Yisɩrayɛlɩ tiinə yɩ Baŋa-Wɛ nyɩm
44
«Zakɔbɩ dwi dɩm a na kuri a pa a tɩtɩ tɩn, nan cəgi.Yisɩrayɛlɩ dwi dɩm, nmʋ mʋ yɩ a tɩntʋŋnʋ.
2 Amʋ Baŋa-Wɛ mʋ naanɩ‑m a kɩ n nu pugə nɩ,
yɩ a ta wʋ́ wəli‑m.a
Amʋ nan na tagɩ te tɩn mʋ tɩntʋ:
Amʋ tɩntʋŋnʋ Zakɔbɩ, yɩ ta n fʋna.
Bɛŋwaanɩ, a kuri Yisɩrayɛlɩ tiinə bam
sɩ á taá yɩ a nɔn-sonnub mʋ.
3 Amʋ wʋ́ lo na zanzan tɩ-kʋra baŋa nɩ,
pa bu-tʋlɩ taa duri je sɩm kʋntʋ nɩ.
A maa wʋ́ pa a Joro ba á biə baŋa nɩ,
yɩ a daarɩ a kɩ ba yu-yoŋo.c
4 Bantʋ wʋ́ puli nɩ ga-lɛɛrʋ na puli te tɩn mʋ,
dɩ tweeru tɩlʋ na zɩgɩ bwi ni nɩ tɩn.
5 Ba wʋnɩ nɔɔnʋ dɩdʋa wʋ́ ta wɩ:
‹Baŋa-Wɛ mʋ te amʋ›.
Wʋdoŋ dɩ wʋ́ taa jɩgɩ Zakɔbɩ yɩrɩ dɩm,
o ma o bǝi o tɩtɩ.
Wʋdoŋ dɩ maa wʋ́ pʋpʋnɩ o jɩŋa nɩ sɩ:
‹Baŋa-Wɛ nyɩm,›
yɩ o daarɩ o ta wɩ: o nuŋi Yisɩrayɛlɩ dwi dɩm wʋnɩ mʋ.»
Baŋa-Wɛ yɩranɩ maŋɩ dɩ zulə
6 Paŋwa Tu Baŋa-Wɛ yɩ Yisɩrayɛlɩ dwi tiinə bam Pɛ mʋ dɩ ba Vrɩnʋ. DƖ nan na tagɩ te tɩn mʋ tɩntʋ:
«Amʋ mʋ yɩ pulim kam dɩ gurim tu.
Amʋ yigə na lɩ, Wɛ nan daa tǝrǝ.d
7 Wɔɔ mʋ wʋ́ kwe o tɩtɩ o maŋɩ dɩ amʋ?
O na wʋra, sɩ o tɔɔlɩ taanɩ dɩm.
Kʋ tu nan ba o zɩgɩ a yigə nɩ o ta sɩ dɩ́ cəgi.
Kʋ zɩgɩ faŋa kam nɩ a na kuri dwi dɩlʋ sɩ ba taa yɩ a nɔɔna tɩn,
o nan maŋɩ sɩ o ta kʋlʋ na maŋɩ kʋ kɩ tɩn
kʋ wǝli dɩ kʋlʋ na wʋ́ kɩ jwa seeni tɩn sɩ dɩ́ lwarɩ.
Ɛɛn, pa kʋ tu ta wǝǝnu tɩlʋ na bɩɩnɩ tɩn.
8 A nɔɔna bam, yɩ taá pa á yɩra saɩ.
Nan yɩ pa-na fʋʋnɩ ta jɩga-abam.
A wʋ wuuri a ta wǝǝnu tɩm kʋntʋ taanɩ
a brɩ abam mʋ na?
Abam nan mʋ wʋ́ zɩgɩ amʋ cɩga kam kwaga nɩ.
Wɛ dɩdoŋ nan daa mʋ wʋra
yɩ kʋ daɩ amʋ na?
Awo! Piu kʋdoŋ daa tǝrǝ sɩ nɔɔna dalɩ da.
Amʋ yǝri dɩdʋa tɩtɩ ni nɩ.»
Balʋ na mɔɔnɩ wa-lɔɔra tɩn yɩ kafɛ mʋ
9 Balʋ maama na gɔgɩrɩ jwǝnǝ tɩn ba jɩgɩ kuri. Jwǝnǝ yalʋ ba na pa-ya cɩga tɩn dɩ yɩ wo-yɔɔrʋ mʋ. Balʋ na zɩgɩ ya kwaga nɩ tɩn yɩ lilwǝ mʋ, yɩ ba yǝri kʋlʋ wʋnɩ ba na wʋra tɩn. Kʋntʋ ŋwaanɩ baá na ba cavɩɩra.
10 Wɔɔ mʋ bʋŋɩ sɩ o mɔ jwəm o pa dɩ ji o wɛ? Dɩ brɩ dɩ bá pa o na nyɔɔrɩ. 11 Nii-na! Nɔɔnʋ wʋm kʋntʋ dɩ o dwi maama wʋ́ di ba cavɩɩra. Gwarʋ tɩlʋ na kɩ jwǝnǝ tɩn maa yɩ nabiinǝ yɩranɩ. Ba nan maŋɩ sɩ ba ba ba zɩgɩ amʋ yigə nɩ sɩ dɩ́ ŋɔɔnɩ. Fʋʋnɩ yɩranɩ mʋ wʋ́ ja-ba yɩ ba ta di ba cavɩɩra.
12 Luru mʋ yǝni o kwe o yɔrɔ kʋm zɩla o ma o gɔgɩrɩ luu mim wʋnɩ. O ma kwe hama mʋ o magɩ luu kʋm dɩ o dam, sɩ kʋ ji jwəm nyɩnyʋgʋ na yɩ te tɩn. O kana laan maa waɩ yɩ na-nyɔm jɩg-o pa o bwəni yɩ o dam dɩ ti.
13 Gɔgɔ kʋlʋ na sarɩ dɛ tɩn dɩ ma yǝni o maŋɩ daa. O ma bə bibələ daa kam yɩra nɩ sɩ kʋ brɩ jwəm nyɩnyʋgʋ. O laan maa wʋ́ kwe o tɩtʋŋa zɩla o ma o sarɩ daa kam, yɩ o daarɩ o swəli-ka. O ma kɩ ka nyɩnyʋgʋ kʋm pa kʋ lwǝni nabiinu nyɩnyʋgʋ, yɩ kʋ jɩgɩ nabiinu lam dɩm. O laan wʋ́ kwe-ka o vu o zɩgɩ ka digə wʋnɩ.
14 Gɔgɔ kʋm waɩ o kuri dɛ dwi dwi wʋnɩ sɩ o ma o kɩ jwəm dɩm. Oó wanɩ o zʋ kagʋa wʋnɩ o goni Sɛdrɩ tiu o dɩ tɩga nɩ, naa lʋa, naa kantɔŋɔ, naa tiu kʋlʋ maama. Kʋ na daɩ kʋntʋ, o tɩtɩ mʋ wʋ́ jəri tiu, yɩ dʋa laan nɩ kʋ baŋa nɩ pa kʋ bɩ kamunu. 15 Kʋ tu na goni daa kantʋ doŋ, o laan wʋ́ kwe ka cicoro mʋ o ma o wiiri mim, yɩ o daarɩ o kwe ka cicoro o kɩ jwəm. Kʋntʋ tɩn, o tɔgɩ ka cicoro baŋa nɩ o weeri mim, naa o ma o wɔ dɩpɛ. O ta ma kwe ka cicoro kʋm o gɔgɩrɩ jwəm sɩ o taa zulə. 16 O yǝni o twǝri dɛ sɩm wʋnɩ o dwe mim, yɩ o daarɩ o ma mim dɩm o wɔ nwana, pa o dʋnɩ o su. O ta ma yǝni o weeri mim dɩ dɛ sɩm yɩ o wɩ: «Ɛhɛɛn! Nii mim dɩm na lana te! A yɩra yɩ ŋwamm!» 17 Dɛ sɩlʋ na daarɩ tɩn mʋ oó ma o kɩ jwəm. O laan ma yǝni o tiiri dɩ yigə nɩ o zuli-dɩ. O ma loori zǝnǝ dɩ tee nɩ yɩ o wɩ: «Joŋi-nɩ n yagɩ, sɩ nmʋ mʋ yɩ amʋ wɛ.»
18 Nɔɔna bantʋ doŋ nan yǝri kʋlʋkʋlʋ. Ba brɩ ba ba ni wǝǝnu kuri. Ba yiǝ yam kwǝni mʋ pa ya ba naɩ kʋlʋkʋlʋ. Ba wʋbʋŋa dɩ kwaalɩ mʋ dɩ cɩga kam. 19 Ba ba fɔgɩ ba jeeli wǝǝnu. Ba wʋnɩ wʋlʋwʋlʋ ba bʋŋɩ o yi sɩ o ta wɩ: «A kwe da kam cicoro mʋ a ma a dwe mim. A ma wɔ dɩpɛ mim dɩm fʋnyʋgʋ wʋnɩ. A ta wɔgɩ nwana fʋnyʋgʋ dɩm wʋnɩ a dʋnɩ. A nan wʋ́ wanɩ a kwe ka cicoro kʋlʋ na daarɩ tɩn a ma a kɩ jwə-yɔɔ na? Amʋ wʋ́ tiiri a zuli daa mʋ na?»
20 Nɔn-joro kʋntʋ doŋ wʋbʋŋa gan‑o mʋ. Kʋ nyɩ dɩ o ni-wʋdiu yɩ tɩntwarɩm mʋ. O maa warɩ o tɩtɩ o joŋi. O bá ta dɩ o tɩtɩ nɩ: «Nii woŋo kʋlʋ a na ze a jazɩm nɩ tɩn. Kʋ ba jɩgɩ-nɩ kʋ gana mʋ na?»e
Baŋa-Wɛ joŋi DƖ nɔɔna DƖ yagɩ
Baŋa-Wɛ maa wɩ:
21 «Abam Yisɩrayɛlɩ tiinə bam nan guli-na wǝǝnu tɩntʋ gulə.
Bɛŋwaanɩ, nmʋ Zakɔbɩ dwi dɩm yɩ amʋ tɩntʋŋnʋ mʋ.
Amʋ mʋ naanɩ‑m pa n yɩ a tɩntʋŋnʋ.
Yisɩrayɛlɩ tiinə bam, amʋ bá swe abam swiə.
22 A saarɩ á lwarɩm dɩm a pa ya je
nɩ kunkwǝǝnu na duri tɩ kɛ te tɩn mʋ,
naa tɩtɩɩtɩ nyɔnɔ na je te tɩn.
Joori-na á ba amʋ te,
sɩ amʋ mʋ vrɩ abam a pa a tɩtɩ.»
23 Wɛyuu je sɩm maama,
nan ta kaasɩ wʋpolo kaasa!
Tɩga kuri gugwəəru tɩm dɩ,
nan ta magɩ ni!
Pweeru tɩm, dɩ tweeru tɩlʋ maama na wʋ kagʋa wʋnɩ tɩn,
taá chakɩ-na dɩ ywəəni.
Bɛŋwaanɩ, Baŋa-Wɛ mʋ vrɩ Zakɔbɩ dwi dɩm DƖ pa DƖ tɩtɩ,
sɩ DƖ paarɩ-zulǝ yam taa naɩ jaja Yisɩrayɛlɩ tiinə bam tɩtarɩ nɩ.
24 Baŋa-Wɛ yɩ dɩlʋ na vrɩ nmʋ mʋ DƖ pa DƖ tɩtɩ.
Dɩntʋ nan mʋ naanɩ‑m DƖ kɩ n nu pugə nɩ.
DƖ na tagɩ te tɩn mʋ tɩntʋ:
«Amʋ mʋ yɩ Baŋa-Wɛ dɩm na kɩ wǝǝnu maama tɩn.
Amʋ mʋ lwarɩ wɛyuu kʋm a tɩtɩ nɩ
pa kʋ tigi palalala.
A daa ta ma jarɩ tɩga kam ni maama a tiŋi a tɩtɩ nɩ.
25 Amʋ mʋ paɩ vʋra ni-taanɩ jiri kafɛ,
yɩ daarɩ a paɩ sampwəri jwərim dɩm brɩ jaja.
A yǝni a pa swan tiinə joori kwaga mʋ,
sɩ ba yǝno maama taa ba jɩgɩ kuri.
26 Kʋ daarɩ, kʋ na yɩ amʋ tɩtɩ tɩntʋŋna,
a yǝni a pa ba taanɩ jɩgɩ kuri mʋ.
A ta maa kɩ a sui a tɩntʋŋna na brɩ wǝǝnu tɩlʋ tɩn.
Amʋ nan mʋ tɛ Zeruzalɛm tɩʋ taanɩ nɩ:
‹Nɔɔna wʋ́ taa zʋʋrɩ kʋ wʋnɩ.›
Kʋ ta na yɩ Zuda tɩɩnɩ dɩdonnǝ dɩm,
a maa wɩ: ‹Baá fɔgɩ ba lɔ-dɩ mʋ ba zɩgɩ,
pa dɩ di-dwəənu joori tɩ ji sɔ-ŋʋnnʋ.›
27 A maa tɛ dɩ nanɩɩrʋ tɩm nɩ: tɩ na bam wɩ,
sɩ bu-tʋlɩ sɩm dɩ wɩ.
28 Kʋ ta na yɩ Pɛ Sirusi, a maa tɛ o taanɩ nɩ:
‹O yɩ nayɩrʋ mʋ o tʋŋɩ o pa-nɩ.
O maŋɩ sɩ o kɩ o su amʋ wʋbʋŋa na dɛ sɩ o kɩ te tɩn mʋ.›
Wʋntʋ laan maa wʋ́ pa ni o wɩ:
‹Fɔgɩ á lɔ-na Zeruzalɛm tɩʋ kʋm á zɩgɩ.›
O nan wʋ́ ta Wɛ-digə kam taanɩ o wɩ:
‹Cwi-na ka kabri-kuri kam.› »f