Baŋa-Wɛ wʋ́ zǝni DƖ nɔɔna
Baŋa-Wɛ maa wɩ:
51
«Abam balʋ na lagɩ sɩ cɩga taa tʋŋa,yɩ á kwarɩ Baŋa-Wɛ tɩn,
cəgi-na a taanɩ dɩm.
Kwəni-na á nii piu kʋlʋ ba na sarɩ abam ba nuŋi kʋ yɩra nɩ tɩn.
Kʋ maa yɩ goŋo kʋlʋ ba na kʋgɩ yɩ ba lɔɔnɩ abam kʋ wʋnɩ tɩn.
2 ɡuli-na á nabaarʋ Abraham gulə,
dɩ o kaanɩ Sara gulə.
Abam nuŋi bantʋ dwi dɩm wʋnɩ mʋ.
Amʋ nan na bəŋi Abraham sɩ o ji a nyɩm maŋa kalʋ nɩ tɩn,
dɩ o ta wʋ nɛ dwi dɩ dɩdʋa dɩ.
A laan ma kɩ o yu-yoŋo pa o biə kɔgɔ gaalɩ.
3 Baŋa-Wɛ wʋ́ pa Siyɔn tɩʋ tiinə bam bɩcarɩ zuri.
DƖ maa wʋ́ fɔgɩ DƖ nii kʋ di-dwəənu tɩm baŋa nɩ.
DƖ lagɩ DƖ pa tɩʋ kʋm kagʋa kam taa yɩ nɩ Edɛn tweeru kara kam na lana te tɩn mʋ.
Ka wʋ́ taa yɩ nɩ Baŋa-Wɛ gaarɩ dɩm na yɩ te tɩn mʋ.
Wʋpolo zanzan wʋ́ taa wʋ dáanɩ,
yɩ baá taa bagɩ le-kǝm le ba yagɩ je maama.
4 Amʋ nɔɔna bam, cəgi-na a taanɩ dɩm.
Amʋ tɩtɩ nɔɔna bam, pʋrɩ-na á zwa!
Amʋ wʋ́ pa a zaasɩm dɩm yi nɔɔna maama.
A ta wʋ́ pa a cɩga kam taa tʋŋa,
sɩ lʋgʋ baŋa dwi maama na pooni.
5 A ti a yigə sɩ a bʋrɩ cɩga bʋra a pa nɔɔna,
sɩ a daarɩ a joŋi-ba a yagɩ lɩla.
A ta wʋ́ di dwi tiinə bam maama taanɩ.
Balʋ na zʋʋrɩ nɩnɩʋ kʋm ni nɩ tɩn
dɩ wʋ́ taa tɩɩnɩ amʋ mʋ,
sɩ a ba a ma a dam dɩm a vrɩ-ba.
6 Kwəni-na á yiǝ á nii wɛyuu kʋm,
sɩ á daarɩ á tiiri á nii tɩga kam maama nɩ.
Wɛyuu kʋm nan lagɩ kʋ je,
nɩ nyʋa na yǝni ka zaŋɩ tʋgɩ-tʋgɩ
yɩ ka je te tɩn mʋ.
Tɩga kam baŋa dɩ maa wʋ́ zarɩmɩ,
nɩ gɔrɔ na zarɩmɩ te tɩn.
Balʋ na zʋʋrɩ ka wʋnɩ tɩn wʋ́ tɩ,
nɩ nanjwɛ na tʋ te tɩn mʋ.
Kʋ nan na yɩ a na vrɩ nɔɔna a yagɩ te tɩn,
dɩntʋ wʋ́ taa wʋra mʋ wuu.
A cɩga kam dɩ wʋ́ taa tʋŋa taan,
ka bá fɔgɩ ka ti.a
7 Abam balʋ na ye cɩga tɔgɩm
yɩ á jɩgɩ amʋ niə yam á wʋbʋŋa nɩ tɩn,
nan cəgi-na a taanɩ dɩm.
Yɩ taá fʋna-na dɩ nɔɔna na jɩgɩ abam ba lwɛ te tɩn.
Nan yɩ pa-na sɩ ba tʋrʋ tɩm daanɩ abam.
8 Bɛŋwaanɩ, tʋ́a mʋ lagɩ ka mu-ba ka ti,
nɩ kɩnkaa na mugi gɔrɔ te tɩn.
Kanzwa dɩ maa wʋ́ zʋ-ba ya ja cɔgɩ,
nɩ ya na cɔgɩ lɔŋɔ te tɩn.
Amʋ cɩga kam nan wʋ́ taa tʋŋa mʋ wuu.
A vrɩm dɩm dɩ wʋ́ taa wʋra maŋa maama wʋnɩ.»
9 Baŋa-Wɛ, zaŋɩ wɛɛnɩ!
Kɩ n tɩtɩ n kɩ daanɩ dɩ dam!
Daa n zaŋɩ n kɩ nɩ n na kɩ te faŋa faŋa
yɩ dɩ́ nabaara bam ta wʋra tɩn.
Kʋ daɩ nmʋ mʋ cɔgɩ jur-kamunub kʋlʋ yɩrɩ na yɩ Rahabɩ tɩn na?
N yɔɔrɩ n zɔ-kʋ mʋ n dɩ tɩga nɩ
yɩ n goni-kʋ mugə mugə.
10 Kʋ daɩ nmʋ dɛɛn mʋ pɛ nɩnɩʋ kʋm wʋ na bam wɩ,
pa na-luŋə kam je yɩ cwǝŋǝ pəni nɩnɩʋ kʋm wʋnɩ na?
Kʋntʋ laan ma pa balʋ n na vrɩ gabɛɛm nɩ n yagɩ tɩn
wanɩ ba bɛ ba kɛ.
11 Baŋa-Wɛ na joŋi balʋ DƖ yagɩ tɩn
wʋ́ joori ba tɩtɩ tɩʋ.
Ba nan wʋ́ taa leeni mʋ
yɩ ba maa zʋʋrɩ Siyɔn tɩʋ kʋm wʋ.
Baá taa jɩgɩ wʋpolo mʋ maŋa maama,
nɩ ba na kwe paarɩ yipwi ba pu ba yum te tɩn.
Ba ta wʋ́ di ywəəni sɩ kʋ gaalɩ.
Wʋ-cɔgɔ dɩdaanɩ ŋʋʋsa dwi maama maa wʋ́ je ba tee nɩ.
Baŋa-Wɛ maa wɩ:
12 «Amʋ tɩtɩ mʋ yǝni a pa‑m baarɩ.
Bɛŋwaanɩ nan mʋ yɩ nmʋ kwarɩ fʋʋnɩ dɩ nabiinǝ?
Sɩ bantʋ bá dáanɩ yɩ ba je,
nɩ gaarʋ na kwaarɩ yɩ tɩ tɩ te tɩn.
13 Bɛɛ mʋ yɩ n swe amʋ Baŋa-Wɛ na yɩ n kəru tɩn swiə?
Amʋ mʋ lwarɩ wɛyuu baŋa kam maama
pa ka tigi palalala.
A ma daarɩ a cwi lʋgʋ kʋm kuri.
Bɛɛ mʋ yɩ n pa fʋʋnɩ jɩgɩ-m dɛ maama wʋnɩ,
dɩ balʋ na jɩgɩ-m ba bɛɛsɩ dɩ ban-lʋm
yɩ ba yɔɔrɩ ba beeri n cɔgɩm tɩn?
Bantʋ banɩ nan zaŋɩ kafɛ mʋ.
14 Kʋ bá daanɩ dɩ kʋ na cɛ balʋ tɩn joŋi ba tɩtɩ ba yagɩ.
Ba bá maŋɩ pɩɩna digə kam wʋnɩ ba tɩ.
Ba nan bá ga ba ni-wʋdiu dɩ.
15 Amʋ nan mʋ yɩ abam Tu Baŋa-Wɛ dɩm.
A na yǝni a paɩ sɩ nɩnɩʋ yiyiŋə,
yɩ kʋ na-pɔgɩla bam caŋɩ wɛɛnɩ tɩn.
A yɩrɩ mʋ yɩ Paŋwa Tu Baŋa-Wɛ.
16 Amʋ mʋ pɛ‑m ni sɩ n ta n tʋŋɩ n pa-nɩ,
yɩ a daarɩ a səgi‑m a ja-guli wʋnɩ.
A ma lwarɩ wɛyuu kʋm a yagɩ kʋ na tigi mɛ tɩn,
yɩ a daarɩ a cwi lʋgʋ kʋm kuri dɩ.
Kʋ ta na yɩ Siyɔn tiinə bam,
a tagɩ dɩ ba a wɩ: ‹Abam yɩ amʋ nɔɔna mʋ.› »
Zeruzalɛm tiinə bam yaara wʋ́ ti
17 Zeruzalɛm tiinə bam, zaŋɩ-na!
Zaŋɩ-na dɔɔm wʋnɩ!
Abam nyɔgɩ na-zʋŋa kalʋ Baŋa-Wɛ na pɛ abam tɩn wʋnɩ mʋ,
ka na su dɩ o ban-zɔŋɔ kʋm tɩn.
Á ma nyɔ á su á ja á gaalɩ,
pa á bəri yɩ á daa warɩ sɩ á taá zɩgɩ cɛpɩ.
18 Zeruzalɛm nɔn-biə bam maama wʋnɩ
nɔɔnʋ dɩdʋa tɩtɩ tǝrǝ
sɩ o da á yigə o brɩ abam cwǝŋǝ sɩ á taá tɔga.
19 Cam kuni bɩle mʋ tu á baŋa kʋntʋ.
Jara mʋ tu á baŋa, yɩ kana dɩ ja abam,
pa á na cɔgɩm dɩ cam.
Wɔɔ mʋ wʋ́ wanɩ o pa á bɩcarɩ zuri?
20 Á biə bam maama bəri mʋ.
Ba maa tigi Zeruzalɛm cwe sɩm maama yuu nɩ.
Ba yɔɔrɩ ba nyɩ dɩ tɔgɔ kʋlʋ cɩkʋ na jaanɩ tɩn mʋ.
Baŋa-Wɛ ban-zɔŋɔ kʋm mʋ yɔɔrɩ kʋ tʋ ba baŋa nɩ.
Á Tu Wɛ dɩm ma sɩɩnɩ DƖ bwɛ-ba.
21 Nmʋ wʋlʋ na je yaara nɩ pa n bwəni n tigə,
yɩ kʋ daɩ sana mʋ n nyɔgɩ n bugi tɩn,
nan cəgi a taanɩ dɩntʋ.
22 Nmʋ Yuutu Baŋa-Wɛ nii n baŋa nɩ,
yɩ DƖ zɩgɩ DƖ nɔɔna bam kwaga nɩ.
Dɩntʋ na tagɩ dɩ DƖ nɔɔna bam te tɩn mʋ tɩntʋ:
«Nii-na! A lagɩ a lɩ na-zʋŋa kalʋ á na nyɔgɩ ka wʋnɩ
pa á bəri tɩn mʋ á niə nɩ.
Ka maa yɩ a ban-zɔŋɔ kʋm na su zʋŋa kalʋ tɩn.
A nan na lɩ-ka á niə nɩ,
abam daa bá joori á nyɔ ka wʋnɩ maŋa dɩ maŋa.
23 Amʋ laan wʋ́ kwe-ka a təni
balʋ na jɩgɩ abam ba bɛɛsɩ tɩn niə nɩ mʋ.
Bantʋ ya mʋ jɩgɩ abam ba tɛ ba wɩ:
‹Tiiri-na sɩ dɩ́ tɔgɩ abam baŋa dɩ́ kɛ tɩn!›
Á dɛɛn yəni á kɩ á təŋə nɩnɛɛnɩ tɩga mʋ tɩte á pa-ba,
abam pɛ ka ji cwəŋə mʋ, sɩ nɔɔna ta tɔgɩ dá ba kɛa.»