Ezekɩasɩ loori zǝnǝ Baŋa-Wɛ tee nɩ
37
Pɛ Ezekɩasɩ dɛɛn na ni kwǝrǝ kam tɩn, o wʋʋ ma tiini kʋ cɔgɩ yɩ o kaarɩ o gwaarʋ. O ma daarɩ o kwe gwar-zɩnzwara o zʋ, yɩ o vu o zʋ Baŋa-Wɛ digə kam. 2 O ma tʋŋɩ Eliyakɩm na nii pɛ sɔŋɔ kʋm tɩtʋŋa baŋa nɩ tɩn, dɩ Sebɩna na yɩ tɔn-pʋpʋnnʋ tɩn, dɩdaanɩ Wɛ kaanɩm yigǝ tiinǝ bam sɩ ba zʋ gwar-zɩnzwara ba vu Amɔtɩ bu Ezayi na yɩ Wɛ nijoŋnu tɩn te.a 3 Ba ma vu ba ta dɩd-o ba wɩ: «Ezekɩasɩ na tagɩ te tɩn mʋ tɩntʋ: Dɩ́ zɩm jɩgɩ lɛɛrʋ dɩ cavɩɩra mʋ dɩ́ di. Kʋ tiini kʋ yɩ cavɩɩra mʋ dɩ yɩra nɩ. Dɩ́ nyɩ dɩ kaanɩ na vri pugə sɩ o lʋ, yɩ dam tǝri o yɩra nɩ sɩ o lʋ bu wʋm tɩn mʋ. 4 Asiiri tɩʋ pɛ wʋm mʋ tʋŋɩ o dɩdɛɛra yigə tu sɩ o ba o twɩ Ŋwɩa Tu Baŋa-Wɛ. Dɛdoŋ nɩ nmʋ Tu Baŋa-Wɛ ni tʋrʋ tɩm kʋntʋ maama, yɩ DƖ nan wʋ́ bwɛ dɩdɛɛrʋ wʋm dɩ o ta-balɔrɔ kʋm. Nan loori Wɛ n pa dɩbam balʋ fɩɩn na daarɩ pa dɩ maŋɩ tɩʋ kʋm nɩ tɩn.»5 Ezekɩasɩ tɩntʋŋna bam na pɛ Ezayi kwǝrǝ kam ba ti tɩn, 6 mʋ Ezayi dɩ kwe kwǝrǝ o pa-ba o wɩ: «Joori-na á vu á ta dɩ Pɛ Ezekɩasɩ nɩ: ‹Baŋa-Wɛ na tagɩ te tɩn mʋ tɩntʋ: Yɩ ta n kwarɩ fʋʋnɩ dɩ taanɩ dɩlʋ Asiiri pɛ na tɔgɩ o nɔn-dʋnnʋ tɩm baŋa nɩ o ma o twɩ-nɩ tɩn. 7 Nii mʋ. Amʋ Baŋa-Wɛ wʋ́ pa Asiiri pɛ wʋm wʋbʋŋa vugimi pa o ni sawɩa, yɩ o da ka ŋwaanɩ o joori o tɩtɩ tɩʋ. Dáanɩ mʋ baá zɔ‑o dɩ sʋ-lɔŋɔ ba gʋ.› »
Asiiri pɛ Senakeribi jara bɩle tu taanɩ
8 Asiiri tɩʋ dɩdɛɛra yigə tu wʋm dɛɛn ni nɩ: ba pɛ wʋm yagɩ Lakisi tɩʋ yɩ o vu sɩ o zaŋɩ najara dɩ Libina tɩʋ tiinə. O dɩ ma vu dáanɩ.
9 Maŋa kam kʋntʋ nɩ dɩ, Asiiri tɩʋ pɛ Senakeribi ta ni kwǝrǝ nɩ: Tiraka na yɩ Kusi tɩʋ pɛ tɩn mʋ bɩɩnɩ sɩ o jeer-o dɩ najara. O ma tʋŋɩ nɔɔna Ezekɩasɩ tee nɩ dɩ kwǝrǝ kantʋ o wɩ:
10 «Ta-na dɩ Zuda tɩʋ pɛ Ezekɩasɩ nɩ: ‹Yɩ pa Wɛ dɩlʋ n na pɛ-DƖ cɩga tɩn taa jɩgɩ-m DƖ ganɩ nɩ: Zeruzalɛm tɩʋ bá fɔgɩ kʋ zʋ Asiiri tɩʋ pɛ jɩŋa nɩ. 11 Nmʋ maŋɩ n ni Asiiri tɩʋ pwa bam na tʋŋɩ te dɩ lʋgʋ baŋa tɩɩnɩ maama tɩn. Ba yɔɔrɩ ba cɔgɩ dɩ maama mʋ. Nmʋ nan bʋŋɩ tɩta mʋ yɩ n tɩɩnɩ sɩ n lu? 12 Tɩɩnɩ dɩdonnǝ dɩm jwə-dɛɛra wanɩ-dɩ ya joŋi ya yagɩ amʋ nabaara bam jɩŋa nɩ na? Gozam tɩʋ wɛ, dɩ Haran tɩʋ wɛ, dɩ Rezefɩ tɩʋ wɛ, dɩ Edɛn tiinə balʋ dɛɛn na zʋʋrɩ Telasaarɩ nɩ tɩn wɛ wʋ wanɩ ba wʋlʋwʋlʋ ya joŋi ya yagɩ. 13 Kʋ ta na yɩ Hamatɩ, dɩ Arapadɩ, dɩ Sefavayim, dɩ Hena, dɩ Ivaa, tɩɩnɩ dɩm kʋntʋ pwa bam dɩ wʋ yən nɩ mʋ?› »
Ezekɩasɩ wɛ-loro kʋm
14 Ezekɩasɩ ma joŋi tɔnɔ kʋm Asiiri tɩʋ pɛ tɩntʋŋna bam tee nɩ, yɩ o karɩmɩ-kʋ. O ma ja-kʋ o zʋ Baŋa-Wɛ digə kam. O ma jarɩ-kʋ Baŋa-Wɛ yigə nɩ. 15 Ezekɩasɩ ma loori Baŋa-Wɛ yɩ o wɩ: 16 «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn, nmʋ paarɩ di Serubɛn sɩm tɩtarɩ laŋa nɩ mʋ. Nmʋ yɩranɩ mʋ yɩ Wɛ, yɩ n te tɩga baŋa paarɩ dim je maama. Nmʋ nan mʋ naanɩ wɛyuu dɩ tɩga baŋa. 17 Baŋa-Wɛ, nan pʋrɩ n zwa sɩ n cəgi! Ta puri n yiǝ sɩ n nii n na kʋlʋ na jɩgɩ kʋ kɩ dɩbam tɩntʋ tɩn. Cəgi bɩtarɩ sɩlʋ maama Senakeribi na tʋŋɩ o ma o twɩ nmʋ Ŋwɩa Tu Baŋa-Wɛ tɩn. 18 Baŋa-Wɛ, kʋ yɩ cɩga mʋ nɩ Asiiri tɩʋ pwa dɛɛn sɩɩnɩ ba cɔgɩ tɩɩnɩ maama dɩ dɩ nɔn-biə zanzan, pa dɩ ji di-dwəənu yɩranɩ. 19 Ba ma dʋlɩ tɩɩnɩ dɩm kʋntʋ jwǝnǝ ba dɩ mim wʋnɩ ba zwɛ-ya. Bɛŋwaanɩ, ba wa yam daɩ wa cɩga cɩga. Nabiinǝ mʋ bʋŋɩ ba ja yɩ ba kwe dɛ dɩ kandwa ba kɩ-ya. Kʋntʋ ŋwaanɩ mʋ ba dɩ ba jwǝnǝ nɛ cɔgɩm. 20 Kʋntʋ tɩn, dɩ́ Tu Baŋa-Wɛ, yɔɔrɩ n joŋi dɩbam n yagɩ Asiiri tɩʋ pɛ jɩŋa nɩ sɩ lʋgʋ baŋa tɩɩnɩ dɩm maama lwarɩ nɩ nmʋ yɩranɩ mʋ yɩ Baŋa-Wɛ.»
Baŋa-Wɛ ləri pɛ wʋm
21 Amɔtɩ bu Ezayi ma tʋŋɩ kwǝrǝ Pɛ Ezekɩasɩ tee nɩ yɩ o wɩ:
«Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: Nmʋ na loori amʋ te sɩ kʋ vu Asiiri tɩʋ pɛ Senakeribi seeni tɩn, 22 kwǝrǝ kantʋ mʋ Baŋa-Wɛ maŋɩ sɩ DƖ pa‑o:
Siyɔn tiinə bam yɔɔrɩ ba nɩɩsɩ nmʋ mʋ.
Zeruzalɛm tɩʋ tiinə bam jɩgɩ-m mʋ ba mwana.
23 Wɔɔ mʋ nmʋ nan tu n ba
n twɩ n daarɩ n gooni tɩn?
Nmʋ zəŋi n kwərə n ŋɔɔnɩ dɩdaanɩ wɔɔ mʋ kʋntʋ?
Nmʋ kwəni n yiə wɛɛnɩ,
n lo-ya Yisɩrayɛlɩ dwi dɩm Wʋ-poŋo Tu wʋm baŋa nɩ mʋ!
24 Nmʋ tɔgɩ n tɩntʋŋna baŋa nɩ mʋ
n twɩ amʋ Baŋa-Wɛ.
Nmʋ ta ma n brɩ n tɩtɩ n wɩ:
‹Amʋ pɛ a sise-tərikooru zanzan mʋ din pweeru tɩm yuu
tɩ yi Liban pweeru tɩm yuu lanyɩranɩ.
A ta ma goni ba tu-dɩdwaarʋ dɩm a dɩ tɩga nɩ,
dɩ ba tu-ŋʋnnʋ tɩm maama.
A ma vu a yi yigə yigə a din ba pweeru tɩm yuu,
yɩ a zʋ ba kagʋa mɛ na li tɩn wʋnɩ.
25 Amʋ ta ma vu a kʋ vʋla sa-tɩɩnɩ nɩ yigə yigə,
yɩ a nyɔ na ya wʋnɩ.
A jar-kərə bam ma nɔnɩ Ezipi bwi sɩm
dɩ ba napra pa sɩ wɩ.›
26 Nmʋ wʋ ni nɩ amʋ maŋɩ
a bʋŋɩ bʋbʋŋɩ dɩm faŋa faŋa mʋ na?,
A na bʋŋɩ te faŋa faŋa kʋntʋ tɩn
mʋ amʋ laan pɛ kʋ sɩɩnɩ kʋ kɩ.
A wʋbʋŋa dɛɛn jaanɩ
sɩ nmʋ zaŋɩ n cɔgɩ tɩɩnɩ dɩlʋ ya na lɔgɩ dɩ pɩ tɩn,
sɩ dɩ ji kandwa na dʋgɩlɩ da-baŋa nɩ ya tigi tɩn mʋ.
27 A ta pɛ tɩɩnɩ dɩm kʋntʋ nɔn-biə bam dam ti,
yɩ ba di ba cavɩɩra nmʋ ŋwaanɩ.
Bantʋ jigi nɩ ga-punnu dɩ ga-lɛɛrʋ mʋ nmʋ yigə nɩ.
Ba maa nyɩ dɩ gaa na wʋra kʋ taɩ kʋ nuŋi te tɩn,
yɩ wɩa laan magɩ-kʋ pa kʋ tɩ lɩla.
28 Amʋ nan ye nmʋ kuri maama.
A ta ye n na-vəli maama ni nɩ,
dɩ kamun-ŋwɛ dɩlʋ n na jɩgɩ n kɩ dɩ amʋ tɩn ni nɩ.
29 Amʋ laan lagɩ a waarɩ-m mʋ
n na jɩgɩ kamun-ŋwɛ dɩlʋ n kɩ dɩ amʋ tɩn ŋwaanɩ.
N yi-dɛɛrɩ kikiə yam tʋ amʋ zwa nɩ.
Kʋntʋ ŋwaanɩ amʋ wʋ́ lə gwələ n mʋmwɛ nɩ,
yɩ a daarɩ a kɩ gara n ni nɩ.
A laan maa wʋ́ vaŋɩ‑m sɩ n tɔgɩ
cwǝŋǝ kalʋ n na tɔgɩ da n ba tɩn
n joori n tɩtɩ tɩʋ.»
30 Ezayi laan ma ta dɩ Ezekɩasɩ o wɩ:
«Kǝm dɩntʋ mʋ wʋ́ kɩ sɩ kʋ taa yɩ maana kʋ pa‑m: Dɔɔm bɩnɩ dɩm nɩ, á wʋ́ di wʋdiiru tɩlʋ na kɩ tɩ tɩtɩ nɩ tɩn. Bɩnɩ dɩlʋ na saŋɩ-dɩ tɩn nɩ, á wʋ́ di kʋlʋ na tagɩ kʋ nuŋi pulim nyɩm kʋm yɩra nɩ tɩn. Kʋ daarɩ bɩna yatɔ bɩnɩ dɩm nɩ, abam wʋ́ du wʋdiiru yɩ á daarɩ á kɩ faa. Á ta wʋ́ jəri vinyə tweeru yɩ á daarɩ á di dɩ wo-biə bam. 31 Zuda dwi tiinə balʋ ta na daarɩ tɩn laan wʋ́ taa yɩ nɩ tiu bʋnnʋ na jaanɩ tɩga yɩ kʋ nɛ sɩm ləri biə tɩn mʋ. 32 Bɛŋwaanɩ, Zeruzalɛm tɩʋ tiinə ta wʋ́ daarɩ. Cɩga tɩn, balʋ na zʋʋrɩ Siyɔn piu kʋm baŋa nɩ tɩn badaara wʋ́ lu tʋʋnɩ wʋnɩ. Paŋwa Tu Baŋa-Wɛ tɩtɩ nan wʋ́ pa wǝǝnu tɩntʋ maama kɩ, DƖ na sɩɩnɩ yiǝ DƖ nii DƖ nɔɔna baŋa nɩ tɩn ŋwaanɩ.
33 Baŋa-Wɛ nan na tagɩ Asiiri tɩʋ pɛ yɩra taanɩ te tɩn mʋ tɩntʋ: O bá na cwǝŋǝ sɩ o zʋ tɩʋ kʋntʋ wʋnɩ. O jar-kərə bam bá ta cɩna kʋ wʋnɩ! Ba bá kwe ba najara cɩ-kwɛn ba nuŋi sɩ ba kɩ jara dɩ tɩʋ kʋm, naa ba lɔ taala ba yǝri tɩʋ kʋm kabri sɩm təŋə nɩ. 34 Asiiri pɛ na tɔgɩ cwǝŋǝ kalʋ o ba tɩn, mʋ oó tɔgɩ da o joori, sɩ o bá zʋ tɩʋ kʋntʋ wʋnɩ. 35 Amʋ tɩtɩ yɩrɩ dɩm zulə ŋwaanɩ, dɩ a tɩntʋŋnʋ Davidi ŋwaanɩ, Aá taa kwǝli tɩʋ kʋntʋ sɩ kʋlʋkʋlʋ yɩ wanɩ-kʋ kʋ cɔgɩ. Amʋ Baŋa-Wɛ na tagɩ te tɩn mʋ kʋntʋ.»
36 Baŋa-Wɛ malɛka dɛɛn ma zaŋɩ ka vu Asiiri jar-kərə bam na kikili mɛ tɩn. Ka ma gʋ Asiiri tiinə mʋrrʋ bi dɩ funɔnɔ-banu (185,000). Tɩga na pʋʋrɩ tɩn, ba ma na nɩ ba je sɩm su dɩ twa yɩranɩ mʋ. 37 Kʋntʋ baŋa nɩ mʋ Senakeribi pɛ o jar-kərə bam yagɩ najara yam kǝm, yɩ o joori o kɛ o vu o tɩtɩ tɩʋ. O laan ma vu o zʋʋrɩ Ninivi tɩʋ nɩ.
38 Dɛ dɩdʋa: o dɛɛn ma zʋ o jwəm Nisirɔkɩ digə kam sɩ o zuli-dɩ. O biə bale Adɩramɛlɛkɩ, dɩ Saresɛrɩ ma zʋ ba zag‑o ba gʋ dɩ sʋ-lwaanʋ. Ba ma duri ba vu Arara laŋa kam ba zʋʋrɩ da. Senakeribi bu Esar-Adɔn dɛɛn ma ləri o yuu nɩ o ji pɛ.b