Baŋa-Wɛ tɩntʋŋnʋ wʋm taanɩ
49
Abam vərə balʋ na zʋʋrɩ nɩnɩʋ kʋm ni nɩ yigə yigə tɩn,cəgi-na a taanɩ dɩm.
Baŋa-Wɛ maŋɩ DƖ kuri-nɩ mʋ yɩ ba laan lʋ-nɩ.
DƖ ma lɩ-nɩ a nu pugə wʋnɩ,
yɩ DƖ bəŋi a yɩrɩ sɩ a ji DƖ tɩntʋŋnʋ.
2 Dɩntʋ ma pa a ni-taanɩ nyɩ dɩ sʋ-lɔŋɔ
kʋlʋ ni na di lanyɩranɩ tɩn.
DƖ maa jɩgɩ-nɩ DƖ ja-kukoro nɩ.
A ta nyɩ dɩ taŋa cɩnɩ dɩlʋ DƖ na fɔgɩ DƖ kwɛ tɩn mʋ.
DƖ ma kɩ-nɩ DƖ cɩkɔgɔ wʋnɩ DƖ səgi.
3 DƖ tagɩ dɩ amʋ mʋ DƖ wɩ:
«Yisɩrayɛlɩ dwi dɩm, nmʋ yɩ amʋ tɩntʋŋnʋ mʋ,
sɩ n pa a paarɩ-zulǝ yam taa naɩ jaja.»
4 Amʋ laan maa wɩ: «Amʋ yɔɔrɩ a tʋŋɩ tɩtʋŋ-zɛɛra mʋ.
A na mɛ a dam a kɩ kʋlʋ maama tɩn ba jɩgɩ kuri.»
Baŋa-Wɛ yɩranɩ nan mʋ wʋ́ pa a na a tɩtʋŋa yam nyɔɔrɩ.
Dɩntʋ mʋ wʋ́ pa-nɩ ŋwɩɩrʋ tɩlʋ na maŋɩ tɩn.
5 Baŋa-Wɛ mʋ naanɩ-nɩ DƖ kɩ a nu pugə nɩ
sɩ a laan ji DƖ tɩntʋŋnʋ.a
DƖ ma tiŋi-nɩ sɩ a ja Zakɔbɩ dwi dɩm na yɩ Yisɩrayɛlɩ tiinə bam tɩn
a joori a ba a kɩ DƖ jɩŋa nɩ.
Kʋ nan yɩ a Tu Baŋa-Wɛ wʋm mʋ kɩ dam o kɩ a kuri nɩ,
sɩ kʋ pa a na zulə o yigə nɩ.
6 Baŋa-Wɛ tagɩ DƖ wɩ:
«Nmʋ na yɩ amʋ tɩntʋŋnʋ tɩn,
n jɩgɩ tɩtʋŋ-farɩ mʋ sɩ n kɩ.
Nmʋ wʋ́ ja Yisɩrayɛlɩ dwi tiinə balʋ ta na daarɩ tɩn
n joori n pa ba zɩgɩ dɩ dam,
yɩ kʋ daɩ kʋntʋ yɩranɩ mʋ nń kɩ.
Nmʋ ta wʋ́ ji pooni n nyɩ dwi-gɛ tiinə bam baŋa nɩ,
sɩ n wanɩ n pa nabiinǝ na vrɩm lʋgʋ baŋa je maama nɩ.»b
7 Baŋa-Wɛ dɩm na yɩ Yisɩrayɛlɩ dwi dɩm Wʋ-poŋo Tu wʋm
yɩ DƖ ta kwǝri DƖ yɩ á Vɩrnʋ tɩn tagɩ tɩntʋ mʋ
dɩ wʋlʋ lʋgʋ baŋa nɔɔna na gooni yɩ ba ta cul‑o,
yɩ o tʋŋɩ o pa ba tɩɩnɩ dɩm dɩdɛɛra tɩn.
Baŋa-Wɛ tagɩ dɩ kʋ tu DƖ wɩ:
«Pwa laan na nɛ nmʋ,
baá zaŋɩ wɛɛnɩ mʋ ba sɛ ba pa‑m.
Dɩdɛɛra dɩ na nɛ nmʋ, baá tiiri n yigə nɩ mʋ.
Ba nan wʋ́ kɩ kʋntʋ Baŋa-Wɛ na yɩ cɩga tu tɩn ŋwaanɩ mʋ.
Wʋntʋ nan mʋ yɩ Yisɩrayɛlɩ dwi dɩm Wʋ-poŋo Tu wʋm,
yɩ o kuri nmʋ sɩ n tʋŋɩ n pa‑o.»
Yisɩrayɛlɩ tiinə bam wʋ́ joori sɔŋɔ
8 Baŋa-Wɛ na tagɩ te tɩn mʋ tɩntʋ:
«Maŋa kam na yiǝ sɩ a kɩ abam yu-yoŋo,
a laan wʋ́ ləri á wɛ-loro kʋm.
Dɛ dɩm na yi sɩ a vrɩ abam a yagɩ tɩn,
amʋ wʋ́ zǝni abam.
Aá taa jɩgɩ abam kəŋkəŋ
sɩ a tɔgɩ abam baŋa a goni ni dɩ nɔɔna.
Á ta wʋ́ pa á tɩga kam fɔgɩ ka ji tɩ-ŋʋŋa,
yɩ á daarɩ á pɔɔrɩ je sɩlʋ na cɔgɩ tɩn
sɩ nɔɔna joori ba taa zʋʋrɩ da.c
9 Abam wʋ́ ta dɩ balʋ ba na kɩ pɩɩna digə nɩ tɩn nɩ:
‹Nuŋi-na á viiri zaanɩ!›
Sɩ kʋ na yɩ balʋ na je lim wʋnɩ tɩn,
á wʋ́ ta dɩ ba nɩ: ‹Ba-na pooni yigə nɩ!›
Ba na maa joorə, baá na ba ni-wʋdiu cwǝŋǝ yuu nɩ,
yɩ ba di ba su ba wʋbʋŋa pweeru je nɩ dɩ.
10 Kana dɩ na-nyɔm bá ja-ba.
Wɩa, dɩ kagʋa dʋ-viu kʋm dɩ bá yaarɩ-ba.
Bɛŋwaanɩ, ŋwaŋa Tu Wɛ dɩm mʋ wʋ́ da ba yigə,
yɩ DƖ kalɩ-ba DƖ vu buli-yiə na wʋ mɛ tɩn sɩ ba taa nyɔa.d
11 Amʋ lagɩ a pipiri pweeru je sɩm maama mʋ
sɩ sɩ ji pɩmpala,
A ta wʋ́ pa cwə-farɩ pəni sɩ a nɔɔna bam da da ba kɛ.
12 Nii-na! A nɔɔna bam wʋ́ nuŋi sa-tɩɩnɩ yigə yigə
ba joori ba ba ba tɩtɩ tɩʋ.
Ba badaara wʋ́ nuŋi jazɩm baŋa seeni tɩɩnɩ dɩm mʋ,
yɩ badonnǝ dɩ nuŋi wa-puli seeni ba ba.
Ba babam dɩ maa wʋ́ nuŋi Siyɛnɩe laŋa kam ba joori ba ba.»
13 Wɛyuu kʋm nan ta kaasɩ dɩ wʋpolo!
Tɩga baŋa ni maama dɩ taa di ywəəni!
Pweeru je sɩm dɩ ta kaasɩ wʋpolo kaasa!
Bɛŋwaanɩ, Baŋa-Wɛ mʋ paɩ DƖ nɔɔna bam bɩcarɩ tigə,
yɩ DƖ daarɩ DƖ duri ba ŋwaŋa ba yaara yam wʋnɩ.
14 Dɩ kʋ dɩ, Siyɔn tɩʋ kʋm ta tagɩ mʋ kʋ wɩ:
«Amʋ Tu Baŋa-Wɛ dɩm yagɩ-nɩ,
yɩ DƖ swe amʋ swiə.»
15 «Kaanɩ wʋ́ swe o bu wʋlʋ na jɩg-o o ŋɔgɩ tɩn swiə
sɩ o daa yɩ ja bu wʋlʋ o tɩtɩ na lʋgɩ tɩn ŋwaŋa na?
Wʋntʋ nan na maŋɩ o swe o bu wʋm swiə dɩ,
amʋ Baŋa-Wɛ brɩ a bá swe nmʋ ni nɩ.
16 Nii mʋ! Amʋ bəgi n yɩrɩ dɩm
a tiŋi a jataala wʋnɩ mʋ.
A nan bá fɔgɩ a swe nmʋ kabri sɩm na cɔgɩ tɩn ni nɩ.
17 Nmʋ biə bam wʋ́ taa laga sɩ ba joori ba ba lɩla.
Kʋ nan na yɩ balʋ ya na yɔɔrɩ ba cɔgɩ‑m tɩn,
bantʋ wʋ́ viiri ba daarɩ‑m.
18 Kwǝni n yuu sɩ n nii je maama nɩ.
N biə bam maama maa tɔgɩ daanɩ ba bɩɩnɩ n te.»
Baŋa-Wɛ ta ma ta DƖ wɩ:
«Amʋ na yɩ Ŋwɩa Tu Wɛ dɩm tɩn,
kʋ yɩ cɩga mʋ nɩ nmʋ yi wʋ́ su n biə bam,
nɩ ba yɩ nɩnwaŋa zwannʋ kaanɩ na lagɩ o zʋ barʋ
yɩ o kwe-tɩ o kɩ o ban nɩ te tɩn mʋ.
19 Nɔɔna dɛɛn cɔgɩ nmʋ je sɩm maama
pa n nɔn-biə bam duri ba daarɩ‑m,
yɩ n laan zɩgɩ di-dwəənu yɩranɩ.
Kʋ nan na wʋ́ taa yɩ te tɩn,
nmʋ wʋ́ ba n tan pɩɩna n pa n nɔɔna bam,
ba na wʋ́ taa daga ba dwe n jam tɩn ŋwaanɩ.
Balʋ dɩ ya na cɔgɩ nmʋ tɩn wʋ́ lagɩ je ba vu yigə yigə.
20 Biə balʋ ba na lʋgɩ yɩ ba wʋ sa-tɩʋ nɩ tɩn wʋ́ joori
yɩ ba ta pa kʋ zʋ n zwa nɩ:
‹Dɩ́ tɩga kantʋ tiini ka muri dɩ́ zʋʋrɩm.
Nan beeri tɩga n wǝli da n pa dɩbam
sɩ dɩ́ taa zʋʋra.›
21 Nmʋ laan ma n wʋ́ ta n tɩtɩɩ nɩ n wɩ:
‹Bɛɛ mʋ kɩ yɩ a na bu-kɔgɔ kʋntʋ maama?
Ba dɛɛn gʋ a biə bam zanzan mʋ najara wʋnɩ,
yɩ ba zəli balʋ na daarɩ tɩn
pa ba vu sa-tɩʋ yigə yigə.
A maa nyɩ dɩ ka-dʋgʋ daa na warɩ biə ka lʋ tɩn.
Sɩ wɔɔ nan mʋ kɔnɩ biə bantʋ maama?
Amʋ ya yɩ a yɩranɩ mʋ.
Wɔɔ mʋ lʋgɩ biə bam kʋntʋ o pa-nɩ?› »
22 Yuutu Baŋa-Wɛ na tagɩ te tɩn mʋ tɩntʋ:
«Nii mʋ! Amʋ lagɩ a zǝŋi a jɩŋa wɛɛnɩ mʋ
a bəŋi dwi-gɛ tiinə.
A maa wʋ́ zǝŋi drapoo wɛɛnɩ,
sɩ nɔɔna bam maama lwarɩ kʋ ni nɩ.
Bantʋ wʋ́ pəli n biə bam ba ja ba ba ba pa nmʋ,
bəkəri dɩ bɩsankam maama.
23 Tɩɩnɩ dɩdonnǝ pwa mʋ wʋ́ joŋi n biə bam ba kɔnɩ.
Ba bukwa wʋ́ pa-ba yɩlɩ sɩ ba taa ŋɔga.
Baá tiiri nmʋ yigə nɩ sɩ ba yibi sɩm ja tɩga.
Ba maa wʋ́ dəlimi nmʋ napra kuri kasʋlʋ.
Nmʋ dɩ n biə bam laan maa wʋ́ lwarɩ nɩ:
amʋ mʋ yɩ Baŋa-Wɛ.
Balʋ tɩɩna na wʋ amʋ wʋnɩ tɩn bá fɔgɩ ba na ba cavɩɩra.»
24 Nɔɔna waɩ ba vrɩ nɔn-babɩa jɩŋa wǝǝnu na?
Nɔn-vɩrnʋ nan na jaanɩ gambɛ sɩ ba taa yɩ o nyɩm,
ba waɩ ba bwǝli-ba ba yagɩ na?
25 Baŋa-Wɛ nan na tagɩ kʋlʋ tɩn mʋ tɩntʋ:
«Baá wanɩ ba vrɩ nɔn-babɩa gambɛ o tee nɩ ba yagɩ.
Ba ta wʋ́ wanɩ ba joŋi wǝǝnu nɔn-vɩrnʋ dɩ tee nɩ.
Kʋ nan na yɩ balʋ na dwəni dɩ nmʋ tɩn,
amʋ tɩtɩ mʋ wʋ́ dwǝni dɩ ba,
yɩ a daarɩ a joŋi n biə bam a yagɩ.
26 Kʋ ta na yɩ balʋ na bɛɛsɩ‑m tɩn,
a lagɩ a pa ba taa jɩgɩ daanɩ ba gʋɩ mʋ.
Ba maa wʋ́ mɩ dɩ nɔn-gʋra kikiə,
sɩ kʋ taa nyɩ dɩ ba nyɔ jana mʋ ba sui.
Nabiinǝ maama laan maa wʋ́ lwarɩ nɩ:
amʋ Baŋa-Wɛ mʋ yɩ abam Vɩrnʋ wʋm.
A maa yɩ Zakɔbɩ dwi tiinə Dam maama Tu wʋm,
yɩ a ta yɩ á Joŋnu wʋm.»