Babilɔnɩ tɩʋ wʋ́ cɔgɩ
47
«Nan tu n jəni tɩga nɩ, jəni fogo wʋnɩ,Babilɔnɩ wʋlʋ na nyɩ dɩ kabwəm kajɔŋɔ tɩn!
Jəni tɩga nɩ, nmʋ daa ba jɩgɩ paarɩ yituŋu,
Kalde tiinə bukɔ!
Ba daa ba lagɩ ba ta bei-m nɩ,
‹Babilɔnɩ tɩ-laa›, ‹Babilɔnɩ nɩnwaŋa tɩʋ kʋm›.
2 Nan beeri nɔŋɔ namim sɩ n cʋ muni.
Dwanɩ gar-fɩfala kam na kwǝli n yibiyə tɩn.
Kɔɔrɩ n gɔrɔ sɩ kʋ din n təŋə kam seeni,
yɩ n laan yɛ na n bɛ bu-tʋlɩ sɩm.
3 Nmʋ wʋ́ ta n zɩgɩ kalambolo mʋ,
sɩ nɔɔna na n cavɩɩra.
A lagɩ a mɔ jɩm mʋ nmʋ nɔɔna bam maama baŋa nɩ,
yɩ nɔɔn-nɔɔnʋ bá wanɩ a yigə o cɩ.»
4 Dɩbam Joŋnu wʋm na tagɩ kʋlʋ tɩn mʋ kʋntʋ.
O yɩrɩ mʋ yɩ Paŋwa Tu Baŋa-Wɛ.
O maa yɩ Yisɩrayɛlɩ dwi dɩm Wʋ-poŋo Tu wʋm.
5 «Nmʋ Babilɔnɩ tɩʋ kʋm, ta n je cɩmm,
sɩ n ta ta n wʋ lim wʋnɩ.
Nɔɔna daa bá taa bǝi nmʋ yɩrɩ nɩ:
lʋgʋ baŋa tɩɩnɩ pa-kana.
6 Amʋ banɩ ya mʋ zaŋɩ dɩ a nɔɔna bam,
pa a cɔgɩ-ba nɩ ba daɩ a nɔɔna mʋ tɩn.
A ma kwe-ba a kɩ nmʋ jɩŋa nɩ,
yɩ nmʋ wʋ duri ba ŋwaŋa.
Kʋ na maŋɩ kʋ yɩ ba nankwɩn dɩ,
n yɔɔrɩ n pa kʋ zʋ ba yɩra mʋ,
7 Nmʋ tagɩ n tɩtɩ nɩ mʋ n wɩ:
‹Amʋ wʋ́ yɔɔrɩ a taa wʋra mʋ wuu,
sɩ a taa yɩ pa-kana wʋlʋ paarɩ na bá ti tɩn!›
Nmʋ nan na tagɩ kʋntʋ doŋ tɩn,
n wʋ jeeli wǝǝnu tɩntʋ wʋnɩ,
naa n bʋŋɩ sɩ n nii bɛ jwa mʋ wʋ́ yi nmʋ.
8 Nan fɔgɩ n cəgi a taanɩ dɩm,
nmʋ wʋlʋ na soe paarɩ dim
yɩ n yɔɔrɩ n je mʋ faɩ n ba liə kʋlʋkʋlʋ tɩn.
Nmʋ ma n tɛ n tɩtɩ nɩ n wɩ:
‹Amʋ mʋ wʋra, yɩ a doŋ tǝrǝ.
Amʋ brɩ a bá ji kadəm.
A biə dɩ nan bá tɩ ba daarɩ-nɩ.›
9 Wǝǝnu tɩm kʋntʋ maama nan wʋ́ yi nmʋ bɩdwɩ baŋa nɩ.
Dɛ dɩdʋa mʋ tɩ lagɩ tɩ ba n baŋa.
N biə wʋ́ tɩ, yɩ n ta ji kadəm dɩ.
Lɛɛrʋ tɩntʋ wʋ́ yɔɔrɩ tɩ ba n baŋa mʋ.
N yi-nɛɛrɩ tɩtʋŋa yam dam dɩm dɩ n liri mwaanʋ kikiə yam maama
bá joŋi‑m ya yagɩ.
10 Nmʋ tʋŋɩ kǝm-balwaarʋ mʋ yɩ n ba liǝ.
N ma n tɛ n wɩ: ‹Nɔɔn-nɔɔnʋ ba naɩ a kikiə yam.›
Nmʋ na yǝni n tɛ dɩ n tɩtɩ nɩ:
‹Amʋ mʋ wʋra, yɩ a doŋ tǝrǝ› tɩn,
nmʋ swan yam dɩ n yǝno kʋm mʋ jaanɩ‑m ya je.
11 Lɛɛrʋ lagɩ tɩ da tɩ ba n baŋa mʋ,
yɩ lirǝ tǝrǝ ka na wʋ́ joŋi‑m ka yagɩ.
Cam lagɩ dɩ yi nmʋ mʋ.
Kʋlʋkʋlʋ nan tǝrǝ sɩ n ma-kʋ n ləri dɩ yuu nɩ.
Cɔgɩm dɩlʋ nmʋ na maŋɩ n ba jɩgɩ dɩ wʋbʋŋa tɩn
mʋ lagɩ dɩ da dɩ yi‑m bɩdwɩ baŋa nɩ.
12 Nmʋ nan na laga, ta tan tɔgɩ n liri mwaanʋ kikiə yam,
dɩ n yi-nɛɛrɩ tɩtʋŋa kam dɩ,
nɩ n na maŋɩ n kɩ te kʋ zɩgɩ n nɔn-dʋnnɩ maŋa nɩ tɩn.
Dɛdoŋ nɩ n wʋ́ ba n ji nɔɔnʋ wʋlʋ na jɩgɩ fʋʋnɩ
sɩ kʋ pa n dʋna taa fʋna dɩ nmʋ.
13 Kwiə yalʋ maama nmʋ na joŋi tɩn
pɛ n wʋbʋŋa vugimi.
Pa balʋ na nii calɩcwɩ sɩ ba joŋi swan tɩn
ba ba zɩgɩ nmʋ yigə nɩ.
Ba yǝni ba nii calɩcwɩ sɩm mʋ cana maama
sɩ ba lwarɩ wǝǝnu tɩlʋ jwa na wʋ́ kɩ tɩn.
Nan pa ba joŋi nmʋ ba yagɩ
dɩ cam dɩlʋ na bɩɩnɩ n baŋa tɩn.
14 Bantʋ yɔɔrɩ ba nyɩ dɩ ga-kʋrrʋ mʋ.
Mim nan mʋ lagɩ dɩ di-ba kulə.
Ba warɩ ba tɩtɩ sɩ ba joŋi ba yagɩ,
min-vʋgʋ kʋm na tiini kʋ dana tɩn ŋwaanɩ.
Mim dɩntʋ daɩ dɩlʋ ba na wʋ́ taa jeeri daanɩ dɩ yigə nɩ,
naa sɩ ba jǝni ba twɛ-dɩ ba weeri tɩn.
15 Kʋ na yɩ nmʋ na kɩ n cɩga dɩ balʋ maama
yɩ nmʋ dɩ ba tʋŋɩ daanɩ kʋ nuŋi n biini maŋa nɩ tɩn,
ba ba jɩgɩ nyɔɔrɩ ba pa‑m.
Ba maama tusi cwǝŋǝ mʋ ba ve ba tɩtɩ vəŋə,
pa nɔɔn-nɔɔnʋ tǝrǝ sɩ kʋ tu joŋi‑m o yagɩ.»