Ezekɩasɩ ba jɩgɩ yazurə yɩ o joori o zaŋɩ
2 Pwa 20:1-11; 2 Wǝǝnu Kɩbarɩ tɔnɔ 32:24-26
38
Da yam kʋntʋ nɩ, Ezekɩasɩ dɛɛn ba jɩgɩ yazurə mʋ yɩ o bwələ dɩ tʋʋnɩ. Wɛ nijoŋnu Ezayi na yɩ Amɔtɩ bu tɩn ma vu o te yɩ o ta dɩd-o o wɩ: «Baŋa-Wɛ na tagɩ kʋlʋ tɩn mʋ tɩntʋ: Brɩ n sɔŋɔ tiinə bam ba na wʋ́ kɩ te nɩ n na tǝrǝ. Bɛŋwaanɩ, n lagɩ n tɩ mʋ. N bá wəri dɩ n yawɩʋ kʋm.»2 Ezekɩasɩ na ni kʋntʋ tɩn, mʋ o pipiri o yibiyə o jeeri kəbrə kam yɩ o loori Wɛ o wɩ: 3 «Baŋa-Wɛ, guli nɩ amʋ yǝni a tɔgɩ-m dɩ a cɩga maama, dɩdaanɩ a wʋʋ maama mʋ. A ma yɔɔrɩ a kɩ kʋlʋ nmʋ na lagɩ sɩ a kɩ tɩn.» Ezekɩasɩ ma tiini o keeri zanzan.
4 Baŋa-Wɛ kwǝrǝ ma yi Ezayi ka wɩ:
5 «Ve n ta dɩ Ezekɩasɩ nɩ: ‹Baŋa-Wɛ dɩm na yɩ n ko Davidi Wɛ tɩn mʋ tagɩ DƖ wɩ: A ni n wɛ-loro kʋm, yɩ a ta na n na kanɩ yi-na te tɩn. A nan lagɩ a wǝli bɩna fugə-yanu mʋ n bɩna yam wʋnɩ. 6 A ta wʋ́ joŋi nmʋ dɩ Zeruzalɛm tɩʋ kʋntʋ a yagɩ Asiiri tɩʋ pɛ wʋm jɩŋa nɩ, sɩ a daarɩ a taa kwǝli tɩʋ kʋntʋ.
7 Kǝm dɩntʋ nan mʋ wʋ́ pa n lwarɩ nɩ: Baŋa-Wɛ wʋ́ sɩɩnɩ DƖ kɩ DƖ na goni ni sɩ DƖ kɩ te tɩn: 8 Nii sɩ n wʋ́ na wɛ dɩm na jɩgɩ dɩ zʋʋra yɩ dɩ kɩ luluŋu kʋlʋ Ahazɩ natəm dɩm yɩra nɩ tɩn. Baŋa-Wɛ lagɩ DƖ pa lunluŋu kʋm fʋfɔ kʋ joori kwaga naprɩ-yi kuni fugə mʋ.› »
Wɛ dɩm na kɩ lunluŋu kʋlʋ tɩn ma sɩɩnɩ kʋ joori kwaga naprɩ-yi kuni fugə.
9 Ezekɩasɩ dɛɛn na zaŋɩ o yawɩʋ kʋm baŋa nɩ yɩ o na yazurə tɩn, mʋ o panɩ ləŋə kantʋ:
10 Amʋ ya bʋŋɩ a tɩtɩ nɩ mʋ a wɩ:
«A lagɩ a tɩ a nɔn-dʋnnɩ maŋa nɩ mʋ,
sɩ a zʋ curu yɩ a maŋɩ dáanɩ taan wuu.
11 A ma bʋŋɩ nɩ: a daa bá taa ŋwɩ lʋgʋ baŋa nɩ
sɩ a na Baŋa-Wɛ dáanɩ.
A ta maa bá na nabiinǝ balʋ na ŋwɩ tɩn dɩ.
A nan bá taa zʋʋrɩ ba tɩtarɩ nɩ.
12 Amʋ ŋwɩa kam da ka ti mʋ.
Kʋ nyɩ dɩ nayɩrʋ na da o gɔ o vwe te tɩn mʋ.
Kʋ ta nyɩ dɩ garyi dɩlʋ
garyi-sɔrʋ na da o vaŋɩ ŋʋna
o kɔ dɩ yɩra nɩ tɩn mʋ.
Nmʋ wʋra n pa a mʋmwɛ ti lɩla,
nɩ wɩa na da ka ji lim te tɩn mʋ.
13 A yɔɔrɩ a keeri mʋ taan pa tɩga ba ka pʋʋrɩ.
Kʋ nyɩ dɩ nyoŋo ya mʋ jɩgɩ a kwi sɩm kʋ yara.
Nmʋ wʋra n pa a mʋmwɛ ti lɩla,
nɩ wɩa na da ka ji lim te tɩn mʋ.
14 A keeri nɩ kawɛbudoori
naa kʋŋwa na keeri te tɩn mʋ.
A nan ta keeri nɩ kunkwǝŋǝ mʋ.
Amʋ na kwǝni a yuu wɛɛnɩ taan tɩn,
a yiǝ sɩɩnɩ mʋ dɩ kərə.
Amʋ Yuutu Wɛ, a cam dɩm gaalɩ.
Nan ba lɩla n joŋi-nɩ n yagɩ.»
15 Bɛɛ mʋ amʋ nan maŋɩ sɩ a ta
wǝǝnu tɩntʋ maama baŋa nɩ?
Wɛ maŋɩ DƖ ta taanɩ DƖ brɩ-nɩ,
yɩ DƖ sɩɩnɩ DƖ kɩ DƖ wʋbʋŋa na jaanɩ te tɩn.
Amʋ wʋ́ tu a tɩtɩ mʋ a ŋwɩa maama wʋnɩ,
a wʋʋ na tiini kʋ cɔgɩ tɩn ŋwaanɩ.
16 Amʋ Yuutu Wɛ, nmʋ kikiə mʋ paɩ nɔɔna jɩgɩ ŋwɩa.
Amʋ dɩ maa tɔgɩ ya ŋwaanɩ a jɩgɩ ŋwɩa.
Nan pa yazurə yi-nɩ
sɩ a joori a na a ŋwɩa.
17 Nii mʋ. A na nɛ yaara yalʋ tɩn
jɩgɩ nyɔɔrɩ ya pa-nɩ.
N na soe-nɩ tɩn ŋwaanɩ,
n wʋ sɛ sɩ a tʋ goŋo kʋlʋ na wʋ́ cɔge-nɩ tɩn wʋnɩ.
N ta daarɩ n yagɩ a lwarɩm dɩm maama n cɛ-nɩ.
18 Bɛŋwaanɩ, balʋ na wʋ curu wʋnɩ tɩn warɩ sɩ ba tee‑m.
Twa warɩ ba leeni ba zuli-m.
Balʋ dɩ nan na zʋ tɩga kuri nɩ tɩn,
warɩ sɩ ba lwarɩ nmʋ na tʋŋɩ cɩga te tɩn.
19 Kʋ na yɩ cɩga, kʋ yɩ balʋ na ŋwɩ tɩn yɩranɩ mʋ waɩ‑m ba tiə,
nɩ amʋ na wʋra a kɩ te zɩm tɩn.
Kwə wʋ́ ta ba brɩ ba biə
nmʋ na yɔɔrɩ n jɩgɩ cɩga te tɩn.
20 Baŋa-Wɛ nan lagɩ DƖ joŋi-nɩ DƖ yagɩ mʋ.
Dɩ́ wʋ́ taa jɩgɩ gɩgana kwɛɛra wǝǝnu yɩ dɩ́ leeni dɩ́ zuli‑DƖ.
Dɩ́ nan wʋ́ zuli‑DƖ taan mʋ Baŋa-Wɛ digə kam wʋnɩ,
sɩ kʋ yi dɩ́ ŋwɩa sisəm.
21 Ezayi dɛɛn ya tagɩ dɩ Pɛ Ezekɩasɩ mʋ o wɩ: «Pa ba zɔ mɔɔla sɩ ba kwe-tɩ ba taagɩ n ŋwan-zwəm kam, sɩ n wʋ́ na yazurə.»
22 Ezekɩasɩ dɩ ma bwe o wɩ: «Kǝm dɔɔ mʋ wʋ́ kɩ sɩ kʋ brɩ nɩ: amʋ daa wʋ́ na cwǝŋǝ sɩ a zʋ Baŋa-Wɛ digə kam wʋ a zuli‑DƖ?»a