩ. Pɛ wʋm dɩ ma tʋŋɩ Hilkiya bu Eliyakɩm na nii pɛ sɔŋɔ kʋm tɩtʋŋa baŋa nɩ tɩn, dɩdaanɩ Sebɩna na yɩ tɔn-pʋpʋnnʋ tɩn, kʋ wǝli dɩ Azafɩ bu Yoa na nii pɛ sɔŋɔ kʋm yɩra cɩbarɩ twannʋ baŋa nɩ tɩn, sɩ ba nuŋi tɩʋ kʋm wʋnɩ ba vu ba jeeri-ba.d
19 Ba na jeeri tɩn mʋ Asiiri tɩʋ pɛ dɩdɛɛra yigə tu wʋm taga dɩ ba sɩ ba ja Asiiri pɛ wʋm kwǝrǝ ba vu ba ta dɩ Pɛ Ezekɩasɩ. O maa wɩ:
«Asiiri Pa-farʋ wʋm wɩ: Bɛɛ mʋ brɩ kʋ pa n jɩgɩ n tɩtɩ cɩga kʋntʋ? 20 Nmʋ bʋŋɩ nɩ kamun-ŋwɛ waɩ najara dɩ kɩ mʋ na? Wɔɔ baŋa nɩ mʋ n tɩɩgɩ yɩ n lɔ amʋ kwaga nɩ? 21 Nmʋ tɩɩna wʋ Ezipi tɩʋ nɩ mʋ na? Kʋntʋ nan nyɩ dɩ nɔɔnʋ na kwe kasʋgʋ o ji o nacəgə tɩn mʋ. Kasʋgʋ kʋm wʋ́ sɩɩrɩ mʋ ka zɔ wʋlʋ maama na ze-ka tɩn jɩŋa. Kʋntʋ mʋ wʋ́ kɩ wʋlʋ maama na salɩ Ezipi Pa-farʋ wʋm yɩra nɩ tɩn. 22 Nmʋ nan ta na wɩ: ‹Dɩ́ wʋ́ salɩ dɩbam Tu Baŋa-Wɛ yɩra nɩ mʋ,› kʋ daɩ Wɛ dɩm kʋntʋ wara-je dɩ kaanɩm bimbinə mʋ Ezekɩasɩ guri o yagɩ o daarɩ o pa ni sɩ Zeruzalɛm dɩ Zuda nɔɔna maama taa tui bimbim dɩm na wʋ Zeruzalɛm nɩ yo seeni tɩn yɩranɩ ba zuli‑DƖ na?
23 Amʋ lagɩ a ma a tu wʋm yɩrɩ mʋ a kɩ ni dɩdaanɩ nmʋ Ezekɩasɩ. Amʋ wʋ́ pa‑m siseŋ-nɔɔna mʋrrʋ tɩle, nɩ nmʋ na wʋ́ wanɩ n na sɩ diinǝ bam n kɩ da. 24 Nii amʋ wʋlʋ na yɩ a pɛ wʋm nabwəm tɩn na jɩgɩ dam dɩlʋ tɩn. Nmʋ wʋ́ wanɩ-nɩ n vɩn n daarɩ n kɩ n tɩɩna dɩ Ezipi tiinə mʋ nɩ baá wəli‑m dɩ ba jara-kǝm tərikooru dɩ ba sise diinə na? 25 Kʋ daɩ Baŋa-Wɛ mʋ tʋŋɩ-nɩ sɩ a ba yo a wanɩ n tɩʋ kʋm na? Kʋ sɩɩnɩ kʋ yɩ Baŋa-Wɛ tɩtɩ mʋ pɛ-nɩ ni sɩ a li tɩʋ kʋm dɩ najara a daarɩ cɔgɩ-kʋ.»
26 Eliyakɩm, dɩ Sebɩna, dɩdaanɩ Yoa maama ma ta dɩ Asiiri tɩʋ dɩdɛɛra yigə tu wʋm ba wɩ: «Popo ŋɔɔnɩ Aramɛ taanɩ dɩ dɩbam, sɩ dɩ́ wʋ́ ni. Nmʋ na ŋɔɔnɩ dɩ Zuda tiinə taanɩ dɩm, balʋ na dɔgɩ kəbrə kam yuu nɩ ba cəgi tɩn wʋ́ da ba ni n na tɛ kʋlʋ tɩn mʋ.» 27 Asiiri tɩʋ yigə tu wʋm ma lǝri-ba o wɩ: «Á bʋŋɩ nɩ amʋ tu kwǝrǝ kam wʋra ka pa abam dɩ á pɛ wʋm yɩranɩ mʋ na? Kʋ yɩ balʋ maama na dɔgɩ kəbrə kam baŋa nɩ tɩn dɩ nyɩm mʋ. Bantʋ dɩ wʋ́ da ba di ba bəənu ba daarɩ ba nyɔ ba fɩan nɩ abam na maŋɩ sɩ á kɩ te tɩn mʋ.»
28 Asiiri yigə tu wʋm ma tɔɔlɩ o yagɩ dɩ Zuda tiinə taanɩ dɩm o wɩ:
«Abam maama cəgi-na Asiiri tɩʋ pa-farʋ wʋm kwǝrǝ kam. 29 Pɛ wʋm wɩ: Yɩ sɛ-na sɩ Ezekɩasɩ taa jɩgɩ abam o gana, sɩ o bá wanɩ abam o joŋi o yagɩ amʋ jɩŋa nɩ. 30 Nan yɩ pa-na sɩ á pɛ wʋm ganɩ abam sɩ á kɩ á wʋ-dɩdʋa dɩ Baŋa-Wɛ. O na tagɩ dɩ abam wɩ: Baŋa-Wɛ wʋ́ joŋi abam DƖ yagɩ yɩ DƖ cɩ sɩ Asiiri tɩʋ pɛ yɩ di á tɩʋ kʋm, nan yɩ sɛ-na. 31 Yɩ cəgi-na Ezekɩasɩ taanɩ maŋa dɩ maŋa. Asiiri pɛ wʋm nan na tagɩ te tɩn mʋ tɩntʋ: ‹Abam maama maŋɩ sɩ á nuŋi á tɩʋ kʋm wʋnɩ sɩ á daarɩ á tʋ kantɛɛsa á sɛ amʋ sɩ dɩ́ kɩ yazurə ni-mɔrɔ daanɩ. Á na kɩ kʋntʋ, á wʋ́ na cwǝŋǝ sɩ á taá je yɔlɔ-lɔ-lɔ yɩ á di á tɩtɩ vinyə tweeru dɩ á kapʋrrʋ tɩm nyɔɔrɩ. Á ta maa wʋ́ nyɔ á vʋla na bam á ni ywəəni. 32 Kʋntʋ kwaga nɩ, amʋ ta wʋ́ ja abam a vu a yagɩ tɩga kalʋ na nyɩ dɩ abam tɩtɩ tɩga kam tɩn baŋa nɩ. Dáanɩ vinyə tweeru wʋra sɩ á na sana á nyɔ, dɩ mɩna sɩ á ma á kɩ dɩpɛ. Olivi tweeru nugə, dɩdaanɩ tʋʋrʋ zanzan dɩ maa wʋ dáanɩ. Kuri-na ŋwɩa á ləri tʋʋnɩ yuu nɩ! Yɩ cəgi-na pɛ Ezekɩasɩ taanɩ dɩm, dɩ o na ganɩ abam yɩ o wɩ: Baŋa-Wɛ wʋ́ joŋi abam DƖ yagɩ tɩn. 33 Tɩʋ kɔɔ tɩtɩ jwǝnǝ mʋ dana pa ya wanɩ ya joŋi ya tɩɩnɩ ya yagɩ Asiiri pa-farʋ wʋm jɩŋa nɩ? 34 Hamatɩ, dɩ Arapadɩ jwǝnǝ yam bɛ? Sefavayim, dɩ Hena, dɩdaanɩ Ivaa jwǝnǝ yam dɩ nan wʋ yən mʋ? Ya wanɩ ya vrɩ Samari tiinə ya yagɩ a dam kuri nɩ na? 35 Tɩɩnɩ dɩm maama jwǝnǝ yam wʋnɩ, jwəm dɔɔ mʋ wanɩ dɩ joŋi dɩ tɩʋ dɩ yagɩ amʋ jɩŋa nɩ? Baŋa-Wɛ dɩ nan bá wanɩ DƖ vrɩ Zeruzalɛm DƖ yagɩ amʋ jɩŋa nɩ.› »
36 Zeruzalɛm tɩʋ nɔɔna bam ma maŋɩ da cɩmm, ba wʋ ləri o taanɩ dɩm, bɛŋwaanɩ, Pɛ Ezekɩasɩ ya pɛ-ba ni mʋ o wɩ: «Yɩ lər-o-na.» 37 Hilkiya bu Eliyakɩm na nii pɛ sɔŋɔ kʋm tɩtʋŋa baŋa nɩ tɩn, dɩ Sebɩna na yɩ tɔn-pʋpʋnnʋ tɩn, dɩdaanɩ Azafɩ bu Yoa na tiŋi pɛ sɔŋɔ kʋm yɩra cɩbarɩ twannʋ tɩm tɩn maama ma ja ba gwaarʋ ba kaarɩ wʋ-cɔgɔ ŋwaanɩ, yɩ ba ja kwǝrǝ kalʋ Asiiri tɩʋ dɩdɛɛra yigə tu wʋm na taga tɩn ba vu ba ta dɩ Pɛ Ezekɩasɩ.