Yisɩrayɛlɩ tiinə zwabaniə kam taanɩ
48
Abam Zakɔbɩ dwi tiinə bam, cəgi-na taanɩ dɩntʋ.Abam balʋ ba na jɩgɩ Yisɩrayɛlɩ yɩrɩ ba bǝi
yɩ á kuri nuŋi Zuda dwi dɩm nɩ tɩn, cəgi-na!
Abam mʋ yǝni á maɩ Baŋa-Wɛ yɩrɩ dɩm á du durə,
yɩ á ta yǝni á warɩ Yisɩrayɛlɩ tiinə Wɛ dɩm.
Á nan ba kɩ kʋntʋ cɩga wʋnɩ
naa nɔn-ŋʋnnɩ baŋa nɩ.
2 Dɩ kʋ dɩ, abam brɩ á tɩtɩ mʋ yɩ á wɩ:
á zʋʋrɩ Wɛ tɩtɩ tɩʋ Zeruzalɛm nɩ mʋ.
Á ta brɩ á tɩtɩ nɩ: á tɩɩgɩ Yisɩrayɛlɩ tiinə Wɛ dɩm baŋa nɩ mʋ,
yɩ wʋntʋ yɩrɩ mʋ yɩ Paŋwa Tu Baŋa-Wɛ.
Baŋa-Wɛ maa wɩ:
3 «Faŋa faŋa tɩn amʋ nan wuuri a ta kʋ dɛ nɩ mʋ
wǝǝnu tɩlʋ na lagɩ tɩ kɩ tɩn taanɩ.
A ni ma puri yɩ a pa á lwarɩ kʋlʋ na wʋ́ ba tɩn.
A laan ma da a pa kʋ kɩ,
sɩ a na tagɩ te tɩn sɩɩnɩ kʋ kɩ.
4 Bɛŋwaanɩ, amʋ maŋɩ a ye abam zwa na ba ni taanɩ te tɩn.
Á yi dana dɩ dwe luu na yɩ te tɩn.
Á wʋʋ dɩ maa dana kʋ dwe canna dam.
5 Kʋntʋ ŋwaanɩ mʋ a nan wuuri a ta wǝǝnu tɩntʋ
a brɩ abam kʋ dɛ nɩ,
pa á lwarɩ tɩ ni nɩ yɩ tɩ ta wʋ kɩ.
A kɩ kʋntʋ sɩ abam yɩ wanɩ á ta nɩ:
‹Dɩ́ jwǝnǝ yam mʋ kɩ tɩntʋ ya pa dɩbam.
Kʋ yɩ dɩ́ wa yam nyɩnyʋrʋ dam mʋ pɛ wǝǝnu tɩntʋ kɩ.›
6 Abam maŋɩ á ni a na tagɩ wǝǝnu tɩlʋ tɩn taanɩ.
Nan fɔgɩ-na á guli tɩ gulə,
sɩ á daarɩ á sɛ nɩ tɩ sɩɩnɩ tɩ kɩ.
Amʋ laan nan lagɩ a ta wo-dʋnnʋ taanɩ mʋ a brɩ abam.
Tɩ maa yɩ wǝǝnu tɩlʋ ya na səgi á yigə nɩ yɩ á yəri-tɩ tɩn mʋ.
7 Kʋ yɩ zɩm mʋ amʋ lagɩ a pa tɩ kɩ,
sɩ kʋ daɩ faŋa faŋa wǝǝnu.
Sɩ kʋ loori zɩm tɩn, á ya maŋɩ á wʋ ni tɩ ŋwa.
Kʋntʋ ŋwaanɩ, abam bá wanɩ á ta nɩ:
‹Nii mʋ! Dɩ́ maŋɩ dɩ́ ye tɩ ni nɩ.›
8 Abam nan maŋɩ á wʋ ni wǝǝnu tɩm kʋntʋ ŋwa
sɩ á wanɩ á lwarɩ tɩ kuri.
Kʋ zɩgɩ faŋa kam nɩ tɩn, á yɔɔrɩ á sɩn á zwa mʋ.
Amʋ nan ye á na yɩ nɔn-ŋʋllʋ te tɩn.
Kʋ na nuŋi á lʋra maŋa nɩ tɩn mʋ
á maŋɩ á kɩ zwabaniə.
9 Amʋ na lagɩ sɩ a yɩrɩ taa jɩgɩ zulə tɩn ŋwaanɩ,
aá ja a wʋʋ mʋ.
A maa na lagɩ sɩ nɔɔna taa tee-nɩ tɩn ŋwaanɩ,
a ta wʋ́ pɩɩnɩ a banɩ dɩ abam,
sɩ a yɩ cɔgɩ abam zɔŋ-zɔŋ.
10 Nii-na! A yɔɔrɩ a kwɛ abam mʋ.
Kʋ nan ba nyɩ dɩ ba na kwɛ səbu-poŋo te tɩn.
A pɛ á zʋ yaara wʋnɩ mʋ
sɩ a ma-ya a maŋɩ abam a nii.
11 Kʋ nan yɔɔrɩ kʋ yɩ amʋ tɩtɩ yɩrɩ dɩm ŋwaanɩ mʋ
a lagɩ a tʋŋɩ kʋntʋ doŋ.
Bɛŋwaanɩ, amʋ bá sɛ sɩ a yɩrɩ dɩm maŋɩ bwəru wʋnɩ.
A ta bá sɛ sɩ nɔɔn-nɔɔnʋ tɔgɩ o joŋi amʋ zulə yam.
Yisɩrayɛlɩ tɩʋ tiinə te ba tɩtɩ
12 Cəgi-na, Zakɔbɩ dwi dɩm na yɩ Yisɩrayɛlɩ tiinə bam tɩn.
Kʋ yɩ abam mʋ a bəŋi sɩ á taa yɩ a nyɩm.
Amʋ yɩranɩ nan mʋ maŋɩ a wʋra.a
A maa yɩ pulim tu dɩ kweelim tu.
13 Amʋ tɩtɩ mʋ kwe a jɩŋa a ma a cwi lʋgʋ kʋm kuri.
Amʋ ta mʋ lwarɩ wɛyuu kʋm dɩ a jazɩm dɩm,
pa kʋ tigi palalala.
A na yǝni a bəŋi tɩntʋ maama,
tɩ maama wʋ́ zaŋɩ wɛɛnɩ mʋ tɩ taa zɩga.b
14 Á maama nan la-na á kɩ daanɩ
sɩ á cəgi a taanɩ dɩm:
Jwǝnǝ yam wʋnɩ, jwəm dɔɔ mʋ wuuri dɩ ta wǝǝnu tɩntʋ taanɩ?
Amʋ Baŋa-Wɛ nan na maŋɩ a goni ni dɩ wʋlʋ sɩ o tʋŋɩ o pa-nɩ tɩn
mʋ wʋ́ kɩ a na bʋŋɩ sɩ a kɩ te Babilɔnɩ tiinə bam yɩra nɩ tɩn.
Kʋ tu nan wʋ́ sɩɩnɩ o na dam sɩ o tʋŋɩ cam ba yɩra nɩ.
15 Amʋ tɩtɩ mʋ yɔɔrɩ a ta kʋntʋ.
Amʋ mʋ bəŋi Sirusi,
yɩ a na tʋŋ-o sɩ o kɩ kʋlʋ tɩn wʋ́ sɩɩnɩ kʋ kɩ.
16 Nan fʋfɔ á yi-na sɩ á cəgi a taanɩ dɩntʋ:
Kʋ na zɩgɩ pulim kam nɩ tɩn,
a wʋ kɩ na a ni nɩ, yɩ a ŋɔɔnɩ dɩ abam.
Wǝǝnu tɩm na puli tɩ kɩ tɩn, dɩ a maŋɩ a wʋra mʋ.»
Lele kʋntʋ, Yuutu Baŋa-Wɛ dɛ DƖ Joro baŋa nɩ mʋ DƖ tʋŋɩ-nɩ.
17 Baŋa-Wɛ dɩm na yɩ Yisɩrayɛlɩ dwi dɩm Wʋ-poŋo Tu wʋm
yɩ DƖ ta kwǝri DƖ yɩ á Vɩrnʋ tɩn kwǝrǝ mʋ tɩntʋ:
«Amʋ mʋ yɩ abam Tu Baŋa-Wɛ dɩm.
A nan yǝni a brɩ abam á na wʋ́ kɩ te
á na nyɔɔrɩ á ŋwɩa wʋnɩ tɩn mʋ,
yɩ a daarɩ a tʋ á yigə nɩ a brɩ abam cwə-laa sɩ á tɔgɩ-ka.
18 Abam ya na maŋɩ á kɩ á tɔgɩ niə yalʋ a na pɛ abam tɩn,
á yaá taa jɩgɩ bɩcar-zuru,
nɩ bu-tʋla na na duri barɩ-barɩ te tɩn mʋ.
Á ta wʋ́ taa zɩgɩ á cɩga wʋnɩ
nɩ nɩnɩʋ na-woro kʋm na pɛɛlɩ te tɩn mʋ.c
19 Tɩntʋ wɛɛnɩ á dwi dɩm yaá puli zanzan
nɩ nɩnɩʋ ni kasʋlʋ na daga te tɩn.
A yaá taa yɩrɩ-ba sɩ ba dwi dɩm daa yɩ ti,
sɩ nɔɔn-nɔɔnʋ yɩ pa ba je amʋ yigə nɩ.»
20 Laan nuŋi-na Babilɔnɩ tɩʋ kʋm nɩ!
Duri-na á daarɩ Babilɔnɩ tiinə bam!d
Nan ta tɔɔlɩ dɩdaanɩ kwər-dɩa je maama nɩ
yɩ á kɩ wʋpolo kʋ ŋwaanɩ.
Ta-na sɩ lʋgʋ baŋa je sɩm maama ni nɩ:
«Baŋa-Wɛ mʋ joŋi DƖ tɩntʋŋnʋ Zakɔbɩ dwi dɩm DƖ yagɩ.»
21 DƖ na tɔgɩ ba yigə yɩ ba beeri kagʋa yuu nɩ tɩn,
na-nyɔm wʋ jaanɩ-ba.
DƖ dɛɛn pɛ na mʋ nuŋi piu yɩra nɩ yɩ ba nyɔ.
DƖ yɔɔrɩ DƖ lɔ piu kʋm mʋ,
pa na ta ba cuurə.e
22 Baŋa-Wɛ nan na tagɩ te tɩn mʋ tɩntʋ:
«Nɔn-balwaarʋ bá fɔgɩ ba na bɩcar-zuru.»