Wɛ mʋ yɩ Yisɩrayɛlɩ tiinə bam zənnu
41
Tɩɩnɩ dɩlʋ na wʋ nɩnɩʋ kʋm ni nɩ tɩn,taá yɩ cɩmm sɩ á cəgi a taanɩ!a
Pa-na sɩ tɩga baŋa dwi tiinə bam beeri dam-dʋʋrɩ
ba kɩ ba tɩtɩ kuri nɩ,
sɩ ba fʋfɔ ba yi amʋ te sɩ dɩ́ ŋɔɔnɩ taanɩ.
Pa-na dɩ́ jeeri daanɩ
sɩ dɩ́ lwarɩ wʋlʋ na jɩgɩ bʋra.
2 Wɔɔ mʋ ciŋi wa-puli seeni pɛ wʋm,
yɩ o pa o tʋŋɩ cɩga ŋwaanɩ?
Kʋ tu ma kwe tɩɩnɩ o kɩ pɛ wʋm kʋntʋ dam kuri nɩ,
pa o nɔnɩ ba pwa bam o sɩn tɩga nɩ.
O ma kwe o sʋ-lɔŋɔ o zəli-ba
pa ba jagɩ nɩ kasʋlʋ mʋ jagɩ,
yɩ o cɩna dɩ kalɩ-ba ya ja je,
nɩ viu na kɩ weeru te tɩn.
3 O na zəli-ba lɩla te tɩn
nyɩ dɩ o nɛ sɩm ba dwe tɩga mʋ te.
O maa kɛ yigə, yɩ o tɩtɩ wʋ nɛ zʋnnɩ.
4 Wɔɔ mʋ pɛ wǝǝnu tɩntʋ maama kɩ,
nɩ o wʋbʋŋa na jaanɩ sɩ o kɩ te tɩn?
Wɔɔ mʋ te dwi dɩdwɩ wʋra,
yɩ dɩdoŋ saŋɩ dɩ kwaga?
Kʋ yɩ amʋ Baŋa-Wɛ mʋ te kʋntʋ maama.
Amʋ dɛɛn mʋ maŋɩ a wʋra pulim nɩ,
yɩ a ta wʋ́ taa wʋra kweelim maŋa nɩ.b
5 Nɩnɩʋ ni tɩɩnɩ dɩm nɛ a na kɩ kʋlʋ tɩn,
pa fʋʋnɩ ja-ba.
Lʋgʋ baŋa je maama nɔɔna yɩra tiini ya saɩ mʋ.
Ba ma kɩ daanɩ ba fʋfɔ ba ba.
6 Ba maama wǝli daanɩ mʋ,
yɩ nɔɔnʋ maama tɛ dɩ o cʋrʋ nɩ:
«Kɩ n tɩtɩ n kɩ daanɩ!»
7 Gɔgɔ kʋlʋ na sarɩ dɛ tɩn wʋ́ wǝli
wʋlʋ na jɩgɩ səbu-sɩŋa o gɔgɩrɩ wǝǝnu tɩn,
sɩ ba na dam yɩ ba kɩ jwəm ba zɩgɩ.
Wʋlʋ dɩ na kwe hama o ma o kwɛ-dɩ tɩn
wʋ́ wǝli luru wʋm sɩ ba na baarɩ.
Ba maama wʋ́ ta ba brɩ daanɩ ba wɩ: «Dɩ́ kwaanɩ.»
Ba laan maa wʋ́ kwe cɩna ba kwaarɩ jwəm dɩm,
sɩ dɩ yɩ vin dɩ tʋ tɩga nɩ.
8 Abam Yisɩrayɛlɩ tiinə bam na yɩ Zakɔbɩ dwi dɩm tɩn,
á yɩ amʋ tɩntʋŋna balʋ a na kuri a pa a tɩtɩ tɩn mʋ.
Abam maa yɩ amʋ ciloŋ Abraham biə.
9 A liiri abam a ja a nuŋi tɩga baŋa gugwəəru tɩm nɩ mʋ.
A ma bəŋi abam sɩ á zɩgɩ lʋgʋ baŋa ni maama nɩ á ba.
A laan ma ta dɩ nmʋ Zakɔbɩ dwi dɩm wɩ:
«Nmʋ yɩ amʋ tɩntʋŋnʋ mʋ.
A nan na kuri nmʋ tɩn, a wʋ vɩ‑m.»
10 Nan yɩ ta n fʋna, sɩ a wʋ n tee nɩ.
Yɩ ta n jagɩ liǝ, Bɛŋwaanɩ, amʋ mʋ yɩ n Tu Wɛ dɩm.
Amʋ wʋ́ kɩ dam a kɩ n kuri nɩ,
yɩ a ta wəli‑m.
A maa wʋ́ kwe a dam dɩm a tʋŋɩ dɩ cɩga
sɩ a ma a zǝni-m.
11 Nii mʋ! Balʋ wʋrʋ na zaŋɩ dɩ nmʋ tɩn
wʋ́ na ba lɛɛrʋ mʋ yɩ cavɩɩra ja-ba.
Balʋ dɩ nan na dwəni dɩ nmʋ tɩn wʋ́ je mʋ.
12 Nmʋ wʋ́ beeri balʋ na ciŋi nmʋ tɩn
yɩ n bá na-ba.
Balʋ na dʋnɩ nmʋ,
bantʋ yɩrɩ mʋ lagɩ dɩ saarɩ lʋgʋ baŋa nɩ.
13 Bɛŋwaanɩ, amʋ wʋlʋ na yɩ nmʋ Yisɩrayɛlɩ dwi dɩm Tu Baŋa-Wɛ tɩn
mʋ yɔɔrɩ a jɩgɩ n jazɩm,
yɩ a tɛ dɩ nmʋ nɩ:
«Yɩ ta n fʋna, sɩ amʋ wʋ́ wəli‑m.»
14 Zakɔbɩ dwi dɩm, n sɩɩnɩ n bwǝnǝ
nɩ kanzwɛ na yɩ te tɩn mʋ.
Yisɩrayɛlɩ tiinə bam, nan yɩ taá fʋna.
Amʋ Baŋa-Wɛ mʋ tɛ a wɩ:
«A lagɩ a wǝli abam mʋ.»
Amʋ wʋlʋ na yɩ Yisɩrayɛlɩ dwi dɩm Wʋ-poŋo Tu wʋm tɩn mʋ yɩ á Vrɩnʋ.
15 Zakɔbɩ dwi dɩm, a lagɩ a pa nmʋ ji nɩ
naanɩ vɔrɔ kʋlʋ yəli na yɩ mɩrɩm tɩn mʋ,
vɔr-ni dʋʋrɩ dɩlʋ yɩra na panɩ dɩdaanɩ cɩna tɩn.
Nmʋ laan ma n wʋ́ magɩ pweeru tɩm n cɩcʋgɩ,
yɩ n ta pa zwəənu tɩm ji nɩ swannʋ doŋ.
16 Abam wʋ́ dʋlɩ-tɩ á yagɩ wɛɛnɩ,
sɩ viu kalɩ kʋ ja je.
Vu-dɩʋ mʋ lagɩ kʋ pɛ-ba kʋ ja jagɩ je maama nɩ.
Nmʋ tɩtɩ nan wʋ́ taa caka dɩ wʋpolo Baŋa-Wɛ ŋwaanɩ,
yɩ n ta tan tee n tɩtɩ DƖ baŋa nɩ,
DƖ na yɩ Yisɩrayɛlɩ dwi dɩm Wʋ-poŋo Tu wʋm tɩn ŋwaanɩ.
17 Yinigə tiinə dɩ nabwənə beeri na mʋ ba ga sɩ ba nyɔ.
Ba dindəlimə ma kʋ na-nyɔm ŋwaanɩ.
Amʋ Baŋa-Wɛ nan wʋ́ ləri ba wɛ-loro kʋm.
Amʋ mʋ yɩ Yisɩrayɛlɩ tiinə Wɛ dɩm,
yɩ a bá vɩ-ba a yagɩ.
18 Amʋ wʋ́ pa bwi taa tʋlɩ pweeru yuu nɩ sɩ tuǝ,
sɩ buli-yiə dɩ taa taɩ ya nuŋi bwəəlu tɩm nɩ.
A ta wʋ́ pa kagʋa pipiri ka ji je sɩlʋ bwi na daga da tɩn,
sɩ tɩ-kʋra kam ləni ka taa yɩ mɛ buli-yiə na gaalɩ.
19 Amʋ wʋ́ pa Sɛdrɩ tweeru kɩ kagʋa yuu nɩ,
sɩ gʋlsaa, dɩ Miriti, dɩ Olivi tweeru dɩ nuŋi dáanɩ.
Tu-ŋʋnnʋ dɩ punnu dwi dwi mʋ wʋ́ nuŋi
sɩ tɩ li tɩ-kʋra kam maama.
20 Nɔɔna laan maa wʋ́ na kʋ maama
yɩ ba lwarɩ nɩ Baŋa-Wɛ dɩm
na yɩ Yisɩrayɛlɩ dwi dɩm Wʋ-poŋo Tu wʋm tɩn mʋ kɩ tɩntʋ maama.
Ba ta wʋ́ jeeli kʋ maama ba nii
pa ba ni kʋ kuri lanyɩranɩ.
21 Baŋa-Wɛ na yɩ Zakɔbɩ dwi dɩm pɛ wʋm tɩn tɛ DƖ wɩ:
«Nan ja-na á taanɩ á ba, sɩ dɩ́ nii.
Ta-na á ni sɩ dɩ́ cəgi.
22 Pa á jwǝnǝ yam ba ya ta
ya brɩ dɩbam kʋlʋ na lagɩ kʋ kɩ tɩn.
Ya maŋɩ sɩ ya ta wǝǝnu tɩlʋ na kɩ tɩ kɛ tɩn
ya brɩ dɩbam sɩ dɩ́ lwarɩ kʋ ni nɩ,
yɩ dɩ́ daarɩ dɩ́ lwarɩ tɩ na lagɩ tɩ guri te tɩn.
Ya nan wʋ́ ta ya brɩ dɩbam wǝǝnu tɩlʋ jwa na wʋ́ kɩ tɩn.
23 Kʋntʋ mʋ wʋ́ pa dɩ́ wanɩ dɩ́ sɛ nɩ:
ya sɩɩnɩ ya yɩ wa cɩga cɩga.
Kɩ-na woŋo, kʋ na yɩ lam naa balɔrɔ dɩ,
sɩ kʋntʋ wʋ́ pa fʋʋnɩ yɔɔrɩ dɩ ja dɩbam.
24 Abam nan ba jɩgɩ nyɔɔrɩ kʋlʋkʋlʋ baŋa nɩ,
yɩ á na kɩ wǝǝnu tɩlʋ tɩn yɩ tɩtʋŋ-yɔɔrʋ mʋ.
Balʋ na kuri sɩ ba zuli abam tɩn yɩ wo-zɔɔna mʋ!
25 Amʋ nan ciŋi nɔɔnʋ mʋ sɩ o nuŋi jazɩm baŋa seeni
o ba o zaŋɩ najara.
Wʋntʋ yǝni o bǝi amʋ yɩrɩ o zuli-nɩ mʋ.
O laan lagɩ o zɩgɩ wa-puli seeni mʋ o ba.
O maa wʋ́ cɔgɩ tɩɩnɩ dɩdɛɛra
nɩ nɔɔnʋ na nɔnɩ tɩɩrʋ te tɩn.
O ta maa wʋ́ kɩ dɩ ba
nɩ kamɔ-mɔrʋ na viiri o dɔgɔ te tɩn.
26 Wɔɔ mʋ zɩgɩ pulim kam nɩ o ta wʋntʋ taanɩ,
sɩ dɩ́ wanɩ dɩ́ lwarɩ kʋ ni nɩ?
Wɔɔ mʋ wuuri o ta dɩbam
sɩ dɩ́ wanɩ dɩ́ ta nɩ: ‹O wʋ o cɩga wʋnɩ›?
Nɔɔn-nɔɔnʋ wʋ tagɩ kʋ taanɩ.
Nɔɔn-nɔɔnʋ wʋ pwərisi-kʋ sɩ dɩ́ ni.
Nɔɔn-nɔɔnʋ wʋ ni taanɩ abam ni nɩ.
27 Amʋ Baŋa-Wɛ mʋ loori yigə
sɩ a ta dɩ Siyɔn tiinə bam nɩ: ‹Nii mʋ, nii-kʋ da!›
A ma tʋŋɩ nijoŋnu sɩ o vu Zeruzalɛm
o brɩ-ba kwər-ywəŋə.
28 A nan na nii jwǝnǝ yam wʋnɩ tɩn,
a wʋ nɛ ya dɩdʋa sɩ dɩ wanɩ dɩ brɩ swan.
Ya dɩdʋa tɩtɩ tǝrǝ sɩ dɩ sɛ a beeri dɩm.
29 Ya maama yɩ wo-yɔɔrʋ mʋ!
Ya kikiə yɩ kafɛ yɩranɩ ŋwaanɩ mʋ.
Ya nyɩnyʋrʋ dɩ maa ba jɩgɩ zǝnǝ kɔtaa,
kʋ yɔɔrɩ kʋ nyɩ dɩ mʋmwɛ viu mʋ tɩn.»