Yisɩrayɛlɩ tiinə bam tusi
50
Baŋa-Wɛ na tagɩ te tɩn mʋ tɩntʋ:«Kʋ na yɩ cɩga nɩ amʋ zəli abam nu pa o viiri,
tɔnɔ kʋlʋ na brɩ nɩ a yag-o tɩn nan bɛ?
Á nan bʋŋɩ nɩ: a yəgi abam a pa vərə
sɩ a ma a ŋwɩ a jɩnɩ mʋ na?
Kʋ nan yɩ á tɩtɩ tusim ŋwaanɩ mʋ
kʋ kɩ abam kʋntʋ doŋ.
Kʋ ta yɩ á nu lwarɩm ŋwaanɩ mʋ
a zǝl-o a yagɩ yigə yigə.
2 A ya na tu sɩ a joŋi abam a yagɩ tɩn,
bɛɛ mʋ yɩ nɔɔn-nɔɔnʋ wʋ jeeri-nɩ?
A na bəŋi abam yɩrɩ maŋa kalʋ tɩn,
bɛŋwaanɩ mʋ á wʋ sɛ a beeri dɩm?
A dam mʋ muri,
pa a warɩ abam sɩ a vrɩ a yagɩ na?
A dam dɩm nan ti mʋ,
pa a warɩ sɩ a joŋi abam na?
A yɔɔrɩ a pa ni mʋ, yɩ nɩnɩʋ wʋ na bam wɩ.
A ma daarɩ a pipiri bwi sɩ sɩ ji kagʋa.
Kale ma da kʋ ŋwaanɩ ya pɔ,
na na tǝrǝ sɩ sɩ nyɔ tɩn ŋwaanɩ.
3 Amʋ mʋ waɩ a pa wɛyuu kʋm maama kɩ tim,
nɩ nɔɔnʋ na zʋ gwar-zɩnzwara o ma keeri luə te tɩn.»
Wɛ tɩntʋŋnʋ wʋm taanɩ
4 Yuutu Baŋa-Wɛ mʋ pɛ-nɩ cwǝŋǝ sɩ a taa ŋɔɔnɩ a pa‑DƖ.
DƖ maa yǝni DƖ pa-nɩ swan taanɩ sɩ a ta,
sɩ balʋ na bwəni tɩn joori ba na dam.
Tɩtɩɩtɩ maama nɩ, DƖ yǝni DƖ zaŋɩ-nɩ dɔɔm wʋnɩ mʋ.
DƖ ma pʋrɩ a zwa sɩ a ta cəgə,
nɩnɛɛnɩ karabiə na maŋɩ sɩ ba ta cəgi tɩte tɩm.
5 Yuutu Baŋa-Wɛ tɩtɩ mʋ pʋrɩ a zwa
sɩ a cəgi DƖ taanɩ.
Amʋ dɩ maa wʋ kɩ zwabaniə dɩ DƖ.
A nan wʋ pipiri a viiri a daarɩ‑DƖ.
6 A yɔɔrɩ a kwe a kwaga mʋ
a pa balʋ na jɩgɩ-nɩ ba magɩ tɩn.
A ma guni a pʋpɔŋɔ
a pa balʋ na jɩgɩ a twana ba vaŋɩ ba vuuri tɩn.
Ba ta na jɩgɩ-nɩ ba twɩa,
yɩ ba twɩ lileeru ba yagɩ a yɩra nɩ tɩn,
amʋ wʋ kwǝli a yibiyə ba yigə nɩ.a
7 Yuutu Baŋa-Wɛ na wǝli amʋ tɩn ŋwaanɩ,
amʋ yuu bá fɔgɩ kʋ yáalɩ.
Kʋntʋ ŋwaanɩ a nan jɩgɩ baarɩ sɩ a zɩgɩ,
a na ye nɩ a bá di a cavɩɩra tɩn ŋwaanɩ.
8 Wɛ mʋ zɩgɩ amʋ kwaga nɩ,
yɩ Dɩntʋ wʋ́ pa a na a bʋra.
Wɔɔ daa mʋ wʋra sɩ o saŋɩ-nɩ o wɩ a cɔgɩ?
Kʋ tu nan ba sɩ dɩ́ jeeri daanɩ!
Wɔɔ mʋ wʋra sɩ o bwɛ-nɩ?
Kʋ tu ba sɩ o zɩgɩ a yigə nɩ!
9 Yuutu Baŋa-Wɛ zəni-nɩ mʋ.
Wɔɔ nan mʋ wʋra sɩ o di bʋra o vanɩ-nɩ?
Balʋ na culi-nɩ tɩn maama wʋ́ cɔgɩ mʋ ba ti,
nɩ tʋ́a na mugi gɔrɔ maama te tɩn.
10 Abam maama wʋnɩ wɔɔ mʋ kwarɩ Baŋa-Wɛ
yɩ o nɩgɩ DƖ tɩntʋŋnʋ wʋm?
Wʋlʋ nan na ve lim wʋnɩ,
yɩ pooni tǝrǝ o tee nɩ,
sɩ kʋ tu kɩ o tɩɩna o Tu Baŋa-Wɛ yɩrɩ dɩm nɩ,
sɩ o daarɩ o salɩ DƖ yɩra nɩ.
11 Kʋ nan na yɩ abam balʋ maama na tarɩgɩ min-mɔɔla tɩn,
fɔgɩ-na á cɩ á tɩtɩ,
dɩ á na laŋɩ mim dɩlʋ á pa á tɩtɩ tɩn.
Taá ve-na á mim dɩm á na tarɩgɩ tɩn pooni wʋnɩ.
Nan lwarɩ-na nɩ: amʋ lagɩ a ba a kɩ tɩntʋ mʋ á yɩra nɩ:
Á wʋ́ ba á pəni tɩga nɩ yɩ kʋ tiini kʋ ni abam zanzan.