Ezekɩasɩ ba jɩgɩ yazurə yɩ o joori o zaŋɩ
Ezayi 38:1-8, 21-22; 2 Wǝǝnu Kɩbarɩ tɔnɔ 32:24-26
20
Da yam kʋntʋ nɩ, Ezekɩasɩ dɛɛn yɔɔrɩ o tʋ yawɩʋ mʋ yɩ o bwələ dɩ tʋʋnɩ. Wɛ nijoŋnu Ezayi na yɩ Amɔtɩ bu tɩn ma vu o te yɩ o ta dɩd-o o wɩ: «Baŋa-Wɛ na tagɩ kʋlʋ tɩn mʋ tɩntʋ: Brɩ n sɔŋɔ tiinə bam ba na wʋ́ kɩ te nɩ n na tǝrǝ. Bɛŋwaanɩ, n lagɩ n tɩ mʋ, n bá wəri dɩ n yawɩʋ kʋm.»2 Ezekɩasɩ na ni kʋntʋ tɩn, mʋ o pipiri o yibiyə o jeeri kəbrə kam yɩ o loori Wɛ o wɩ: 3 «Baŋa-Wɛ, guli nɩ amʋ yǝni a tɔgɩ-m dɩ a cɩga maama dɩdaanɩ a wʋʋ maama mʋ. A ma yɔɔrɩ a kɩ kʋlʋ nmʋ na laga sɩ a kɩ tɩn.» Ezekɩasɩ ma tiini o keeri zanzan.
4 Sɩ Ezayi laan yagɩ pɛ sɔŋɔ kʋnkɔlɔ kʋm tɩn mʋ Baŋa-Wɛ kwǝrǝ yi‑o wɩ:
5 «Joori n vu n ta dɩ a nɔɔna bam yuutu Ezekɩasɩ n wɩ: ‹Baŋa-Wɛ dɩm na yɩ n ko Davidi Wɛ tɩn mʋ tagɩ DƖ wɩ: A ni n wɛ-loro kʋm, yɩ a ta na n na kanɩ yi-na te tɩn. Amʋ wʋ́ pa‑m yazurə. Da yatɔ dɛ nɩ nmʋ wʋ́ vu Baŋa-Wɛ sɔŋɔ kʋm n zuli-nɩ. 6 A nan lagɩ a wǝli bɩna fugə-yanu mʋ n bɩna yam wʋnɩ. A ta wʋ́ joŋi nmʋ dɩ Zeruzalɛm tɩʋ kʋntʋ a yagɩ Asiiri tɩʋ pɛ wʋm jɩŋa nɩ, sɩ a daarɩ a taa kwǝli tɩʋ kʋntʋ amʋ tɩtɩ yɩrɩ dɩ Davidi yɩrɩ zulə ŋwaanɩ.› »
7 Ezayi ma ta dɩ Ezekɩasɩ o wɩ: «Zɔ mɔɔla sɩ n kwe-tɩ n taagɩ n ŋwan-zwəm dɩm, sɩ n wʋ́ na yazurə.»
8 Ezekɩasɩ ma ta dɩ Ezayi o wɩ: «Kǝm dɔɔ mʋ wʋ́ kɩ sɩ kʋ brɩ nɩ Baŋa-Wɛ wʋ́ sɩɩnɩ DƖ pa-nɩ yazurə sɩ a wanɩ a vu Baŋa-Wɛ digə kam a zuli‑DƖ da yatɔ dɛ nɩ?» 9 Ezayi ma ləri o wɩ: «Kǝm dɩntʋ nan mʋ wʋ́ pa n lwarɩ nɩ Baŋa-Wɛ wʋ́ sɩɩnɩ DƖ kɩ DƖ na goni ni sɩ DƖ kɩ te tɩn. Nmʋ laga sɩ luluŋu kʋm fʋfɔ kʋ vu yigə naprɩ-yi fugə mʋ naa n laga sɩ kʋ fʋfɔ kʋ joori kwaga kuni fugə mʋ?»
10 Ezekɩasɩ ma ləri o wɩ: «Kʋ yɩ mwalɩ sɩ woro kʋm fʋfɔ kʋ vu yigə naprɩ-yi fugə. Laan nan pa kʋ joori kwaga naprɩ-yi fugə.» 11 Ezayi ma loori Baŋa-Wɛ sɩ DƖ kɩ kʋntʋ. Wɛ ma sɩɩnɩ DƖ pa natəm dɩm woro kʋm joori kwaga naprɩ-yi fugə.
Ba zɩgɩ Babilɔnɩ nɩ ba tʋŋɩ nɔɔna
12 Kʋ maŋɩ dɩ maŋa kam kʋntʋ nɩ, Merodaki-Baladan laan mʋ jigi Babilɔnɩ tɩʋ pɛ. O na ni nɩ Ezekɩasɩ ya ba jɩgɩ yazurə tɩn, mʋ o tʋŋɩ nɔɔna o tee nɩ, dɩ twannʋ, dɩ pɛɛra. 13 Ezekɩasɩ dɛɛn ma jeeri nɔɔna bam dɩ wʋpolo. O ma ja-ba o zʋ o jɩjɩgɩrʋ tɩm na tigi mɛ tɩn. O laan ma brɩ-ba o səbu-poŋo tɩm maama, dɩ o səbu-sɩŋa, dɩ o wo-talooru tɩm, dɩ o nu-ŋʋŋa kam, dɩ o najara zɩla yam, dɩ kʋlʋ maama ba na tiŋi jɩjɩgɩrʋ di sɩm wʋnɩ tɩn. Pɛ Ezekɩasɩ dɛɛn wʋ daarɩ kʋlʋkʋlʋ pɛ sɔŋɔ kʋm nɩ, naa o paarɩ dim je sɩm maama nɩ yɩ o wʋ kwe o brɩ-ba.a
14 Wɛ nijoŋnu Ezayi dɛɛn ma vu Ezekɩasɩ te yɩ o bwe‑o o wɩ: «Nɔɔna bantʋ nuŋi yən nɩ mʋ ba ba nmʋ te? Ba nan tagɩ bɛɛ mʋ dɩ nmʋ?» Ezekɩasɩ ma ləri o wɩ: «Ba nuŋi Babilɔnɩ tɩʋ yigə yigə mʋ ba ba.» 15 Ezayi daa ma bwe o wɩ: «Bɛɛ mʋ ba nii ba na n sɔŋɔ kʋm wʋnɩ?» Ezekɩasɩ ma ləri o wɩ: «Amʋ brɩ-ba wǝǝnu tɩlʋ maama na tigi a jɩjɩgɩrʋ di sɩm wʋnɩ tɩn mʋ. Kʋlʋkʋlʋ wʋ daarɩ yɩ a wʋ brɩ-ba.»
16 Ezayi dɩ ma ta dɩ Pɛ Ezekɩasɩ o wɩ: «Nan cəgi Baŋa-Wɛ na jɩgɩ kwǝrǝ kalʋ sɩ DƖ pa‑m tɩn: 17 Ta n ye nɩ maŋa lagɩ ka yi sɩ Babilɔnɩ tɩʋ tiinə ba ba pɛ jɩjɩgɩrʋ tɩlʋ maama na tigi n sɔŋɔ kʋm wʋnɩ tɩn, dɩ tɩlʋ n nabaara bam na yaarɩ ba la ba tiŋi tɩn ba ja ba vu ba tɩtɩ tɩʋ kʋm. Kʋlʋkʋlʋ daa bá daarɩ kʋ pa abam.b Baŋa-Wɛ ni dɩm mʋ kʋntʋ. 18 Nmʋ tɩtɩ dwi dɩm dɩ wʋ́ tɔgɩ ba wǝli da. Ba nan na jaanɩ-ba ba yi da, baá lwɩ n biə bam mʋ sɩ ba taa tʋŋɩ Babilɔnɩ tɩʋ pɛ sɔŋɔ nɩ.»c
19 Ezekɩasɩ na ni kʋntʋ tɩn mʋ o tagɩ dɩ Ezayi o wɩ: «Baŋa-Wɛ na pɛ‑m kwǝrǝ kalʋ sɩ n pa-nɩ tɩn lana.» Bɛŋwaanɩ o bʋŋɩ o tɩtɩ nɩ o wɩ: «Kʋ na kɩ kʋntʋ, cam bá yi dɩbam amʋ paarɩ dim maŋa kam nɩ, yɩ a nɔɔna wʋ́ taa zʋʋrɩ dɩ bɩcar-zuru.»
Ezekɩasɩ tʋʋnɩ