Pɛrsɩ tɩʋ pɛ Sirusi taanɩ
45
Baŋa-Wɛ na tagɩ te dɩ DƖ dam tu Sirusi wʋlʋ DƖ na kuri tɩn mʋ tɩntʋ:«Amʋ mʋ jaanɩ n jazɩm sɩ a wəli‑m
sɩ n wanɩ n di tɩɩnɩ zanzan,
sɩ n daarɩ n vrɩ ba pwa bam najara zɩla.
A ta wʋ́ pa‑m dam sɩ n pʋrɩ tɩɩnɩ ni-bwəəru
sɩ n wanɩ dɩ wʋʋ n zʋ,
yɩ ba daa warɩ ba cɩ n cwǝŋǝ.
2 A nan wʋ́ tʋ nmʋ yigə nɩ,
yɩ a palɩsɩ pweeru a tiŋi a pa‑m.
Amʋ wʋ́ bwəri canna ni-bwəəru tɩm sɩ n zʋ,
yɩ a daarɩ a goni tɩ luuru tɩm a dɩ tɩga nɩ.
3 A ta wʋ́ kwe jɩjɩgɩrʋ tɩlʋ ya na tigi lim wʋnɩ tɩn a lɩ a pa nmʋ.
Wǝǝnu tɩlʋ nɔɔna na tiŋi gugwəəru wʋnɩ jwa ŋwaanɩ tɩn mʋ kʋntʋ.
Kʋntʋ mʋ wʋ́ pa n lwarɩ nɩ:
amʋ mʋ yɩ Baŋa-Wɛ dɩm na yɩ Yisɩrayɛlɩ tiinə bam Wɛ tɩn.
A ma bǝŋi-m dɩ n yɩrɩ.
4 Kʋ yɩ a tɩntʋŋnʋ Zakɔbɩ dwi dɩm
na yɩ Yisɩrayɛlɩ tiinə bam a na kuri tɩn ŋwaanɩ mʋ,
a yɔɔrɩ a bəŋi nmʋ yɩrɩ.a
N nan ta wʋ sɛ n pa amʋ.
Dɩ kʋntʋ dɩ a kwe yɩrɩ kamunu mʋ a pa‑m.
5 Amʋ mʋ yɩ Baŋa-Wɛ,
yɩ wɛ dɩdoŋ wʋ wǝli amʋ wʋnɩ.
Amʋ yigə na lɩ, wɛ nan daa tǝrǝ.
Amʋ wʋ́ taa pa‑m dam,
dɩ n na wʋ lwarɩ amʋ tɩn dɩ.
6 Kʋ na zɩgɩ wa-puli seeni sɩ kʋ vu kʋ yi wa-zʋʋrɩ seeni tɩn,
nɔɔna wʋ́ lwarɩ nɩ: Wɛ dɩdoŋ daa tǝrǝ kʋ na daɩ amʋ yɩranɩ.
Amʋ mʋ yɩ Baŋa-Wɛ,
yɩ Wɛ dɩdoŋ wʋ wǝli amʋ wʋnɩ.
7 Amʋ mʋ kɩ pooni yɩ a ta pa lim wʋra.
A maa paɩ nɔɔna yazurə yɩ a jaanɩ cam dɩ a tui.
Amʋ Baŋa-Wɛ nan mʋ paɩ wǝǝnu tɩm kʋntʋ maama kɩ.
8 Wɛyuu kʋm maama, pa dʋa taa nɩ.
Sɩ cɩga taa tʋŋɩ tɩga baŋa nɩ,
nɩ kunkwǝǝnu tɩm na siiri dɩ dʋa te tɩn.
Nan pa tɩga baŋa ni maama dɩ pʋrɩ zanzan,
sɩ vrɩm dɩ nɔn-ŋʋnnɩ ta tɩ nuŋi ka wʋnɩ,
yɩ tɩ yɔɔrɩ tɩ bɩ tɩga kam baŋa nɩ.
Kʋ yɩ amʋ Baŋa-Wɛ mʋ pɛ kʋ kɩ kʋntʋ.
9 Lɛɛrʋ wʋ́ yi wʋlʋ na magɩ kantɔgɔ dɩ o kəru tɩn.
Kʋ tu nyɩ dɩ kacuə mʋ na gwaanɩ dɩ kacwi sɩdonnǝ
yɩ sɩ maama tigi tɩga nɩ tɩn.
Dɔgɔ ba jɩgɩ cwǝŋǝ sɩ kʋ bwe kamɔ-mɔrʋ kʋ wɩ:
‹Bɛɛ mʋ yɩ n kɩ-nɩ tɩntʋ?›
Kʋ bá ta dɩd-o kʋ wɩ:
‹N tɩtʋŋa yam ba lana.›b
10 Lɛɛrʋ wʋ́ yi bu wʋlʋ na wʋ́ ta dɩ o ko o wɩ:
‹Bu dwi dɔɔ mʋ tɩntʋ n lʋga?›
naa wʋlʋ na wʋ́ ta dɩ o nu o wɩ:
‹N vri pugə sɩ n lʋ bɛ woŋo mʋ tɩntʋ?›»
11 Baŋa-Wɛ dɩm na yɩ Yisɩrayɛlɩ dwi dɩm Wʋ-poŋo Tu wʋm
yɩ o ta yɩ ba Kəru tɩn na tagɩ te mʋ tɩntʋ:
«Kʋ na yɩ wǝǝnu tɩlʋ na wʋ́ kɩ jwa seeni tɩn,
bɛɛ mʋ yɩ á bwe amʋ sɩ kʋ tɔgɩ a biə bam seeni?
Bɛɛ mʋ yɩ á brɩ amʋ a na maŋɩ sɩ a kɩ kʋlʋ
dɩ balʋ a tɩtɩ jɩn na kɩ tɩn?
12 Amʋ mʋ kɩ lʋgʋ baŋa
yɩ a daarɩ a naanɩ nabiinǝ a kɩ da.
Amʋ tɩtɩ mʋ kwe a jɩan a lwarɩ wɛyuu kʋm
pa kʋ tigi palalala.
A laan ma tigisi calɩcwɩ sɩm dɩ sɩ kɔgɔ kʋm maama.
13 Kʋ ta na yɩ pɛ Sirusi, a lagɩ a ciŋ‑o mʋ sɩ o kɩ kǝm,
pa cɩga taa tʋŋa.
A maa wʋ́ tʋ o yigə nɩ sɩ a pa o tɩtʋŋa kɩ mwalɩ ya pa‑o.
Oó fɔgɩ o lɔ amʋ tɩtɩ tɩʋ Zeruzalɛm,
yɩ o daarɩ o vrɩ a nɔɔna balʋ ya na wʋ sa-tɩʋ nɩ tɩn
pa ba taa te ba tɩtɩ,
Dɩ kʋ dɩ, o ba lagɩ o tʋŋɩ ŋwɩɩrʋ ŋwaanɩ.»
Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
Yisɩrayɛlɩ tiinə taanɩ
14 Baŋa-Wɛ na tagɩ te tɩn mʋ tɩntʋ:
«Kʋ na yɩ Ezipi tiinə bam, dɩ Kusi tiinə bam,
dɩ Sabiɛn tiinə bam na yɩ nɔn-dɩdwaarʋ tɩn,
bantʋ maama wʋ́ ba ba tʋ ba pa abam.
Ba nan ta wʋ́ ja ba pipiu zɩla dɩ ba jɩjɩgɩrʋ
ba ba ba pa tɩ ji á nyɩm.
Baá ba ba tɔgɩ á kwaga dɩ ba nɛ capʋnnʋ,
yɩ ba kɩ ba tɩtɩ á jɩŋa nɩ.
Ba maama wʋ́ tiiri abam yigə nɩ,
yɩ ba loori abam nɩ:
‹Wɛ mʋ sɩɩnɩ DƖ wʋra abam tee nɩ,
sɩ Wɛ dɩdoŋ nan daa tǝrǝ.› »
15 Yisɩrayɛlɩ tiinə Wɛ dɩm na yɩ dɩ́ Vɩrnʋ tɩn,
nmʋ sɩɩnɩ n yɩ Wɛ dɩlʋ na yǝni DƖ səgi DƖ tɩtɩ tɩn mʋ.
16 Kʋ na yɩ balʋ maama na kɩ jwǝnǝ ba zɩgɩ tɩn,
cavɩɩra wʋ́ di-ba mʋ, yɩ nɔɔna dɩ yáalɩ-ba.
Ba maama lagɩ ba tɔgɩ daanɩ ba na ba lɛɛrʋ mʋ.
17 Kʋ nan na yɩ Yisɩrayɛlɩ tiinə bam,
Baŋa-Wɛ tɩtɩ nan mʋ lagɩ DƖ joŋi-ba DƖ yagɩ.
Á vrɩm dɩm wʋ́ taa yɩ vrɩm cɩga cɩga na wʋra maŋa maama wuu tɩn.
Abam daa bá na á cavɩɩra, yɩ ba nan bá yáalɩ abam,
sɩ kʋ taa ve maŋa na ba ti tɩn.
18 Bɛŋwaanɩ, Baŋa-Wɛ yɩ dɩlʋ na naanɩ wɛyuu maama tɩn mʋ.
Dɩntʋ mʋ yɩ Wɛ cɩga cɩga.
DƖ ma jeeli lʋgʋ kʋm na wʋ́ taa yɩ te tɩn yɩ DƖ kɩ-kʋ.
DƖ ta ma cwi kʋ kuri.
DƖ na naanɩ-kʋ kʋntʋ tɩn,
DƖ wʋ kɩ-kʋ sɩ kʋ taa yɩ yɔɔ yɩranɩ.
DƖ nan kɩ sɩ nɔɔna mʋ taa zʋʋrɩ kʋ wʋnɩ.
Dɩntʋ na tagɩ te tɩn mʋ tɩntʋ:
«Amʋ mʋ yɩ Baŋa-Wɛ.
Wɛ dɩdoŋ daa wʋ wǝli amʋ wʋnɩ.
19 A wʋ tagɩ taanɩ a səgi.
A nan wʋ kɩ na a ni nɩ sɩ a ta taanɩ.
A wʋ tagɩ dɩ Zakɔbɩ dwi dɩm nɩ:
‹Beeri-na amʋ kafɛ ŋwaanɩ.›
Amʋ Baŋa-Wɛ dɩm, a ŋɔɔnɩ cɩga taanɩ mʋ.
A maa na pɛ a ni, dɩ yɩ cɩga mʋ.
20 Nan la-na daanɩ sɩ á ba amʋ te.
Abam dwi-gɛ tiinə balʋ na wanɩ á lu najara yam wʋnɩ tɩn
ba-na á jeeri daanɩ.
Kʋ na yɩ jwǝnǝ yalʋ nɔɔna na mɛ dɛ ba kɩ tɩn,
balʋ na zɩŋɩ-ya ba kaagɩ ba beeri tɩn wʋbʋŋa tǝrǝ.
Bɛŋwaanɩ, ba zuli wa yalʋ na warɩ nɔɔna
sɩ ya joŋi ya yagɩ tɩn mʋ.
21 Ba-na á tʋlɩ taanɩ dɩm sɩ dɩ́ nii kʋlʋ na wʋra tɩn.
Pa-na sɩ ba banɩ daanɩ ba nii ba na wʋ́ ta kʋlʋ tɩn.
Wɔɔ mʋ pɛ ba lwarɩ kʋntʋ woŋo kʋm,
kʋ na zɩgɩ pulə yam nɩ tɩn?
Wɔɔ nan mʋ ya maŋɩ o ŋɔɔnɩ tɩ woŋo faŋa faŋa tɩm?
Kʋ daɩ amʋ Baŋa-Wɛ mʋ na?
Wɛ dɩdoŋ wʋ wǝli amʋ wʋnɩ,
dɩ na jɩgɩ cɩga yɩ dɩ ta yɩ vrɩnʋ.
Amʋ yigə na lɩ, Wɛ nan daa tǝrǝ.
22 Lʋgʋ baŋa je sɩm maama nɔɔna,
pipiri-na á ba amʋ te,
sɩ a joŋi abam a yagɩ.
Bɛŋwaanɩ, amʋ mʋ yɩ Wɛ cɩga cɩga,
sɩ wɛ dɩdoŋ daa tǝrǝ.
23 Amʋ nan dugi dɩ a tɩtɩ yɩrɩ mʋ.
A ni ma puri dɩ da a cɩga kam ŋwaanɩ
dɩ ta kwǝrǝ kalʋ daa na ba kwana tɩn nɩ:
Nabiinǝ maama wʋ́ ba ba kuni nadoonə amʋ yigə nɩ.
Ba maama wʋ́ puri ba niə ba sɛ ba pa amʋ mʋ.c
24 Ba maa wʋ́ ta amʋ taanɩ nɩ:
‹Baŋa-Wɛ yɩranɩ wʋnɩ mʋ
cɩga dɩ dam maama wʋra.› »
Balʋ maama nan na culi Wɛ tɩn
wʋ́ ba DƖ yigə nɩ ba di ba cavɩɩra.
25 Baŋa-Wɛ nan wʋ́ pa Yisɩrayɛlɩ dwi tiinə maama na ba bʋra,
yɩ ba dɩ wʋ́ taa jɩgɩ wʋpolo Wɛ ŋwaanɩ.