Baŋa-Wɛ tɩntʋŋnʋ wʋm taanɩ
Baŋa-Wɛ maa wɩ:
42
«Nii-na, amʋ tɩntʋŋnʋ wʋlʋ a na təli tɩn mʋ tɩntʋ.Wʋntʋ mʋ amʋ kuri, yɩ o kikiə su a yi.
A nan kwe a Joro mʋ a kɩ o wʋnɩ.
O maa wʋ́ tʋŋɩ cɩga o pa lʋgʋ baŋa dwi tiinə maama.
2 Wʋntʋ bá dwanɩ o kwǝrǝ sɩ o kɩ sɔɔ.
O bá taa paɩ o kwǝrǝ zaŋa tɩʋ pooni nɩ.
3 Kʋ na yɩ miu kʋlʋ na bwǝnǝ tɩn dɩ,
o brɩ o bá bwəri-kʋ.
O nan bá ja kanɩa kalʋ nugə na ti tɩn mim o dwe o yagɩ.
O maa wʋ́ pa cɩga yi nɔɔna maama,
o tɩtɩ na yɩ cɩga tu tɩn ŋwaanɩ.
4 O bá ywəri o cwǝŋǝ kalʋ o na tɔgɩ tɩn wʋnɩ,
naa o pa o vwana parɩ,
sɩ kʋ yi o na pɛ cɩga joŋi lʋgʋ baŋa je maama te tɩn.
Tɩɩnɩ dɩlʋ na wʋ nɩnɩʋ kʋm ni nɩ tɩn
wʋ́ kɩ ba tɩɩna wʋntʋ zaasɩm dɩm wʋnɩ mʋ.»a
5 Yuutu Baŋa-Wɛ dɛɛn naanɩ wɛyuu kʋm
yɩ DƖ lwarɩ-kʋ pa kʋ tigi palalala.
DƖ ta mʋ jarɩ tɩga kam ni maama,
dɩ wǝǝnu tɩlʋ na ŋwɩ tɩ wʋ ka baŋa nɩ tɩn.
DƖ paɩ ka nabiinǝ bam jɩgɩ siun,
sɩ ba taa jɩgɩ ŋwɩa ba ve ka wʋnɩ.
Dɩntʋ na tagɩ kʋlʋ tɩn mʋ tɩntʋ:
6 «Amʋ Baŋa-Wɛ bǝŋi-m mʋ sɩ n pa cɩga taa tʋŋa.
Amʋ mʋ lagɩ a ja n jɩŋa sɩ a taa təli‑m.
A ta wʋ́ tɔgɩ nmʋ baŋa a kɩ ni-gonim dɩ nabiinǝ,
yɩ a pa n ji pooni n nyɩ dwi-gɛ tiinə bam baŋa nɩ.b
7 Nmʋ ma n wʋ́ puri lilwǝ yiǝ,
sɩ n daarɩ n pʋrɩ pɩɩna digə
sɩ balʋ ya na je lim wʋnɩ tɩn nuŋi pooni.
8 Amʋ mʋ yɩ Baŋa-Wɛ. A yɩrɩ dɩm mʋ kʋntʋ!
A nan bá sɛ sɩ nɔɔn-nɔɔnʋ tɔgɩ o joŋi amʋ zulə yam.
Jwǝnǝ dɩ nan bá na amʋ tiə yam dwi.
9 Nii-na! Wǝǝnu tɩlʋ a na wuuri a ta tɩ taanɩ tɩn sɩɩnɩ tɩ kɩ.
Amʋ laan wʋ́ ŋɔɔnɩ wo-dʋnnʋ taanɩ mʋ.
Wǝǝnu tɩntʋ ta na wʋ puli sɩ tɩ kɩ mʋ,
a nan wʋ́ pa á lwarɩ tɩ ni nɩ.»
Leeni-na á zuli Baŋa-Wɛ
10 Leeni-na ləŋ-dʋŋa sɩ á ma á tee Baŋa-Wɛ.
Zɩgɩ-na lʋgʋ baŋa ni maama nɩ á tee‑DƖ.
Abam balʋ na zʋʋrɩ nabwǝǝru wʋnɩ á lɛɛnɩ tɩɩnɩ tɩn,
dɩ wǝǝnu tɩlʋ maama na wʋ nɩnɩʋ kʋm wʋnɩ tɩn,
kʋ wǝli dɩ abam balʋ na zʋʋrɩ nɩnɩʋ ni tɩɩnɩ dɩm nɩ tɩn,
taá zuli-na Baŋa-Wɛ.
11 Kagʋa kam dɩ ka tɩɩnɩ dɩm maama wʋ́ tee‑DƖ dɩ kwǝr-dɩa mʋ,
kʋ wǝli dɩ Kedarɩ tiinə na zʋʋrɩ je sɩlʋ nɩ tɩn.
Balʋ na zʋʋrɩ Siloe tɩʋ nɩ tɩn wʋ́ taa caka dɩ wʋpolo,
yɩ ba din pweeru yuu sɩ ba taa tɔɔlɩ ba yaga dɩ ywəəni.
12 Vərə balʋ na zʋʋrɩ nɩnɩʋ kʋm ni nɩ tɩn
wʋ́ taa zuli Baŋa-Wɛ yɩ ba zǝŋi DƖ yɩrɩ wɛɛnɩ.
13 Kʋ na yɩ Baŋa-Wɛ, DƖ yǝni DƖ nuŋi mʋ
sɩ DƖ kɩ najara nɩ nɔn-babɩa na kɩ te tɩn.
Dɩ jɩgɩ baarɩ nɩnɛɛnɩ cɩ-tarʋ na maa ve cɩ-tɔgɔ te tɩn mʋ.
DƖ lagɩ DƖ kaasɩ tiguri-kaasa mʋ,
DƖ magɩ jɩŋa mʋ ni nɩ, DƖ maa wanɩ DƖ sɩbara.
Baŋa-Wɛ tagɩ o wɩ:
14 «A na pɩɩnɩ a banɩ te tɩn tiini kʋ daanɩ.
A ya ta yɩ cɩmm mʋ taan.
A laan nan ti a yigə mʋ sɩ a taa coosi a yagɩ je maama,
nɩ kaanɩ wʋlʋ na yaarɩ sɩ o lʋ bu yɩ o keeri te tɩn.
15 Amʋ lagɩ a cɔgɩ zwǝǝnu dɩ pweeru mʋ,
yɩ a daarɩ a pa gaarʋ dɩ tweeru maama kwaarɩ tɩ tɩ.
A maa wʋ́ pa bu-tʋlɩ sɩm ləni sɩ ji tɩ-dɩa jəgə mʋ,
yɩ a daarɩ a pa bwi sɩm na bam wɩ.
16 Amʋ lagɩ a vaŋɩ lilwǝ bam mʋ
a pa ba tɔgɩ cwe sɩlʋ ba na maŋɩ ba yǝri tɩn.
A maa wʋ́ pa lim dɩlʋ ba na ve dɩ wʋnɩ tɩn
ji pooni dɩ pa-ba.
Cwe sɩlʋ ya na tigi dɩ gwəənu tɩn
Aá pa palɩsɩ mʋ sɩ pa-ba.
Amʋ wʋ́ yɔɔrɩ a kɩ wǝǝnu tɩntʋ mʋ a pa-ba,
yɩ a bá dʋlɩ-ba a yagɩ.
17 Kʋ nan na yɩ balʋ na salɩ jwǝnǝ yɩra nɩ tɩn,
baá joori kwaga mʋ yɩ ba na ba cavɩɩra.
Nɔɔna bantʋ doŋ yǝni ba tɛ dɩ kamwarʋ tɩlʋ na yɩ ba jwǝnǝ tɩn wɩ:
‹Abam mʋ yɩ dɩ́ wa.› »c
Yisɩrayɛlɩ tiinə bam yɩ zwa-kwarʋ
18 «Abam zwa-kwarʋ tɩm, pʋrɩ-na á zwa sɩ á cəgi!
Abam lilwǝ bam dɩ taa fɔgɩ á nii á naɩ!
19 Lilwe nan daa ba dwe amʋ tɩntʋŋnʋ wʋm.
Zwa-kɔgɔ dɩ nan daa ba dwe wʋlʋ amʋ na tʋŋɩ dɩ a kwǝrǝ tɩn.
Nɔɔn-nɔɔnʋ yiǝ wʋ tiini ya dwe
ya dwǝni wʋlʋ na sɛ amʋ tɩn yiǝ yam.
Amʋ Baŋa-Wɛ tɩntʋŋnʋ wʋm yiǝ yɔɔrɩ ya dwe mʋ kʋ ja gaalɩ.
20 Yisɩrayɛlɩ tiinə bam, abam nɛ wǝǝnu zanzan,
yɩ á wʋ kwe-tɩ á kɩ a yum nɩ.
Abam ma á pʋrɩ á zwa,
á nan wʋ ni kʋlʋkʋlʋ.»
21 Baŋa-Wɛ na zɩgɩ DƖ cɩga wʋnɩ tɩn,
DƖ ya lagɩ sɩ DƖ niə yam taa jɩgɩ yuu dɩ nɩnwaŋa nɔɔna tee nɩ.
22 DƖ nɔɔna bam dʋna nan mʋ wanɩ-ba,
yɩ ba daarɩ ba vrɩ ba wǝǝnu ba ja viiri.
Ba ma li ba maama ba yagɩ goŋ-canluŋu
dɩdaanɩ pɩɩna di wʋnɩ.
Ba na jaanɩ-ba kʋntʋ tɩn,
nɔɔn-nɔɔnʋ daa tǝrǝ sɩ kʋ tu joŋi-ba o yagɩ.
Nɔɔn-nɔɔnʋ tǝrǝ sɩ kʋ tu ta wɩ:
«Pa cwǝŋǝ sɩ ba joori.»
23 Abam wɔɔ mʋ wʋ́ cəgi a taanɩ dɩntʋ?
Kʋ zɩgɩ lele sɩ kʋ taa veǝ,
wɔɔ mʋ laan wʋ́ fɔgɩ o cəgi?
24 Wɔɔ mʋ yəgi Zakɔbɩ dwi dɩm o pa nɔɔna
sɩ ba wanɩ-ba ba vrɩ?
Yisɩrayɛlɩ tiinə bam sɩɩnɩ ba tʋ vɩnvɩrna jɩŋa nɩ mʋ.
Kʋ nan yɩ Baŋa-Wɛ tɩtɩ mʋ kɩ kʋntʋ.
Dɩ́ tusi dɩ́ cɔgɩ Dɩntʋ yigə mʋ.
DƖ nɔɔna bam wʋ sɛ sɩ ba tɔgɩ DƖ cwe sɩm
naa sɩ ba kɩ DƖ niə yam na brɩ te tɩn.
25 Kʋntʋ ŋwaanɩ mʋ DƖ banɩ tiini dɩ fuli dɩ ba,
yɩ DƖ pa ba na cɔgɩm najara baŋa nɩ.
DƖ banɩ dɩm jigi min-vʋgʋ mʋ dɩ li-ba,
yɩ ba ta wʋ ni kʋ kuri.
Dɩ yɔɔrɩ dɩ zwɛ-ba mʋ,
yɩ ba wʋ zaasɩ kǝm dɩm kʋntʋ baŋa nɩ,
sɩ ba kwe-kʋ ba kɩ ba wʋbʋŋa nɩ.