Babilɔnɩ tɩʋ jwǝnǝ yam taanɩ
46
Babilɔnɩ tɩʋ wa yam Bɛlɩ dɩ Nebo dam ti,ya nadoonə jɩgɩ tɩga mʋ.
Ya nyɩnyʋrʋ tɩm laan nan yɩ zɩla mʋ
bɩnɛ na zɩŋɩ-ya sɩ veǝ.
Ya maa yɩ zɩlɩ-zana yalʋ na dunǝ tɩn mʋ,
pa vara balʋ na zɩŋɩ-ya tɩn tiini ba bwəni.
2 Jwǝnǝ yam kʋntʋ dɩ balʋ na zɩŋɩ-ya tɩn
nan dɛ daanɩ mʋ ba tiiri tɩga nɩ.
Wa yam warɩ sɩ ya joŋi ya tɩtɩ nyɩnyʋrʋ tɩm ya yagɩ.
Ya maama maŋɩ sɩ nɔɔna ja-ya mʋ
ba ja ba vu sa-tɩʋ yigə yigə.
Baŋa-Wɛ maa wɩ:
3 «Abam Zakɔbɩ dwi tiinə bam, cəgi-na a taanɩ dɩm.
Abam Yisɩrayɛlɩ dwi tiinə balʋ maama ta na daarɩ tɩn,
a yɔɔrɩ a təli abam mʋ,
kʋ zɩgɩ maŋa kalʋ á nu na kwe á pugə tɩn.
Kʋ zɩgɩ ba na lʋgɩ abam maŋa kalʋ tɩn
a ta yɔɔrɩ a jɩgɩ abam a pələ mʋ.
4 Abam na kwɩn maŋa kalʋ
yɩ á yum tɩm su dɩ yu-pwe tɩn,
kʋ ta yɩ amʋ mʋ jɩgɩ abam a niə.
Amʋ mʋ naanɩ abam, yɩ aá taa nii á baŋa nɩ taan.
Amʋ wʋ́ taa təli abam, yɩ a joŋi abam a yaga.
5 Wɔɔ mʋ abam wʋ́ kwe á maŋɩ dɩ amʋ?
Wɔɔ mʋ á wʋ́ ta wɩ: dɩ́ yɩ da-yuudwənnə?
6 Nɔɔna badonnǝ yǝni ba lo ba tampwarʋ wʋʋ səbu-sɩŋa mʋ ba tiŋi tɩga nɩ,
yɩ ba daarɩ ba maŋɩ ba səbu-poŋo tɩm duuni.
Ba laan maa wʋ́ kwe səbu kʋm ba pa luru
sɩ o pipiri-ka sɩ ka ji ba jwəm.
Ba laan maa wʋ́ tiiri dɩ yigə nɩ,
yɩ ba jɩgɩ-dɩ ba zulə.
7 Ba ta wʋ́ kwe-dɩ mʋ ba daŋɩ ba bakalɩ baŋa nɩ,
yɩ ba jɩgɩ-dɩ ba veǝ.
Ba na yɔɔrɩ ba cwi-dɩ mɛ,
dɩ lɛɛrɩ dɩ zɩgɩ da mʋ,
dɩ daa warɩ sɩ dɩ gɔ naga dɩ tɩtɩ nɩ.
Nɔɔnʋ na kaasɩ te o loori-dɩ sɩ dɩ zən‑o,
dɩ warɩ sɩ dɩ ləri kʋlʋkʋlʋ.
Dɩ nan warɩ sɩ dɩ joŋi kʋ tu o cam wʋnɩ dɩ yagɩ.
8 Abam balʋ na soe sɩ á taá vɩn amʋ tɩn,
guli-na tɩntʋ sɩ á wanɩ á kɩ dam á kɩ á kuri nɩ.
Kwe-kʋ á kɩ á yuu nɩ.
9 Guli-na wo-dwəənu tɩlʋ na kɩ faŋa faŋa tɩn.
Amʋ mʋ yɩ Wɛ, yɩ Wɛ dɩdoŋ daa tǝrǝ.
Amʋ mʋ yɩ Wɛ, yɩ kʋlʋkʋlʋ tǝrǝ kʋ na maɩ dɩ amʋ.
10 Pulim kam nɩ mʋ amʋ maŋɩ a ta kʋlʋ na wʋ́ kɩ kʋ guri tɩn.
Kʋ na nuŋi faŋa tɩn mʋ a tagɩ kʋlʋ jwa na wʋ́ ba tɩn.
A maa wɩ: Amʋ wʋbʋŋa yam mʋ wʋ́ yɔɔrɩ ya tʋŋɩ.
A nan wʋ́ kɩ kʋlʋ maama na su a yi tɩn mʋ.
11 A lagɩ a bəŋi nɔɔnʋ mʋ
sɩ o zɩgɩ wa-puli seeni o ba.
O nan wʋ́ fʋʋrɩ o ba mʋ
nɩ kaloŋo na fʋʋrɩ cibiə baŋa nɩ te tɩn.
Kʋ tu wʋ́ nuŋi tɩʋ yigə yigə o ba
o kɩ te maama amʋ na bʋŋɩ sɩ o kɩ tɩn.
Amʋ na jeeli a ja te yɩ a ta kʋlʋ taanɩ tɩn mʋ
a lagɩ a sɩɩnɩ a kɩ.
12 Abam zwabani-nyɩna bam cəgi-na a taanɩ dɩm.
Á soe sɩ á taá pɔɔrɩ á tɩtɩ dɩ a cɩga kam mʋ.
13 Amʋ nan lagɩ a vaŋɩ a cɩga kam mʋ sɩ ka yi abam.
Ka daa daɩ yigə yigə dɩ abam.
Kʋ bá daanɩ sɩ a ma a joŋi abam a yagɩ.
Amʋ wʋ́ pa Siyɔn tiinə bam na vrɩm,
sɩ Yisɩrayɛlɩ tiinə bam taa jɩgɩ paarɩ-zulǝ amʋ ŋwaanɩ.»