Wɛ nɔɔna bam wʋ́ joori ba na dam
40
Abam Tu Wɛ dɩm na tagɩ te tɩn mʋ tɩntʋ:«Pa a nɔɔna bam bɩcara taa tigə.
2 Ŋɔɔnɩ-na bɩcar-zuru taanɩ dɩ Zeruzalɛm tiinə bam,
sɩ á ta dɩ ba nɩ: ba tɩtʋŋ-cɛɛra maŋa kam ti.
Brɩ-ba nɩ: Baŋa-Wɛ kwe ba lwarɩm mʋ
DƖ yagɩ DƖ cɛ-ba.
DƖ maŋɩ DƖ waarɩ-ba mʋ
sɩ kʋ ma kʋ ŋwɩ ba jɩnɩ dɩm kuni bɩle kʋ pa‑DƖ.»
3 Nɔɔnʋ kwǝrǝ mʋ tɔɔla ka wɩ:
«Kagʋa yuu nɩ mʋ á wʋ́ zaŋɩ á kwɛ cwǝŋǝ kam
á pa dɩ́ Tu Baŋa-Wɛ.
Nan pa-na sɩ cwe sɩlʋ DƖ na wʋ́ tɔgɩ tɩ-kʋra je nɩ tɩn
fɔgɩ sɩ yɔɔrɩ lanyɩranɩ.a
4 Je sɩlʋ maama na jɩgɩ gwəənu tɩn
maŋɩ sɩ tɩ suuri mʋ.
Je sɩlʋ maama na jɩgɩ zwǝǝnu dɩ pweeru tɩn
dɩ maa wʋ́ guri tɩ daarɩ cwǝŋǝ kam.
Tɩga kam mɛ na ba maɩ daanɩ tɩn
dɩ maa wʋ́ palɩsɩ ka maŋɩ daanɩ.
5 Kʋntʋ mʋ wʋ́ pa Baŋa-Wɛ paarɩ-zulǝ yam taa naɩ jaja,
sɩ nabiinǝ maama na-kʋ bɩdwɩ baŋa nɩ.
Baŋa-Wɛ na pɛ ni dɩlʋ tɩn mʋ kʋntʋ.»
6 Nɔɔnʋ mʋ tagɩ o wɩ: «Ta n tɔɔlɩ n yaga!»
Amʋ dɩ ma bwe a wɩ: «A tɔɔlɩ a ta nɩ bɛ?»
Ta wɩ: «Kʋ na yɩ nabiinǝ,
ba maama nyɩ dɩ gaarʋ mʋ.
Ba lam dɩ yɩ nɩ punnu na nuŋi gaa wʋnɩ tɩn mʋ.
Ba brɩ ba ba daana yɩ ba tʋa.
7 Gaarʋ tɩm wʋ́ kwaarɩ mʋ
yɩ punnu tɩm dɩ siiri,
Baŋa-Wɛ na wʋ́ sin viu DƖ yagɩ tɩ yɩra nɩ tɩn ŋwaanɩ.
Cɩga tɩn, nabiinǝ mʋ nan nyɩ dɩ gaarʋ tɩm kʋntʋ.
8 Gaarʋ tɩm wʋ́ sɩɩnɩ tɩ kwaarɩ,
yɩ punnu tɩm dɩ siiri.
Kʋ nan na yɩ Wɛ kwǝrǝ kam,
kantʋ wʋ́ taa wʋra mʋ maŋa maama.»b
9 Siyɔn, nmʋ jɩgɩ kwər-ywəŋə sɩ n tɔɔlɩ!
Nan diini piu na tiini kʋ dwara tɩn yuu.
Zeruzalɛm, kwe kwər-ywəŋə kam
n ta n tɔɔlɩ n yaga wɛ wɛ!
Ta n tɔɔlɩ n yaga yɩ n ba fʋna.
Ta dɩ Zuda tɩɩnɩ dɩdonnǝ dɩm wɩ:
«Nii-na. Abam Tu Wɛ dɩm wʋra!»
10 Nii-na! Yuutu Baŋa-Wɛ dɩm maa bɩɩnɩ dɩ baarɩ.
DƖ nan te nɔɔna dɩ dam-fɔrɔ mʋ.
Nii-na. DƖ jɩgɩ DƖ ŋwɩɩrʋ mʋ DƖ bɩɩna.
Kʋ daarɩ yɩ DƖ kwərə yam DƖ na lagɩ DƖ pa tɩn wʋ DƖ yigə nɩ.c
11 DƖ maa yɩrɩ nɔɔna balʋ DƖ na kuri tɩn,
nɩ nayɩrʋ na nii o peeni te tɩn.
O ta buki pəlbiə bam mʋ o ja-kukoro nɩ,
yɩ o ja-ba o ba o fǝri o bɩcarɩ nɩ.
Kʋ ta na yɩ piniinə balʋ na jɩgɩ biə tɩn,
o yǝni o kalɩ-ba o ve mɛmɛ mʋ.d
12 Wɔɔ mʋ wanɩ nɩnɩʋ na-fara bam
o maŋɩ o kɩ o ja-guli nɩ?
Wɔɔ mʋ wanɩ o kwe o jɩŋa
o maŋɩ wɛyuu kʋm maama o ti?
Wɔɔ nan mʋ wanɩ tɩga kasʋlʋ kʋm maama
o la o kɩ tɩtɔgɔ wʋnɩ,
yɩ o daarɩ o kwe pweeru tɩm dɩ zwəənu tɩm
o maŋɩ tɩ duuni sɩ o lwarɩ?
13 Wɔɔ mʋ yi sɩ o wanɩ o lwarɩ Baŋa-Wɛ wʋbʋŋa,
naa sɩ kʋ tu brɩ-DƖ DƖ na wʋ́ kɩ te?e
14 Baŋa-Wɛ jǝni dɩ wɔɔ mʋ sɩ ba banɩ daanɩ,
sɩ kʋ tu pa Baŋa-Wɛ yi pʋʋrɩ,
yɩ o daarɩ o brɩ-DƖ cwǝŋǝ kalʋ na yɩ cɩga cɩga tɩn?
Wɔɔ mʋ wanɩ o pa Baŋa-Wɛ yǝno,
yɩ o daarɩ o brɩ-DƖ sɩ DƖ taa ni wǝǝnu kuri?
15 Baŋa-Wɛ nii lʋgʋ baŋa dwi tiinə bam
nɩ ba yɩ na mʋ na lugi fɩɩn ba kɩ war-zʋŋa wʋnɩ tɩn.
Ba ta nyɩ dɩ kasʋlʋ biə mʋ
ba maŋɩ ba kɩ bwaŋa nɩ yɩ ka muri.
DƖ ma maŋɩ tɩɩnɩ dɩlʋ na wʋ nɩnɩʋ kʋm ni nɩ tɩn
nɩ dɩ yɩ fogo mʋ tɩn.
16 Liban vara bam muri
sɩ ba kwe-ba ba ma kɩ zwɛɛm kaanɩm.
Kʋ tweeru tɩm dɩ ma muri sɩ ba ma tɩ dɛ sɩm
ba tarɩgɩ mim ba ma zwɛ kaanɩm dɩm kʋntʋ.
17 Dwi-gɛ tiinə bam maama yɩ kafɛ mʋ DƖ yigə nɩ.
DƖ nii ba maama nɩ ba yɩ yɔɔ yɩranɩ mʋ,
yɩ ba ta ba jɩgɩ kuri dɩ fɩnfɩɩn dɩ.f
18 Wɔɔ mʋ abam nan wʋ́ kwe á maŋɩ dɩ Wɛ?
Bɛ nyɩnyʋgʋ mʋ abam wʋ́ kwe á maŋɩ dɩ DƖ?
19 Kʋ na yɩ jwəm, gɔgɔ mʋ wʋ́ mɔ-dɩ,
yɩ luru dɩ kwe səbu-sɩŋa o taagɩ-dɩ,
yɩ o daarɩ o ma səbu-poŋo o gɔgɩrɩ dɩ maama.
20 Yinigə tu na warɩ səbu-poŋo dɩ səbu-sɩŋa o yi,
oó beeri da-ŋʋŋa kalʋ na ba pɔɩ tɩn mʋ.
O maa wʋ́ ta dɩ gɔgɔ
sɩ kʋ tu kɩ jwəm dɩlʋ na ba tʋɩ tɩga nɩ tɩn o pa‑o.
21 Abam yǝri tɩntʋ na?
Abam wʋ ni kʋ ŋwa na?
Ba wʋ zɩgɩ kʋ dɛ nɩ sɩ ba ta dɩ abam na?
Kʋ na zɩgɩ lʋgʋ pulim nɩ tɩn,
abam wʋ ni kʋ kuri na?
22 Baŋa-Wɛ yɩ dɩlʋ na je mɛ na gaalɩ tɩga kam baŋa
dɩ wɛyuu kʋm tɩn mʋ.
DƖ maa nii nabiinǝ nɩ ba yɩ manjwəəlu mʋ tɩn.
DƖ yɔɔrɩ DƖ lwarɩ wɛyuu kʋm nɩ gar-jalɩ mʋ,
naa vwe dɩlʋ DƖ na zʋʋrɩ dɩ wʋnɩ tɩn.
23 Dɩntʋ mʋ waɩ DƖ paɩ lʋgʋ baŋa dɩdɛɛra jeə,
yɩ pwa dɩ yɔɔrɩ ba jiri kafɛ.
24 Ba nyɩ dɩ tweeru tɩlʋ ba na yɔɔrɩ ba jəri tɩn mʋ.
Ba na cwi-tɩ tɩga kam nɩ,
yɩ dɩ bʋnnʋ na wʋra tɩ jaanɩ tɩga,
mʋ Baŋa-Wɛ wʋ́ pa viu ba kʋ fuli-tɩ
pa tɩ kwaarɩ lɩla.
Ba ta nyɩ dɩ swannʋ mʋ
viu na kalɩ kʋ ja viiri.
25 Wʋ-poŋo Tu Wɛ dɩm mʋ bwe DƖ wɩ:
«Wɔɔ mʋ abam wʋ́ kwe á maŋɩ dɩ amʋ?
Wɔɔ dɩ amʋ mʋ wʋ́ taa maɩ daanɩ?»
26 Kwəni-na á yiǝ á nii wɛɛnɩ sɩ á taá brɩ-nɩ,
wɔɔ mʋ naanɩ wǝǝnu tɩm kʋntʋ maama?
Kʋ yɩ Wɛ mʋ jaanɩ calɩcwɩ sɩm kɔgɔ kʋm dɩdʋa dɩdʋa DƖ nuŋǝ,
yɩ DƖ bəŋi calɩcʋa maama dɩ ka yɩrɩ.
Sɩ dɩdʋa tɩtɩ wʋ fɔgɩ ka je,
DƖ dam-fɔrɔ kʋm na dwe woŋo maama tɩn ŋwaanɩ.
27 Yisɩrayɛlɩ tiinə bam na yɩ Zakɔbɩ dwi tiinə tɩn,
bɛɛ mʋ yɩ abam pʋʋna á wɩ:
«Baŋa-Wɛ yǝri kʋlʋ na kɩ dɩbam tɩn.»
Á ta ma á wɩ:
«Baŋa-Wɛ yigə tǝrǝ dɩbam wʋnɩ.»
28 Abam yǝri tɩntʋ na?
Á wʋ ni kʋ ŋwa na?
Baŋa-Wɛ yɩ Wɛ dɩlʋ na wʋra maŋa maama tɩn mʋ.
Dɩntʋ mʋ naanɩ lʋgʋ baŋa dɩ kʋ ni maama.
DƖ ba bwənə.
DƖ yɩra dɩ nan ba cɛa.
Nɔɔn-nɔɔnʋ ba lwarɩ DƖ yǝno kʋm o tiə.
29 Wɛ joori dɩ pa dam mʋ nɔɔnʋ wʋlʋ na bwəni tɩn,
yɩ DƖ daarɩ DƖ wəli baarɩ nɔɔnʋ wʋlʋ dam na ti tɩn.g
30 Bu-dʋnnʋ tɩtɩ waɩ ba bwənə yɩ ba yɩra cɛa.
Nɔn-dʋnnʋ dɩ maa waɩ ba tri ba tʋɩ tɩga nɩ.
31 Kʋ nan na yɩ balʋ tɩɩna na wʋ Baŋa-Wɛ wʋnɩ tɩn,
ba dam dɩm yǝni dɩ joori dɩ jiri dam-dʋʋrɩ mʋ.
Baá zaŋɩ wɛɛnɩ baŋa baŋa,
nɩ maarʋ na yaarɩ tɩ vwana te tɩn mʋ.
Ba na duri te maama dɩ, ba yɩra bá cɛ.
Ba maa na ve taan te dɩ, ba ba bərə.h