Ba tʋŋɩ nɔɔna pa ba zɩgɩ Babilɔnɩ nɩ ba ba
39
Kʋ maŋɩ dɩ maŋa kam kʋntʋ nɩ, Merodaki-Baladan laan mʋ jigi Babilɔnɩ tɩʋ pɛ. O ni nɩ Ezekɩasɩ ya na tʋ yawɩʋ, yɩ o joori o na yazurə tɩn, mʋ o tʋŋɩ nɔɔna o tee nɩ dɩ twannʋ dɩ pɛɛra. 2 Ezekɩasɩ dɛɛn ma jeeri nɔɔna bam dɩ wʋpolo. O ma ja-ba o zʋ o jɩjɩgɩrʋ tɩm na tigi mɛ tɩn. O laan ma brɩ-ba o səbu-poŋo tɩm maama, dɩ o səbu-sɩŋa, dɩ o wo-talooru sɩm, dɩ o nu-ŋʋŋa kam, dɩ o najara zɩla yam maama, dɩ kʋlʋ maama ba na tiŋi jɩjɩgɩrʋ di sɩm wʋnɩ tɩn. Pɛ Ezekɩasɩ dɛɛn wʋ daarɩ kʋlʋkʋlʋ pɛ sɔŋɔ kʋm nɩ, naa o paarɩ dim je sɩm maama nɩ yɩ o wʋ kwe o brɩ-ba.3 Wɛ nijoŋnu Ezayi dɛɛn ma vu Ezekɩasɩ te o bwe‑o o wɩ: «Nɔɔna bantʋ nuŋi yən nɩ mʋ ba ba nmʋ te? Ba nan tagɩ bɛɛ mʋ dɩ nmʋ?» Ezekɩasɩ ma ləri o wɩ: «Ba nuŋi Babilɔnɩ tɩʋ yigə yigə mʋ ba ba amʋ te.» 4 Ezayi daa ma bwe o wɩ: «Bɛɛ mʋ ba nii ba na n sɔŋɔ kʋm wʋnɩ?» Ezekɩasɩ ma ləri o wɩ: «Amʋ brɩ-ba wǝǝnu tɩlʋ maama na tigi a jɩjɩgɩrʋ di sɩm wʋnɩ tɩn mʋ. Kʋlʋkʋlʋ wʋ daarɩ yɩ a wʋ brɩ-ba.»
5 Ezayi daa ta ma ta dɩ Pɛ Ezekɩasɩ o wɩ: «Nan cəgi Paŋwa Tu Baŋa-Wɛ na jɩgɩ kwǝrǝ kalʋ sɩ DƖ pa‑m tɩn: 6 Ta n ye nɩ: maŋa lagɩ ka yi sɩ Babilɔnɩ tɩʋ tiinə ba ba pɛ jɩjɩgɩrʋ tɩlʋ maama na tigi n sɔŋɔ kʋm wʋnɩ tɩn, dɩ tɩlʋ n nabaara bam na yaarɩ ba la ba tiŋi tɩn ba ja ba vu ba tɩtɩ tɩʋ kʋm. Kʋlʋkʋlʋ daa bá daarɩ kʋ pa abam. Baŋa-Wɛ ni dɩm mʋ kʋntʋ.a 7 Nmʋ tɩtɩ dwi dɩm dɩ wʋ́ tɔgɩ ba wǝli da ba vu. Ba nan na jaanɩ-ba ba yi da, baá lwɩ n biə bam mʋ sɩ ba taa tʋŋɩ Babilɔnɩ tɩʋ pɛ sɔŋɔ nɩ.»
8 Ezekɩasɩ na ni kʋntʋ tɩn, mʋ o tagɩ dɩ Ezayi o wɩ: «Baŋa-Wɛ na pɛ‑m kwǝrǝ kalʋ sɩ n pa-nɩ tɩn lana.» Bɛŋwaanɩ, o bʋŋɩ o tɩtɩ nɩ o wɩ: «Kʋ na kɩ kʋntʋ, cam bá yi dɩbam amʋ paarɩ dim maŋa kam nɩ, yɩ a nɔɔna wʋ́ taa zʋʋrɩ dɩ bɩcar-zuru.»