Baŋa-Wɛ wʋ́ joŋi DƖ nɔɔna DƖ yagɩ
43
Zakɔbɩ dwi dɩm na yɩ Yisɩrayɛlɩ tiinə tɩn,Baŋa-Wɛ mʋ naanɩ abam pa á wʋra.
DƖ nan na tagɩ te tɩn mʋ tɩntʋ:
«Yɩ taá fʋna, sɩ a joŋi abam mʋ a pa a tɩtɩ.
A ma bəŋi abam dɩdʋa dɩdʋa dɩ á yɩra.
Kʋntʋ ŋwaanɩ, á yɩ amʋ nyɩm mʋ.
2 Abam na tɔgɩ na-luŋə wʋnɩ mʋ sɩ á bɛ,
amʋ wʋ́ taa wʋ á tee nɩ.
Á nan na tɔgɩ bwi wʋnɩ sɩ á bɛɛ mʋ dɩ,
sɩ na bam bá li abam.
Kʋ nan na yɩ mim wʋnɩ mʋ á tɔgɩ da á ve dɩ,
dɩ bá zwɛ abam.
Dɩ nan bá zaŋɩ bugi-bugi sɩ dɩ di abam.
3 Bɛŋwaanɩ, amʋ mʋ yɩ abam Tu Baŋa-Wɛ dɩm.
A maa yɩ Yisɩrayɛlɩ dwi dɩm Wʋ-poŋo Tu wʋm na yɩ á Vrɩnʋ tɩn.
Amʋ mʋ kwe Ezipi tɩʋ a pa
sɩ abam wanɩ á taá te á tɩtɩ.
A nan ta kwe Kusi dɩ Sabaa tɩɩnɩ dɩm dɩ a pa
sɩ a joŋi abam a yagɩ.
4 Amʋ wʋ́ ga tɩɩnɩ zanzan dɩ nabiinǝ dwi maama
sɩ kʋ pa a vrɩ abam sɩ á taá jɩgɩ á ŋwɩa.
Bɛŋwaanɩ, abam tiini á jɩgɩ kuri á pa-nɩ,
yɩ a tiini a soe abam mʋ.
5 Nan yɩ taá kwarɩ-na fʋʋnɩ, sɩ amʋ wʋ á tee nɩ.
A maa wʋ́ ja á biə bam á zɩgɩ wa-puli seeni a ba,
yɩ a daarɩ a la abam badonnǝ
a ja a nuŋi wa-zʋʋrɩ seeni sɩ a kɩ abam daanɩ.
6 Amʋ wʋ́ ta dɩ jazɩm baŋa seeni tɩɩnɩ dɩm nɩ:
‹Yagɩ a nɔɔna bam sɩ ba viiri!›
A ta wʋ́ ta dɩ jagwiə seeni tɩɩnɩ dɩm nɩ:
‹Yɩ cɩ-na ba yigə.›
Pa-na sɩ a biə bam nuŋi yigə yigə tɩɩnɩ dɩm nɩ ba ba.
Ta pa-na sɩ a bukwa bam dɩ zɩgɩ tɩga baŋa ni maama nɩ ba ba.
7 Bantʋ yɩ amʋ nɔɔna balʋ a na maɩ a yɩrɩ mʋ a bǝ-ba.
A na naanɩ-ba tɩn, a kuri sɩ a tɔgɩ ba baŋa mʋ
a ma na paarɩ-zulǝ.»
8 Nan ja nɔɔna balʋ na jɩgɩ yiǝ yɩ ya ba naɩ,
yɩ ba ta jɩgɩ zwa yalʋ na ba ni tɩn,
n pa ba zɩgɩ amʋ yigə nɩ.
9 Dwiə yam maama nan kikili daanɩ,
kʋ daarɩ sɩ nɔn-biə bam la jəgə dɩdʋa.
Bantʋ wʋnɩ wɔɔ mʋ ŋɔɔnɩ wəənu tɩm kʋntʋ?
Bantʋ wɔɔ mʋ zaasɩ dɩbam dayigə wəənu tɩlʋ na kɩ tɩn?
Ba nan beeri ba maana tiinə,
sɩ ba daarɩ ba brɩ nɩ ba jɩgɩ cɩga.
Ba nan ŋɔɔnɩ sɩ dɩ́ cəgi, sɩ dɩ́ wanɩ dɩ́ ta nɩ:
«Kʋ sɩɩnɩ kʋ yɩ cɩga mʋ!»
10 Baŋa-Wɛ na tagɩ te tɩn mʋ tɩntʋ:
«Nmʋ Yisɩrayɛlɩ dwi dɩm nan mʋ wʋ́ zɩgɩ amʋ cɩga kam kwaga nɩ.
N ma n yɩ a tɩntʋŋnʋ wʋlʋ a na kuri tɩn.
Kʋntʋ mʋ wʋ́ pa n lwarɩ nɩ amʋ mʋ yɩ kʋ tu,
sɩ kʋ pa n kɩ n wʋ-dɩdʋa dɩ amʋ.
Nmʋ ma n wʋ́ ni kʋ kuri nɩ
amʋ mʋ yɩ Wɛ cɩga cɩga.
Wɛ dɩdoŋ ya maŋɩ dɩ tǝrǝ,
sɩ amʋ laan taa wʋra.
Wɛ nan tǝrǝ dɩ na wʋ́ saŋɩ amʋ kwaga sɩ dɩ taa wʋra.
11 Amʋ yɩranɩ mʋ yɩ Baŋa-Wɛ.
Amʋ yigə na lɩ, vrɩnʋ nan daa tǝrǝ.
12 Amʋ mʋ ya goni ni dɩ abam sɩ a joŋi abam a yagɩ,
yɩ a sɩɩnɩ a kɩ a su a ni-gonim dɩm.
Kʋ yɩ amʋ tɩtɩ mʋ,
sɩ kʋ daɩ wɛ-gaa mʋ wʋ á tɩtarɩ nɩ.
Á maa yɩ balʋ na wʋ́ zɩgɩ a cɩga kam kwaga nɩ:
a sɩɩnɩ a yɩ Wɛ cɩga cɩga tɩn mʋ.»
Baŋa-Wɛ na tagɩ kʋlʋ tɩn mʋ kʋntʋ.
13 «Cɩga tɩn, kʋ na maŋɩ kʋ nuŋi faŋa tɩn
dɩ amʋ yɩ Wɛ mʋ cɩga cɩga.
Amʋ na jɩgɩ wʋlʋ dɩ a jɩŋa,
nɔɔn-nɔɔnʋ warɩ kʋ tu sɩ o joŋi o yagɩ.
A nan na cwi kʋlʋ,
nɔɔn-nɔɔnʋ warɩ sɩ o gɔ-kʋ o yagɩ.»
Wɛ wʋ́ duri Yisɩrayɛlɩ tiinə yibwənə
14 Baŋa-Wɛ mʋ yɩ abam Yisɩrayɛlɩ dwi dɩm Wʋ-poŋo Tu wʋm dɩ á Vrɩnʋ. O nan na tagɩ te tɩn mʋ tɩntʋ:
«Abam ŋwaanɩ mʋ a lagɩ a tʋŋɩ jar-kərə sɩ ba li Babilɔnɩ tɩʋ,
sɩ ba daarɩ ba ja kʋ nɔɔna bam ba kalɩ ba ja viiri.
Babilɔnɩ tiinə bam wʋpolo sɔɔ
laan wʋ́ ləri kʋ ji wʋ-cɔgɔ kərə mʋ.
15 Amʋ mʋ yɩ Baŋa-Wɛ dɩm na yɩ abam Wʋ-poŋo Tu tɩn.
A maa yɩ wʋlʋ na naanɩ abam Yisɩrayɛlɩ tiinə bam,
yɩ a ta yɩ á Pɛ.»
16 Baŋa-Wɛ mʋ yɩ dɩlʋ na pɛ
cwǝŋǝ pəni nɩnɩʋ kʋm wʋnɩ,
ka na tigi na-fara bam tɩtarɩ nɩ tɩn.
17 DƖ ma sʋgɩ jar-kərə zanzan kɔgɔ,
dɩ ba jara-kǝm tərikooru, dɩ ba siseŋ-nɔɔna,
pa ba maama tu ba maŋɩ na bam wʋnɩ.
Ba yɔɔrɩ ba tʋ mʋ, sɩ ba daa yɩ zaŋɩ wɛɛnɩ.
Ba maama jilli je mʋ,
nɩ ba na fuli min-zoŋo mim ba dwe te tɩn.
Baŋa-Wɛ na tagɩ te tɩn mʋ tɩntʋ:
18 «Swe-na faŋa wǝǝnu tɩlʋ na kɩ tɩ kɛ tɩn swiə.
Yɩ taá guli-na wo-dwəənu gulə.
19 Nii-na, amʋ lagɩ a kɩ wo-dʋŋʋ mʋ!
Kǝm dɩm nan puli mʋ dɩ wʋra dɩ kɩ.
Abam ba lwarɩ kʋ ni nɩ na?
A lagɩ a pa cwǝŋǝ mʋ pəni kagʋa yuu nɩ,
sɩ bu-tʋlɩ dɩ pəni tɩ-kʋra je sɩm nɩ.
20 Ga-vara bam maama wʋ́ zuli-nɩ,
kʋ wǝli dɩ ga-kakuri, dɩ kukwəəru.
Bɛŋwaanɩ, amʋ wʋ́ pa na taa burǝ kagʋa kam yuu nɩ,
yɩ bu-tʋlɩ dɩ taa tigi da,
sɩ amʋ nɔɔna balʋ a na kuri tɩn nyɔ ba su.
21 Bantʋ mʋ yɩ balʋ a na naanɩ a pa a tɩtɩ
sɩ ba taa leeni ba zuli amʋ tɩn.
22 Zakɔbɩ dwi dɩm na yɩ Yisɩrayɛlɩ tiinə tɩn,
abam nan wʋ bəŋi a yɩrɩ sɩ a wǝli abam.
Á ta wʋ sɛ sɩ kʋ cɛ á yɩra amʋ ŋwaanɩ.
23 Abam wʋ jaanɩ á peeni á ba
sɩ á ma á kɩ zwɛɛm pɛɛra á pa-nɩ.
Á maa wʋ kɩ kaanɩm sɩ á ma á zuli amʋ.
Amʋ wʋ fɩn abam sɩ á ja wʋdiu pɛɛra á ba á pa-nɩ,
naa sɩ á zwɛ wǝǝnu tɩlʋ lwǝm na ywǝmmǝ tɩn á ma á zuli-nɩ.
24 Á wʋ kwe á sǝbiǝ á yəgi tralɩ nugə
sɩ á ma á zuli-nɩ.
Á ta wʋ kwe á vara lara kam á pa-nɩ
sɩ kʋ pa a di ywəəni kʋ ŋwaanɩ.
Abam nan pɛ a yɩra cɛ dɩ á lwarɩm dɩm mʋ,
yɩ á ta pa a yiǝ gigiri dɩ á lwarɩm kikiǝ yam.
25 Dɩ kʋntʋ maama dɩ, amʋ Baŋa-Wɛ yɩranɩ mʋ
yɩ wʋlʋ na saarɩ á lwarɩm dɩm a yagɩ tɩn.
Kʋ nan yɩ amʋ tɩtɩ ŋwaanɩ mʋ a kɩ kʋntʋ.
A nan daa bá guli á lwarɩm dɩm gulə.
26 Pa-na sɩ dɩ́ jeeri dɩ́ ŋɔɔnɩ sɩ dɩ́ maŋɩ daanɩ.
Pa-na sɩ a guli kʋlʋ na kɩ kʋ kɛ tɩn gulə.
Tʋlɩ-na taanɩ dɩm sɩ dɩ́ lwarɩ
á sɩɩnɩ á wʋ á cɩga wʋnɩ na?
27 Pulim nɩ tɩn, á nabaarʋ wʋm dɛɛn wʋ lwarɩm wʋnɩ mʋ.
Á yigǝ tiinǝ bam dɩ ma nuŋi amʋ kwaga nɩ.
28 Kʋntʋ ŋwaanɩ mʋ a lagɩ a pa á kaanɩm tiinə
balʋ na kwɩɩrɩ dɩ ba tɩtʋŋa tɩn di ba cavɩɩra.
A ta wʋ́ yɔɔrɩ a cɔgɩ Yisɩrayɛlɩ dwi tiinə bam,
sɩ nɔɔna maama taa jɩgɩ-ba ba yáala.»